ਵੈਂਚੁਰਾ (ਕੈਲੀਫੋਰਨੀਆ), 18 ਦਸੰਬਰ 2025(Newsdateline Desk):ਅਮਰੀਕਾ ਦੇ ਕੈਲੀਫੋਰਨੀਆ ਵਿੱਚ ਇੱਕ ਮੰਦਭਾਗੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਬੇਕਰਸਫੀਲਡ ਦੇ ਰਹਿਣ ਵਾਲੇ ਇੱਕ ਪੰਜਾਬੀ ਮੂਲ ਦੇ ਉਬਰ ਡਰਾਈਵਰ, ਸਿਮਰਨਜੀਤ ਸੇਖੋਂ , ‘ਤੇ ਬੇਹੋਸ਼ੀ ਦੀ ਹਾਲਤ ਵਿੱਚ ਇੱਕ ਮਹਿਲਾ ਸਵਾਰੀ ਨਾਲ ਜਬਰ-ਜ਼ਨਾਹ ਕਰਨ ਦੇ ਦੋਸ਼ ਲੱਗੇ ਹਨ। ਵੈਂਚੁਰਾ ਕਾਉਂਟੀ ਦੇ ਜ਼ਿਲ੍ਹਾ ਅਟਾਰਨੀ ਏਰਿਕ ਨਾਸਾਰੇਂਕੋ ਨੇ ਦੱਸਿਆ ਕਿ ਸੇਖੋਂ ਵਿਰੁੱਧ ਗੰਭੀਰ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ, ਜਿਸ ਵਿੱਚ ਪੀੜਤਾ ਦੀ ਬੇਹੋਸ਼ੀ ਦੀ ਹਾਲਤ ਦਾ ਫਾਇਦਾ ਉਠਾਉਣ ਦਾ ਦੋਸ਼ ਵੀ ਸ਼ਾਮਲ ਹੈ। ਅਦਾਲਤ ਵਿੱਚ ਪੇਸ਼ੀ ਦੌਰਾਨ ਸੇਖੋਂ ਨੇ ਖੁਦ ਨੂੰ ਬੇਕਸੂਰ ਦੱਸਿਆ ਹੈ।
ਇਹ ਘਟਨਾ 27 ਨਵੰਬਰ, 2025 ਦੀ ਰਾਤ ਦੀ ਹੈ, ਜਦੋਂ ਸੇਖੋਂ ਨੇ ਥਾਊਜ਼ੈਂਡ ਓਕਸ ਦੇ ਇੱਕ ਬਾਰ ਦੇ ਬਾਹਰੋਂ ਮਹਿਲਾ ਸਵਾਰੀ ਨੂੰ ਉਸ ਦੇ ਘਰ ਕੈਮਰਿਲੋ ਛੱਡਣ ਲਈ ਬਿਠਾਇਆ ਸੀ। ਜਾਣਕਾਰੀ ਅਨੁਸਾਰ ਪੀੜਤਾ ਨਸ਼ੇ ਦੀ ਹਾਲਤ ਵਿੱਚ ਸੀ ਅਤੇ ਸਫ਼ਰ ਦੌਰਾਨ ਉਬਰ ਵਿੱਚ ਹੀ ਸੌਂ ਗਈ। ਦੋਸ਼ ਹੈ ਕਿ ਸਫ਼ਰ ਖਤਮ ਹੋਣ ਤੋਂ ਬਾਅਦ ਵੀ ਡਰਾਈਵਰ ਨੇ ਪੀੜਤਾ ਨੂੰ ਘਰ ਉਤਾਰਨ ਦੀ ਬਜਾਏ ਉਸ ਨੂੰ ਬੇਹੋਸ਼ੀ ਦੀ ਹਾਲਤ ਵਿੱਚ ਕੈਮਰਿਲੋ ਦੇ ਆਲੇ-ਦੁਆਲੇ ਘੁਮਾਇਆ ਅਤੇ ਉਸ ਨਾਲ ਜਿਨਸੀ ਸ਼ੋਸ਼ਣ ਕੀਤਾ।
ਵੈਂਚੁਰਾ ਕਾਉਂਟੀ ਸ਼ੈਰਿਫ ਦੇ ਦਫਤਰ ਨੇ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰਨ ਤੋਂ ਬਾਅਦ 15 ਦਸੰਬਰ, 2025 ਨੂੰ ਸਿਮਰਨਜੀਤ ਸੇਖੋਂ ਨੂੰ ਲਾਸ ਏਂਜਲਸ ਕਾਉਂਟੀ ਤੋਂ ਗ੍ਰਿਫਤਾਰ ਕਰ ਲਿਆ। ਇਸ ਕੇਸ ਦੀ ਪੈਰਵੀ ਸੀਨੀਅਰ ਡਿਪਟੀ ਡਿਸਟ੍ਰਿਕਟ ਅਟਾਰਨੀ ਟਵਾਈਲਾ ਐਟਮੋਰ ਕਰ ਰਹੇ ਹਨ। ਫਿਲਹਾਲ ਮੁਲਜ਼ਮ ਹਿਰਾਸਤ ਵਿੱਚ ਹੈ ਅਤੇ ਉਸ ਦੀ ਜ਼ਮਾਨਤ 5 ਲੱਖ ਡਾਲਰ ਤੈਅ ਕੀਤੀ ਗਈ ਹੈ। ਇਸ ਮਾਮਲੇ ਦੀ ਅਗਲੀ ਸੁਣਵਾਈ 29 ਦਸੰਬਰ ਨੂੰ ਵੈਂਚੁਰਾ ਕਾਉਂਟੀ ਦੀ ਉੱਚ ਅਦਾਲਤ ਵਿੱਚ ਹੋਵੇਗੀ।
