ਚੰਡੀਗੜ੍ਹ। ਪੰਜਾਬ ਦੇ ਮੁੱਖ ਮੰਤਰੀ ਵਜੋਂ ਅਹੁਦਾ ਸੰਭਾਲਦੇ ਹੀ ਸੀਐੱਮ ਚਰਨਜੀਤ ਸਿੰਘ ਚੰਨੀ ਪੂਰੇ ਐਕਸ਼ਨ ਵਿੱਚ ਨਜ਼ਰ ਆ ਰਹੇ ਹਨ। ਬਤੌਰ ਮੁੱਖ ਮੰਤਰੀ ਆਪਣੀ ਪਹਿਲੀ ਕਾਨਫ਼ਰੰਸ ਦੌਰਾਨ ਹੀ ਉਹਨਾਂ ਨੇ ਆਪਣੇ ਇਰਾਦੇ ਜਾਹਿਰ ਕਰ ਦਿੱਤੇ। ਖੇਤੀ ਕਾਨੂੰਨਾਂ ਤੋਂ ਲੈ ਕੇ ਰੇਤ ਮਾਫੀਆ ਸਣੇ ਹਾਈਕਮਾਂਡ ਦੇ 18 ਨੁਕਾਤੀ ਫਾਰਮੂਲੇ ‘ਤੇ ਉਹਨਾਂ ਨੇ ਗੱਲ ਕੀਤੀ।
PC ਦੀ ਸ਼ੁਰੂਆਤ ‘ਚ ਹੀ ਹੋਏ ਭਾਵੁਕ
ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਜਿਵੇਂ ਹੀ ਪ੍ਰੈੱਸ ਕਾਨਫ਼ਰੰਸ ਸ਼ੁਰੂ ਕੀਤੀ, ਤਾਂ ਸਭ ਤੋਂ ਪਹਿਲਾਂ ਉਹਨਾਂ ਕਾਂਗਰਸ ਹਾਈਕਮਾਂਡ ਖਾਸਕਰ ਰਾਹੁਲ ਗਾਂਧੀ ਦਾ ਧੰਨਵਾਦ ਕੀਤਾ। ਚੰਨੀ ਨੇ ਕਿਹਾ ਕਿ ਉਹ ਇੱਕ ਆਮ ਪਰਿਵਾਰ ਨਾਲ ਸਬੰਧ ਰਖਦੇ ਹਨ, ਇਸ ਲਈ ਉਹਨਾਂ ਨੂੰ ਮੁੱਖ ਮੰਤਰੀ ਬਣਾਏ ਜਾਣ ਦਾ ਮਤਲਬ ਹੈ ਕਿ ਸੂਬੇ ਵਿੱਚ ਹੁਣ ਆਮ ਆਦਮੀ ਦੀ ਸਰਕਾਰ ਹੈ। ਗਰੀਬ ਦੀ ਸਰਕਾਰ ਹੈ।
ਇਹ ਸਭ ਬੋਲਦੇ ਹੋਏ ਸੀਐੱਮ ਭਾਵੁਕ ਵੀ ਹੋ ਗਏ। ਖਾਸ ਗੱਲ ਰਹੀ ਕਿ ਜਦੋਂ-ਜਦੋਂ ਚੰਨੀ ਭਾਵੁਕ ਹੋਏ, ਤਾਂ ਸਿੱਧੂ ਕਦੇ ਉਹਨਾਂ ਦੀ ਪਿੱਠ ਥਪਥਪਾਉਂਦੇ ਰਹੇ ਤਾਂ ਕਦੇ ਹੱਥ ਫੜਦੇ ਨਜ਼ਰ ਆਏ।
ਚੰਨੀ ਨੇ ਇਸ ਦੌਰਾਨ ਰਾਹੁਲ ਗਾਂਧੀ ਨੂੰ ਇੱਕ ਕ੍ਰਾਂਤੀਕਾਰੀ ਆਗੂ ਦੱਸਿਆ। ਇਸਦੇ ਨਾਲ ਹੀ ਸਾਬਕੀ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦੀ ਵੀ ਤਾਰੀਫ਼ ਕੀਤੀ। ਉਹਨਾਂ ਨੇ ਕੈਪਟਨ ਨੂੰ ਪਾਣੀਆਂ ਦਾ ਰਾਖਾ ਵੀ ਦੱਸਿਆ।
ਕਿਸਾਨਾਂ ‘ਤੇ ਮੁਸੀਬਤ ਨਹੀਂ ਆਉਣ ਦਵਾਂਗਾ- ਚੰਨੀ
ਚੰਨੀ ਨੇ ਆਪਣੀ ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਕੇਂਦਰ ਤੋਂ ਖੇਤੀ ਕਾਨੂੰਨ ਰੱਦ ਕਰਨ ਦੀ ਮੰਗ ਕੀਤੀ ਅਤੇ ਕਿਹਾ ਕਿ ਉਹਨਾਂ ਦੀ ਸਰਕਾਰ ਗਰੀਬਾਂ ਦੀ ਸਰਕਾਰ ਹੈ ਅਤੇ ਉਹ ਕਿਸਾਨਾਂ ਦੇ ਨਾਲ ਹਨ। ਚੰਨੀ ਨੇ ਕਿਹਾ, “ਕਿਸਾਨ ਡੁੱਬੇਗਾ ਤਾਂ ਦੇਸ਼ ਡੁੱਬੇਗਾ, ਮੈਂ ਕਿਸਾਨਾਂ ‘ਤੇ ਕੋਈ ਮੁਸੀਬਤ ਨਹੀਂ ਆਉਣ ਦਵਾਂਗਾ। ਜੇਕਰ ਕਿਸਾਨਾਂ ‘ਤੇ ਕੋਈ ਮੁਸੀਬਤ ਆਈ, ਤਾਂ ਆਪਣਾ ਗਲਾ ਅੱਗੇ ਕਰ ਦਵਾਂਗਾ।”
ਸੀਐੱਮ ਦੀ ਰੇਤ ਮਾਫੀਆ ਨੂੰ ਖੁੱਲ੍ਹੀ ਚੇਤਾਵਨੀ !
ਮੁੱਖ ਮੰਤਰੀ ਨੇ ਰੇਤ ਮਾਫੀਆ ਨੂੰ ਖੁੱਲ੍ਹੀ ਚੇਤਾਵਨੀ ਵੀ ਦਿੱਤੀ। ਚੰਨੀ ਨੇ ਕਿਹਾ ਕਿ ਉਹਨਾਂ ਦੀ ਸਰਕਾਰ ਰੇਤ ਮਾਫੀਆ ਨੂੰ ਬਿਲਕੁੱਲ ਬਰਦਾਸ਼ਤ ਨਹੀਂ ਕਰੇਗੀ। ਉਹਨਾਂ ਕਿਹਾ, “ਮੈਂ ਤੇ ਮੇਰੀ ਕੈਬਨਿਟ ਇਹ ਨਹੀਂ ਸੁਣਨਾ ਚਾਹੁੰਦੇ ਕਿ ਪੰਜਾਬ ਵਿੱਚ ਰੇਤ ਮਾਫੀਆ ਹੈ। ਮੈਨੂੰ ਓਹੀ ਬੰਦੇ ਮਿਲਣ, ਜੋ ਪੰਜਾਬ ਦੀ ਸੇਵਾ ਕਰਨਾ ਚਾਹੁੰਦੇ ਹਨ। ਮੈਂ ਗਰੀਬ ਦਾ ਨੁਮਾਇੰਦਾ ਹਾਂ।“
ਬੇਅਦਬੀ ਤੇ ਗੋਲੀ ਕਾਂਡ ‘ਚ ਮਿਲੇਗਾ ਇਨਸਾਫ਼?
ਪੰਜਾਬ ਦੇ ਜਿਸ ਅਹਿਮ ਮੁੱਦੇ ਨੇ ਕਾਂਗਰਸ ਪਾਰਟੀ ਵਿੱਚ ਘਮਸਾਣ ਦੀ ਸ਼ੁਰੂਆਤ ਕੀਤੀ ਸੀ, ਉਹ ਮੁੱਦਾ ਬਰਗਾੜੀ ਬੇਅਦਬੀ ਤੇ ਗੋਲੀ ਕਾਂਡ ਵਿੱਚ ਇਨਸਾਫ਼ ਦਾ ਮੁੱਦਾ ਹੈ। ਸਿੱਖਾਂ ਦੇ ਨਾਲ-ਨਾਲ ਹਰ ਵਰਗ ਦੀਆਂ ਭਾਵਨਾਵਾਂ ਇਸ ਨਾਲ ਜੁੜੀਆਂ ਹਨ ਅਤੇ ਹਰ ਪੰਜਾਬੀ ਦੋਸ਼ੀਆਂ ਨੂੰ ਸਲਾਖਾਂ ਪਿੱਛੇ ਵੇਖਣਾ ਚਾਹੁੰਦਾ ਹੈ। ਚੰਨੀ ਨੇ ਆਪਣੀ ਪਹਿਲੀ ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਬੇਅਦਬੀ ਮਾਮਲੇ ਦਾ ਜਿਕਰ ਤਾਂ ਨਹੀਂ ਕੀਤਾ, ਪਰ ਬਿਨ੍ਹਾਂ ਕਿਸੇ ਨੂੰ ਦੋਸ਼ੀ ਠਹਿਰਾਏ ਇਹ ਜ਼ਰੂਰ ਕਿਹਾ ਕਿ ਉਹਨਾਂ ਦੀ ਸਰਕਾਰ ਦੇ ਕਾਰਜਕਾਲ ਦੌਰਾਨ ਸਾਰਿਆਂ ਨੂੰ ਇਨਸਾਫ਼ ਮਿਲੇਗਾ ਅਤੇ ਕਿਸੇ ਨਾਲ ਰਿਆਇਤ ਨਹੀਂ ਵਰਤੀ ਜਾਵੇਗੀ।
ਕਿਸਾਨਾਂ ਨੂੰ ਬਿਜਲੀ-ਪਾਣੀ ਮੁਆਫ਼- ਚੰਨੀ
ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਚੰਨੀ ਨੇ ਐਲਾਨ ਕੀਤਾ ਕਿ ਉਹਨਾਂ ਦੀ ਸਰਕਾਰ ਦੌਰਾਨ ਕਿਸਾਨਾਂ ਨੂੰ ਬਿਜਲੀ ਮੁਆਫ਼ ਰਹੇਗੀ। ਪਿੰਡਾਂ ਵਿੱਚ ਪਾਣੀ ਸਪਲਾਈ ਵਾਲੀਆਂ ਮੋਟਰਾਂ ਦਾ ਵੀ ਬਿੱਲ ਨਹੀਂ ਲਿਆ ਜਾਵੇਗਾ। ਉਹਨਾਂ ਕਿਹਾ, “ਜਿਹਨਾਂ ਦੇ ਬਿੱਲ ਬਕਾਇਆ ਹਨ, ਉਹ ਮੁਆਫ਼ ਕਰਾਂਗੇ। ਕੱਟੇ ਕੁਨੈਕਸ਼ਨ ਬਹਾਲ ਹੋਣਗੇ। ਬਿੱਲ ਨਾ ਦੇਣ ‘ਤੇ ਕਿਸੇ ਦਾ ਕੁਨੈਕਸ਼ਨ ਨਹੀਂ ਕੱਟਿਆ ਜਾਵੇਗਾ।”
ਹੜਤਾਲੀ ਕਰਮਚਾਰੀਆਂ ਨੂੰ ਚੰਨੀ ਦੀ ਅਪੀਲ
ਨਵੇਂ ਮੁੱਖ ਮੰਤਰੀ ਨੇ ਪੰਜਾਬ ਸਰਕਾਰ ਖਿਲਾਫ਼ ਮੋਰਚਾ ਖੋਲ੍ਹ ਕੇ ਬੈਠੇ ਹੜਤਾਲੀ ਕਰਮਚਾਰੀਆਂ ਨੂੰ ਵੀ ਕੰਮ ‘ਤੇ ਵਾਪਸ ਪਰਤਣ ਦੀ ਅਪੀਲ ਕੀਤੀ। ਉਹਨਾਂ ਕਿਹਾ ਕਿ ਕਰਮਚਾਰੀ ਮੇਰੇ ‘ਤੇ ਭਰੋਸਾ ਰੱਖਣ। ਜੋ ਕਰਮਚਾਰੀ ਪੱਕੇ ਹੋਣ ਵਾਲੇ ਹੋਣਗੇ, ਉਹਨਾਂ ਨੂੰ ਜ਼ਰੂਰ ਪੱਕਾ ਕੀਤਾ ਜਾਵੇਗਾ।
ਮੈਨੂੰ ਕਦੇ ਵੀ ਕੋਈ ਵੀ ਮਿਲ ਸਕਦਾ ਹੈ- ਚੰਨੀ
ਜਿਵੇਂ ਕਿ ਸੂਬੇ ਦੇ ਸਾਬਕਾ ਸੀਐੱਮ ‘ਤੇ ਅਕਸਰ ਇਹ ਇਲਜਾਮ ਲਗਦੇ ਰਹੇ ਹਨ, ਕਿ ਉਹ ਆਪਣੇ ਫਾਰਮ ਹਾਊਸ ਤੋਂ ਹੀ ਸਰਕਾਰ ਚਲਾਉਂਦੇ ਰਹੇ ਅਤੇ ਕਦੇ ਆਪਣੇ ਵਿਧਾਇਕਾਂ-ਮੰਤਰੀਆਂ ਤੱਕ ਨੂੰ ਨਹੀਂ ਮਿਲਦੇ ਸਨ। ਇਸੇ ਤੋਂ ਸਬਕ ਲੈਂਦੇ ਹੋਏ ਚਰਨਜੀਤ ਚੰਨੀ ਨੇ ਕਿਹਾ ਕਿ ਉਹ ਹਮੇਸ਼ਾ ਆਪਣੇ ਦਫਤਰ ਵਿੱਚ ਹੀ ਮੌਜੂਦ ਰਹਿਣਗੇ, ਜਿਥੇ ਕੋਈ ਵੀ ਉਹਨਾਂ ਨਾਲ ਮੁਲਾਕਾਤ ਕਰ ਸਕਦਾ ਹੈ।
