ਬਿਓਰੋ। ਪੰਜਾਬ ਵਿੱਚ ਅਫਸਰਾਂ ਦੇ ਤਾਬੜਤੋੜ ਤਬਾਦਲਿਆਂ ਨੂੰ ਲੈ ਕੇ ਘਮਸਾਣ ਮਚ ਗਿਆ ਹੈ। ਸ੍ਰੀ ਅਨੰਦਪੁਰ ਸਾਹਿਬ ਤੋਂ ਕਾਂਗਰਸੀ ਸਾਂਸਦ ਮਨੀਸ਼ ਤਿਵਾੜੀ ਨੇ ਹੁਣ ਸਰਕਾਰ ਤੋਂ ਇਸਦਾ ਹਿਸਾਬ ਮੰਗਿਆ ਹੈ। ਤਿਵਾੜੀ ਨੇ ਚੰਨੀ ਸਰਕਾਰ ਨੂੰ 70 ਦਿਨਾਂ ਵਿੱਚ ਹੋਏ ਅਫਸਰਾਂ ਦੇ ਤਬਾਦਲਿਆਂ ਦੀ ਲਿਸਟ ਜਾਰੀ ਕਰਨ ਨੂੰ ਕਿਹਾ ਹੈ।
ਚਰਨਜੀਤ ਚੰਨੀ ਨੂੰ ਸੀਐੱਮ ਬਣੇ ਅਜੇ 70 ਦਿਨ ਹੀ ਹੋਏ ਹਨ। ਅਜਿਹੇ ਵਿੱਚ ਤਿਵਾੜੀ ਦੀ ਇਸ ਮੰਗ ਨੂੰ ਸਿੱਧੇ ਤੌਰ ‘ਤੇ ਸਰਕਾਰ ਦੀ ਟਰਾਂਸਫਰ ਪਾਲਿਸੀ ਨੂੰ ਲੈ ਕੇ ਸਵਾਲ ਚੁੱਕਣ ਨਾਲ ਜੋੜ ਕੇ ਵੇਖਿਆ ਜਾ ਰਿਹਾ ਹੈ।
ਸਾਂਸਦ ਤਿਵਾੜੀ ਨੇ ਟਵੀਟ ਕਰਕੇ ਕਿਹਾ, “ਮੈਂ ਲੋਕਾਂ ਦੇ ਕੰਮਕਾਜ ਲਈ ਸਵੇਰੇ 7 ਵਜੇ ਕੁਝ ਅਫਸਰਾਂ ਨੂੰ ਸੱਦਿਆ। ਉਹਨਾਂ ਦਾ ਦਾਅਵਾ ਹੈ ਕਿ ਸਾਡੀ ਟਰਾਂਸਫਰ ਹੋ ਗਈ ਹੈ। ਮੈਂ ਜਾਣਨਾ ਚਾਹੁੰਦਾ ਹਾਂ ਕਿ ਇਹ ਸੱਚ ਹੈ ਜਾਂ ਝੂਠ।” ਤਿਵਾੜੀ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ 70 ਦਿਨਾਂ ਵਿੱਚ ਪਟਵਾਰੀ ਤੋਂ ਲੈ ਕੇ ਚੀਫ ਸੈਕਟਰੀ ਤੱਕ ਦੇ ਟਰਾਂਸਫਰ ਦੀ ਪੂਰੀ ਲਿਸਟ ਜਾਰੀ ਕੀਤੀ ਜਾਵੇ।
I urge @PunjabGovtIndia to kindly put out A consolidated list of Transfers & Postings from Patwari to Chief Secy over Past 70 odd days across ALL Govt Deptt’s
Whoever I have called since7AM Morn for Public Works claim they have been transferredTrue/False?https://t.co/7N5bM6apTy— Manish Tewari (@ManishTewari) November 28, 2021
BSF ਦੇ ਮੁੱਦੇ ‘ਤੇ ਵੀ ਘੇਰੀ ਸੀ ਸਰਕਾਰ
ਤਿਵਾੜੀ ਨੇ ਪੰਜਾਬ ਵਿੱਚ BSF ਦਾ ਦਾਇਰਾ 15 ਤੋਂ 50 ਕਿੱਲੋਮੀਟਰ ਕਰਨ ਦੇ ਕੇਂਦਰ ਦੇ ਫੈਸਲੇ ਨੂੰ ਲੈ ਕੇ ਵੀ ਪੰਜਾਬ ਦੀ ਚੰਨੀ ਸਰਕਾਰ ‘ਤੇ ਹਮਲਾ ਬੋਲਿਆ ਸੀ। ਤਿਵਾੜੀ ਨੇ ਪੁੱਛਿਆ ਸੀ ਕਿ ਇਸਦਾ ਨੋਟੀਫਿਕੇਸ਼ਨ ਹੋਏ ਇੱਕ ਮਹੀਨਾ ਹੋ ਚੁੱਕਿਆ ਹੈ, ਪਰ ਇਸ ਨੂੰ ਸੁਪਰੀਮ ਕੋਰਟ ਵਿੱਚ ਚੁਣੌਤੀ ਕਿਉਂ ਨਹੀਂ ਦਿੱਤੀ ਗਈ। ਕੀ ਪੰਜਾਬ ਸਰਕਾਰ ਦਾ ਵਿਰੋਧ ਸਿਰਫ਼ ਦਿਖਾਵਾ ਹੈ?
ਨਵਜੋਤ ਸਿੱਧੂ ‘ਤੇ ਵੀ ਚੁੱਕੇ ਸਨ ਸਵਾਲ
ਪਿਛਲੇ ਦਿਨੀਂ ਜਦੋਂ ਸਿੱਧੂ ਕਰਤਾਰਪੁਰ ਸਾਹਿਬ ਗਏ ਸਨ, ਤਾਂ ਉਹਨਾਂ ਨੇ ਇਮਰਾਨ ਖਾਨ ਨੂੰ ਆਪਣਾ ਵੱਡਾ ਭਰਾ ਦੱਸਿਆ ਸੀ, ਜਿਸ ‘ਤੇ ਭਾਰਤ ਵਿੱਚ ਬਵਾਲ ਮਚ ਗਿਆ। ਕਾਂਗਰਸੀ ਸਾਂਸਦ ਮਨੀਸ਼ ਤਿਵਾੜੀ ਨੇ ਵੀ ਇਸ ਨੂੰ ਲੈ ਕੇ ਸਿੱਧੂ ‘ਤੇ ਹਮਲਾ ਬੋਲਿਆ ਸੀ। ਤਿਵਾੜੀ ਨੇ ਕਿਹਾ ਸੀ ਕਿ ਇਮਰਾਨ ਖਾਨ ਕਿਸੇ ਦਾ ਵੱਡਾ ਭਰਾ ਹੋ ਸਕਦਾ ਹੈ, ਪਰ ਭਾਰਤ ਲਈ ਉਹ ਪਾਕਿਸਤਾਨੀ ਖੂਫੀਆ ਏਜੰਸੀ ISI ਅਤੇ ਪਾਕਿ ਫੌਜ ਦੀ ਕਠਪੁਤਲੀ ਹੈ, ਜੋ ਪੰਜਾਬ ਵਿੱਚ ਡਰੋਨ ਜ਼ਰੀਏ ਹਥਿਆਰ ਅਤੇ ਨਸ਼ਾ ਭੇਜ ਰਿਹਾ ਹੈ। ਇਸ ਤੋਂ ਇਲਾਵਾ ਉਹ ਰੋਜ਼ ਜੰਮੂ-ਕਸ਼ਮੀਰ ਵਿੱਚ LoC ‘ਤੇ ਦਹਿਸ਼ਤਗਰਦਾਂ ਨੂੰ ਭੇਜ ਰਿਹਾ ਹੈ। ਉਹਨਾਂ ਨੇ ਸਿੱਧੂ ਤੋਂ ਪੁੱਛਿਆ..ਕੀ ਅਸੀਂ ਪੁੰਛ ਵਿੱਚ ਸਾਡੇ ਫੌਜੀਆਂ ਦੀ ਸ਼ਹਾਦਤ ਨੂੰ ਇੰਨੀ ਜਲਦੀ ਭੁੱਲ ਗਏ?
ਕੈਪਟਨ ਦੇ ਕਰੀਬੀ ਹਨ ਮਨੀਸ਼ ਤਿਵਾੜੀ
ਮਨੀਸ਼ ਤਿਵਾੜੀ ਪੰਜਾਬ ਦੇ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦੇ ਕਰੀਬੀ ਹਨ। ਦਿਲਚਸਪ ਹੈ ਕਿ ਕੈਪਟਨ ਦੇ ਕਾਂਗਰਸ ਛੱਡਣ ਤੋਂ ਬਾਅਦ ਤਿਵਾੜੀ ਨੇ ਕਾਂਗਰਸ ਤਾਂ ਨਹੀਂ ਛੱਡੀ ਹੈ, ਪਰ ਕੈਪਟਨ ‘ਤੇ ਖੁੱਲ੍ਹ ਕੇ ਕੁਝ ਬੋਲਿਆ ਵੀ ਨਹੀਂ ਹੈ। ਸਿਆਸੀ ਹਲਕਿਆਂ ਵਿੱਚ ਚਰਚਾ ਹੈ ਕਿ ਤਿਵਾੜੀ ਵੀ ਕੈਪਟਨ ਦੇ ਨਾਲ ਬੀਜੇਪੀ ਦੇ ਨਾਲ ਜਾ ਸਕਦੇ ਹਨ।
