ਨਵੀਂ ਦਿੱਲੀ, June 17
ਸਾਬਕਾ ਰਾਜ ਸਭਾ MP ਸਰਦਾਰ ਤਰਲੋਚਨ ਸਿੰਘ ਨੇ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਜਥੇਦਾਰ ਵਲੋਂ ਪੰਜਾਬ ਦੇ ਵਿਧਾਇਕਾਂ ਅਤੇ ਵਜ਼ੀਰਾਂ ਨੂੰ ਤਖ਼ਤ ਸਾਹਿਬ ਵਿਖੇ ਬੁਲਾਉਣ ਦੇ ਫੈਸਲੇ ਦੇ ਮਾਮਲੇ ਚ ਇਕ ਚਿੱਠੀ ਲਿਖਦਿਆਂ ਇਸ ਮਾਮਲੇ ਉੱਤੇ ਚਿੰਤਾ ਜ਼ਾਹਿਰ ਕੀਤੀ ਹੈ। ਸਰਦਾਰ ਤਰਲੋਚਨ ਸਿੰਘ ਨੇ ਖ਼ਦਸ਼ਾ ਜ਼ਾਹਿਰ ਕੀਤਾ ਹੈ ਕਿ ਅਜਿਹੀ ਰਿਵਾਇਤ ਕਾਰਨ ਗ਼ਲਤ ਸੁਨੇਹਾ ਲੋਕਾਂ ਅਤੇ ਪੰਥਿਕ ਹਲਕਿਆਂ ਵਿਚ ਜਾਉਣ ਦਾ ਡਰ ਹੈ।
ਸਰਦਾਰ ਤਰਲੋਚਨ ਸਿੰਘ ਦੀ ਵਲੋਂ ਲਿੱਖੀ ਚਿੱਠੀ :
ਜਥੇਦਾਰ ਗਿਆਨੀ ਕੁਲਦੀਪ ਸਿੰਘ ਗੜਗੱਜ
ਅਕਾਲ ਤਖ਼ਤ, ਅੰਮ੍ਰਿਤਸਰ
ਸਿੰਘ ਸਾਹਿਬ ਜੀ,
ਅਕਾਲ ਤਖ਼ਤ ਸਾਹਿਬ ਦੀ ਸਰਵਊਚਤਾ ਅਤੇ ਸਿੱਖ ਕੌਮ ਦੀ ਸਭ ਤੋਂ ਵਡੀ ਸੰਸਥਾ ਨੂੰ ਹਰ ਸਿੱਖ ਬੜੀ ਸ਼ਰਧਾ ਨਾਲ ਮਾਨਤਾ ਦਿੰਦਾ ਹੈ। ਅਕਾਲ ਤਖ਼ਤ ਤੋਂ ਸਿੱਖ ਕੌਮ ਦੀ ਭਲਾਈ ਲਈ ਸਦੀਆਂ ਤੋਂ ਫੈਸਲੇ ਲਏ ਜਾਂਦੇ ਹਨ।
ਕਲ ਜੋ ਫੈਸਲਾ ਅਕਾਲ ਤਖ਼ਤ ਤੇ ਪੰਜੇ ਸਿੰਘ ਸਾਹਿਬਾਨ ਨੇ ਲਿਆ ਹੈ ਉਸ ਬਾਰੇ ਮੀਡਿਆ ਤੇ ਬੜੀ ਚਰਚਾ ਚਲ ਰਹੀ ਹੈ। ਕਰੀਬਨ ਹਰ ਇੰਟਰਨੇਂਟ ਚੈਨਲ ਤੇ ਇਸ ਬਾਰੇ ਬੜੇ ਵਿਦਵਾਨਾਂ ਦੇ ਬਿਆਨ ਵੀ ਮੈਂ ਸੁਣੇ ਹਨ। ਮੈਂ ਆਪਣੀ ਵਡੀ ਉਮਰ ਹੌਣ ਕਰਕੇ ਬੜੇ ਚਿਰ ਤੋਂ ਬੜੀਆਂ ਇਤਿਹਾਸਿਕ ਘਟਨਾਵਾਂ ਤੋਂ ਜਾਣੂ ਹਾਂ। ਮੈਂ ਪਾਕਿਸਤਾਨ ਚੋਂ ਆਏ ਰਿਫੂਜੀਆਂ ਵਿੱਚ ਸ਼ਾਮਿਲ ਹਾਂ। ਮੈਂ ਇਸ ਗਲ ਦਾ ਧਾਰਨੀ ਹਾਂ ਕਿ ਆਨੰਦਪੁਰ ਦਾ ਮਤਾ ਸਾਡੇ ਲਈ ਇਕ ਖਤਰੇ ਦੀ ਘੰਟੀ ਬਣਿਆ ਸੀ। ਸਾਰੇ ਭਾਰਤ ਵਿੱਚ ਇਸ ਦਾ ਅਰਥ ਇਹ ਕਢਿਆ ਗਿਆ ਕਿ ਅਸੀ ਵਖਵਾਦ ਦੇ ਹਾਮੀ ਹਾਂ। ਅਕਾਲੀ ਪਾਰਟੀ ਇਸ ਦੇ ਹੱਕ ਵਿੱਚ ਕੋਈ ਪ੍ਰਚਾਰ ਨਾ ਕਰ ਸਕੀ। ਅਖੀਰ ਵਿੱਚ ਧਰਮ ਯੂਧ ਮੋਰਚਾ ਤੇ ਨਿੰਦਨੀਆਂ ਬਲੂ ਸਟਾਰ ਇਸ ਦੀ ਉਪਜ ਸਨ। ਇਸ ਬਾਰੇ ਹੁਣ ਕਈ ਕਿਤਾਬਾਂ ਲਿਖੀਆਂ ਜਾ ਰਹੀਆਂ ਹਨ। ਮੈਂਨੂੰ ਡਰ ਹੈ ਕਿ 15 ਜੂਨ ਨੂੰ ਜੋ ਹੁਕਨਾਮਾ ਪੰਜਾਬ ਅਸੈਂਬਲੀ ਦੇ ਐਮ.ਅੇਲ.ਏ. ਬਾਰੇ ਦਿੱਤਾ ਗਿਆ ਹੈ ਉਸ ਦੀ ਚਰਚਾ ਅਜੀਬ ਰੰਗਤ ਲੈ ਰਹੀ ਹੈ। ਇਹ ਪਹਿਲੀ ਵਾਰ ਹੈ ਕਿ ਭਾਰਤ ਦੇਸ਼ ਵਿੱਚ ਪਾਰਲੀਮੈਂਟ ਜਾ ਕਿਸੇ ਅਸੈਂਬਲੀ ਦੇ ਹੋਏ ਫੈਸਲੇ ਕਾਰਨ ਸਾਰੇ ਐਮ.ਅੇਲ.ਏ. ਨੂੰ ਕਿਸੇ ਹੋਰ ਅਥਾਰਟੀ ਨੇ ਸੰਮਨ ਕੀਤਾ ਹੋਵੇ। ਆਮ ਕਰਕੇ ਇਹ ਕਿਹਾ ਜਾ ਰਿਹਾ ਹੈ ਕਿ ਇਹ ਸਟੇਟ ਅੰਦਰ ਸਟੇਟ ਦੀ ਥਿਊਰੀ ਬਣ ਗਈ ਹੈ। ਜਦੋਂ ਇਹ ਬਿਲ ਅਸੇਂਬਲੀ ਵਿੱਚ ਪੇਸ਼ ਹੋਇਆ ਸੀ ਤਾਂ ਸਿੱਖ ਜੱਜਾਂ ਨੇ ਤੇ ਮੈਂ ਵੀ ਇਸ ਦਾ ਵਿਰੋਧ ਕੀਤਾ ਸੀ ਕਿ ਗੁਰੂ ਗੰ੍ਰਥ ਸਾਹਿਬ ਬਾਰੇ ਕੋਈ ਕਾਨੂੰਨ ਨਹੀ ਬਣਾ ਸਕਦਾ। ਉਸ ਸਮੇਂ ਸ਼੍ਰੋਮਣੀ ਕਮੇਟੀ ਦੂਚਿਤੀ ਵਿੱਚ ਰਹੀ।
ਅਸੀਂ ਸਮਝਦੇ ਹਾਂ ਕਿ ਪੰਜਾਬ ਸਰਕਾਰ ਨੂੰ ਇਹ ਕਾਨੂੰਨ ਸਮੂਚੇ ਤੋਰ ਤੇ ਵਾਪਿਸ ਲੈ ਲੈਣਾ ਚਾਹੀਦਾ ਹੈ।
ਮੇਰੀ ਬੇਨਤੀ ਹੈ ਕਿ ਕਲ ਦੇ ਹੁਕਮਨਾਮੇ ਤੇ ਮੁੜ ਵਿਚਾਰ ਹੋਵੇ ਤੇ ਅਸੈਂਬਲੀ ਦੀ ਐਮ.ਅੇਲ.ਏ, ਵਜ਼ੀਰ, ਸਪੀਕਰ ਨੂੰ ਅਕਾਲ ਤਖ਼ਤ ਤੇ ਬੁਲਾਉਣ ਦੀ ਪਰੰਪਰਾ ਬੜੇ ਗਲਤ ਸੰਦੇਸ਼ ਦੇਵੇਗੀ। ਤੁਹਾਨੂੰ ਵਿਚਾਰ ਵੰਟਾਦਰਾਂ ਕਰਕੇ ਮਸਲਾ ਸੁਲਝਾਉਣਾ ਚਾਹੀਦਾ ਹੈ। ਅਸੀ ਪਿਛੋਕੜ ਤੋਂ ਸਬਕ ਸਿਖੀਏ। ਟਕਰਾਓ ਦੀ ਨੀਤੀ ਤੋਂ ਕੌਮ ਨੂੰ ਬਚਾਇਏ। ਮੇਰੀ ਬੇਨਤੀ ਹੈ ਕਿ ਤੁਸੀ ਸਮੇਂ ਅਨੁਸਾਰ ਕੌਮ ਨੂੰ ਪੂਰੀ ਅਗਵਾਈ ਦਿੰਦੇ ਹੋਏ ਇਹ ਮਸਲੇ ਦਾ ਹਲ ਕਰੋਗੇ।
ਸਤਿਕਾਰ ਸਹਿਤ
ਤਰਲੋਚਨ ਸਿੰਘ
ਸਾਬਕਾ ਐਮ.ਪੀ.
