ਬਿਓਰੋ। ਡਰੱਗਜ਼ ਦੇ ਮੁੱਦੇ ਨੂੰ ਲੈ ਕੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੂੰ ਘੇਰ ਰਹੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਹੁਣ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ‘ਤੇ ਹਮਲਾ ਬੋਲਿਆ ਹੈ। ਸਿੱਧੂ ਨੇ ਕਿਹਾ, “ਡਰੱਗਜ਼ ਦੇ ਮਾਮਲੇ ਵੱਚ ਹਾਈਕੋਰਟ ਵਿੱਚ ਅਪੀਲ ਦਾ ਕੀ ਮਤਲਬ ਹੈ? ਜਦਕਿ ਕੋਰਟ ਨੇ ਉਹਨਾਂ ਨੂੰ ਆਦੇਸ਼ ਦਿੱਤੇ ਹਨ ਕਿ ਰਿਪੋਰਟ ਖੋਲ੍ਹ ਕੇ ਕਾਰਵਾਈ ਕਰੋ।” ਸਿੱਧੂ ਨੇ ਕਿਹਾ, “ਜੇਕਰ ਰਿਪੋਰਟ ਵਿੱਚ ਕੁਝ ਨਹੀਂ ਹੈ, ਤਾਂ ਕੈਪਟਨ ਅਮਰਿੰਦਰ ਸਿੰਘ ਨੂੰ ਜਿੰਮੇਵਾਰ ਠਹਿਰਾਓ। ਜੇਕਰ ਕੁਝ ਹੈ, ਤਾਂ ਤੁਰੰਤ ਐਕਸ਼ਨ ਲਓ।“
ਸਿੱਧੂ ਦੀ ਇਹ ਪ੍ਰਤੀਕਿਰਿਆ ਉਸ ਬਿਆਨ ‘ਤੇ ਆਈ ਹੈ, ਜਿਸ ਵਿੱਚ ਰੰਧਾਵਾ ਨੇ ਕਿਹਾ ਕਿ ਅਸੀਂ ਇੱਕ ਪੈਨਲ ਬਣਾ ਰਹੇ ਹਾਂ, ਜੋ ਡਰੱਗਜ਼ ਦੇ ਕੇਸ ਦੀ ਜਾਂਚ ਵਿੱਚ ਦੇਰੀ ਲਈ ਅਫਸਰਾਂ ਦੀ ਜਿੰਮੇਵਾਰੀ ਫਿਕਸ ਕਰੇਗਾ। ਇਸ ਤੋਂ ਇਲਾਵਾ ਰੰਧਾਵਾ ਨੇ ਕਿਹਾ ਕਿ ਉਹ ਹਾਈਕੋਰਟ ਵਿੱਚ 6 ਦਸੰਬਰ ਨੂੰ ਮੁੜ ਸੀਲਬੰਦ ਰਿਪੋਰਟ ਖੋਲ੍ਹਣ ਦੀ ਮੰਗ ਕਰਨਗੇ। ਰੰਧਾਵਾ ਦੇ ਇਸੇ ਬਿਆਨ ‘ਤੇ ਸਿੱਧੂ ਭੜਕ ਗਏ।
Why plead to High Court, when the Court had directed you to take the lead and open the report … If there is nothing in the report let Captain be accountable, if there is something, take immediate action !! pic.twitter.com/1BlPqNWxAq
— Navjot Singh Sidhu (@sherryontopp) November 28, 2021
ਸਿੱਧੂ ਦੇ ਹਾਈਕੋਰਟ ਦੇ ਆਦੇਸ਼ ਦੀ ਕਾਪੀ ਵੀ ਜਾਰੀ ਕੀਤੀ। ਇਸਦੇ ਜ਼ਰੀਏ ਦਾਅਵਾ ਕੀਤਾ ਕਿ ਹਾਈਕੋਰਟ ਨੇ ਕਿਹਾ ਹੈ ਕਿ ਸਰਕਾਰ ਉਹਨਾਂ ਨੂੰ ਸੌਂਪੀ ਗਈ ਰਿਪੋਰਟ ‘ਤੇ ਕਾਰਵਾਈ ਕਰੇ।
ਮਰਨ ਵਰਤ ਦੀ ਧਮਕੀ ਵੀ ਦੇ ਚੁੱਕੇ ਹਨ ਸਿੱਧੂ
ਪੰਜਾਬ ਦੇ ਡਰੱਗਜ਼ ਕੇਸ ਨੂੰ ਲੈ ਕੇ ਸਿੱਧੂ ਲਗਾਤਾਰ ਚੰਨੀ ਸਰਕਾਰ ‘ਤੇ ਹਮਲੇ ਬੋਲ ਰਹੇ ਹਨ। ਸਿੱਧੂ ਨੇ ਮੋਗਾ ਵਿੱਚ ਕਿਹਾ ਕਿ ਜੇਕਰ STF ਦੀ ਰਿਪੋਰਟ ਖੋਲ੍ਹ ਕੇ ਕਾਰਵਾਈ ਨਾ ਕੀਤੀ ਗਈ, ਤਾਂ ਉਹ ਮਰਨ ਵਰਤ ‘ਤੇ ਬਹਿ ਜਾਣਗੇ। ਸਿੱਧੂ STF ਰਿਪੋਰਟ ਵਿੱਚ ਅਕਾਲੀ ਆਗੂ ਬਿਕਰਮ ਸਿੰਘ ਮਜੀਠੀਆ ਦਾ ਨਾਂਅ ਹੋਣ ਦਾ ਦਾਅਵਾ ਕਰ ਰਹੇ ਹਨ। ਹਾਲਾਂਕਿ ਅਕਾਲੀ ਦਲ ਦਾ ਕਹਿਣਾ ਹੈ ਕਿ ਸਰਕਾਰ ਉਹਨਾਂ ਨੂੰ ਫਸਾਉਣ ਲਈ ਸਾਜਿਸ਼ ਰਚ ਰਹੀ ਹੈ।
