ਅੰਮ੍ਰਿਤਸਰ/ ਚੰਡੀਗੜ੍ਹ ਅਗਸਤ 12
ਕੇਂਦਰੀ ਏਜੇਂਸੀ Enforcement Directorate ਦੀ ਪੰਜਾਬ ਦੇ DGP ਗੌਰਵ ਯਾਦਵ ਨੂੰ ਲਿਖੀ ਗਈ ਚਿੱਠੀ ਉੱਤੇ ਸਿਆਸੀ ਘਮਾਸਾਨ ਸ਼ੁਰੂ ਹੋ ਗਿਆ ਹੈ। ਅਕਾਲੀ ਦਲ ਆਗੂ ਬਿਕਰਮ ਸਿੰਘ ਮਜੀਠੀਆ ਨੇ ਅਮ੍ਰਿਤਸਰ ਵਿਖੇ ਇਕ ਅਹਿਮ ਪ੍ਰੈਸ ਕਾਨਫਰੰਸ ਦੌਰਾਨ ED ਵਲੋਂ ਲਿਖੀ ਚਿੱਠੀ ਵਿਚ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੇ OSD ਰਾਜਵੀਰ ਘੁੱਮਣ ਅਤੇ ਉਹਨਾਂ ਦੇ ਨਜ਼ਦੀਕੀ ਮੰਨੇ ਜਾਣ ਵਾਲੇ ਨਿਤਿਨ ਗੋਹਾਲ ਸੰਬੰਧੀ ਕੀਤੇ ਗਏ ਕਥਿਤ ਖੁਲਾਸਿਆਂ ਬਾਰੇ ਜਨਤਕ ਵੇਰਵੇ ਜਾਰੀ ਕਰਦਿਆਂ ਪੰਜਾਬ ਦੇ DGP ਨੂੰ ਉਹਨਾਂ ਦੇ ਦਾਅਵਿਆਂ ਬਾਰੇ ਬਿਆਨ ਜਾਰੀ ਕਰਨ ਦੀ ਚੁਣੌਤੀ ਦਿੱਤੀ।
ਸੂਬੇ ਵਿਚ ਅਹਿਮ ਅਹੁਦਿਆਂ ਉੱਤੇ ਬਦਲੀਆਂ, ਲੈਂਡ ਡੀਲਸ ਵਿਚ ਹੇਰਾਫੇਰੀ, ਅਸਲਾ ਲਾਇਸੈਂਸਾਂ ਚ ਰਿਸ਼ਵਤਖੋਰੀ ਅਤੇ ਕਈ ਕਿਸਮ ਦੀ ਕਥਿਤ ਸੌਦੇਬਾਜ਼ੀਆਂ ਵਿਚ ਮੁੱਖ ਮੰਤਰੀ ਦਫਤਰ ਦੇ ਅਧਿਕਾਰੀਆਂ ਦੀ ਮਿਲੀਭੁਗਤ ਹੋਣ ਦੇ ਇਲਜ਼ਾਮ ਲਾਉਂਦਿਆਂ ਮਜੀਠੀਆ ਨੇ ਪੰਜਾਬ ਦੇ DGP ਉਤੇ ਦੋਸ਼ ਲਾਇਆ ਕਿ ਉਹ ED ਵਲੋਂ ਭੇਜੀ ਚਿੱਠੀ ਦੀ ਫਾਈਲ ਉੱਤੇ ਬੈਠ ਗਏ ਨੇ ਅਤੇ ਆਪਣਾ ਅਹੁਦਾ ਬਚਾਉਣ ਲਈ ED ਵਲੋਂ ਪਾਏ ਗਏ ਸਬੂਤਾਂ ਅਤੇ ਚੈਟ details ਨਸ਼ਟ ਕਰਵਾਉਣ ਦੇ ਜਤਨਾਂ ਵਿਚ ਲੱਗੇ ਨੇ। ਮਜੀਠੀਆ ਨੇ ਇਸ ਮਾਮਲੇ ਦੀ CBI ਜਾਂਚ ਦੀ ਮੰਗ ਕੀਤੀ।
ਦੂਜੇ ਪਾਸੇ ਪੰਜਾਬ ਸਰਕਾਰ ਦੇ ਖਜ਼ਾਨਾ ਮੰਤਰੀ ਹਰਪਾਲ ਸਿੰਘ ਚੀਮਾ ਨੇ ਅਕਾਲੀ ਦਲ ਆਗੂ ਬਿਕਰਮ ਸਿੰਘ ਮਜੀਠੀਆ ਦੇ ਇਲਜ਼ਾਮਾਂ ਨੂੰ ਗਲਤ ਦੱਸਦਿਆਂ ਅਕਾਲੀ ਦਲ ਉੱਤੇ ਕੇਂਦਰ ਸਰਕਾਰ ਅਤੇ ਉਸਦੀਆਂ ਏਜੇਂਸੀਆਂ ਦੇ ਏਜੇਂਟ ਵਜੋਂ ਕੰਮ ਕਰਨ ਦੇ ਇਲਜ਼ਾਮ ਲਾਏ ਨੇ। ਚੰਡੀਗੜ੍ਹ ਵਿਖੇ ਇਕ ਪ੍ਰੈਸ ਕਾਨਫਰੰਸ ਕਰਕੇ ਹਰਪਾਲ ਚੀਮਾ ਨੇ ਮਜੀਠੀਆ ਨੂੰ ED ਚਿਠੀ ਦੀ ਜਾਣਕਾਰੀ ਹੋਣ ਉੱਤੇ ਸਵਾਲ ਚੁੱਕੇ ਅਤੇ ਅਕਾਲੀਆਂ ਉੱਤੇ ਕੇਂਦਰੀ ਏਜੰਸੀਆਂ ਦੇ ਸਿਰ ਉੱਤੇ ਸਿਆਸਤ ਕਰਨ ਦੇ ਦੋਸ਼ ਲਾਏ।
