ਨਿਊਯਾਰਕ/ਵਾਸ਼ਿੰਗਟਨ August 31
ਅਮਰੀਕੀ ਸੰਘੀ ਅਦਾਲਤ ਨੇ ਭਾਰਤੀ ਮੂਲ ਦੇ ਟੈਕਸੀ ਡਰਾਈਵਰ ਗੁਰਮੀਤ ਸਿੰਘ ਦੀ ਨਾਗਰਿਕਤਾ ਰੱਦ ਕਰ ਦਿੱਤੀ ਹੈ, ਜਿਸ ’ਤੇ 2011 ਵਿੱਚ ਇੱਕ ਔਰਤ ਯਾਤਰੀ ਨਾਲ ਚਾਕੂ ਦੀ ਨੋਕ ’ਤੇ ਬਲਾਤਕਾਰ ਅਤੇ ਕਿਡਨੈਪਿੰਗ ਦਾ ਦੋਸ਼ ਸਾਬਤ ਹੋਇਆ ਸੀ। ਨਿਊਯਾਰਕ ਦੇ ਪੂਰਬੀ ਜ਼ਿਲ੍ਹੇ ਲਈ ਅਮਰੀਕੀ ਜ਼ਿਲ੍ਹਾ ਅਦਾਲਤ ਨੇ 26 ਅਗਸਤ 2026 ਨੂੰ ਫ਼ੈਸਲਾ ਸੁਣਾਉਂਦਿਆਂ ਸਿੰਘ ਦੀ ਕੁਦਰਤੀਕਰਨ (ਨੈਚੁਰਲਾਈਜ਼ੇਸ਼ਨ) ਰੱਦ ਕਰ ਦਿੱਤੀ ਅਤੇ ਉਸਨੂੰ 16 ਸਤੰਬਰ 2026 ਤੱਕ ਆਪਣੇ ਨਾਗਰਿਕਤਾ ਦਸਤਾਵੇਜ਼ (ਨੈਚੁਰਲਾਈਜ਼ੇਸ਼ਨ ਸਰਟੀਫਿਕੇਟ ਅਤੇ ਅਮਰੀਕੀ ਪਾਸਪੋਰਟ) ਸੌਂਪਣ ਦਾ ਹੁਕਮ ਦਿੱਤਾ।
ਸਿੰਘ ਫਰਵਰੀ 1992 ਵਿੱਚ ਅਮਰੀਕਾ ਵਿੱਚ ਛੇ ਮਹੀਨਿਆਂ ਲਈ ਵਿਜ਼ਿਟਰ ਵਜੋਂ ਆਇਆ ਸੀ। ਜੂਨ 2000 ਵਿੱਚ ਸਥਾਈ ਨਿਵਾਸੀ ਬਣਿਆ ਅਤੇ 19 ਅਕਤੂਬਰ 2011 ਨੂੰ ਅਮਰੀਕੀ ਨਾਗਰਿਕ ਬਣਿਆ। ਮਈ 2011 ਵਿੱਚ ਨਾਗਰਿਕਤਾ ਅਰਜ਼ੀ ਦਾਖ਼ਲ ਕਰਨ ਤੋਂ ਕੁਝ ਹਫ਼ਤੇ ਪਹਿਲਾਂ ਉਸਨੇ ਇੱਕ ਔਰਤ ਯਾਤਰੀ ਨੂੰ ਸੁੰਨਸਾਨ ਥਾਂ ’ਤੇ ਲੈ ਜਾ ਕੇ ਚਾਕੂ ਦੀ ਨੋਕ ’ਤੇ ਧਮਕਾਇਆ, ਬੰਨ੍ਹਿਆ ਅਤੇ ਬਲਾਤਕਾਰ ਕੀਤਾ। ਪੀੜਤਾ ਸਵੇਰੇ ਬਚ ਕੇ ਭੱਜੀ ਅਤੇ ਮਦਦ ਲਈ ਲੋਕਾਂ ਕੋਲ ਪਹੁੰਚੀ।
ਨਾਗਰਿਕਤਾ ਮਿਲਣ ਤੋਂ ਬਾਅਦ ਸਿੰਘ ਨੂੰ ਨਿਊਯਾਰਕ ਵਿੱਚ ਪਹਿਲੀ ਡਿਗਰੀ ਦੇ ਬਲਾਤਕਾਰ ਅਤੇ ਦੂਜੀ ਡਿਗਰੀ ਦੀ ਕਿਡਨੈਪਿੰਗ (ਜਿਨਸੀ ਮਕਸਦ ਵਾਲਾ ਅਪਰਾਧ) ਦਾ ਦੋਸ਼ੀ ਠਹਿਰਾਇਆ ਗਿਆ ਅਤੇ 20 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ। ਅਟਾਰਨੀ ਜਨਰਲ ਟੌਡ ਬਲਾਂਚੇ ਨੇ ਕਿਹਾ, “ਅਮਰੀਕੀ ਨਾਗਰਿਕਤਾ ਅਪਰਾਧੀਆਂ ਲਈ ਢਾਲ ਨਹੀਂ ਹੈ… ਧੋਖੇ ਨਾਲ ਪ੍ਰਾਪਤ ਕੀਤੀ ਨਾਗਰਿਕਤਾ ਅਪਰਾਧੀਆਂ ਨੂੰ ਨਿਆਂ ਤੋਂ ਨਹੀਂ ਬਚਾ ਸਕਦੀ।” ਨਿਆਂ ਵਿਭਾਗ ਨੇ 2 ਫਰਵਰੀ 2026 ਨੂੰ ਸਿਵਲ ਡੀਨੈਚੁਰਲਾਈਜ਼ੇਸ਼ਨ (ਨਾਗਰਿਕਤਾ ਰੱਦੀ) ਦੀ ਕਾਰਵਾਈ ਦਾਇਰ ਕੀਤੀ ਸੀ, ਜਿਸ ਵਿੱਚ ਦੋਸ਼ ਲਾਇਆ ਗਿਆ ਕਿ ਸਿੰਘ ਨੇ ਕੁਦਰਤੀਕਰਨ ਦੌਰਾਨ ਆਪਣੇ ਗੰਭੀਰ ਅਪਰਾਧਾਂ ਨੂੰ ਲੁਕਾਇਆ।
ਨਾਗਰਿਕਤਾ ਰੱਦ ਹੋਣ ਤੋਂ ਬਾਅਦ ਹੁਣ ਇਮੀਗ੍ਰੇਸ਼ਨ ਅਧਿਕਾਰੀ ਉਸ ਖ਼ਿਲਾਫ਼ ਦੇਸ਼ ਨਿਕਾਲੇ (ਡੀਪੋਰਟੇਸ਼ਨ) ਦੀ ਕਾਰਵਾਈ ਕਰ ਸਕਦੇ ਹਨ, ਜੋ ਸੰਭਵ ਤੌਰ ’ਤੇ ਉਸਦੀ ਕੈਦ ਪੂਰੀ ਹੋਣ ਤੋਂ ਬਾਅਦ ਅਮਲ ਵਿੱਚ ਆਵੇਗੀ। ਰਿਪੋਰਟਾਂ ਮੁਤਾਬਕ ਸਿੰਘ ਇਸ ਸਮੇਂ ਸ਼ਾਵਾਂਗੁੰਕ (ਵਾਲਕਿੱਲ) ਮੈਕਸੀਮਮ-ਸਿਕਿਓਰਿਟੀ ਜੇਲ੍ਹ ਵਿੱਚ ਬੰਦ ਹੈ।
