ਬਿਓਰੋ। ਕਰਨਾਲ ਵਿੱਚ ਕਿਸਾਨਾਂ ‘ਤੇ ਲਾਠੀਚਾਰਜ ਦੇ ਮੁੱਦੇ ਨੂੰ ਲੈ ਕੇ ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟਰ ਅਤੇ ਪੰਜਾਬ ਦੇ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਵਿਚਾਲੇ ਜੁਬਾਨੀ ਜੰਗ ਜਾਰੀ ਹੈ। ਟਵਿਟਰ ‘ਤੇ ਦੋਵੇਂ ਖੁਦ ਨੂੰ ਕਿਸਾਨ ਹਿਤੈਸ਼ੀ ਅਤੇ ਦੂਜੇ ਨੂੰ ਵਿਰੋਧੀ ਸਾਬਿਤ ਕਰਨ ਵਿੱਚ ਲੱਗੇ ਹਨ। ਖੱਟਰ ਨੇ ਸੋਮਵਾਰ ਰਾਤ ਨੂੰ ਕੈਪਟਨ ਅੱਗੇ 8 ਸਵਾਲ ਰੱਖੇ ਹਨ, ਜਿਹਨਾਂ ਦਾ 24 ਘੰਟਿਆਂ ਬਾਅਦ ਜਵਾਬ ਦਿੰਦੇ ਹੋਏ ਕੈਪਟਨ ਨੇ ਹਰਿਆਣਾ ਸਰਕਾਰ ਦੇ ਦਾਅਵਿਆਂ ਨੂੰ ਹਾਸੋਹੀਣਾ ਦੱਸਿਆ ਅਤੇ ਕਿਹਾ ਕਿ ਉਹਨਾਂ ਦੇ ਝੂਠੇ ਦਾਅਵੇ ਕਿਸਾਨਾਂ ਦੇ ਨਾਲ ਕੀਤੇ ਉਹਨਾਂ ਦੇ ਗੁਨਾਹ ਨੂੰ ਲੁਕੋ ਨਹੀਂ ਸਕਣਗੇ।
MSP ‘ਤੇ ਆਹਮੋ-ਸਾਹਮਣੇ
ਮਨੋਹਰ ਲਾਲ- ਹਰਿਆਣਾ ਝੋਨਾ, ਕਣਕ, ਸਰੋਂ, ਬਾਜਰਾ, ਛੋਲੇ, ਮੂੰਗ, ਕੌਟਨ ਸਣੇ 10 ਫਸਲਾਂ ਘੱਟੋ-ਘੱਟ ਸਮਰਥਨ ਮੁੱਲ ‘ਤੇ ਖਰੀਦਦਾ ਹੈ। ਪੇਮੈਂਟ ਸਿੱਧੇ ਕਿਸਾਨ ਦੇ ਖਾਤੇ ਵਿੱਚ ਜਾਂਦੀ ਹੈ। ਤੁਸੀਂ ਕਿੰਨੀਆਂ ਫਸਲਾਂ ਖਰੀਦਦੇ ਹੋ?
ਕੈਪਟਨ ਅਮਰਿੰਦਰ ਸਿੰਘ- MSP ਵਿੱਚ ਕਣਕ ਅਤੇ ਝੋਨੇ ਦੀ ਖਰੀਦ ‘ਚ ਅਸੀਂ ਅੱਗੇ ਹਾਂ। ਉਸ ਵਿੱਚ ਤੁਹਾਡੇ ਨਾਲ ਤੁਲਨਾ ਨਹੀਂ ਹੋ ਸਕਦੀ।
ਅਦਾਇਗੀ ‘ਤੇ ਵੀ ਸਵਾਲ-ਜਵਾਬ
ਮਨੋਹਰ ਲਾਲ- ਭੁਗਤਾਨ ਵਿੱਚ 72 ਘੰਟਿਆਂ ਦੀ ਦੇਰੀ ਹੋਣ ‘ਤੇ ਹਰਿਆਣਾ 12% ਵਿਆਜ ਦਿੰਦਾ ਹੈ। ਕੀ ਪੰਜਾਬ ਕੁਝ ਦਿੰਦਾ ਹੈ?
ਕੈਪਟਨ ਅਮਰਿੰਦਰ ਸਿੰਘ- ਸਾਨੂੰ ਵਿਆਜ ਅਦਾ ਕਰਨ ਦੀ ਜ਼ਰੂਰਤ ਨਹੀਂ ਹੈ, ਕਿਉਂਕਿ ਅਸੀਂ ਕਿਸਾਨਾਂ ਨੂੰ ਉਨ੍ਹਾਂ ਦੇ ਖਾਤਿਆਂ ਵਿੱਚ ਸਿੱਧੇ 72 ਘੰਟਿਆਂ ਦੇ ਅੰਦਰ ਭੁਗਤਾਨ ਕਰਦੇ ਹਾਂ। ਇਹ ਤੁਹਾਡੀ ਸਰਕਾਰ ਦੀ ਖਰੀਦ ਪ੍ਰਕਿਰਿਆ ਦੇ ਮਾੜੇ ਪ੍ਰਬੰਧਨ ਅਤੇ ਕਿਸਾਨਾਂ ਪ੍ਰਤੀ ਤੁਹਾਡਾ ਰੁੱਖਾ ਰਵੱਈਆ ਹੈ, ਜੋ ਭੁਗਤਾਨ ਵਿੱਚ ਦੇਰੀ ਦਾ ਕਾਰਨ ਬਣਦਾ ਹੈ।
ਗੰਨੇ ਦੇ ਭਾਅ ‘ਤੇ ਤਕਰਾਰ
ਮਨੋਹਰ ਲਾਲ- ਹਰਿਆਣਾ ਪਿਛਲੇ 7 ਸਾਲਾਂ ਤੋਂ ਆਪਣੇ ਕਿਸਾਨਾਂ ਨੂੰ ਗੰਨੇ ਦਾ ਸਭ ਤੋਂ ਵੱਧ ਰੇਟ ਦੇ ਰਿਹਾ ਹੈ। ਪੰਜਾਬ ਨੂੰ ਰੇਟ ਵਧਾਉਣ ਲਈ ਕਿਸਾਨਾਂ ਦੇ ਪ੍ਰਦਰਸ਼ਨ ਦਾ ਇੰਤਜਾਰ ਕਿਉਂ ਕਰਨਾ ਪਿਆ?
ਕੈਪਟਨ ਅਮਰਿੰਦਰ ਸਿੰਘ- ਅਸੀਂ ਨਾ ਸਿਰਫ਼ ਤੁਹਾਡੇ ਬਰਾਬਰ, ਸਗੋਂ ਤੁਹਾਡੇ ਤੋਂ ਵੱਧ ਆਪਣੇ ਕਿਸਾਨਾਂ ਨੂੰ ਗੰਨੇ ‘ਤੇ MSP ਦਿੱਤੀ ਹੈ, ਜੋ ਕਿ 360 ਰੁਪਏ ਪ੍ਰਤੀ ਕੁਇੰਟਲ SAP ਹੈ। ਅਸੀਂ ਇਸ ਰਕਮ ਨੂੰ ਹੋਰ ਵਧਾ ਦਿੰਦੇ, ਜੇਕਰ ਤੁਹਾਡੀ ਬੀਜੇਪੀ ਸਰਕਾਰ ਨੇ ਕੁਝ ਪੈਸੇ ਛੱਡ ਦਿੱਤੇ ਹੁੰਦੇ।
ਪਰਾਲੀ ਪ੍ਰਬੰਧਨ ‘ਤੇ ਵੀ ਪੰਗਾ
ਮਨੋਹਰ ਲਾਲ- ਪਰਾਲੀ ਪ੍ਰਬੰਧਨ ਲਈ ਹਰਿਆਣਾ ਇੱਕ ਹਜਾਰ ਰੁਪਏ ਪ੍ਰਤੀ ਏਕੜ ਦਿੰਦਾ ਹੈ। ਉਸਦੀ ਵਿਕਰੀ ਵਿੱਚ ਵੀ ਮਦਦ ਕਰਦਾ ਹੈ, ਪੰਜਾਬ ਕੀ ਦਿੰਦਾ ਹੈ?
ਕੈਪਟਨ ਅਮਰਿੰਦਰ ਸਿੰਘ- ਤੁਸੀਂ ਜੋ ਰੱਟ ਲਗਾਈ ਹੋਈ ਹੈ ਕਿ ਤੁਸੀਂ ਪਰਾਲੀ ਪ੍ਰਬੰਧਨ ਲਈ 1000 ਰੁਪਏ ਪ੍ਰਤੀ ਏਕੜ ਕਿਸਾਨਾਂ ਨੂੰ ਦਿੰਦੇ ਹੋ ਤਾਂ ਤੁਹਾਡੀ ਜਾਣਕਾਰੀ ਲਈ ਮੈਂ ਦੱਸ ਦਿੰਦਾ ਹਾਂ ਕਿ ਅਸੀਂ ਪੰਜਾਬ ਵਿੱਚ ਆਪਣੇ ਕਿਸਾਨਾਂ ਨੂੰ ਪਰਾਲੀ ਪ੍ਰਬੰਧਨ ਲਈ 2500 ਰੁਪਏ ਪ੍ਰਤੀ ਏਕੜ ਦਿੰਦੇ ਹਾਂ, ਜੋ ਕਿ ਵਿੱਤੀ ਸਾਲ 2020-21 ਵਿੱਚ 19.93 ਕੁੱਲ ਰਕਮ ਸੀ ਜਿਸ ਨਾਲ 31231 ਕਿਸਾਨਾਂ ਨੂੰ ਫ਼ਾਇਦਾ ਹੋਇਆ ਸੀ।
ਫਸਲੀ ਵਿਭਿੰਨਤਾ ‘ਤੇ ਵੀ ਵਾਰ-ਪਲਟਵਾਰ
ਮਨੋਹਰ ਲਾਲ- ਹਰਿਆਣਾ ਨੇ ਸਿੰਚਾਈ ਦੇ ਪਾਣੀ ਦੇ ਬਚਾਅ ਲਈ 85 ਫੀਸਦ ਸਬਸਿਡੀ ਦੇ ਨਾਲ ਮਾਈਕਰੋ ਇਰੀਗੇਸ਼ਨ ਸਕੀਮ ਸ਼ੁਰੂ ਕੀਤੀ ਹੈ। ਕੀ ਪੰਜਾਬ ਨੂੰ ਚਿੰਤਾ ਵੀ ਹੈ ਕਿ ਲਗਾਤਾਰ ਗਹਿਰਾਉਂਦੇ ਭੂਜਲ ਪੱਧਰ ਨਾਲ ਕਿਸਾਨੀ ਖਤਮ ਹੋ ਜਾਵੇਗੀ?
ਕੈਪਟਨ ਅਮਰਿੰਦਰ ਸਿੰਘ- ਅਸੀਂ ਫਸਲੀ ਵਿਭਿੰਨਤਾ ਨੂੰ ਉਤਸ਼ਾਹਤ ਕਰਨ ਲਈ ਪਿਛਲੇ 3 ਸਾਲਾਂ ਵਿੱਚ ਪੰਜਾਬ ਵਿੱਚ ਕਪਾਹ ਅਤੇ ਮੱਕੀ ਉਤਪਾਦਕਾਂ ਨੂੰ ਕਰੋੜਾਂ ਰੁਪਏ ਦਿੱਤੇ ਹਨ। ਅਸੀਂ ਉਨ੍ਹਾਂ ਕਿਸਾਨਾਂ ਨੂੰ 4 ਰੁਪਏ ਪ੍ਰਤੀ ਯੂਨਿਟ ਬਿਜਲੀ ਵੀ ਦਿੰਦੇ ਹਾਂ, ਜੋ ਪਾਣੀ ਬਚਾਉਣ ਦੀਆਂ ਤਕਨੀਕਾਂ ਅਪਣਾ ਕੇ ਬਦਲਵੀਆਂ ਫਸਲਾਂ ਦੀ ਬਿਜਾਈ ਕਰਕੇ ਬਿਜਲੀ ਬਚਾਉਂਦੇ ਹਨ।
ਮਨੋਹਰ ਲਾਲ ‘ਤੇ ਕੈਪਟਨ ਦੀਆਂ ਤਲਖ ਟਿੱਪਣੀਆਂ
ਕੈਪਟਨ ਇਥੇ ਹੀ ਨਹੀਂ ਰੁਕੇ, ਉਹਨਾਂ ਅੱਗੇ ਕਿਹਾ, “ਮਨੋਹਰ ਲਾਲ ਖੱਟਰ ਤੁਸੀਂ ਜੋ ਆਪਣੇ ਕਿਸਾਨ ਪੱਖੀ ਦਾਅਵਿਆਂ ਨਾਲ ਹਰਿਆਣਾ ਸਰਕਾਰ ਦੀ ਕਿਸਾਨਾਂ ਨਾਲ ਕੀਤੀ ਵਧੀਕੀ ਨੂੰ ਲੁਕਾਉਣ ਦੀ ਕੋਸ਼ਿਸ਼ ਕੀਤੀ ਹੈ, ਉਹ ਸਰਾਸਰ ਹਾਸੋਹੀਣੀ ਹੈ। ਤੁਹਾਡੀਆਂ ਇਹ ਗੱਲਾਂ ਤੁਹਾਡੇ ਗੁਨਾਹਾਂ ਨੂੰ ਨਹੀਂ ਲੁਕਾ ਸਕਦੀਆਂ, ਜੋ ਤੁਸੀਂ ਕਿਸਾਨਾਂ ਨਾਲ ਕੀਤੇ ਹਨ।“
ਕੈਪਟਨ ਨੇ ਕਿਹਾ, “ਮਨੋਹਰ ਲਾਲ ਖੱਟਰ ਤੁਹਾਨੂੰ ਬਿਲਕੁੱਲ ਵੀ ਸ਼ਰਮ ਨਹੀਂ ਹੈ, ਤੁਸੀਂ ਕਿਸਾਨਾਂ ਤੋਂ ਮੁਆਫ਼ੀ ਮੰਗਣ ਦੀ ਬਜਾਏ ਪੁਲਿਸ ਵੱਲੋਂ ਕੀਤੇ ਬੇਰਹਿਮ ਲਾਠੀਚਾਰਜ ਤੇ ਕਰਨਾਲ ਦੇ SDM ਦੇ ਬੇਹੁਦਾ ਫੈਸਲੇ ਦਾ ਸਮਰਥਨ ਕਰ ਰਹੇ ਹੋ। ਇਹਨਾਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਕਰ ਰਹੇ ਹੋ, ਜਿਸਨੂੰ ਪੂਰੀ ਦੁਨੀਆ ਨਿੰਦ ਰਹੀ ਹੈ।“
ਕੈਪਟਨ ਨੇ ਮਨੋਹਰ ਲਾਲ ਤੋਂ ਸਵਾਲ ਪੁੱਛਦੇ ਹੋਏ ਕਿਹਾ, “ਜੇਕਰ ਤੁਸੀਂ ਆਪਣੇ ਕਿਸਾਨਾਂ ਲਈ ਇੰਨਾ ਕੁੱਝ ਕੀਤਾ ਹੈ, ਜਿਸਦਾ ਤੁਸੀਂ ਦਾਅਵਾ ਕਰ ਰਹੇ ਹੋ ਤਾਂ ਫਿਰ ਤੁਹਾਡੇ ਆਪਣੇ ਸੂਬੇ ਦੇ ਕਿਸਾਨ ਤੁਹਾਡੇ ਤੋਂ ਤੇ ਤੁਹਾਡੀ ਬੀਜੇਪੀ ਸਰਕਾਰ ਤੋਂ ਗੁੱਸੇ ਕਿਉਂ ਹਨ? ਤੁਸੀਂ ਲੋਕਾਂ ਨੂੰ ਇਹ ਸਮਝਾਉਣ ਵਿੱਚ ਨਾਕਾਮਯਾਬ ਹੋ ਗਏ ਹੋ ਕਿ ਕਿਸਾਨ ਸੰਘਰਸ਼ ਲਈ ਪੰਜਾਬ ਤੇ ਉੱਥੋਂ ਦੇ ਕਿਸਾਨ ਜ਼ਿੰਮੇਵਾਰ ਹਨ। ਇਸ ਲਈ ਹੁਣ ਤੁਸੀਂ ਸਿਰਫ਼ ਤੇ ਸਿਰਫ਼ ਝੂਠ ਦਾ ਸਹਾਰਾ ਲੈ ਰਹੇ ਹੋ।“
ਖੱਟਰ ਦੇ ਇਸ ਬਿਆਨ ਨਾਲ ਸ਼ੁਰੂ ਹੋਈ ‘ਜੰਗ’
ਦਰਅਸਲ, ਹਰਿਆਣਾ ਦੇ ਸੀਐੱਮ ਮਨੋਹਰ ਲਾਲ ਖੱਟਰ ਨੇ ਕਿਸਾਨ ਅੰਦੋਲਨ ਲਈ ਪੰਜਾਬ ਸਰਕਾਰ ‘ਤੇ ਇਲਜਾਮ ਲਗਾਇਆ ਸੀ। ਖੱਟਰ ਨੇ ਕਿਹਾ ਸੀ ਕਿ ਪੰਜਾਬ ਸਰਕਾਰ ਨੇ ਕਿਸਾਨਾਂ ਨੂੰ ਉਕਸਾਇਆ ਹੈ, ਜਿਸ ਤੋਂ ਬਾਅਦ ਕੈਪਟਨ ਨੇ ਕਿਹਾ ਸੀ ਕਿ ਕਿਸਾਨਾਂ ਦੇ ਗੁੱਸੇ ਲਈ ਅਸੀਂ ਨਹੀਂ, ਖੁਦ ਬੀਜੇਪੀ ਜਿੰਮੇਵਾਰ ਹੈ। ਕੈਪਟਨ ਨੇ ਕਿਹਾ ਸੀ ਕਿ ਕਰਨਾਲ ਵਿੱਚ ਹੋਏ ਲਾਠੀਚਾਰਜ ਨਾਲ ਬੀਜੇਪੀ ਦੇ ਕਿਸਾਨ ਵਿਰੋਧੀ ਏਜੰਡੇ ਦਾ ਪਰਦਾਫਾਸ਼ ਹੋਇਆ ਹੈ।
