ਬਿਓਰੋ। ਆਮ ਜਨਤਾ ‘ਤੇ ਇੱਕ ਵਾਰ ਫੇਰ ਮਹਿੰਗਾਈ ਦੀ ਮਾਰ ਪਈ ਹੈ। ਤੇਲ ਕੰਪਨੀਆਂ ਨੇ ਘਰੇਲੂ ਰਸੋਈ ਗੈਸ ਸਲੰਡਰ ਦੀ ਕੀਮਤ ਵਿੱਚ 25 ਰੁਪਏ ਦਾ ਇਜ਼ਾਫਾ ਕੀਤਾ ਹੈ। ਦਿੱਲੀ ਵਿੱਚ ਬਿਨ੍ਹਾਂ ਸਬਸਿਡੀ ਵਾਲੇ 14.2 ਕਿਲੋਗ੍ਰਾਮ ਗੈਸ ਸਲੰਡਰ ਦੀ ਕੀਮਤ ਹੁਣ 884.50 ਰੁਪਏ ਹੋ ਗਈ ਹੈ। ਇਸ ਤੋਂ ਇਲਾਵਾ 19 ਕਿਲੋਗ੍ਰਾਮ ਕਮਰਸ਼ੀਅਲ ਗੈਸ ਸਲੰਡਰ ਦੀ ਕੀਮਤ ਵਿੱਚ ਵੀ 75 ਰੁਪਏ ਦਾ ਇਜ਼ਾਫਾ ਹੋਇਆ ਹੈ। 15 ਦਿਨਾਂ ‘ਚ ਹੀ 50 ਰੁਪਏ ਮਹਿੰਗਾ ਹੋਇਆ ਸਲੰਡਰ
ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ 17 ਅਗਸਤ ਨੂੰ ਰਸੋਈ ਗੈਸ ਸਲੰਡਰ ਦੀ ਕੀਮਤ ਵਿੱਚ 25 ਰੁਪਏ ਦਾ ਵਾਧਾ ਕੀਤਾ ਗਿਆ ਸੀ। ਯਾਨੀ 15 ਦਿਨਾਂ ਵਿੱਚ ਹੀ ਗੈਰ ਸਬਸਿਡੀ ਵਾਲਾ ਸਲੰਡਰ 50 ਰੁਪਏ ਮਹਿੰਗਾ ਹੋ ਚੁੱਕਿਆ ਹੈ।
8 ਮਹੀਨਿਆਂ ‘ਚ 190 ਰੁਪਏ ਮਹਿੰਗਾ ਹੋਇਆ ਸਲੰਡਰ
ਦਿੱਲੀ ਵਿੱਚ ਇਸ ਸਾਲ 1 ਜਨਵਰੀ ਨੂੰ LPG ਸਲੰਡਰ ਦੀ ਕੀਮਤ 694 ਰੁਪਏ ਸੀ। ਹੁਣ ਸਲੰਡਰ ਦੀ ਕੀਮਤ 884.5 ਰੁਪਏ ਹੈ। ਯਾਨੀ ਜਨਵਰੀ ਤੋਂ ਹੁਣ ਤੱਕ ਘਰੇਲੂ ਗੈਸ ਸਲੰਡਰ ਦੀ ਕੀਮਤ 190.50 ਰੁਪਏ ਵੱਧ ਗਈ ਹੈ।
7 ਸਾਲਾਂ ‘ਚ ਸਲੰਡਰ ਦੀ ਕੀਮਤ ਦੁੱਗਣੀ ਤੋਂ ਵੱਧ ਹੋਈ
ਪਿਛਲੇ 7 ਸਾਲਾਂ ਵਿੱਚ ਘਰੇਲੂ ਗੈਸ ਸਲੰਡਰ(14.2 ਕਿਲੋਗ੍ਰਾਮ) ਦੀ ਕੀਮਤ ਦੁੱਗਣੀ ਹੋ ਕੇ 884.50 ਰੁਪਏ ਪ੍ਰਤੀ ਸਲੰਡਰ ਹੋ ਗਈ ਹੈ। 1 ਮਾਰਚ, 2014 ਨੂੰ 14.2 ਕਿਲੋ ਦੇ ਘਰੇਲੂ ਗੈਸ ਸਲੰਡਰ ਦੀ ਕੀਮਤ 410.5 ਰੁਪਏ ਸੀ, ਜੋ ਹੁਣ 884.50 ਰੁਪਏ ਹੈ ।
