ਬਿਓਰੋ। ਤਮਾਮ ਵਿਰੋਧ ਦੇ ਬਾਵਜੂਦ ਅਦਾਕਾਰਾ ਕੰਗਨਾ ਰਣੌਤ ਅਜਾਦੀ ‘ਤੇ ਦਿੱਤੇ ਆਪਣੇ ਵਿਵਾਦਤ ਬਿਆਨ ਤੋਂ ਪਿੱਛੇ ਹਟਣ ਨੂੰ ਤਿਆਰ ਨਹੀਂ ਹੈ। ਦਰਅਸਲ, ਹਾਲ ਹੀ ਵਿੱਚ ਇੱਕ ਟੀਵੀ ਚੈਨਲ ‘ਤੇ ਕੰਗਨਾ ਨੇ ਕਿਹਾ ਸੀ ਕਿ 1947 ਵਿੱਚ ਜੋ ਅਜਾਦੀ ਮਿਲੀ ਸੀ, ਉਹ ਭੀਖ ਸੀ। ਅਸਲ ਅਜਾਦੀ 2014 ਵਿੱਚ ਮਿਲੀ ਹੈ। ਇਸ ਨੂੰ ਲੈ ਕੇ ਕੰਗਨਾ ਦਾ ਦੇਸ਼ ਭਰ ਵਿੱਚ ਵਿਰੋਧ ਹੋ ਰਿਹਾ ਹੈ ਅਤੇ ਉਹਨਾਂ ਦਾ ਪਦਮਸ਼੍ਰੀ ਐਵਾਰਡ ਵਾਪਸ ਲਏ ਜਾਣ ਦੀ ਮੰਗ ਕੀਤੀ ਜਾ ਰਹੀ ਹੈ, ਪਰ ਕੰਗਨਾ ਮੰਨਣ ਨੂੰ ਤਿਆਰ ਨਹੀਂ ਹਨ। ਉਹ ਕਹਿ ਰਹੇ ਹਨ ਕਿ ਜੇਕਰ ਕੋਈ ਸਾਬਿਤ ਕਰ ਦਵੇ ਕਿ ਉਹਨਾਂ ਨੇ ਕੁਝ ਗਲਤ ਕਿਹਾ ਹੈ, ਤਾਂ ਉਹ ਆਪਣਾ ਐਵਾਰਡ ਵਾਪਸ ਕਰ ਦੇਣਗੇ।
1947 ‘ਚ ਕਿਹੜਾ ਯੁੱਧ ਹੋਇਆ, ਮੈਨੂੰ ਨਹੀਂ ਪਤਾ- ਕੰਗਨਾ
ਕੰਗਨਾ ਨੇ ਸੋਸ਼ਲ ਮੀਡੀਆ ‘ਤੇ ਲਿਖਿਆ, “1857 ਵਿੱਚ ਅਜਾਦੀ ਲਈ ਪਹਿਲੀ ਸਮੂਹਿਕ ਲੜਾਈ ਸ਼ੁਰੂ ਹੋਈ। ਪੂਰੀ ਲੜਾਈ ਵਿੱਚ ਸੁਭਾਸ਼ ਚੰਦਰ ਬੋਸ, ਰਾਣੀ ਲਕਸ਼ਮੀ ਬਾਈ ਅਤੇ ਵੀਰ ਸਾਵਰਕਰ ਵਰਗੇ ਮਹਾਨ ਲੋਕਾਂ ਨੇ ਬਲੀਦਾਨ ਦਿੱਤਾ। 1857 ਦੀ ਲੜਾਈ ਮੈਨੂੰ ਪਤਾ ਹੈ, ਪਰ 1947 ਵਿੱਚ ਕਿਹੜਾ ਯੁੱਧ ਹੋਇਆ ਸੀ, ਮੈਨੂੰ ਨਹੀਂ ਪਤਾ। ਜੇਕਰ ਕੋਈ ਮੈਨੂੰ ਦੱਸ ਸਕਦਾ ਹੈ, ਤਾਂ ਮੈਂ ਆਪਣਾ ਪਦਮਸ਼੍ਰੀ ਵਾਪਸ ਕਰ ਦਿਆਂਗੀ ਅਤੇ ਮੁਆਫੀ ਵੀ ਮੰਗਾਂਗੀ। ਕ੍ਰਿਪਾ ਕਰਕੇ ਇਸ ਵਿੱਚ ਮੇਰੀ ਮਦਦ ਕਰੋ।”
ਮਹਾਤਮਾ ਗਾਂਧੀ ‘ਤੇ ਵਿਵਾਦਤ ਟਿੱਪਣੀ ਕੀਤੀ
ਕੰਗਨਾ ਨੇ ਅੱਗੇ ਲਿਖਿਆ, “ਮੈਂ ਸ਼ਹੀਦ ਵੀਰਾਂਗਨਾ ਰਾਣੀ ਲਕਸ਼ਮੀ ਬਾਈ ਦੀ ਫੀਚਰ ਫਿਲਮ ਵਿੱਚ ਕੰਮ ਕੀਤਾ ਹੈ। ਅਜਾਦੀ ਦੀ ਪਹਿਲੀ ਲੜਾਈ 1857 ‘ਤੇ ਮੈਂ ਵੱਡੇ ਪੱਧਰ ‘ਤੇ ਰਿਸਰਚ ਕੀਤੀ ਸੀ। ਰਾਸ਼ਟਰਵਾਦ ਦੇ ਨਾਲ ਰਾਈਟ ਵਿੰਗ ਦਾ ਵੀ ਉਦੈ ਹੋਇਆ, ਪਰ ਅਚਾਨਕ ਖਤਮ ਕਿਉਂ ਹੋ ਗਿਆ? ਗਾਂਧੀ ਨੇ ਭਗਤ ਸਿੰਘ ਨੂੰ ਮਰਨ ਕਿਉਂ ਦਿੱਤਾ? ਨੇਤਾਜੀ ਬੋਸ ਨੂੰ ਕਿਉਂ ਮਾਰਿਆ ਗਿਆ ਅਤੇ ਗਾਂਧੀ ਜੀ ਦਾ ਸੁਪੋਰਟ ਉਹਨਾਂ ਨੂੰ ਕਦੇ ਕਿਉਂ ਨਹੀਂ ਮਿਲਿਆ? ਇੱਕ ਗੋਰੇ(ਬ੍ਰਿਟਿਸ਼) ਨੇ ਪਾਰਟੀਸ਼ਨ ਦੀ ਲਾਈਨ ਕਿਉਂ ਖਿੱਚੀ? ਅਜਾਦੀ ਦਾ ਜਸ਼ਨ ਮਨਾਉਣ ਦੀ ਬਜਾਏ ਭਾਰਤੀਆਂ ਨੇ ਇੱਕ-ਦੂਜੇ ਨੂੰ ਕਿਉਂ ਮਾਰਿਆ? ਕੁਝ ਜਵਾਬ ਜੋ ਮੈਂ ਮੰਗ ਰਹੀ ਹਾਂ, ਕਿਰਪਾ ਕਰਕੇ ਜਵਾਬ ਲੱਭਣ ਵਿੱਚ ਮੇਰੀ ਮਦਦ ਕਰੋ।”
ਅੰਗ੍ਰੇਜਾਂ ਨੇ ਭਾਰਤ ਨੂੰ ਬਰਬਾਦ ਕੀਤਾ- ਕੰਗਨਾ
ਕੰਗਨਾ ਨੇ ਕਿਹਾ, “ਇਤਿਹਾਸ ਗਵਾਹ ਹੈ ਕਿ ਅੰਗ੍ਰੇਜਾਂ ਨੇ ਬਰਬਾਦੀ ਦੀ ਹੱਦ ਤੱਕ ਲੁੱਟਿਆ ਹੈ। ਦੂਜੇ ਵਿਸ਼ਵ ਯੁੱਧ ਦੇ ਦੌਰਾਨ ਗਰੀਬੀ ਅਤੇ ਦੁਸ਼ਮਣੀ ਦੇ ਹਾਲਾਤ ਵਿੱਚ ਉਹਨਾਂ ਦਾ ਭਾਰਤ ਵਿੱਚ ਰਹਿਣਾ ਵੀ ਮਹਿੰਗਾ ਪੈ ਰਿਹਾ ਸੀ, ਪਰ ਉਹ ਜਾਣਦੇ ਸਨ ਕਿ ਉਹ ਸਦੀਆਂ ਦੇ ਅੱਤਿਆਚਾਰਾਂ ਦੀ ਕੀਮਤ ਚੁਕਾਏ ਬਗੈਰ ਭਾਰਤ ਤੋਂ ਨਹੀਂ ਜਾ ਸਕਣਗੇ। ਉਹਨਾਂ ਨੂੰ ਭਾਰਤੀਆਂ ਦੀ ਮਦਦ ਚਾਹੀਦੀ ਸੀ। ਉਹਨਾਂ ਦੀ ਅਜਾਦ ਹਿੰਦ ਫੌਜ ਦੇ ਨਾਲ ਛੋਟੀ ਜਿਹੀ ਲੜਾਈ ਹੀ ਸਾਨੂੰ ਅਜਾਦੀ ਦਵਾ ਸਕਦੀ ਸੀ ਅਤੇ ਸੁਭਾਸ਼ ਚੰਦਰ ਬੋਸ ਦੇਸ਼ ਦੇ ਪਹਿਲੇ ਪ੍ਰਧਾਨ ਮੰਤਰੀ ਹੁੰਦੇ। ਕਿਉਂ ਅਜਾਦੀ ਨੂੰ ਕਾਂਗਰਸ ਦੇ ਕਟੋਰੇ ਵਿੱਚ ਪਾਇਆ ਗਿਆ, ਜਦਕਿ ਰਾਈਟ ਵਿੰਗ ਇਸ ਨੂੰ ਲੜ ਕੇ ਲੈ ਸਕਦੀ ਸੀ। ਕੀ ਕੋਈ ਇਹ ਸਮਝਣ ਵਿੱਚ ਮਦਦ ਕਰ ਸਕਦਾ ਹੈ?”
ਮੈਂ ਨਤੀਜਾ ਭੁਗਤਣ ਨੂੰ ਤਿਆਰ- ਕੰਗਨਾ
ਕੰਗਨਾ ਨੇ ਲਿਖਿਆ, “ਮੈਂ ਨਤੀਜਾ ਭੁਗਤਣ ਲਈ ਤਿਆਰ ਹਾਂ। ਜਿਥੋਂ ਤੱਕ 2014 ਵਿੱਚ ਅਜਾਦੀ ਦਾ ਸਬੰਧ ਹੈ, ਮੈਂ ਵਿਸ਼ੇਸ਼ ਰੂਪ ਨਾਲ ਕਿਹਾ ਸੀ ਕਿ ਭੌਤਿਕ ਅਜਾਦੀ ਸਾਡੇ ਕੋਲ ਹੋ ਸਕਦੀ ਹੈ, ਪਰ ਭਾਰਤ ਦੀ ਚੇਤਨਾ ਅਤੇ ਵਿਵੇਕ 2014 ਵਿੱਚ ਮੁਕਤ ਹੋ ਗਏ ਸਨ। ਇਹ ਪਹਿਲੀ ਵਾਰ ਹੈ, ਜਦੋਂ ਅੰਗ੍ਰੇਜੀ ਨਾ ਬੋਲਣ ਜਾਂ ਛੋਟੇ ਸ਼ਹਿਰਾਂ ਤੋਂ ਆਉਣ ਜਾਂ ਭਾਰਤ ਵਿੱਚ ਬਣੀਆਂ ਚੀਜਾਂ ਦਾ ਇਸਤੇਮਾਲ ਕਰਨ ਲਈ ਲੋਕ ਸਾਨੂੰ ਸ਼ਰਮਿੰਦਾ ਨਹੀਂ ਕਰ ਸਕਦੇ। ਉਸ ਇੱਕ ਹੀ ਇੰਟਰਵਿਊ ਵਿੱਚ ਸਭ ਕੁਝ ਸਾਫ ਕਿਹਾ ਹੈ, ਪਰ ਜੋ ਚੋਰ ਹਨ, ਉਹਨਾਂ ਦੀ ਤਾਂ ਜਲੇਗੀ। ਕੋਈ ਬੁਝਾ ਨਹੀਂ ਸਕਦਾ। ਜੈ ਹਿੰਦ।”
ਕਿਸਾਨਾਂ ਨੂੰ ਅੱਤਵਾਦੀ ਵੀ ਕਹਿ ਚੁੱਕੀ ਕੰਗਨਾ
ਕੰਗਨਾ ਉਸ ਵੇਲੇ ਵੀ ਵਿਵਾਦਾਂ ਵਿੱਚ ਰਹੇ ਸੀ, ਜਦੋਂ ਉਹਨਾਂ ਨੇ ਖੇਤੀ ਕਾਨੂੰਨਾਂ ਦਾ ਵਿਰੋਧ ਕਰ ਰਹੇ ਕਿਸਾਨਾਂ ਨੂੰ ਕੰਗਨਾ ਨੇ ਅੱਤਵਾਦੀ ਕਿਹਾ ਸੀ। ਕੰਗਨਾ ਨੇ ਇੱਕ ਬਜੁਰਗ ਮਹਿਲਾ ਅੰਦੋਲਨਕਾਰੀ ਨੂੰ ਦਿਹਾੜੀ ਵਾਲੀ ਵੀ ਕਹਿ ਦਿੱਤਾ ਸੀ, ਜਿਸ ‘ਤੇ ਖੂਬ ਬਵਾਲ ਹੋਇਆ ਸੀ। ਕੰਗਨਾ ਦਾ ਪੰਜਾਬ ਵਿੱਚ ਜ਼ਬਰਦਸਤ ਵਿਰੋਧ ਹੋਇਆ ਸੀ ਅਤੇ ਉਹਨਾਂ ਦੇ ਖਿਲਾਫ਼ ਕ੍ਰਿਮੀਨਲ ਕੇਸ ਵੀ ਦਰਜ ਹੋਇਆ ਸੀ।
