ਗੁਰਦਸਪੂਰ/ ਦਿੱਲੀ :ਇੱਕ ਵਾਰ ਫਿਰ ਪੰਜਾਬ ਪੁਲਿਸ ਦਾ ਝੂਠ ਬੇਨਕਾਬ ਹੋਇਆ ਹੈ। ਜਿਸ ਧਮਾਕੇ ਨੂੰ ਪੰਜਾਬ ਪੁਲਿਸ ਕਹਿ ਰਹੀ ਸੀ ਕਿ ‘ਕੁਝ ਹੋਇਆ ਹੀ ਨਹੀਂ’, ਉਹ ISI ਸਪਾਂਸਰਡ ਅੱਤਵਾਦੀ ਹਮਲਾ ਨਿਕਲਿਆ ।
25 ਨਵੰਬਰ ਨੂੰ ਗੁਰਦਾਸਪੁਰ ਦੇ ਸਿਟੀ ਥਾਣੇ ਦੇ ਬਾਹਰ ਇੱਕ ਗ੍ਰੇਨੇਡ ਹਮਲਾ ਹੋਣ ਦੀ ਖ਼ਬਰ ਆਈ ਸੀ, ਜਿਸ ਨਾਲ ਪੂਰੇ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਪੈਦਾ ਹੋ ਗਿਆ ਸੀ। ਇਸ ਹਮਲੇ ਵਿੱਚ ਇੱਕ ਮਹਿਲਾ ਗੰਭੀਰ ਰੂਪ ਨਾਲ ਜ਼ਖਮੀ ਹੋਈ ਸੀ। ਜ਼ਖਮੀ ਮਹਿਲਾ ਨੇ ਖੁਦ ਕੈਮਰੇ ਮੂਹਰੇ ਆਪਣੀ ਆਪ ਬੀਤੀ ਵੀ ਦੱਸੀ ਸੀ।
ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਇੰਨੀ ਵੱਡੀ ਵਾਰਦਾਤ ਨੂੰ ਗੁਰਦਾਸਪੁਰ ਪੁਲਿਸ ਨੇ ਲੁਕਾਉਣ ਦੀ ਕੋਸ਼ਿਸ਼ ਕੀਤੀ। ਪੁਲਿਸ ਦਾ ਬਿਆਨ ਆਇਆ ਕਿ ‘ਕੁਝ ਹੋਇਆ ਹੀ ਨਹੀਂ’। ਪੁਲਿਸ ਨੇ ਗ੍ਰੇਨੇਡ ਹਮਲੇ ਦੀ ਖ਼ਬਰ ਨੂੰ ‘ਫੇਕ’ ਦੱਸਿਆ।
ਪੰਜਾਬ ਪੁਲਿਸ ਨੇ ਗ੍ਰੇਨੇਡ ਹਮਲੇ ਦੀ ਖ਼ਬਰ ਨੂੰ ਝੂਠ ਦੱਸਿਆ ਸੀ, ਪਰ ਝੂਠ ਤਾਂ ਪੰਜਾਬ ਪੁਲਿਸ ਦਾ ਫੜਿਆ ਜਾਣਾ ਸੀ। ਹੁਣ ਦਿੱਲੀ ਪੁਲਿਸ ਨੇ ਵੱਡੀ ਕਾਰਵਾਈ ਕਰਦੇ ਹੋਏ, ਦੱਤੀਆ (ਮੱਧ ਪ੍ਰਦੇਸ਼) ਵਿੱਚੋਂ ਸ਼ਾਹਜ਼ਾਦ ਭੱਟੀ ਗੈਂਗ ਦੇ 3 ਮੈਂਬਰਾਂ ਨੂੰ ਫੜਿਆ ਹੈ। ਇਨ੍ਹਾਂ 3 ਕ੍ਰਿਮੀਨਲਾਂ ਦੀ ਪਛਾਣ ਪੰਜਾਬ ਦੇ 19 ਸਾਲਾ ਹਰਗੁਨਪ੍ਰੀਤ ਸਿੰਘ, ਦੱਤੀਆ, ਮੱਧ ਪ੍ਰਦੇਸ਼ ਦੇ 19 ਸਾਲਾ ਵਿਕਾਸ ਪ੍ਰਜਾਪਤੀ, ਅਤੇ ਬਿਜਨੌਰ,UP ਦੇ ਆਰਿਫ ਵਜੋਂ ਹੋਈ ਹੈ।
ਦਿੱਲੀ ਪੁਲਿਸ ਨੂੰ ਇਨ੍ਹਾਂ ਤਿੰਨਾਂ ਨੇ ਪੁੱਛਗਿੱਛ ਵਿੱਚ ਦੱਸਿਆ ਕਿ 25 ਨਵੰਬਰ ਨੂੰ ਗੁਰਦਾਸਪੁਰ ਸਿਟੀ ਥਾਣੇ ‘ਤੇ ਹੋਏ ਗ੍ਰੇਨੇਡ ਹਮਲੇ ਵਿੱਚ ਇਹ ਤਿੰਨੋਂ ਸ਼ਾਮਲ ਸਨ ਅਤੇ ਇਨ੍ਹਾਂ ਨੇ ਹੀ ਇਹ ਗ੍ਰੇਨੇਡ ਪੁਲਿਸ ਥਾਣੇ ‘ਤੇ ਸੁੱਟਿਆ ਸੀ।
ਪੁਲਿਸ ਨੇ ਦੱਸਿਆ ਕਿ ਇਹ ਤਿੰਨੋਂ ਸ਼ਾਹਜ਼ਾਦ ਭੱਟੀ ਗੈਂਗ ਦੇ ਮੈਂਬਰ ਹਨ। ਸ਼ਾਹਜ਼ਾਦ ਭੱਟੀ ISI ਦੇ ਇਸ਼ਾਰਿਆਂ ‘ਤੇ, ਪਾਕਿਸਤਾਨ ਦੇ ਇਸ਼ਾਰਿਆਂ ‘ਤੇ, ਅੱਤਵਾਦੀ ਗਤੀਵਿਧੀਆਂ ਨੂੰ ਅੰਜਾਮ ਦਿੰਦਾ ਹੈ। ਗੁਰਦਾਸਪੁਰ ਪੁਲਿਸ ਸਟੇਸ਼ਨ ਅਟੈਕ ਵੀ ਸ਼ਾਹਜ਼ਾਦ ਭੱਟੀ ਨੇ ਹੀ ਕਰਵਾਇਆ ਸੀ।
ਦਿੱਲੀ ਪੁਲਿਸ ਦੇ ਇਸ ਵੱਡੇ ਖੁਲਾਸੇ ਤੋਂ ਬਾਅਦ ਪੰਜਾਬ ਪੁਲਿਸ ਦੀ ਪੋਲ ਇੱਕ ਵਾਰ ਫਿਰ ਖੁੱਲ੍ਹ ਗਈ ਹੈ। ਅਸੀਂ ਆਪਣੀ ਪਹਿਲਾਂ ਦੀ ਰਿਪੋਰਟ ਵਿੱਚ ਵੀ ਦੱਸਿਆ ਸੀ ਕਿ ਪੰਜਾਬ ਪੁਲਿਸ ਇਸ ਤਰ੍ਹਾਂ ਦੇ ਗੰਭੀਰ ਮਸਲਿਆਂ ‘ਤੇ ਲਗਾਤਾਰ ਝੂਠ ਬੋਲਦੀ ਆਈ ਹੈ। ਪਹਿਲਾਂ ਵੀ ਇਸ ਤਰੀਕੇ ਦੇ ਵੱਡੇ ਹਮਲਿਆਂ ਨੂੰ ਪੰਜਾਬ ਪੁਲਿਸ ਕਦੇ ਟਾਇਰ ਬਲਾਸਟ ਜਾਂ ਰੇਡੀਏਟਰ ਬਲਾਸਟ ਦੱਸਦੀ ਆਈ ਹੈ, ਅਤੇ ਹੁਣ ਇੱਕ ਵਾਰ ਫਿਰ ਪੰਜਾਬ ਪੁਲਿਸ ਦਾ ਝੂਠ ਫੜਿਆ ਗਿਆ ਹੈ।
ਇੱਥੇ ਵੱਡਾ ਸਵਾਲ ਇਹ ਹੈ ਕਿ: ਜੇ ਪੰਜਾਬ ਪੁਲਿਸ ਇਸ ਤਰ੍ਹਾਂ ਦੇ ਗੰਭੀਰ ਮਸਲਿਆਂ ‘ਤੇ ਆਪਣੀ ਅੱਖ ਬੰਦ ਕਰਕੇ ਬੈਠੀ ਰਹੇਗੀ? ਇਨ੍ਹਾਂ ਘਟਨਾਵਾਂ ਨੂੰ ਲੁਕਾਉਣ ਵਿੱਚ ਹੀ ਆਪਣੀ ਐਨਰਜੀ ਵੇਸਟ ਕਰਦੀ ਰਹੇਗੀ? ਇਨ੍ਹਾਂ ਅੱਤਵਾਦੀ ਹਮਲਿਆਂ ਨੂੰ ਰੋਕੇਗਾ ਕੌਣ?
ਜੋ ਕੰਮ ਦਿੱਲੀ ਪੁਲਿਸ ਨੇ ਕੀਤਾ ਹੈ, ਉਹ ਕੰਮ ਪੰਜਾਬ ਪੁਲਿਸ ਨੂੰ ਪਹਿਲਾਂ ਹੀ ਕਰਨਾ ਚਾਹੀਦਾ ਸੀ। ਇਹ ਅਪਰਾਧੀ ਪੰਜਾਬ ਵਿੱਚ ਪੁਲਿਸ ਸਟੇਸ਼ਨਾਂ ‘ਤੇ ਗ੍ਰੇਨੇਡ ਹਮਲੇ ਕਰਦੇ ਹਨ ਅਤੇ ਬੜੀ ਹੀ ਆਸਾਨੀ ਨਾਲ ਪੰਜਾਬ ਵਿੱਚੋਂ ਫਰਾਰ ਹੋ ਜਾਂਦੇ ਹਨ। ਪੰਜਾਬ ਪੁਲਿਸ ਇਨ੍ਹਾਂ ਨੂੰ ਫੜਦੀ, ਜੇ ਆਪਣਾ ਧਿਆਨ ਇਸ ਘਟਨਾ ਨੂੰ ਛੁਪਾਉਣ ਦੀ ਥਾਂ, ਇਨ੍ਹਾਂ ਅਪਰਾਧੀਆਂ ਨੂੰ ਫੜਨ ‘ਤੇ ਲਾਉਂਦੀ।
ਉੱਥੇ ਦੂਜੇ ਪਾਸੇ, ਅੱਜ ਗੁਰਦਾਸਪੁਰ ਵਿਖੇ 2 ਅਪਰਾਧੀਆਂ ਦਾ ਪੁਲਿਸ ਮੁਕਾਬਲਾ ਵੀ ਹੋਇਆ ਹੈ। ਦੋਵੇਂ ਕ੍ਰਿਮੀਨਲ ਇਸ ਐਨਕਾਊਂਟਰ ਵਿੱਚ ਜ਼ਖਮੀ ਹੋਏ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਦੋਵੇਂ ਅਪਰਾਧੀ ਵੀ ਗੁਰਦਾਸਪੁਰ ਗ੍ਰੇਨੇਡ ਹਮਲੇ ਵਿੱਚ ਸ਼ਾਮਲ ਸਨ।
ਸ਼ਾਹਜ਼ਾਦ ਭੱਟੀ ਲਗਾਤਾਰ ਆਪਣੀਆਂ ਅੱਤਵਾਦੀ ਗਤੀਵਿਧੀਆਂ ਨੂੰ ਅੰਜਾਮ ਦੇ ਰਿਹਾ ਹੈ, ਪਰ ਪੰਜਾਬ ਪੁਲਿਸ ਲਗਾਤਾਰ ਉਸਦੀਆਂ ਗਤੀਵਿਧੀਆਂ ਰੋਕਣ ਵਿੱਚ ਅਤੇ ਉਸਦੇ ਕ੍ਰਿਮੀਨਲਾਂ ਨੂੰ ਟਰੇਸ ਕਰਨ ਵਿੱਚ ਨਾਕਾਮ ਰਹੀ ਹੈ।
ਤੁਹਾਨੂੰ ਦੱਸ ਦਈਏ ਕਿ ਸ਼ਾਹਜ਼ਾਦ ਭੱਟੀ ਓਹੀ ਹੈ ਜਿਸਦੇ ਖਿਲਾਫ਼ ਲਾਰੈਂਸ ਬਿਸ਼ਨੋਈ ਦੇ ਭਰਾ ਅਨਮੋਲ ਬਿਸ਼ਨੋਈ ਨੇ ਕੋਰਟ ਵਿੱਚ ਦਰਖਾਸਤ ਦਿੱਤੀ ਹੈ ਕਿ ਉਸਨੂੰ ਸ਼ਾਹਜ਼ਾਦ ਭੱਟੀ ਤੋਂ ਖਤਰਾ ਹੈ। ਅਨਮੋਲ ਬਿਸ਼ਨੋਈ ਨੇ ਕੋਰਟ ਤੋਂ ਉਸਨੂੰ ਸੁਰੱਖਿਆ ਮੁਹੱਈਆ ਕਰਵਾਉਣ ਅਤੇ ਬੁਲੇਟ ਪ੍ਰੂਫ ਜੈਕੇਟ ਮੁਹੱਈਆ ਕਰਵਾਉਣ ਦੀ ਮੰਗ ਕੀਤੀ ਹੈ।
