ਪਟਿਆਲਾ: ਪਟਿਆਲਾ ਦੇ SSPਵਰੁਣ ਸ਼ਰਮਾ ਨੂੰ ਇੱਕ ਹਫ਼ਤੇ ਦੀ ਛੁੱਟੀ ‘ਤੇ ਭੇਜ ਦਿੱਤਾ ਗਿਆ ਹੈ। ਇਹ ਫੈਸਲਾ ਉਸ ਸਮੇਂ ਆਇਆ ਹੈ ਜਦੋਂ ਉਹ ਇੱਕ ਵਾਇਰਲ ਆਡੀਓ ਮਾਮਲੇ ਅਤੇ ਵਿਧਾਨ ਸਭਾ ਉਪ-ਚੋਣਾਂ ਵਿੱਚ ਸੱਤਾਧਿਰ ਪਾਰਟੀ ਦੀ ਕਥਿਤ ਮਦਦ ਕਰਨ ਦੇ ਆਰੋਪਾਂ ਕਾਰਨ ਵਿਵਾਦਾਂ ਵਿੱਚ ਘਿਰੇ ਹੋਏ ਸਨ। ਅਕਾਲੀ ਦਲ ਨੇ ਸ਼ਰਮਾ ‘ਤੇ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਸੀ, ਖਾਸ ਤੌਰ ‘ਤੇ ਡੀ.ਐਸ.ਪੀ. ਨਾਲ ਹੋਈ ਕਥਿਤ ਕਾਨਫਰੰਸ ਕਾਲ ਦੀ ਆਡੀਓ ਵਾਇਰਲ ਹੋਣ ਤੋਂ ਬਾਅਦ।
ਜ਼ਿਕਰਯੋਗ ਹੈ ਕਿ SSP ਵਰੁਣ ਸ਼ਰਮਾ ਨੇ ਆਪਣੇ ਪਰਿਵਾਰਕ ਰੁਝੇਵਿਆਂ ਕਾਰਨ ਇੱਕ ਹਫ਼ਤੇ ਦੀ ਛੁੱਟੀ ਦੀ ਮੰਗ ਕੀਤੀ ਸੀ। ਸੂਬੇ ਦੇ ਡੀ.ਜੀ.ਪੀ. ਗੌਰਵ ਯਾਦਵ ਨੇ ਬੀਤੇ ਕੱਲ੍ਹ ਸ਼ਾਮੀਂ ਰਾਜ ਚੋਣ ਕਮਿਸ਼ਨ ਨੂੰ ਇਸ ਫੈਸਲੇ ਬਾਰੇ ਸੂਚਿਤ ਕੀਤਾ ਅਤੇ ਦੱਸਿਆ ਕਿ ਛੁੱਟੀ ਨੂੰ ਪ੍ਰਵਾਨਗੀ ਦੇ ਦਿੱਤੀ ਗਈ ਹੈ। ਭਾਵੇਂ ਪ੍ਰਸ਼ਾਸਨ ਇਸ ਨੂੰ ਰੁਟੀਨ ਪ੍ਰਬੰਧ ਦੱਸ ਰਿਹਾ ਹੈ, ਪਰ ਰਾਜਨੀਤਿਕ ਹਲਕਿਆਂ ਵਿੱਚ ਇਸ ਕਦਮ ਨੂੰ ਆਰੋਪਾਂ ਦੇ ਦਬਾਅ ਹੇਠ ਲਿਆ ਗਿਆ ਫੈਸਲਾ ਮੰਨਿਆ ਜਾ ਰਿਹਾ ਹੈ।
ਵਰੁਣ ਸ਼ਰਮਾ ਦੇ ਛੁੱਟੀ ‘ਤੇ ਜਾਣ ਤੋਂ ਬਾਅਦ, ਪਟਿਆਲਾ ਜ਼ਿਲ੍ਹੇ ਦਾ ਕਾਰਜਭਾਰ ਹੁਣ ਐਸ.ਐਸ.ਪੀ. ਸੰਗਰੂਰ, ਸਰਤਾਜ ਚਹਿਲ ਨੂੰ ਸੌਂਪਿਆ ਗਿਆ ਹੈ। ਉਹ ਅਗਲੇ ਇੱਕ ਹਫ਼ਤੇ ਲਈ ਪਟਿਆਲਾ ਦਾ ਵਾਧੂ ਕੰਮ ਵੀ ਵੇਖਣਗੇ। ਚੋਣ ਜ਼ਾਬਤੇ ਦੇ ਚੱਲਦਿਆਂ, ਸੁਰੱਖਿਆ ਅਤੇ ਪ੍ਰਸ਼ਾਸਨਿਕ ਪ੍ਰਬੰਧਾਂ ਨੂੰ ਯਕੀਨੀ ਬਣਾਉਣ ਲਈ ਇਹ ਨਿਯੁਕਤੀ ਮਹੱਤਵਪੂਰਨ ਹੈ।
