ਬਿਓਰੋ। ਜੰਮੂ-ਕਸ਼ਮੀਰ ਦੇ ਰਾਜੌਰੀ ਸੈਕਟਰ ਵਿੱਚ ਦਹਿਸ਼ਤਗਰਦਾਂ ਨਾਲ ਮੁਠਭੇੜ ‘ਚ ਇੱਕ JCO(ਜੂਨੀਅਰ ਕਮੀਸ਼ਨਡ ਅਫਸਰ) ਸਣੇ 5 ਜਵਾਨ ਸ਼ਹੀਦ ਹੋ ਗਏ। ਇਸਦੇ ਨਾਲ ਹੀ 3 ਤੋਂ 4 ਜਵਾਨ ਜ਼ਖਮੀ ਹੋਏ ਹਨ, ਜਿਹਨਾਂ ਨੂੰ ਆਰਮੀ ਹਸਪਤਾਲ ਸ਼ਿਫਟ ਕੀਤਾ ਗਿਆ ਹੈ।
ਫੌਜ ਦੇ ਅਧਿਕਾਰੀਆਂ ਮੁਤਾਬਕ, ਪੀਰ ਪੰਜਾਲ ਰੇਂਜ ਵਿੱਚ ਹਥਿਆਰਾਂ ਨਾਲ ਲੈਸ਼ ਦਹਿਸ਼ਤਗਰਦਾਂ ਦੀ ਮੌਜੂਦਗੀ ਬਾਰੇ ਜਾਣਕਾਰੀ ਮਿਲਣ ‘ਤੇ ਸੋਮਵਾਰ ਤੜਕੇ ਕਾਊਂਟਰ ਟੈਰਰਿਸਟ ਅਪਰੇਸ਼ਨ ਸ਼ੁਰੂ ਕੀਤਾ ਗਿਆ ਸੀ। ਆਰਮੀ ਦਾ ਸਰਚ ਅਪਰੇਸ਼ਨ ਜਾਰੀ ਸੀ, ਕਿ ਅਚਾਨਕ ਦਹਿਸ਼ਤਗਰਦਾਂ ਨੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਦਹਿਸ਼ਤਗਰਦਾਂ ਦੀ ਗੋਲੀਬਾਰੀ ‘ਚ JCO ਸਣੇ 5 ਜਵਾਨ ਗੰਭੀਰ ਜ਼ਖਮੀ ਹੋਏ ਸਨ, ਜਿਹਨਾਂ ਨੇ ਬਾਅਦ ਵਿੱਚ ਦਮ ਤੋੜ ਦਿੱਤਾ।
ਅਨੰਤਨਾਗ ਤੇ ਬਾਂਦੀਪੋਰਾ ‘ਚ 2 ਦਹਿਸ਼ਤਗਰਦ ਮਾਰੇ ਗਏ
ਓਧਰ, ਜੰਮੂ-ਕਸ਼ਮੀਰ ਦੇ ਬਾਂਦੀਪੋਰਾ ਵਿੱਚ ਵੀ ਸੁਰੱਖਿਆ ਬਲਾਂ ਅਤੇ ਦਹਿਸ਼ਤਗਰਦਾਂ ਵਿਚਾਲੇ ਮੁਠਭੇੜ ਹੋਈ, ਜਿਸ ‘ਚ ਇੱਕ ਦਹਿਸ਼ਤਗਰਦ ਨੂੰ ਢੇਰ ਕਰ ਦਿੱਤਾ ਗਿਆ। ਮਾਰਿਆ ਗਿਆ ਦਹਿਸ਼ਤਗਰਦ ਲਸ਼ਕਰ-ਏ-ਤੈਯਬਾ ਨਾਲ ਸਬੰਧਤ ਇਮਤਿਆਜ਼ ਅਹਿਮਦ ਡਾਰ ਦੱਸਿਆ ਜਾ ਰਿਹਾ ਹੈ।
ਇਸ ਤੋਂ ਇਲਾਵਾ ਅਨੰਤਨਾਗ ਵਿੱਚ ਵੀ ਸੁਰੱਖਿਆ ਬਲਾਂ ਨੇ ਇੱਕ ਦਹਿਸ਼ਤਗਰਦ ਨੂੰ ਮਾਰ ਗਿਰਾਇਆ। ਇਸ ਦੌਰਾਨ ਇੱਕ ਪੁਲਿਸਕਰਮੀ ਦੇ ਜ਼ਖਮੀ ਹੋਣ ਦੀ ਵੀ ਖ਼ਬਰ ਹੈ।
