ਸਰੀ,12 ਦਸੰਬਰ (Newsdateline desk): ਕੈਨੇਡਾ ਦੇ ਸਰੀ ਸ਼ਹਿਰ ਦੇ ਰਹਿਣ ਵਾਲੇ ਇੱਕ ਪੰਜਾਬੀ ਮੂਲ ਦੇ ਨੌਜਵਾਨ ਨੇ ਵੱਡਾ ਲਾਟਰੀ ਇਨਾਮ ਜਿੱਤਿਆ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਜਿੱਤ ਨਾਲ ਉਹ ਸਾਲਾਂ ਦੀ ਦੂਰੀ ਤੋਂ ਬਾਅਦ ਆਖਰਕਾਰ ਭਾਰਤ ਵਿੱਚ ਆਪਣੇ ਰਿਸ਼ਤੇਦਾਰਾਂ ਨੂੰ ਮਿਲਣ ਜਾ ਸਕਣਗੇ। ਦੱਸਣਯੋਗ ਹੈ ਕਿ ਇਸ ਸਾਲ ਕੈਨੇਡਾ ਵਿੱਚ ਪੰਜਾਬੀ ਮੂਲ ਦੇ ਭਾਰਤੀਆਂ ਨੇ ਵੱਖ-ਵੱਖ ਲਾਟਰੀਆਂ ਵਿੱਚ ਕੁੱਲ 437 ਕਰੋੜ ਰੁਪਏ ਤੋਂ ਵੱਧ ਦੀ ਰਕਮ ਜਿੱਤੀ ਹੈ, ਜਿਸ ਵਿੱਚ ਸਰੀ ਦੀ ਇਹ ਤਾਜ਼ਾ ਜਿੱਤ ਵੀ ਸ਼ਾਮਲ ਹੈ।
ਬ੍ਰਿਟਿਸ਼ ਕੋਲੰਬੀਆ ਦੇ ਲੋਅਰ ਮੇਨਲੈਂਡ ਵਿੱਚ ਰਹਿਣ ਵਾਲੇ ਸੰਦੀਪ ਸਿੱਧੂ ਨੇ 5 ਦਸੰਬਰ ਦੇ Lotto Max Extra draw ਵਿੱਚ 500,000 ਕੈਨੇਡੀਅਨ ਡਾਲਰ (ਲਗਭਗ 3 ਕਰੋੜ ਰੁਪਏ) ਦਾ ਇਨਾਮ ਜਿੱਤਿਆ ਹੈ। ਸਿੱਧੂ ਨੂੰ ਇਸ ਜੈਕਪਾਟ ਬਾਰੇ ਉਦੋਂ ਪਤਾ ਲੱਗਾ ਜਦੋਂ ਉਨ੍ਹਾਂ ਨੇ ਇੱਕ ਸਥਾਨਕ ਪੈਟਰੋਲ ਪੰਪ ‘ਤੇ ਆਪਣੀ ਟਿਕਟ ਸਕੈਨ ਕੀਤੀ। ਇਹ ਟਿਕਟ ਉਨ੍ਹਾਂ ਨੇ ਉਸੇ ਦਿਨ ਸਰੀ ਵਿੱਚ 175ਵੀਂ ਸਟਰੀਟ ਅਤੇ 56ਵੀਂ ਐਵੇਨਿਊ ‘ਤੇ ਸਥਿਤ ਇੱਕ ਸ਼ੈਵਰੋਨ ਆਊਟਲੈੱਟ ਤੋਂ ਖਰੀਦੀ ਸੀ।
ਬ੍ਰਿਟਿਸ਼ ਕੋਲੰਬੀਆ ਲਾਟਰੀ ਕਾਰਪੋਰੇਸ਼ਨ ਨੇ ਦੱਸਿਆ ਕਿ ਸਿੱਧੂ ਨੇ ‘ਐਕਸਟਰਾ’ ਦੇ ਸਾਰੇ ਚਾਰ ਨੰਬਰਾਂ ਦਾ ਸਹੀ ਮੇਲ ਕੀਤਾ, ਜਿਸ ਦੀ ਸੰਭਾਵਨਾ ਲਗਭਗ 3.7 ਮਿਲੀਅਨ (37 ਲੱਖ) ਵਿੱਚੋਂ ਇੱਕ ਹੁੰਦੀ ਹੈ।
ਇਸ ਸਾਲ ਪੰਜਾਬੀਆਂ ਨੇ ਕਈ ਵੱਡੇ ਇਨਾਮ ਜਿੱਤੇ ਹਨ: ਜੂਨ ਵਿੱਚ ਓਂਟਾਰੀਓ ਦੇ ਮੋਹਿਤ ਸ਼ਰਮਾ ਨੇ ‘ਲੋਟੋ ਮੈਕਸ’ ਡਰਾਅ ਵਿੱਚ 65 ਮਿਲੀਅਨ ਕੈਨੇਡੀਅਨ ਡਾਲਰ (ਲਗਭਗ 403 ਕਰੋੜ ਰੁਪਏ) ਜਿੱਤੇ ਸਨ। ਅਕਤੂਬਰ ਵਿੱਚ ਸਸਕੈਚੂਨ ਦੇ ਰਹਿਣ ਵਾਲੇ ਸਤਨਾਮ ਸਿੰਘ ਨੇ ਆਪਣੀ ਖਰੀਦੀ ਦੂਜੀ ਲਾਟਰੀ ਟਿਕਟ ‘ਤੇ ‘ਲੋਟੋ 6/49’ ਡਰਾਅ ਵਿੱਚ 5 ਮਿਲੀਅਨ ਕੈਨੇਡੀਅਨ ਡਾਲਰ (ਲਗਭਗ 31 ਕਰੋੜ ਰੁਪਏ) ਜਿੱਤੇ ਸਨ।
