ਚੰਡੀਗੜ੍ਹ (ਅਵਤਾਰ ਕੰਗ) : ਸ਼੍ਰੋਮਣੀ ਅਕਾਲੀ ਦਲ ਨੇ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਦੌਰਾਨ ਹੋ ਰਹੀ ਕਥਿਤ ਧੱਕੇਸ਼ਾਹੀ ਨੂੰ ਲੈ ਕੇ ਸੋਸ਼ਲ ਮੀਡੀਆ ‘ਤੇ ਇੱਕ ਵੱਡਾ ਖੁਲਾਸਾ ਕਰਦਿਆਂ ਪੰਜਾਬ ਪੁਲਿਸ ਦੇ ਸੀਨੀਅਰ ਅਧਿਕਾਰੀਆਂ ਦੀ ਇੱਕ ਫੋਨ ਰਿਕਾਰਡਿੰਗ ਜਾਰੀ ਕੀਤੀ ਹੈ।
ਇਸ ਰਿਕਾਰਡਿੰਗ ਵਿੱਚ, ਜਿਸਨੂੰ ਅਕਾਲੀ ਦਲ ਨੇ ‘Patiala Police ਦੀ MOST SENSITIVE Conference Call’ ਕਰਾਰ ਦਿੱਤਾ ਹੈ, ਕਥਿਤ ਤੌਰ ‘ਤੇ ਐਸਐਸਪੀ ਪਟਿਆਲਾ ਵਰੁਣ ਸ਼ਰਮਾ ਅਤੇ ਹੋਰ ਡੀਐਸਪੀ ਰੈਂਕ ਦੇ ਅਧਿਕਾਰੀਆਂ ਨੂੰ ਚੋਣ ਪ੍ਰਕਿਰਿਆ ਨੂੰ ਪ੍ਰਭਾਵਿਤ ਕਰਨ ਦੀਆਂ ਯੋਜਨਾਵਾਂ ਬਾਰੇ ਗੱਲ ਕਰਦਿਆਂ ਸੁਣਿਆ ਜਾ ਸਕਦਾ ਹੈ।
ਰਿਕਾਰਡਿੰਗ ਵਿੱਚ ਕੀ ਹੈ? ਨਾਮਜ਼ਦਗੀ ਪੱਤਰ ਪਾੜ੍ਹਨ ਦਾ ਹੁਕਮ!
ਅਕਾਲੀ ਦਲ ਵੱਲੋਂ ਜਾਰੀ ਕੀਤੇ ਗਏ ਆਡੀਓ ਵਿੱਚ ਐਸਐਸਪੀ ਪਟਿਆਲਾ ਨੂੰ ਇਹ ਕਹਿੰਦਿਆਂ ਸੁਣਿਆ ਜਾ ਸਕਦਾ ਹੈ ਕਿ ਪ੍ਰਸ਼ਾਸਨ ‘ਧੱਕੇ ਤੋਂ ਮਨ੍ਹਾ ਨਹੀਂ ਕਰਦਾ’ ਅਤੇ ਇਹ ਲੋਕਲ ਬਾਡੀਜ਼ ਚੋਣਾਂ ਵਿੱਚ ‘ਹੋਣਾ ਹੀ ਹੈ’।
ਰਿਕਾਰਡਿੰਗ ਅਨੁਸਾਰ, ਨਿਰਦੇਸ਼ ਇਹ ਹਨ ਕਿ ਜਿਸ ਵੀ ਵਿਰੋਧੀ ਉਮੀਦਵਾਰ ਨੂੰ ਰੋਕਣਾ ਹੈ, ਉਸਨੂੰ “ਪਿੰਡ, ਘਰ ਜਾਂ ਰਾਹ ‘ਤੇ ਹੀ” ਰੋਕਿਆ ਜਾਵੇ, ਤਾਂ ਜੋ “ਕਾਗਜ਼ ਨਾਮੀਨੇਸ਼ਨ ਫਾਇਲਿੰਗ ਸੈਂਟਰ ‘ਤੇ ਪਹੁੰਚਣ ਤੋਂ ਬਾਅਦ ਨਾ ਪਾੜ੍ਹੇ ਜਾਣ।”
ਐਸਐਸਪੀ ਨੇ ਡੀਐਸਪੀ ਰਾਜਪੁਰਾ ਨੂੰ ਖਾਸ ਤੌਰ ‘ਤੇ ਨਿਰਦੇਸ਼ ਦਿੱਤਾ ਕਿ “ਜੇਕਰ ਕਾਗ਼ਜ਼ ਖੋਹਣੇ ਹਨ, ਉਹ 5 ਕਿਲੋਮੀਟਰ ਪਹਿਲਾਂ ਖੋਹ ਲਏ ਜਾਣ।” ਅਤੇ ਜੇ ਕੋਈ ਸੈਂਟਰ ਦੇ ਅੰਦਰ ਪਹੁੰਚ ਵੀ ਜਾਵੇ ਤਾਂ “ਆਰਓ ਉਸਦੀ ਨਾਮਜਦਗੀ ਕੈਂਸਲ ਕਰਾਵੇ।”
ਐਸਐਸਪੀ ਨੇ ਇਹ ਵੀ ਮੰਨਿਆ ਕਿ ਉਨ੍ਹਾਂ ਲਈ ਅਗਲਾ ਦਿਨ ਸੰਵੇਦਨਸ਼ੀਲ ਹੈ ਕਿਉਂਕਿ “ਸ਼ਾਇਦ ਸੁਖਬੀਰ ਸਿੰਘ ਬਾਦਲ ਆਪ ਘਨੌਰ ਆਉਣ।”
ਡੀਐਸਪੀ ਨਾਭਾ ਅਤੇ ਸਮਾਣਾ ਨੇ ਐਮਐਲਏ ਅਤੇ ਉਨ੍ਹਾਂ ਦੀ ਟੀਮ ਦੇ ਸੰਪਰਕ ਵਿੱਚ ਹੋਣ ਦੀ ਪੁਸ਼ਟੀ ਕੀਤੀ ਅਤੇ ਦੱਸਿਆ ਕਿ ‘ਐਮਐਲਏ ਸਾਬ੍ਹ ਦੇ ਬੰਦਿਆਂ ਨੂੰ 9 ਵਜੇ ਦਾ ਟਾਈਮ ਦਿਵਾ ਕੇ ਪਹਿਲੀਆਂ ਵਿੱਚ ਹੀ ਕਾਗਜ ਦਾਖ਼ਲ ਕਰਵਾ ਦਿਆਂਗੇ।’
ਐਸਐਸਪੀ ਵਰੁਣ ਸ਼ਰਮਾ ਨੇ ਅੰਤ ਵਿੱਚ ਅਫਸਰਾਂ ਨੂੰ ਭਰੋਸਾ ਦਿੱਤਾ ਕਿ ਕਿਸੇ ਵੀ ਸ਼ਿਕਾਇਤ ਦੀ ਸੂਰਤ ਵਿੱਚ ਉਹ “positive ਰਿਪੋਰਟ ਬਣਾਉਣਗੇ” ਅਤੇ ਕਿਸੇ ਨੇ ‘worry ਨਹੀਂ ਕਰਨੀ’।
ਇਸ ਖੁਲਾਸੇ ਤੋਂ ਤੁਰੰਤ ਬਾਅਦ ਸ਼੍ਰੋਮਣੀ ਅਕਾਲੀ ਦਲ ਨੇ ਸੂਬਾ ਚੋਣ ਕਮਿਸ਼ਨਰ, ਪੰਜਾਬ ਨੂੰ ਇੱਕ ਜ਼ਰੂਰੀ ਸ਼ਿਕਾਇਤ ਪੱਤਰ ਲਿਖਿਆ ਹੈ।
ਅਕਾਲੀ ਦਲ ਨੇ ਐਸਐਸਪੀ ਪਟਿਆਲਾ ਵਰੁਣ ਸ਼ਰਮਾ (ਆਈ.ਪੀ.ਐਸ.) ਅਤੇ ਹੋਰ ਅਧਿਕਾਰੀਆਂ ਦੀ ਤੁਰੰਤ ਮੁਅੱਤਲੀ ਅਤੇ ਮਾਮਲੇ ਦੀ ਕੌਮੀ ਪੱਧਰ ‘ਤੇ ਜਾਂਚ ਦੀ ਮੰਗ ਕੀਤੀ ਹੈ। ਪੱਤਰ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਇਹ ਆਡੀਓ ਰਿਕਾਰਡਿੰਗ ਆਮ ਆਦਮੀ ਪਾਰਟੀ ਦੇ ਹੱਕ ਵਿੱਚ ਚੱਲ ਰਹੀ ਚੋਣ ਪ੍ਰਕਿਰਿਆ ਨੂੰ ਅਗਵਾ ਕਰਨ ਦੀ ‘ਅਪਰਾਧਿਕ ਸਾਜ਼ਿਸ਼’ ਦਾ ਸਪੱਸ਼ਟ ਸਬੂਤ ਹੈ।
ਸ਼ਿਕਾਇਤ ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਚੋਣਾਂ ਵਿੱਚ ‘ਲੋਕਤੰਤਰ ਦਾ ਘਾਣ’ ਕੀਤਾ ਜਾ ਰਿਹਾ ਹੈ ਅਤੇ ਪੁਲਿਸ ਫੋਰਸ ਨੂੰ ਸੱਤਾਧਾਰੀ ਪਾਰਟੀ ਦੇ ਰਾਜਨੀਤਿਕ ਦਬਾਅ ਦੇ ਸਾਧਨ ਵਜੋਂ ਵਰਤਿਆ ਜਾ ਰਿਹਾ ਹੈ।
