Jalandhar, July 17
ਭਾਰਤੀ ਰੇਲ ਵਲੋਂ ਨਵੀਂ ਟਰੇਨਾਂ ਸ਼ੁਰੂ ਕਰਨ ਮੌਕੇ ਪੰਜਾਬ ਦੇ ਜਲੰਧਰ ਪੁੱਜੇ ਪ੍ਰਧਾਨਮੰਤਰੀ ਨਰਿੰਦਰ ਮੋਦੀ ਨੇ ਪੰਜਾਬ ਦੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਉੱਤੇ ਜ਼ਬਰਦਸਤ ਨਿਸ਼ਾਨੇ ਸਾਧੇ। ਪੰਜਾਬ ਦੀ ਮੌਜੂਦਾ ਸਰਕਾਰ ਨੂੰ ਕਰੜੇ ਹੱਥੀਂ ਲੈਂਦਿਆਂ ਮੋਦੀ ਨੇ ਪੰਜਾਬ ਦੀ ਕਾਨੂੰਨ ਅਤੇ ਵਿਵਸਥਾ ਦੀ ਸਥਿਤੀ ਅਤੇ ਅੱਤ ਚੁੱਕ ਚੁਕੇ ਗੈਂਗਸਟਰਵਾਦ ਅਤੇ ਕਾਰੋਬਾਰੀਆਂ ਦੀ ਦੁਸ਼ਵਾਰੀਆਂ ਬਾਰੇ ਖੁਲ੍ਹਕੇ ਗੱਲ ਕੀਤੀ। ਮੋਦੀ ਨੇ ਕਿਹਾ ਕਿ ਪੰਜਾਬ ਚ ਕਾਰੋਬਾਰ ਕਰਨਾ ਮੁਸ਼ਕਲ ਹੋ ਚੁੱਕਾ ਹੈ ਅਤੇ ਕਾਰੋਬਾਰੀਆਂ ਤੋਂ ਫਿਰੌਤੀਆਂ ਮੰਗੀਆਂ ਜਾਣਾ ਆਮ ਹੋ ਚੁੱਕਾ ਹੈ। ਪੁਲਿਸ ਥਾਣਿਆਂ ਉੱਤੇ ਹੋ ਰਹੇ ਹਮਲਿਆਂ ਦਾ ਜ਼ਿਕਰ ਕਰਦਿਆਂ ਪ੍ਰਧਾਨਮੰਤਰੀ ਨੇ ਕਿਹਾ ਕਿ ਸੂਬੇ ਵਿਚ ਨਸ਼ੇ ਦੇ ਸੌਦਾਗਰ ਖੁੱਲ੍ਹੇ ਆਮ ਘੁੱਮ ਰਹੇ ਨੇ। ਪੰਜਾਬ ਸਰਕਾਰ ਦੀ ਖਿਚਾਈ ਕਰਦਿਆਂ ਮੋਦੀ ਨੇ ਕਿਹਾ ਕਿ ਪੰਜਾਬ ਸਰਕਾਰ ਇਸ਼ਤਿਹਾਰਾਂ ਦੇ ਜ਼ੋਰ ਉੱਤੇ ਵਿਸ਼ਵਾਸਘਾਤ ਦੀ ਤਸਵੀਰ ਲੁਕਾਉਣ ਵਿਚ ਲੱਗੀ ਹੋਈ ਹੈ ।
ਮੋਦੀ ਨੇ ਇਲਜ਼ਾਮ ਲਾਇਆ ਕਿ ਪੰਜਾਬ ਦੀ ਮੌਜੂਦਾ ਸਰਕਾਰ ਦੌਰਾਨ ਖੁੱਲ੍ਹ ਕੇ ਲੁੱਟ ਚੱਲ ਰਹੀ ਹੈ ਅਤੇ ਸੂਬੇ ਦੀ ਹੁਕਮਰਾਨ ਧਿਰ ਕਰਜ਼ੇ ਲੈਕੇ ਮੌਜ ਕਰ ਰਹੀ ਹੈ। ਆਮ ਆਦਮੀ ਪਾਰਟੀ ਦੇ ਇਕ ਆਗੂ ਨੂੰ ਦਿੱਲੀ ਦੀ ਅਦਾਲਤ ਵਲੋਂ ਇਕ Intelligence Bureau ਅਫਸਰ ਦੇ ਕਤਲ ਅਤੇ ਦੰਗੇ ਭੜਕਾਉਣ ਦੇ ਮਾਮਲੇ ਦਾ ਜ਼ਿਕਰ ਕਰਦਿਆਂ ਮੋਦੀ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੇ ਦਾਗੀ ਲੀਡਰ ਲਗਾਤਾਰ ਬੇਨਕਾਬ ਹੋ ਰਹੇ ਨੇ।
ਮੋਦੀ ਨੇ ਆਮ ਆਦਮੀ ਸਰਕਾਰ ਉੱਤੇ ਕੇਂਦਰੀ ਗਰਾਂਟਾਂ ਦੀ ਦੁਰਵਤੋਂ ਕਰਨ ਅਤੇ ਕੇਂਦਰੀ ਲੋਕ ਭਲਾਈ ਸਕੀਮਾਂ ਉੱਤੇ ਆਪਣੇ ਠੱਪੇ ਲਾਕੇ ਲੋਕਾਂ ਵਿਚ ਵਾਹ ਵਾਹੀ ਲੁੱਟਣ ਦੀਆਂ ਕੋਸ਼ਿਸ਼ਾਂ ਕਰਨ ਦਾ ਵੀ ਦੋਸ਼ ਲਾਇਆ। ਮੋਦੀ ਨੇ ਪੰਜਾਬ ਵਿੱਚ ਗੁਆਂਢੀ ਰਾਜ ਹਰਿਆਣਾ ਅਤੇ ਦਿੱਲੀ ਵਾਂਗ BJP ਦੀ ਡਬਲ ਇੰਜਨ ਸਰਕਾਰ ਲਿਆਉਣ ਦੀ ਅਪੀਲ ਕੀਤੀ। ਸੂਬੇ ਦੀ ਮੁੱਖ ਵਿਰੋਧੀ ਧਿਰ ਕਾਂਗਰਸ ਵਿਚ ਪ੍ਰਧਾਨਗੀ ਅਹੁਦੇ ਨੂੰ ਲੈਕੇ ਹੋ ਰਹੀ ਖਿੱਚੋਤਾਣ ਵਲ ਇਸ਼ਾਰਾ ਕਰਦਿਆਂ ਮੋਦੀ ਨੇ BJP ਨੂੰ ਹੀ ਪੰਜਾਬ ਲਈ ਇਕ ਸਹੀ ਬਦਲ ਦੱਸਿਆ। ਅਕਾਲੀ ਦਲ ਲੀਡਰਸ਼ਿਪ ਨੂੰ ਵੀ ਮੋਦੀ ਨੇ ਆਪਣੀਆਂ ਉਲਝਣਾਂ ਵਿਚ ਘਿਰੀ ਹੋਈ ਧਿਰ ਕਹਿ ਕੇ ਸੰਬੋਧਨ ਕੀਤਾ।
