ਪੰਜਾਬ ਪੁਲਿਸ ਇੱਕ ਵਾਰ ਫਿਰ ਵੱਡੇ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਕਾਰਨ ਘੇਰੇ ਵਿੱਚ ਆ ਗਈ ਹੈ। ਯੂ.ਕੇ. ਨਾਗਰਿਕ ਜਗਤਾਰ ਸਿੰਘ ਜੱਗੀ ਜੌਹਲ ਦੇ ਵਕੀਲ, ਐਡਵੋਕੇਟ ਜਸਪਾਲ ਸਿੰਘ ਮੰਝਪੁਰ ਨੇ ਦਾਅਵਾ ਕੀਤਾ ਹੈ ਕਿ ਜੱਗੀ ਦੀ ਗ੍ਰਿਫ਼ਤਾਰੀ ਸਮੇਂ ਜ਼ਬਤ ਕੀਤੀ ਗਈ 10 ਤੋਲੇ ਸੋਨੇ ਦੀ ਚੇਨ, ਅੱਧੇ ਤੋਲੇ ਦੀ ਸੋਨੇ ਦੀ ਮੁੰਦਰੀ ਅਤੇ 5000 ਰੁਪਏ ਨਕਦ ਪੁਲਿਸ ਨੇ ਖੁਰਦ-ਬੁਰਦ ਕਰ ਦਿੱਤੇ ਹਨ।
ਵਕੀਲ ਨੇ ਇਸ ਮਾਮਲੇ ਵਿੱਚ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਸਮੇਤ ਉਸ ਸਮੇਂ ਦੇ ਡੀ.ਜੀ.ਪੀ. ਅਤੇ ਕਈ ਵੱਡੇ ਅਧਿਕਾਰੀਆਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ।
ਜਗਤਾਰ ਸਿੰਘ ਜੱਗੀ ਜੌਹਲ ਇੱਕ ਬ੍ਰਿਟਿਸ਼ ਨਾਗਰਿਕ ਹੈ, ਜਿਸ ਨੂੰ 4 ਨਵੰਬਰ 2017 ਨੂੰ ਪੰਜਾਬ ਪੁਲਿਸ ਨੇ ਗ੍ਰਿਫ਼ਤਾਰ ਕੀਤਾ ਸੀ। ਉਸ ‘ਤੇ ਟਾਰਗੇਟ ਕਿਲਿੰਗਜ਼ ਨਾਲ ਸਬੰਧਤ ਕਈ ਕੇਸਾਂ ਤਹਿਤ ਆਰਮਜ਼ ਐਕਟ ਅਤੇ ਯੂ.ਏ.ਪੀ.ਏ. ਵਰਗੀਆਂ ਸੰਗੀਨ ਧਾਰਾਵਾਂ ਲਗਾਈਆਂ ਗਈਆਂ ਸਨ।
ਹਾਲਾਂਕਿ, ਜੱਗੀ ਜੌਹਲ ਨੂੰ 4 ਮਾਰਚ 2025 ਨੂੰ ਅਡੀਸ਼ਨਲ ਸੈਸ਼ਨ ਜੱਜ, ਮੋਗਾ ਦੀ ਅਦਾਲਤ ਵੱਲੋਂ ਇਸ ਕੇਸ ਵਿੱਚੋਂ ਬਰੀ ਕਰ ਦਿੱਤਾ ਗਿਆ ਸੀ। ਇਸ ਬਰੀ ਹੋਣ ਤੋਂ ਬਾਅਦ ਜੱਗੀ ਦੇ ਵਕੀਲ ਨੇ ਜ਼ਬਤ ਕੀਤੀਆਂ ਵਸਤੂਆਂ (ਜਾਮਾ ਤਲਾਸ਼ੀ ਆਰਟੀਕਲ) ਵਾਪਸ ਲੈਣ ਲਈ ਅਦਾਲਤ ਵਿੱਚ ਅਰਜ਼ੀ ਦਿੱਤੀ ਸੀ, ਜਿੱਥੋਂ ਇਹ ਸਾਰਾ ਮਾਮਲਾ ਸਾਹਮਣੇ ਆਇਆ।
ਐਡਵੋਕੇਟ ਜਸਪਾਲ ਸਿੰਘ ਮੰਝਪੁਰ ਨੇ ਅਦਾਲਤ ਵਿੱਚ ਦੱਸਿਆ ਕਿ ਜੱਗੀ ਦੀ ਗ੍ਰਿਫ਼ਤਾਰੀ ਸਮੇਂ ਡੀ.ਐੱਸ.ਪੀ. ਬਲਵਿੰਦਰ ਸਿੰਘ ਨੇ ਜਮਾਂ ਤਲਾਸ਼ੀ ਮੀਮੋ ਬਣਾਇਆ ਸੀ, ਜਿਸ ਵਿੱਚ 10 ਤੋਲੇ ਸੋਨੇ ਦੀ ਚੇਨ , ਅੱਧੇ ਤੋਲੇ ਦੀ ਵਿਆਹ ਵਾਲੀ ਮੁੰਦਰੀ ਅਤੇ 5000 ਰੁਪਏ ਨਕਦ ਜ਼ਬਤ ਕੀਤੇ ਗਏ ਸਨ। ਪੁਲਿਸ ਨੇ ਅਦਾਲਤ ਨੂੰ ਦੱਸਿਆ ਕਿ ਇਹ ਆਰਟੀਕਲ ਲੱਭ ਨਹੀਂ ਰਹੇ ਹਨ, ਸਿਰਫ਼ ਮੋਬਾਈਲ ਫ਼ੋਨ ਹੀ ਬਰਾਮਦ ਹੋਇਆ ਹੈ।
ਐਡਵੋਕੇਟ ਮੰਝਪੁਰ ਨੇ ਇਸ ਘਟਨਾ ਨੂੰ ਸ਼ਰਮਨਾਕ ਦੱਸਦੇ ਹੋਏ ਪੰਜਾਬ ਪੁਲਿਸ ਨੂੰ ‘ਚੈਨੀ ਚੋਰ’ ਕਿਹਾ ਅਤੇ ਸਿੱਧੇ ਤੌਰ ‘ਤੇ ਉਸ ਸਮੇਂ ਦੀ ਸਰਕਾਰ ਅਤੇ ਉੱਚ ਅਧਿਕਾਰੀਆਂ ‘ਤੇ ਦੋਸ਼ ਲਾਏ
ਵਕੀਲ ਨੇ ਕਿਹਾ: “ਮੈਂ ਜਿੰਮੇਵਾਰ ਸਮਝਦਾ ਕੈਪਟਨ ਅਮਰਿੰਦਰ ਸਿੰਘ, ਸੁਰੇਸ਼ ਅਰੋੜਾ (ਡੀ.ਜੀ.ਪੀ.), ਦਿਨਕਰ ਗੁਪਤਾ, ਰਾਜੀਤ ਹੁੰਦਲ (ਤਤਕਾਲੀ ਐਸ.ਐਸ.ਪੀ. ਮੋਗਾ) ਅਤੇ ਜੰਗਜੀਤ, ਡੀ.ਐੱਸ.ਪੀ. ਬਲਵਿੰਦਰ, ਤੇ ਏ.ਐੱਸ.ਆਈ. ਜਸਪਾਲ ਸਿੰਘ ਨੂੰ। ਇਹਨਾਂ ਨੇ ਰਲ ਮਿਲ ਕੇ ਇਹ ਖੁਰਦ-ਬੁਰਦਗੀ ਕੀਤੀ ਹੈ।”
ਵਕੀਲ ਮੰਝਪੁਰ ਨੇ ਕਿਹਾ ਕਿ ਜੱਗੀ ਜੌਹਲ ਦੀ ਚੇਨ ਤੇ ਮੁੰਦਰੀ, ਉਸ ਦੀ ਮਾਂ ਅਤੇ ਵਿਆਹ ਦੀ ਯਾਦਗਾਰ ਹੈ।
ਮੰਝਪੁਰ ਨੇ ਕਿਹਾ “ਅਸੀਂ ਇਸ ਕੇਸ ਨੂੰ ਫੋਲੋ ਕਰਾਂਗੇ। ਇਹਨਾਂ ਸਾਰਿਆਂ ਨੂੰ ਪਾਰਟੀ ਬਣਾਵਾਂਗੇ ਅਤੇ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਦੇ ਵਿੱਚ ਖਿੱਚਾਂਗੇ। ਮੁੱਖ ਮੰਤਰੀ ਤੋਂ ਲੈ ਕੇ ਡੀ.ਐੱਸ.ਪੀ. ਤੇ ਐੱਸ.ਐੱਚ.ਓ. ਤੱਕ, ਜਗਤਾਰ ਸਿੰਘ ਜੱਗੀ ਜੌਹਲ ਦੀ ਚੇਨ ਚੋਰੀ ਕਰਨ ਵਾਲੇ ਇਹਨਾਂ ਸਾਰਿਆਂ ਉੱਤੇ ਪਰਚਾ ਦਰਜ ਹੋਣਾ ਚਾਹੀਦਾ ਹੈ ਅਤੇ ਕਾਰਵਾਈ ਹੋਣੀ ਚਾਹੀਦੀ ਹੈ।”
