ਜਲੰਧਰ, 11 ਦਸੰਬਰ (Newsdateline desk):ED ਨੇ ਜਲੰਧਰ ਨੇ ਇੱਕ ਫਾਰਮਾਸਿਊਟੀਕਲ ਕਾਰੋਬਾਰੀ ਨੂੰ ਨਸ਼ੀਲੀਆਂ ਗੋਲੀਆਂ (Psychotropic Tablets) ਦੀ ਨਾਜਾਇਜ਼ ਵਿਕਰੀ ਰਾਹੀਂ ਲਗਭਗ ₹3.75 ਕਰੋੜ ਦੀ ਅਪਰਾਧਕ ਕਮਾਈ ਇਕੱਠੀ ਕਰਨ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਹੈ।
ਦੋਸ਼ੀ ਦੀ ਪਛਾਣ ਅਭਿਸ਼ੇਕ ਕੁਮਾਰ ਵਜੋਂ ਹੋਈ ਹੈ, ਜਿਸ ਨੂੰ ਮਨੀ ਲਾਂਡਰਿੰਗ ਰੋਕੂ ਕਾਨੂੰਨ (PMLA) ਦੀਆਂ ਧਾਰਾਵਾਂ ਤਹਿਤ ਕਾਬੂ ਕੀਤਾ ਗਿਆ ਹੈ। ਮੁਲਜ਼ਮ ਨੂੰ ਮੋਹਾਲੀ ਦੀ ਵਿਸ਼ੇਸ਼ PMLA ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੋਂ ਉਸ ਨੂੰ ਛੇ ਦਿਨਾਂ ਦੇ ED ਰਿਮਾਂਡ ‘ਤੇ ਭੇਜ ਦਿੱਤਾ ਗਿਆ ਹੈ।
ED ਨੇ ਇਹ ਜਾਂਚ ਪੰਜਾਬ ਪੁਲਿਸ ਵੱਲੋਂ ਦਰਜ ਕੀਤੀ ਗਈ ਇੱਕ FIR ਦੇ ਆਧਾਰ ‘ਤੇ ਸ਼ੁਰੂ ਕੀਤੀ ਸੀ। ਇਹ FIR NDPS ਐਕਟ ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਟਰਾਮਾਡੋਲ ਅਤੇ ਅਲਪਰਾਜ਼ੋਲਮ ਵਰਗੀਆਂ ਨਸ਼ੀਲੀਆਂ ਗੋਲੀਆਂ ਦੀ ਵੱਡੇ ਪੱਧਰ ‘ਤੇ ਅੰਤਰ-ਰਾਜੀ ਤਸਕਰੀ ਨਾਲ ਸਬੰਧਤ ਸੀ। ਇਸ ਸਾਲ ਜੂਨ ਵਿੱਚ ਅਭਿਸ਼ੇਕ ਕੁਮਾਰ ਨਾਲ ਜੁੜੇ 16 ਟਿਕਾਣਿਆਂ ‘ਤੇ ਛਾਪੇਮਾਰੀ ਕੀਤੀ ਗਈ ਸੀ, ਜਿੱਥੋਂ ਕਈ ਅਹਿਮ ਦਸਤਾਵੇਜ਼ ਜ਼ਬਤ ਕੀਤੇ ਗਏ ਸਨ।
ED ਦੇ ਬੁਲਾਰੇ ਨੇ ਦੱਸਿਆ ਕਿ ਜਾਂਚ ਵਿੱਚ ਖੁਲਾਸਾ ਹੋਇਆ ਹੈ ਕਿ ਵਿਚੋਲੇ (ਥੋਕ ਵਿਕਰੇਤਾ ਅਤੇ ਪ੍ਰਚੂਨ ਵਿਕਰੇਤਾ) ਕਈ ਫਾਰਮਾ ਕੰਪਨੀਆਂ ਤੋਂ ਵੱਡੀ ਮਾਤਰਾ ਵਿੱਚ ਨਸ਼ੀਲੀਆਂ ਗੋਲੀਆਂ ਖਰੀਦਦੇ ਸਨ ਅਤੇ ਫਿਰ ਉਨ੍ਹਾਂ ਨੂੰ Retail Price ਤੋਂ ਵੱਧ ਕੀਮਤ ‘ਤੇ ਡਰੱਗ ਪੈਡਲਰਾਂ ਰਾਹੀਂ ਕਾਲੇ ਬਾਜ਼ਾਰ ਵਿੱਚ ਵੇਚ ਦਿੰਦੇ ਸਨ, ਜਿਸ ਨਾਲ ਵੱਡੀ ਕਮਾਈ ਹੁੰਦੀ ਸੀ।
ਅਭਿਸ਼ੇਕ ਕੁਮਾਰ ਨੇ ਆਪਣੀ ਫਰਮ, ਮੈਸਰਜ਼ ਸ੍ਰੀ ਸ਼ਿਆਮ ਮੈਡੀਕਲ ਏਜੰਸੀ ਰਾਹੀਂ, ਥੋਕ ਵਿਕਰੇਤਾਵਾਂ/ਨਿਰਮਾਤਾਵਾਂ ਤੋਂ ਨਸ਼ੀਲੀਆਂ ਗੋਲੀਆਂ ਦੀ ਵੱਡੀ ਮਾਤਰਾ ਖਰੀਦੀ ਅਤੇ ਸਟਾਕ ਦਾ ਲਗਭਗ 75% ਹਿੱਸਾ ਗੈਰ-ਕਾਨੂੰਨੀ ਢੰਗ ਨਾਲ ਵੇਚ ਦਿੱਤਾ।
ED ਬੁਲਾਰੇ ਨੇ ਦੱਸਿਆ, “ਇਨ੍ਹਾਂ ਨਾਜਾਇਜ਼ ਲੈਣ-ਦੇਣ ਨੂੰ ਛੁਪਾਉਣ ਲਈ, ਕਾਰੋਬਾਰੀ ਕਾਨੂੰਨੀ ਬਿੱਲਾਂ ਵਿੱਚ ਬਕਸਿਆਂ ਦੀ ਗਿਣਤੀ ਵਧਾ ਕੇ ਦਿਖਾਉਂਦਾ ਸੀ, ਜਿਸ ਨਾਲ ₹3.75 ਕਰੋੜ ਦੀ ਕਮਾਈ ਨਕਦ ਵਿੱਚ ਕੀਤੀ ਗਈ।”
