ਸਰੀ/ਚੰਡੀਗੜ੍ਹ , 11 ਦਸੰਬਰ ( Newsdateline desk): ਕਪਿਲ ਸ਼ਰਮਾ ਦੇ ‘KAP’s Cafe’ ‘ਤੇ ਹੋਈਆਂ ਗੋਲੀਬਾਰੀ ਦੀਆਂ ਵਾਰਦਾਤਾਂ ਦੇ ਸਬੰਧ ਵਿੱਚ ਇੱਕ ਹੈਰਾਨੀਜਨਕ ਤੱਥ ਸਾਹਮਣੇ ਆਇਆ ਹੈ। ਦਿੱਲੀ ਪੁਲਿਸ ਦੀ ਕ੍ਰਾਈਮ ਬ੍ਰਾਂਚ ਦੁਆਰਾ ਫੜੇ ਗਏ ਬੰਧੂਮਾਨ ਸੇਖੋ ਵੱਲੋ ਕੀਤੇ ਗਏ ਖੁਲਾਸਿਆਂ ਤੋਂ ਬਾਅਦ ਇਹ ਗੱਲ ਸਾਹਮਣੇ ਆਈ ਹੈ ਕਿ ਇਸ ਮਾਮਲੇ ਵਿੱਚ ਸ਼ਾਮਲ ਗੋਲਡੀ ਢਿੱਲੋਂ ਗੈਂਗ ਦੇ ਕਈ ਸਰਗਰਮ ਮੈਂਬਰ ਪਹਿਲਾਂ ਹੀ ਕੈਨੇਡਾ ਦੀਆਂ ਜੇਲ੍ਹਾਂ ਵਿੱਚ ਬੰਦ ਹਨ। ਖਾਸ ਗੱਲ ਇਹ ਹੈ ਕਿ ਕੈਨੇਡੀਅਨ ਪੁਲਿਸ ਨੂੰ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ ਕਿ ਉਹ ਮੁਲਜ਼ਮ KAP’s Cafe ਸ਼ੂਟਿੰਗ ਮਾਮਲੇ ਵਿੱਚ ਵੀ ਸ਼ਾਮਲ ਹਨ, ਉਨ੍ਹਾਂ ਨੂੰ ਹੋਰ ਅਪਰਾਧਾਂ, ਜਿਵੇਂ ਕਿ ਗੱਡੀ ਨੂੰ ਅੱਗ ਲਾਉਣ (Arson) ਅਤੇ ਸਿੰਗਰ ਅਤੇ ਰੈਪਰ ਸੁਲਤਾਨ ਦੇ ਹੋਏ ਕੌਂਸਰਟ ਤੋਂ ਪਹਿਲਾਂ ਹੋਈ ਗੋਲੀਬਾਰੀ ਦੀ ਘਟਨਾ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਕ੍ਰਾਈਮ ਬ੍ਰਾਂਚ ਦੇ ਖੁਲਾਸਿਆਂ ਵਿੱਚ ‘ਸ਼ੈਰੀ’ ਨਾਮ ਦੇ ਇੱਕ ਵਿਅਕਤੀ ਦਾ ਜ਼ਿਕਰ ਆਇਆ ਹੈ, ਜਿਸਦਾ ਅਸਲ ਨਾਮ ਹਰਦਿਲਪ੍ਰੀਤ ਸਿੰਘ ਉਰਫ ਸ਼ੈਰੀ ਹੈ। ‘ਸ਼ੈਰੀ’ ਨੂੰ ਕੁਝ ਹਫ਼ਤੇ ਪਹਿਲਾਂ ਸਰੀ ‘ਚ ਇੱਕ ਗੱਡੀ ਨੂੰ ਅੱਗ ਲਾਉਣ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਅਤੇ ਉਹ ਇਸ ਵੇਲੇ ਸਰੀ ਜੇਲ੍ਹ ਵਿੱਚ ਬੰਦ ਹੈ। ਸ਼ੈਰੀ ਨੇ ਰਿਫਿਊਜੀ ਵਜੋਂ ਇੱਕ ਕਲੇਮ ਫਾਈਲ ਕੀਤਾ ਜੋ ਕਿ ਅੱਜ ਤੱਕ ਵਿਚਾਰਾਂਧੀਨ ਹੈ। ਦਿੱਲੀ ਪੁਲਿਸ ਅਨੁਸਾਰ, ਸ਼ੈਰੀ ਗੋਲਡੀ ਢਿੱਲੋਂ ਦੇ ‘ਸੀਪੂ’ ਨਾਮ ਦੇ ਮੋਡਿਊਲ ਦਾ ਇੱਕ ਅਹਿਮ ਹਿੱਸਾ ਹੈ ਅਤੇ ਕੈਫੇ ਸ਼ੂਟਿੰਗ ਵਿੱਚ ਸ਼ਾਮਲ ਸੀ। ਇਸੇ ਤਰ੍ਹਾਂ, ਮੋਡਿਊਲ ਦੇ ਸਰਗਨਾ ‘ਸੀਪੂ’ ਜਿਸਦੀ ਪਛਾਣ ਸੁਖਦੀਪ ਸਿੰਘ ਵਜੋਂ ਹੋਈ ਹੈ, ਉਸ ਨੂੰ ਵੀ ਐਲਬਰਟਾ ਦੇ ਐਡਮਿੰਟਨ ਵਿੱਚ ਸਿੰਗਰ ਅਤੇ ਰੈਪਰ ਸੁਲਤਾਨ ਦੇ ਹੋਏ ਕੌਂਸਰਟ ਤੋਂ ਪਹਿਲਾਂ ਹੋਈ ਗੋਲੀਬਾਰੀ ਦੀ ਘਟਨਾ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਅਤੇ ਉਹ ਵੀ ਸਰੀ ਵਿੱਚ ਡਿਟੈਂਸ਼ਨ ‘ਚ ਹੈ।
ਇਸ ਦੌਰਾਨ, ਇੱਕ ਹੋਰ ਮੁਲਜ਼ਮ ਜਗਦੀਪ ਸਿੰਘ, ਜੋ ਸੰਭਾਵਤ ਤੌਰ ‘ਤੇ ਤੀਜੀ ਸ਼ੂਟਆਊਟ ਵਿੱਚ ਸ਼ਾਮਲ ਸੀ, ਉਹ ਹਸਪਤਾਲ ਵਿੱਚ ਮੈਡੀਕਲ ਸਮੀਖਿਆ ਲਈ ਲਿਆਂਦੇ ਜਾਣ ਤੋਂ ਬਾਅਦ ਹਸਪਤਾਲ ਤੋਂ ਫਰਾਰ ਹੋ ਗਿਆ ਹੈ, ਅਤੇ CBSA (ਕੈਨੇਡਾ ਬਾਰਡਰ ਸਿਕਿਉਰਿਟੀ ਏਜੰਸੀ) ਵੱਲੋਂ ਉਸਦੀ ਭਾਲ ਜਾਰੀ ਹੈ।
ਇਸ ਗੰਭੀਰ ਮੁੱਦੇ ਦੇ ਮੱਦੇਨਜ਼ਰ, ਇਹ ਖਦਸ਼ਾ ਜਤਾਇਆ ਜਾ ਰਿਹਾ ਹੈ ਕਿ: “ਹੋ ਸਕਦਾ ਹੈ ਆਉਣ ਵਾਲੇ ਕੁਝ ਦਿਨਾਂ ਤੱਕ ਇਨ੍ਹਾਂ ਮੁਲਜ਼ਮਾਂ ਨੂੰ ਜ਼ਮਾਨਤ ਦੇ ਦਿੱਤੀ ਜਾਏ ਜਾਂ ਫਿਰ ਕੰਡੀਸ਼ਨਲ ਰਿਲੀਜ਼ ਉੱਤੇ ਛੱਡ ਦਿੱਤਾ ਜਾਏ।”
ਜੇਕਰ ਕੈਨੇਡਾ ਦੀਆਂ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਨੂੰ ਸਮੇਂ ਸਿਰ ਇਹ ਜਾਣਕਾਰੀ ਨਹੀਂ ਮਿਲਦੀ ਕਿ ਇਹ ਵਿਅਕਤੀ ਅਸਲ ਵਿੱਚ KAP’s Cafe ਸ਼ੂਟਿੰਗ ਨਾਲ ਸਬੰਧਤ ਹਨ, ਤਾਂ ਇਨ੍ਹਾਂ ਖਤਰਨਾਕ ਗੈਂਗ ਮੈਂਬਰਾਂ ਦੀ ਜੇਲ੍ਹ ਤੋਂ ਰਿਹਾਈ ਹੋ ਸਕਦੀ ਹੈ, ਜਿਸ ਨਾਲ ਸੰਗਠਿਤ ਅਪਰਾਧਾਂ ਵਿੱਚ ਸ਼ਾਮਲ ਮੁਲਜ਼ਮਾਂ ਲਈ ਰਾਹ ਪੱਧਰਾ ਹੋ ਸਕਦਾ ਹੈ।
