ਪੰਜਾਬ ਅਤੇ ਕੈਨੇਡਾ ਵਿੱਚ ਅਪਰਾਧਿਕ ਗਤੀਵਿਧੀਆਂ ਨੂੰ ਅੰਜਾਮ ਦੇਣ ਵਾਲੇ ਲਾਰੈਂਸ ਬਿਸ਼ਨੋਈ ਗੈਂਗ ਨਾਲ ਜੁੜੇ ਗੈਂਗਸਟਰ ਸਾਬਾ ਗੋਬਿੰਦਗੜ੍ਹ ਨੇ ਵਿਦੇਸ਼ ਤੋਂ ਇੱਕ ਆਡੀਓ ਨੋਟ ਜਾਰੀ ਕਰਕੇ ਗੈਂਗਸਟਰ ਗੋਲਡੀ ਬਰਾੜ ਨੂੰ ਨਾ ਸਿਰਫ਼ ਗੱਦਾਰ ਦੱਸਿਆ ਹੈ, ਬਲਕਿ ਉਸ ‘ਤੇ ਕਈ ਗੰਭੀਰ ਇਲਜ਼ਾਮ ਲਗਾਉਂਦਿਆਂ ਖੁੱਲ੍ਹੀ ਧਮਕੀ ਵੀ ਦਿੱਤੀ ਹੈ।
ਇਹ ਉਹੀ ਸਾਬਾ ਗੋਬਿੰਦਗੜ੍ਹ ਹੈ ਜਿਸ ਨੇ ਪਿਛਲੇ ਸਾਲ ਦੱਖਣੀ ਅਮਰੀਕਾ ਵਿੱਚ ਸਿਰ ਵੱਢ ਕੇ ਕੀਤੇ ਗਏ ਅਜੈ ਰਾਣਾ ਨਾਂਅ ਦੇ ਵਿਅਕਤੀ ਦੇ ਕਤਲ ਦੀ ਜ਼ਿੰਮੇਵਾਰੀ ਕਬੂਲੀ ਸੀ।
ਸਾਬਾ ਗੋਬਿੰਦਗੜ੍ਹ ਨੇ ਆਪਣੇ ਵੌਇਸ ਨੋਟ ਵਿੱਚ ਗੋਲਡੀ ਬਰਾੜ ਨੂੰ ਸਿੱਧੇ ਤੌਰ ‘ਤੇ ਨਿਸ਼ਾਨਾ ਬਣਾਇਆ ਅਤੇ ਕਈ ਵੱਡੇ ਖੁਲਾਸੇ ਕੀਤੇ। ਸਾਬਾ ਨੇ ਸਿੱਧੇ ਤੌਰ ‘ਤੇ ਕਿਹਾ ਕਿ ਗੋਲਡੀ ਬਰਾੜ ਗੱਦਾਰ ਹੈ। ਉਸ ਨੇ ਦੱਸਿਆ ਕਿ ਗੁਰਲਾਲ ਬਰਾੜ ਦੇ ਕਤਲ ਤੋਂ ਬਾਅਦ ਗੋਲਡੀ ਨੂੰ 9 ਪਿਸਤੌਲਾਂ ਅਤੇ 300 ਗੋਲੀਆਂ ਲਾਰੈਂਸ ਬਿਸ਼ਨੋਈ ਨੇ ਉਸਦੇ ਹੱਥੋਂ ਚੁਕਵਾਈਆਂ ਸਨ।
ਸਾਬਾ ਨੇ ਦਾਅਵਾ ਕੀਤਾ ਕਿ ਸਿੱਧੂ ਮੂਸੇਵਾਲਾ ਕਤਲ ਦੀ ਵਾਰਦਾਤ ਲਈ ਵਰਤੀ ਗਈ ਏ.ਕੇ. 47 ਅਸਾਲਟ ਰਾਈਫਲ ਉਸ ਨੇ ਅਤੇ ਲਾਰੈਂਸ ਬਿਸ਼ਨੋਈ ਨੇ ਫਿਰੌਤੀਆਂ ਮੰਗ ਕੇ ਪੈਸੇ ਇਕੱਠੇ ਕਰਕੇ ਗੋਲਡੀ ਬਰਾੜ ਨੂੰ ਮੁਹੱਈਆ ਕਰਵਾਈ ਸੀ। ਸਾਬਾ ਨੇ ਦੋਸ਼ ਲਾਇਆ ਕਿ ਗੋਲਡੀ ਨੇ ਜਾਣਬੁੱਝ ਕੇ ਉਸਦੀ ਅਤੇ ਲਾਰੈਂਸ ਬਿਸ਼ਨੋਈ ਦੀ ਆਪਸ ਵਿੱਚ ਲੜਾਈ ਕਰਵਾਈ। ਉਸ ਨੇ ਗੋਲਡੀ ਬਰਾੜ ਨੂੰ ‘ਡੰਡੇ-ਸੋਟਿਆਂ ਆਲਾ’ ਕਹਿੰਦਿਆਂ ਕਿਹਾ ਕਿ ਇੰਪੋਰਟੇਡ ਹਥਿਆਰ ਲਾਰੈਂਸ ਬਿਸ਼ਨੋਈ ਨੇ ਉਸਦੇ ਹੱਥਾਂ ਵਿੱਚ ਫੜਵਾਏ ਸਨ।
ਸਾਬਾ ਨੇ ਦਾਅਵਾ ਕੀਤਾ ਕਿ ਮਾਨ ਜੈਤੋ ਦਾ ਕਤਲ ਉਨ੍ਹਾਂ ਨੇ ਆਪਣੇ ਜ਼ੋਰ ‘ਤੇ ਕਰਵਾਇਆ ਸੀ। ਨਾਲ ਹੀ, ਉਸਨੇ ਗੋਲਡੀ ‘ਤੇ ਇਲਜ਼ਾਮ ਲਗਾਇਆ ਕਿ ਪੈਰੀ ਦਾ ਕਤਲ ਉਸਦੀ ਵਜ੍ਹਾ ਕਰਕੇ ਹੋਇਆ। ਸਾਬਾ ਨੇ ਗੋਲਡੀ ਬਰਾੜ ‘ਤੇ 25-30 ਕਰੋੜ ਰੁਪਇਆ ਲੈ ਕੇ ਭੱਜ ਜਾਣ ਦਾ ਵੀ ਦੋਸ਼ ਲਾਇਆ।
ਆਡੀਓ ਨੋਟ ਵਿੱਚ ਸਾਬਾ ਨੇ ਗੋਲਡੀ ਬਰਾੜ ਨੂੰ ਚੇਤਾਵਨੀ ਦਿੰਦਿਆਂ ਕਿਹਾ, “ਤੇਰੇ ਵਰਗੇ ਜੇ ਬਦਮਾਸ਼ ਬਣਾ ਸਕਦੇ ਹਾਂ ਤਾਂ ਥੱਲੇ ਵੀ ਲਾਹ ਸਕਦੇ ਹਾਂ।… 3600 ਗੋਲਡੀ ਬਰਾੜ ਬਣਾ ਸਕਦੇ ਹਾਂ।”
