ਬਿਓਰੋ। ਚੋਣਾਂ ਤੋਂ ਪਹਿਲਾਂ ਜੋੜ-ਤੋੜ ਸਿਆਸਤ ਵਿੱਚ ਆਮ ਜਿਹੀ ਗੱਲ ਹੈ। ਕਈ ਨਵੇਂ ਚਿਹਰੇ ਪਾਰਟੀਆਂ ਵਿੱਚ ਸ਼ਾਮਲ ਹੁੰਦੇ ਹਨ ਤੇ ਕਈ ਦਹਾਕਿਆਂ ਬਾਅਦ ਪਾਰਟੀਆਂ ਦਾ ਸਾਥ ਛੱਡ ਦਿੰਦੇ ਹਨ। ਪਰ ਕੀ ਕਦੇ ਤੁਸੀਂ ਅਜਿਹਾ ਵੇਖਿਆ ਹੈ, ਕਿ ਇੱਕ ਹੀ ਸ਼ਖਸ ਇੱਕ ਹੀ ਦਿਨ ਅੰਦਰ 2 ਵੱਖ-ਵੱਖ ਪਾਰਟੀਆਂ ਵਿੱਚ ਸ਼ਾਮਲ ਹੋਇਆ ਹੋਵੇ। ਪੰਜਾਬ ਦੀ ਸਿਆਸਤ ਵਿੱਚ ਮੰਗਲਵਾਰ ਨੂੰ ਕੁਝ ਅਜਿਹਾ ਹੀ ਨਜ਼ਾਰਾ ਵੇਖਣ ਨੂੰ ਮਿਲਿਆ।
ਦਰਅਸਲ, ਭਾਰਤੀ ਜਨਤਾ ਪਾਰਟੀ ਵੱਲੋਂ ਪੰਜਾਬ ਚੋਣਾਂ ਦੇ ਮੱਦੇਨਜ਼ਰ ਲੁਧਿਆਣਾ ਵਿੱਚ ਇੱਕ ਰੈਲੀ ਰੱਖੀ ਗਈ ਸੀ, ਜਿਸ ਦੌਰਾਨ ਕਈ ਲੋਕ ਗਾਇਕਾਂ ਨੂੰ ਪਾਰਟੀ ਵਿੱਚ ਸ਼ਾਮਲ ਕਰਵਾਇਆ ਗਿਆ। ਇਹਨਾਂ ‘ਚੋਂ ਹੀ ਇੱਕ ਨਾਂਅ ਸੀ ਗਾਇਕ ਬੂਟਾ ਮੁਹੰਮਦ ਦਾ, ਜਿਹਨਾਂ ਨੂੰ ਤਮਾਮ ਸੀਨੀਅਰ ਲੀਡਰਸ਼ਿਪ ਨੇ ਪਾਰਟੀ ਵਿੱਚ ਜੀ ਆਇਆਂ ਕਿਹਾ।
ਇਹ ਨਾਂਅ ਅਤੇ ਚਿਹਰਾ ਉਸ ਵੇਲੇ ਹੋਰ ਵੀ ਚਰਚਾ ਦਾ ਵਿਸ਼ਾ ਬਣ ਗਿਆ, ਜਦੋਂ ਦੁਪਹਿਰ ਬਾਅਦ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਲ ਗਾਇਕ ਦੀ ਫੋਟੋ ਸਾਹਮਣੇ ਆਈ। ਇਸ ਫੋਟੋ ਦੇ ਨਾਲ ਕੈਪਟਨ ਦੀ ਟੀਮ ਵੱਲੋਂ ਜੋ ਮੈਸੇਜ ਸ਼ੇਅਰ ਕੀਤਾ ਗਿਆ, ਉਸ ਮੁਤਾਬਕ ਬੂਟਾ ਮੁਹੰਮਦ ਨੇ ਪੰਜਾਬ ਲੋਕ ਕਾਂਗਰਸ ਜੁਆਇਨ ਕਰ ਲਈ ਹੈ।
ਮਿਲ ਕੇ ਲੜ ਰਹੇ ਚੋਣ, ਪਰ ਗਠਜੋੜ ਨਹੀਂ !
ਦਿਲਚਸਪ ਹੈ ਕਿ ਇਹ ਦੋਵੇਂ ਪਾਰਟੀਆਂ ਵਿਧਾਨ ਸਭਾ ਚੋਣ ਮਿਲ ਕੇ ਹੀ ਲੜ ਰਹੀਆਂ ਹਨ, ਪਰ ਇਹਨਾਂ ਵਿਚਕਾਰ ਰਸਮੀ ਗਠਜੋੜ ਨਹੀਂ ਹੋਵੇਗਾ। ਪੰਜਾਬ ਦੇ ਸਾਰੇ ਵਿਧਾਨ ਸਭਾ ਹਲਕਿਆਂ ਵਿੱਚ ਕੈਪਟਨ ਦੀ ਪੰਜਾਬ ਲੋੋਕ ਕਾਂਗਰਸ ਪਾਰਟੀ, ਬੀਜੇਪੀ ਅਤੇ ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਬੇਸ਼ੱਕ ਮਿਲ ਕੇ ਚੋਣ ਮੈਦਾਨ ਵਿੱਚ ਉਤਰਣਗੇ, ਪਰ ਇਹਨਾਂ ਵਿੱਚ ਸਿਰਫ਼ ਸ਼ੀਟ ਸ਼ੇਅਰਿੰਗ ਹੋਵੇਗੀ। ਜਿਸ ਸੀਟ ‘ਤੇ ਤਿੰਨਾਂ ‘ਚ ਜਿਸਦੇ ਕੋਲ ਮਜਬੂਤ ਕੈਂਡੀਡੇਟ ਹੋਵੇਗਾ, ਉਸਦੀ ਪਾਰਟੀ ਨੂੰ ਟਿਕਟ ਮਿਲੇਗੀ। ਬਾਕੀ ਦੋਵੇਂ ਜਿੱਤਣ ਵਿੱਚ ਉਹਨਾਂ ਦੀ ਮਦਦ ਕਰਨਗੇ। ਹਰ ਸੀਟ ‘ਤੇ ਇਹੀ ਫਾਰਮੂਲਾ ਲਾਗੂ ਹੋਵੇਗਾ।
