ਪੰਜਾਬ ਦੇ ਮੁੱਖ ਮੰਤਰੀ ਦੀ ਕੁਰਸੀ ਛੱਡਣ ਤੋਂ ਬਾਅਦ ਹੁਣ ਕੈਪਟਨ ਅਮਰਿੰਦਰ ਸਿੰਘ ਆਪਣੀ ਨਵੀਂ ਸਿਆਸੀ ਪਾਰੀ ਖੇਡਣ ਦੇ ਮੂਡ ਵਿੱਚ ਨਜ਼ਰ ਆ ਰਹੇ ਹਨ। ਚਰਚਾ ਪੂਰੇ ਸਿਖਰਾਂ ‘ਤੇ ਹੈ ਕਿ ਕੈਪਟਨ ਬੀਜੇਪੀ ਵਿੱਚ ਸ਼ਾਮਲ ਹੋਣ ਜਾ ਰਹੇ ਹਨ। ਇਸ ਚਰਚਾ ਨੇ ਹੋਰ ਵੀ ਜੋਰ ਫੜ ਲਿਆ, ਜਦੋਂ ਬੁੱਧਵਾਰ ਨੂੰ ਸਾਬਕਾ ਸੀਐੱਮ ਦਿੱਲੀ ਵਿੱਚ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨਾਲ ਮੁਲਾਕਾਤ ਲਈ ਉਹਨਾਂ ਦੀ ਰਿਹਾਇਸ਼ ਵਿਖੇ ਪਹੁੰਚੇ। ਦੋਵੇਂ ਆਗੂਆਂ ਵਿਚਾਲੇ ਇਹ ਮੁਲਕਾਤ ਕਰੀਬ 45 ਮਿੰਟਾਂ ਤੱਕ ਚੱਲੀ।
ਸ਼ਾਹ ਨਾਲ ਕਿਸਾਨ ਅੰਦੋਲਨ ‘ਤੇ ਗੱਲ ਹੋਈ- ਕੈਪਟਨ
ਅਮਿਤ ਸ਼ਾਹ ਨਾਲ ਮੁਲਾਕਾਤ ਤੋਂ ਬਾਅਦ ਕੈਪਟਨ ਅਮਰਿੰਦਰ ਸਿੰਘ ਨੇ ਇਸ ਨੂੰ ਖੇਤੀ ਕਾਨੂੰਨਾਂ ਨਾਲ ਸਬੰਧਤ ਮੁਲਾਕਾਤ ਕਰਾਰ ਦਿੱਤਾ। ਕੈਪਟਨ ਨੇ ਟਵਿਟਰ ‘ਤੇ ਲਿਖਿਆ, “ਦਿੱਲੀ ‘ਚ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਜੀ ਨਾਲ ਮੁਲਾਕਾਤ ਹੋਈ। ਉਹਨਾਂ ਨਾਲ ਖੇਤੀ ਕਾਨੂੰਨਾਂ ਦੇ ਵਿਰੁੱਧ ਚੱਲ ਰਹੇ ਕਿਸਾਨ ਅੰਦੋਲਨ ਬਾਰੇ ਚਰਚਾ ਹੋਈ ਅਤੇ ਮੈਂ ਉਹਨਾਂ ਨੂੰ ਖੇਤੀ ਕਾਨੂੰਨ ਤੁਰੰਤ ਰੱਦ ਕਰਕੇ ਅਤੇ MSP ਦੀ ਗਾਰੰਟੀ ਦੇ ਕੇ ਇਹ ਮਸਲਾ ਹੱਲ ਕਰਨ ਦੀ ਅਪੀਲ ਕੀਤੀ ਹੈ। ਇਸਦੇ ਨਾਲ ਹੀ ਖੇਤੀ ਵਿਭਿੰਨਤਾ ਵਿੱਚ ਪੰਜਾਬ ਨੂੰ ਸਮਰਥਨ ਦੇਣ ਦੀ ਵੀ ਅਪੀਲ ਕੀਤੀ ਹੈ। #NoFarmersNoFood”
Met Union Home Minister @AmitShah ji in Delhi. Discussed the prolonged farmers agitation against #FarmLaws & urged him to resolve the crisis urgently with repeal of the laws & guarantee MSP, besides supporting Punjab in crop diversification. #NoFarmersNoFood
— Capt.Amarinder Singh (@capt_amarinder) September 29, 2021
ਮੁਲਾਕਾਤ ਤੈਅ ਸੀ, ਤਾਂ ਲੁਕੋਈ ਕਿਉਂ?
ਬੇਸ਼ੱਕ ਅੱਜ ਕੈਪਟਨ ਅਮਰਿੰਦਰ ਸਿੰਘ ਇਸ ਮੁਲਾਕਾਤ ਨੂੰ ਖੇਤੀ ਕਾਨੂੰਨਾਂ ਨਾਲ ਸਬੰਧਤ ਮੁਲਾਕਾਤ ਕਰਾਰ ਦੇ ਰਹੇ ਹਨ। ਪਰ ਇਹ ਸਵਾਲ ਉਠਣਾ ਵੀ ਲਾਜ਼ਮੀ ਹੈ ਕਿ ਜੇਕਰ ਖੇਤੀ ਕਾਨੂੰਨਾਂ ਨੂੰ ਲੈ ਕੇ ਉਹਨਾਂ ਨੇ ਕੇਂਦਰੀ ਗ੍ਰਹਿ ਮੰਤਰੀ ਨਾਲ ਮੁਲਾਕਾਤ ਕਰਨੀ ਹੀ ਸੀ, ਤਾਂ ਉਹ ਵਾਰ-ਵਾਰ ਮੀਡੀਆ ਵਿੱਚ ਇਹ ਕਿਉਂ ਕਹਿੰਦੇ ਰਹੇ ਕਿ ਉਹ ਦਿੱਲੀ ਕਿਸੇ ਲੀਡਰ ਨਾਲ ਮੁਲਾਕਾਤ ਕਰਨ ਲਈ ਨਹੀਂ, ਬਲਕਿ ਕਪੂਰਥਲਾ ਹਾਊਸ ਤੋਂ ਆਪਣਾ ਸਾਮਾਨ ਖਾਲੀ ਕਰਨ ਲਈ ਆਏ ਹਨ। ਜਾਹਿਰ ਹੈ ਕਿ ਮੁਲਾਕਾਤ ਦਾ ਸਬੱਬ ਅਚਾਨਕ ਤਾਂ ਬਣਿਆ ਨਹੀਂ ਹੋਵੇਗਾ, ਕਿਉਂਕਿ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨਾਲ ਮੁਲਾਕਾਤ ਲਈ ਕੈਪਟਨ ਨੇ ਪਹਿਲਾਂ ਉਹਨਾਂ ਤੋਂ ਸਮਾਂ ਤਾਂ ਮੰਗਿਆ ਹੀ ਹੋਵੇਗਾ, ਤਾਂ ਹੀ ਇਹ ਮੁਲਾਕਾਤ ਸ਼ਡਿਊਲ ਹੋਈ ਹੋਵੇਗੀ।
ਰਾਜ ਸਭਾ ਦੇ ਰਸਤੇ ਖੇਤੀਬਾੜੀ ਮੰਤਰੀ ਬਣਾਉਣ ਦੀ ਤਿਆਰੀ !
ਕੈਪਟਨ-ਸ਼ਾਹ ਦੀ ਮੁਲਾਕਾਤ ਤੋਂ ਬਾਅਦ ਕਈ ਤਰ੍ਹਾਂ ਦੀਆਂ ਕਿਆਸਰਾਈਆਂ ਦਾ ਬਜਾਰ ਗਰਮ ਹੈ। ਚਰਚਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਨੂੰ ਬੀਜੇਪੀ ਵਿੱਚ ਸ਼ਾਮਲ ਕਰਵਾ ਕੇ ਉਹਨਾਂ ਨੂੰ ਰਾਜ ਸਭਾ ਸਾਂਸਦ ਬਣਾਇਆ ਜਾ ਸਕਦਾ ਹੈ ਅਤੇ ਰਾਜ ਸਭਾ ਦੇ ਰਸਤੇ ਬੀਜੇਪੀ ਨੂੰ ਕੈਪਟਨ ਨੂੰ ਕੇਂਦਰੀ ਖੇਤੀਬਾੜੀ ਮੰਤਰੀ ਦਾ ਕਾਰਜਭਾਰ ਵੀ ਸੌਂਪ ਸਕਦੀ ਹੈ।
ਖੇਤੀ ਕਾਨੂੰਨ ਰੱਦ ਕਰਵਾਉਣਗੇ ਕੈਪਟਨ ?
ਚਰਚਾ ਇਹ ਵੀ ਹੈ ਕਿ ਖੇਤੀਬਾੜੀ ਮੰਤਰੀ ਦਾ ਕਾਰਜਭਾਰ ਸੰਭਾਲਣ ਤੋਂ ਬਾਅਦ ਕੈਪਟਨ ਖੇਤੀ ਕਾਨੂੰਨ ਰੱਦ ਕਰਕੇ ਕਿਸਾਨ ਅੰਦੋਲਨ ਖਤਮ ਕਰਵਾ ਸਕਦੇ ਹਨ। ਕੈਪਟਨ ਸ਼ੁਰੂ ਤੋਂ ਹੀ ਇਸ ਮਾਮਲੇ ਵਿੱਚ ਕਿਸਾਨਾਂ ਦਾ ਸਮਰਥਨ ਕਰਦੇ ਆਏ ਹਨ। ਲਿਹਾਜਾ ਬੀਜੇਪੀ ਵਿੱਚ ਸ਼ਾਮਲ ਹੋਣ ਲਈ ਉਹਨਾਂ ਦੀ ਪਹਿਲੀ ਤੇ ਸਭ ਤੋਂ ਵੱਡੀ ਸ਼ਰਤ ਇਹੀ ਹੋਵੇਗੀ ਕਿ ਖੇਤੀ ਕਾਨੂੰਨ ਰੱਦ ਕੀਤੇ ਜਾਣ, ਤਾਂ ਜੋ ਕਿਸਾਨਾਂ ਦਾ ਵੋਟ ਬੈਂਕ ਵੀ ਉਹਨਾਂ ਦੇ ਖਾਤੇ ਵਿੱਚ ਆ ਸਕੇ। ਹਾਲਾਂਕਿ ਇਹ ਕੰਮ ਕੈਪਟਨ ਬੀਜੇਪੀ ਵਿੱਚ ਸ਼ਾਮਲ ਹੋਣ ਤੋਂ ਪਹਿਲਾਂ ਵੀ ਕਰਵਾ ਸਕਦੇ ਹਨ।
ਪੰਜਾਬ ‘ਚ ਬੀਜੇਪੀ ਨੂੰ ਮਿਲ ਸਕਦੀ ਹੈ ਜ਼ਮੀਨ
ਕੈਪਟਨ ਅਮਰਿੰਦਰ ਸਿੰਘ ਵਰਗੇ ਕੱਦਾਵਰ ਲੀਡਰ ਦੇ ਪਾਰਟੀ ਜੁਆਇਨ ਕਰਨ ਨਾਲ ਬੀਜੇਪੀ ਪੰਜਾਬ ਵਿੱਚ ਆਪਣੀ ਸਿਆਸੀ ਜ਼ਮੀਨ ਮਜ਼ਬੂਤ ਕਰ ਸਕਦੀ ਹੈ। ਬੀਜੇਪੀ ਨੂੰ ਜਿਥੇ ਪੰਜਾਬ ਵਿੱਚ ਇੱਕ ਵੱਡਾ ਸਿੱਖ ਫੇਸ ਮਿਲ ਜਾਵੇਗਾ, ਤਾਂ ਉਥੇ ਹੀ ਕੈਪਟਨ ਆਪਣੇ ਸਮਰਥਕਾਂ ਨੂੰ ਨਾਲ ਲਿਆ ਕੇ ਹੋਰਨਾਂ ਪਾਰਟੀਆਂ ਨੂੰ ਚੰਗੀ ਟੱਕਰ ਦੇ ਸਕਦੇ ਹਨ।
PM ਅਤੇ ਸ਼ਾਹ ਦੇ ਕਰੀਬੀ ਹਨ ਕੈਪਟਨ !
ਕੈਪਟਨ ਅਮਰਿੰਦਰ ਸਿੰਘ, ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਅਤੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੇ ਕਰੀਬੀ ਸਮਝੇ ਜਾਂਦੇ ਹਨ। ਦਰਅਸਲ, ਬੀਜੇਪੀ ਨੂੰ ਕੈਪਟਨ ਦਾ ਰਾਸ਼ਟਰਵਾਦੀ ਸਟਾਈਲ ਬੇਹੱਦ ਪਸੰਦ ਹੈ। ਕੌਮੀ ਸੁਰੱਖਿਆ ਦੇ ਮੁੱਦੇ ‘ਤੇ ਕੈਪਟਨ ਕਈ ਵਾਰ ਪਾਰਟੀ ਲਾਈਨ ਪਾਰ ਕਰਕੇ ਮੋਦੀ ਸਰਕਾਰ ਦੇ ਨਾਲ ਖੜ੍ਹੇ ਵੇਖੇ ਗਏ। ਸੀਐੱਮ ਰਹਿੰਦੇ ਵੀ ਕੈਪਟਨ ਜਿੰਨੀ ਵਾਰ ਵੀ ਦਿੱਲੀ ਗਏ, ਉਹਨਾਂ ਨੂੰ ਮੋਦੀ ਜਾਂ ਸ਼ਾਹ ਨਾਲ ਮੁਲਾਕਾਤ ਕਰਨ ਵਿੱਚ ਕਦੇ ਕਿਸੇ ਪਰੇਸ਼ਾਨੀ ਦਾ ਸਾਹਮਣਾ ਨਹੀਂ ਕਰਨਾ ਪਿਆ।
