ਚੰਡੀਗੜ੍ਹ। ਪੰਜਾਬ ਕਾਂਗਰਸ ਦਾ ਕਲੇਸ਼ ਕਿਸੇ ਵੀ ਦਿਸ਼ਾ ਵਿੱਚ ਸੁਲਝਦਾ ਹੋਇਆ ਨਜ਼ਰ ਨਹੀਂ ਆ ਰਿਹਾ। ਵੀਰਵਾਰ ਸ਼ਾਮ ਸੀਐੱਮ ਚੰਨੀ ਨਾਲ ਹੋਈ 2 ਘੰਟੇ ਦੀ ਮੀਟਿੰਗ ਦੇ ਬਾਵਜੂਦ ਨਵਜੋਤ ਸਿੱਧੂ ਦੇ ਅਸਤੀਫੇ ‘ਤੇ ਸਸਪੈਂਸ ਹਾਲੇ ਵੀ ਬਰਕਰਾਰ ਹੈ। ਸੂਤਰ ਦੱਸਦੇ ਹਨ ਕਿ ਇਸ ਮੀਟਿੰਗ ਵਿੱਚ ਕੋਈ ਵੀ ਠੋਸ ਨਤੀਜਾ ਨਹੀਂ ਨਿਕਲਿਆ।
ਮੀਟਿੰਗ ਤੋਂ ਬਾਅਦ ਪਹਿਲਾਂ ਸੀਐੱਮ ਚੰਨੀ ਆਬਜ਼ਰਵਰ ਹਰੀਸ਼ ਚੌਧਰੀ ਦੇ ਨਾਲ ਪੰਜਾਬ ਭਵਨ ‘ਚੋਂ ਨਿਕਲੇ। ਇਸ ਤੋਂ ਬਾਅਦ ਕੁਝ ਦੇਰ ਸਿੱਧੂ ਪੰਜਾਬ ਭਵਨ ਦੇ ਅੰਦਰ ਹੀ ਰਹੇ। ਕਈ ਕਾਂਗਰਸੀ ਵਿਧਾਇਕ ਤੇ ਮੰਤਰੀ ਵੀ ਉਹਨਾਂ ਦੇ ਨਾਲ ਅੰਦਰ ਹੀ ਮੌਜੂਦ ਸਨ। ਹਾਲਾਂਕਿ ਜਦੋਂ ਸਿੱਧੂ ਅਤੇ ਤਮਾਮ ਆਗੂ ਬਾਹਰ ਨਿਕਲੇ, ਤਾਂ ਮੀਡੀਆ ਤੋਂ ਬੱਚ ਕੇ ਆਪੋ-ਆਪਣੀਆਂ ਗੱਡੀਆਂ ਵਿੱਚ ਬਹਿ ਕੇ ਬਿਨ੍ਹਾਂ ਕੁਝ ਬੋਲੇ ਚਲੇ ਗਏ। ਦਿਲਚਸਪ ਇਹ ਵੀ ਹੈ ਕਿ ਇਸ ਮੀਟਿੰਗ ਤੋਂ ਬਾਅਦ ਪੰਜਾਬ ਭਵਨ ਦੇ ਬਾਹਰ ਪ੍ਰੈੱਸ ਕਾਨਫ਼ਰੰਸ ਦੀ ਤਿਆਰੀ ਕੀਤੀ ਗਈ ਸੀ, ਜੋ ਹੋਈ ਹੀ ਨਹੀਂ। ਮਤਲਬ ਸਾਫ਼ ਹੈ ਕਿ ਸੀਐੱਮ ਚੰਨੀ, ਸਿੱਧੂ ਨੂੰ ਮਨਾਉਣ ਵਿੱਚ ਅਸਫਲ ਰਹੇ ਹਨ।
ਸੂਤਰਾਂ ਮੁਤਾਬਕ, ਮੀਟਿੰਗ ਵਿੱਚ DGP ਇਕਬਾਲਪ੍ਰੀਤ ਸਹੋਤਾ ਦੀ ਨਿਯੁਕਤੀ ‘ਤੇ ਪੇਚ ਫਸਿਆ ਰਿਹਾ। ਸਿੱਧੂ ਉਹਨਾਂ ਨੂੰ ਹਟਾਉਣ ਦੀ ਮੰਗ ‘ਤੇ ਅੜੇ ਰਹੇ, ਪਰ ਸੀਐੱਮ ਚੰਨੀ ਨੇ ਇਸ ਤੋਂ ਇਨਕਾਰ ਕਰ ਦਿੱਤਾ। ਸੀਐੱਮ ਵੱਲੋਂ ਤਰਕ ਦਿੱਤਾ ਗਿਆ ਕਿ ਜਦੋਂ ਤੱਕ ਬੇਅਦਬੀ ਕੇਸ ਵਿੱਚ SIT ਪ੍ਰਮੁੱਖ ਰਹਿੰਦਿਆਂ ਸਹੋਤਾ ਦੀ ਜਾਂਚ ਹਾਲੇ ਮੁਕੰਮਲ ਵੀ ਨਹੀਂ ਹੋਈ ਸੀ ਕਿ ਕੇਸ CBI ਨੂੰ ਟ੍ਰਾਂਸਫਰ ਕਰ ਦਿੱਤਾ ਗਿਆ ਸੀ। ਹਾਲਾਂਕਿ ਇਸ ਉਪਰੰਤ ਫੈਸਲਾ ਹੋਇਆ ਕਿ ਸਹੋਤਾ ਹਾਲੇ ਕਾਰਜਕਾਰੀ DGP ਹਨ। ਪੰਜਾਬ ਸਰਕਾਰ UPSC ਨੂੰ ਪੈਨਲ ਭੇਜੇਗੀ, ਉਥੋਂ ਜੋ ਵੀ ਫੈਸਲਾ ਹੋਵੇਗਾ, ਉਸ ਨੂੰ ਮੰਨ ਲਿਆ ਜਾਵੇਗਾ।
ਇਸ ਤੋਂ ਇਲਾਵਾ AG ਏਪੀਐੱਸ ਦਿਓਲ ਨੂੰ ਹਟਾਉਣ ‘ਤੇ ਮੀਟਿੰਗ ਵਿੱਚ ਸਹਿਮਤੀ ਬਣਦੀ ਨਜ਼ਰ ਆ ਰਹੀ ਸੀ, ਹਾਲਾਂਕਿ ਇਸ ‘ਤੇ ਆਖਰੀ ਫੈਸਲਾ ਹਾਲੇ ਨਹੀਂ ਹੋਇਆ। ਸੂਤਰਾਂ ਮੁਤਾਬਕ, ਇਸ ਫੈਸਲੇ ਦਾ ਅਧਿਕਾਰ ਹਾਈਕਮਾਂਡ ਨੂੰ ਦਿੱਤਾ ਜਾਵੇਗਾ। ਵਿਵਾਦਤ ਮੰਤਰੀ ਬਾਰੇ ਵੀ ਹਾਈਕਮਾਂਡ ਵੀ ਫੈਸਲਾ ਲਵੇਗਾ।
ਸਹੋਤਾ ਦੀ ਛੁੱਟੀ ਤੋਂ ਬਿਨ੍ਹਾਂ ਨਹੀਂ ਮੰਨਣਗੇ ਸਿੱਧੂ !
ਬੇਸ਼ੱਕ ਸਿੱਧੂ ਵੀਰਵਾਰ ਨੂੰ ਸੀਐੱਮ ਚੰਨੀ ਨੂੰ ਮੁਲਾਕਾਤ ਕਰਨ ਲਈ ਖਾਸ ਤੌਰ ‘ਤੇ ਪਟਿਆਲਾ ਤੋਂ ਚੰਡੀਗੜ੍ਹ ਪਹੁੰਚੇ, ਪਰ ਉਹਨਾਂ ਨੇ ਇਹ ਦ੍ਰਿੜ੍ਹ ਨਿਸ਼ਚਾ ਜ਼ਰੂਰ ਕਰ ਲਿਆ ਹੈ ਕਿ ਉਹ ਇਕਬਾਲਪ੍ਰੀਤ ਸਹੋਤਾ ਨੂੰ DGP ਦੇ ਅਹੁਦੇ ਤੋਂ ਹਟਾਏ ਬਿਨ੍ਹਾਂ ਮੰਨਣਗੇ ਨਹੀਂ। ਇਸਦੀ ਮਿਸਾਲ ਮੀਟਿੰਗ ਤੋਂ ਕੁਝ ਦੇਰ ਪਹਿਲਾਂ ਹੀ ਮਿਲ ਗਈ ਸੀ, ਜਦੋਂ ਸਿੱਧੂ ਨੇ ਮੀਟਿੰਗ ਵਿੱਚ ਪਹੁੰਚਣ ਤੋਂ ਪਹਿਲਾਂ ਹੀ ਟਵਿਟਰ ‘ਤੇ DGP ਖਿਲਾਫ਼ ਸਿੱਧੀ ਲੜਾਈ ਛੇੜ ਦਿੱਤੀ। ਸਿੱਧੂ ਨੇ ਕਿਹਾ ਕਿ ਇਸੇ ਅਫਸਰ ਨੇ SIT ਪ੍ਰਮੁੱਖ ਰਹਿੰਦਿਆਂ 2 ਸਿੱਖ ਨੌਜਵਾਨਾਂ ਨੂੰ ਗਲਤ ਤਰੀਕੇ ਨਾਲ ਬੇਅਦਬੀ ਕੇਸ ਵਿੱਚ ਫਸਾਇਆ ਸੀ। ਉਸ ਵੇਲੇ ਮੌਜੂਦਾ ਮੰਤਰੀਆਂ, ਸਾਬਕਾ ਪਾਰਟੀ ਪ੍ਰਧਾਨ ਸੁਨੀਲ ਜਾਖੜ ਅਤੇ ਮੌਜੂਦਾ ਗ੍ਰਹਿ ਮੰਤਰੀ ਸੁਖਜਿੰਦਰ ਰੰਧਾਵਾ ਨੇ ਮਿਲ ਕੇ ਨੌਜਵਾਨਾਂ ਨੂੰ ਇਨਸਾਫ਼ ਦਾ ਭਰੋਸਾ ਦਵਾਇਆ ਸੀ।
ਅਫ਼ਸਰਾਂ ਦੀ ਨਿਯੁਕਤੀ CM ਦਾ ਕੰਮ, ਪ੍ਰਧਾਨ ਦਾ ਨਹੀਂ- ਕੈਪਟਨ
ਇਸ ਸਭ ਦੇ ਵਿਚਾਲੇ ਸੂਬੇ ਦੇ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਇਸ਼ਾਰਿਆਂ-ਇਸ਼ਾਰਿਆਂ ਵਿੱਚ ਮੁੱਖ ਮੰਤਰੀ ਚਰਨਜੀਤ ਚੰਨੀ ਨੂੰ ਨਸੀਹਤ ਦਿੱਤੀ ਹੈ। ਕੈਪਟਨ ਨੇ ਕਿਹਾ ਕਿ ਉਹਨਾਂ ਨੇ ਆਪਣੇ ਰਾਜ ਵਿੱਚ ਕਦੇ ਪਾਰਟੀ ਪ੍ਰਧਾਨ ਦੀ ਸਰਕਾਰ ਵਿੱਚ ਦਖਲਅੰਦਾਜੀ ਨਹੀਂ ਹੋਣ ਦਿੱਤੀ। ਉਹਨਾਂ ਕਿਹਾ, “ਅਫ਼ਸਰਾਂ ਦੀ ਨਿਯੁਕਤੀ ਦਾ ਕੰਮ ਚਰਨਜੀਤ ਚੰਨੀ ਦਾ ਹੈ, ਨਵਜੋਤ ਸਿੱਧੂ ਦਾ ਨਹੀਂ। ਸਿੱਧੂ ਆਪਣੀ ਰਾਏ ਦੇ ਸਕਦੇ ਹਨ, ਪਰ ਫੈਸਲਾ ਸੀਐੱਮ ਨੇ ਹੀ ਕਰਨਾ ਹੈ। ਮੇਰੇ ਸਾਢੇ 9 ਸਾਲ ਦੇ ਕਾਰਜਕਾਲ ਦੌਰਾਨ ਕਦੇ ਪਾਰਟੀ ਪ੍ਰਧਾਨ ਨੇ ਸਰਕਾਰ ਚਲਾਉਣ ਵਿੱਚ ਦਖਲ ਨਹੀਂ ਦਿੱਤਾ ਅਤੇ ਨਾ ਹੀ ਮੈਂ ਪ੍ਰਧਾਨ ਰਹਿੰਦਿਆਂ ਅਜਿਹਾ ਕੀਤਾ।”
