ਭਾਰਤ ਦੇ ਕੈਨੇਡਾ ਵਿੱਚ ਹਾਈ ਕਮਿਸ਼ਨਰ ਦਿਨੇਸ਼ ਪਟਨਾਇਕ ਨੇ ਕੈਨੇਡੀਅਨ ਨਿਊਜ਼ ਚੈਨਲ ਨੂੰ ਦਿੱਤੇ ਇੱਕ ਇੰਟਰਵਿਊ ਵਿੱਚ ਸਖ਼ਤ ਸ਼ਬਦਾਂ ਵਿੱਚ ਕਿਹਾ ਹੈ ਕਿ ਹਰਦੀਪ ਸਿੰਘ ਨਿੱਝਰ ਦੇ ਕਤਲ ਵਿੱਚ ਭਾਰਤ ਦੀ “ਕੋਈ ਸ਼ਮੂਲੀਅਤ ਨਹੀਂ” ਹੈ। ਉਨ੍ਹਾਂ ਤੱਤਕਾਲੀ ਕੈਨੇਡੀਅਨ ਸਰਕਾਰ ਵੱਲੋਂ ਲਗਾਏ ਗਏ ਇਨ੍ਹਾਂ ਇਲਜ਼ਾਮਾਂ ਨੂੰ “ਬੇਤੁਕੇ’ ਦੱਸਿਆ।
ਪਟਨਾਇਕ ਨੇ ਕਿਹਾ, “ਅਸੀਂ ਕਦੇ ਵੀ ਅਜਿਹੀਆਂ ਚੀਜ਼ਾਂ ਵਿੱਚ ਸ਼ਾਮਲ ਨਹੀਂ ਹੋਏ। ਭਾਰਤ ਅਜਿਹੇ ਕੰਮ ਨਹੀਂ ਕਰਦਾ।
ਰਾਜਦੂਤ ਦੇ ਸਖ਼ਤ ਬਿਆਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਕੈਨੇਡੀਅਨ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਿਚਕਾਰ ਜੋਹਾਨਸਬਰਗ ਵਿੱਚ ਹੋਏ G20 ਸੰਮੇਲਨ ਦੀ ਮੁਲਾਕਾਤ ਤੋਂ ਬਾਅਦ ਆਏ ਹਨ। ਇਸ ਤੌ ਇਲਾਵਾ ਕਾਰਨੀ 2026 ਦੇ ਸ਼ੁਰੂ ਵਿੱਚ ਭਾਰਤ ਦਾ ਦੌਰਾ ਵੀ ਕਰਨਗੇ।
ਪਟਨਾਇਕ ਨੇ ਲਾਰੈਂਸ ਬਿਸ਼ਨੋਈ ਗੈਂਗ ਨੂੰ ਅੱਤਵਾਦੀ ਸੰਸਥਾ ਵਜੋਂ ਨਾਮਜ਼ਦ ਕਰਨ ਦੇ ਕੈਨੇਡਾ ਦੇ ਫੈਸਲੇ ਦਾ ਸਵਾਗਤ ਕੀਤਾ। ਉਨ੍ਹਾਂ ਕਿਹਾ ਕਿ ਭਾਰਤ ਆਪਣੇ ਪੱਧਰ ‘ਤੇ ਇਸ ਨੈੱਟਵਰਕ ਖਿਲਾਫ ਕਾਰਵਾਈ ਕਰ ਰਿਹਾ ਹੈ। ਉਨ੍ਹਾਂ ਦੱਸਿਆ, “ਸਾਡੇ ਕੋਲ ਬਿਸ਼ਨੋਈ ਦਾ ਭਰਾ ਜੇਲ੍ਹ ਵਿੱਚ ਹੈ, ਅਤੇ ਉਸਦੇ ਦੂਜੇ ਭਰਾ ਨੂੰ ਪਿਛਲੇ ਹਫ਼ਤੇ ਅਮਰੀਕਾ ਤੋਂ ਭਾਰਤ ਲਿਆਂਦਾ ਗਿਆ ਹੈ।”
ਰਾਜਦੂਤ ਨੇ ਚੇਤਾਵਨੀ ਦਿੱਤੀ ਕਿ ਅੰਤਰ-ਰਾਸ਼ਟਰੀ ਅਪਰਾਧਿਕ ਸਿੰਡੀਕੇਟ ਹੁਣ ਅੱਤਵਾਦੀ ਸਮੂਹਾਂ ਵਾਂਗ ਹੀ ਗਲੋਬਲ ਪਹੁੰਚ ਨਾਲ ਕੰਮ ਕਰ ਰਹੇ ਹਨ। ਉਨ੍ਹਾਂ ਨਵੀਂ ਦਿੱਲੀ ਅਤੇ ਓਟਾਵਾ ਵਿਚਕਾਰ ਡੂੰਘੇ ਸੁਰੱਖਿਆ ਸਹਿਯੋਗ ਦੀ ਲੋੜ ‘ਤੇ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ, “ਬਿਸ਼ਨੋਈ ਗੈਂਗ ਅਤੇ ਗਲੋਬਲ ਕਾਰਟੇਲਾਂ ਨਾਲ ਜੁੜੇ ਗੈਂਗਾਂ ਬਾਰੇ ਜੋ ਵੀ ਖੁਫੀਆ ਜਾਣਕਾਰੀ ਸਾਡੇ ਕੋਲ ਹੈ, ਅਸੀਂ ਸਾਂਝੀ ਕਰ ਰਹੇ ਹਾਂ,ਲੋਕਾਂ ਨੂੰ ਸੁਰੱਖਿਅਤ ਰੱਖਣ ਲਈ ਇਸ ਤਰ੍ਹਾਂ ਦੇ ਸਹਿਯੋਗ ਦੀ ਲੋੜ ਹੈ।”
ਪਟਨਾਇਕ ਨੇ ਯਾਦ ਦਿਵਾਇਆ ਕਿ ਭਾਰਤ 40 ਸਾਲਾਂ ਤੋਂ, 1985 ਦੇ ਏਅਰ ਇੰਡੀਆ ਕਨਿਸ਼ਕ ਬੰਬ ਧਮਾਕੇ ਦੇ ਸਮੇਂ ਤੋਂ, ਕੈਨੇਡਾ ਵਿੱਚ ਕੱਟੜਪੰਥੀ ਗਤੀਵਿਧੀਆਂ ਬਾਰੇ ਚਿੰਤਾ ਜ਼ਾਹਰ ਕਰਦਾ ਰਿਹਾ ਹੈ। ਕੈਨੇਡਾ ਵਿੱਚ ਵੱਖਵਾਦੀ ਸਮੂਹਾਂ ਵੱਲੋਂ ਆਯੋਜਿਤ ਕੀਤੇ ਜਾ ਰਹੇ “ਖਾਲਿਸਤਾਨ ਰੈਫਰੈਂਡਮ” ਦੇ ਮੁੱਦੇ ‘ਤੇ ਪਟਨਾਇਕ ਨੇ ਕਿਹਾ, “ਤੁਸੀਂ ਲੋਕ ਜਾਣਦੇ ਹੋ ਕਿ ਰੈਫਰੈਂਡਮ ਕੀ ਹੁੰਦੇ ਹਨ। ਤੁਸੀਂ ਅਤੀਤ ਵਿੱਚ ਰੈਫਰੈਂਡਮ ਕੀਤੇ ਹਨ, ਤੁਸੀਂ ਜਾਣਦੇ ਹੋ ਕਿ ਇਹ ਕਿੰਨਾ ‘ਹਾਸੋਹੀਣਾ’ ਹੈ।”
