ਬਿਓਰੋੋ। ਪੰਜਾਬ ਵਿੱਚ ਅਰੂਸਾ ਆਲਮ ‘ਤੇ ਛਿੜੀ ਸਿਆਸਤ ਵਿਚਾਲੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਫੋਟੋ ਬੰਬ ਫੋੜਿਆ ਹੈ। ਕੈਪਟਨ ਨੇ ਸੋਨੀਆ ਗਾਂਧੀ ਸਣੇ ਕਈ ਸ਼ਖਸਸੀਅਤਾਂ ਦੇ ਨਾਲ ਅਰੂਸਾ ਆਲਮ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਜਾਰੀ ਕੀਤੀਆਂ ਹਨ। ਇਹਨਾਂ ਵਿੱਚ ਸੁਸ਼ਮਾ ਸਵਰਾਜ, ਮੁਲਾਇਮ ਸਿੰਘ ਯਾਦਵ, ਦਿਲੀਪ ਕੁਮਾਰ ਵਰਗੀਆਂ ਹਸਤੀਆਂ ਵੀ ਸ਼ਾਮਲ ਹਨ। ਤਸਵੀਰਾਂ ਨੂੰ ਜਾਰੀ ਕਰਦਿਆਂ ਕੈਪਟਨ ਨੇ ਪੁੱਛਿਆ, “ਕੀ ਇਹ ਸਾਰੇ ਵੀ ISI ਦੇ ਏਜੰਟ ਹਨ?”
ਕੈਪਟਨ ਨੇ ਕਿਹਾ, “ਮੈਂ ਅਰੂਸਾ ਆਲਮ ਦੀ ਫੋਟੋ ਕਈ ਪਤਵੰਤੇ ਸੱਜਣਾਂ ਦੇ ਨਾਲ ਜਾਰੀ ਕਰ ਰਿਹਾ ਹਾਂ। ਮੈਨੂੰ ਲਗਦਾ ਹੈ ਕਿ ਉਹ ਸਾਰੇ ਵੀ ISI ਦੇ ਏਜੰਟ ਹਨ। ਅਜਿਹਾ ਕਹਿਣ ਵਾਲਿਆਂ ਨੂੰ ਬੋਲਣ ਤੋਂ ਪਹਿਲਾਂ ਸੋਚਣਾ ਚਾਹੀਦਾ ਹੈ। ਇਹ ਸਿਰਫ਼ ਘਟੀਆ ਮਾਨਸਿਕਤਾ ਦੀ ਮਿਸਾਲ ਹੈ।” ਉਹਨਾਂ ਕਿਹਾ ਕਿ ਬਦਕਿਸਮਤੀ ਨਾਲ ਇਸ ਵਕਤ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਵੀਜਾ ਬੈਨ ਹੈ, ਨਹੀਂ ਤਾਂ ਮੈਂ ਅਰੂਸਾ ਆਲਮ ਨੂੰ ਮੁੜ ਇਥੇ ਬੁਲਾ ਲੈਂਦੇ। ਸਾਬਕਾ ਸੀਐੱਮ ਨੇ ਇਥੋਂ ਤੱਕ ਕਿਹਾ, “ਮਾਰਚ ਵਿੱਚ ਮੈਂ 80 ਸਾਲ ਦਾ ਹੋ ਰਿਹਾ ਹਾਂ ਅਤੇ ਅਰੂਸਾ ਅਗਲੇ ਸਾਲ 69 ਸਾਲ ਦੇ ਹੋ ਜਾਣਗੇ। ਤੰਗ ਸੋਚ ਵਾਲੇ ਇਸ ਨੂੰ ਨਹੀਂ ਸਮਝਣਗੇ।”
ਦਰਅਸਲ, ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੇ ਕਿਹਾ ਕਿ ਅਰੂਸਾ ਦੇ ਬਾਰੇ ਕਈ ਗੱਲਾਂ ਸਾਹਮਣੇ ਆਈਆਂ ਹਨ, ਜਿਹਨਾਂ ਦੀ ਜਾਂਚ ਜ਼ਰੂਰੀ ਹੈ। ਉਹਨਾਂ ਨੇ ਇਸ ਸਿਲਸਿਲੇ ਵਿੱਚ DGP ਨੂੰ ਆਦੇਸ਼ ਵੀ ਦੇ ਦਿੱਤੇ ਹਨ।
