ਬਠਿੰਡਾ। ਪੰਜਾਬ ਪੁਲਿਸ ਨੇ ਐਤਵਾਰ ਨੂੰ ਬਠਿੰਡਾ ਤੋਂ 2 ਹੈਂਡ ਗ੍ਰਨੇਡ ਬਰਾਮਦ ਕੀਤੇ ਹਨ। ਇਹਨਾਂ ਹੈਂਡ ਗ੍ਰਨੇਡ ਨੂੰ ਬਾਈਕ ਸਵਾਰ 2 ਅਣਪਛਾਤੇ ਸ਼ਖਸ ਇੱਕ ਬੈਗ ਵਿੱਚ ਲੁਕੋ ਕੇ ਲਿਜਾ ਰਹੇ ਸਨ, ਪਰ ਉਹਨਾਂ ਨੇ ਜਿਵੇਂ ਹੀ ਪੁਲਿਸ ਦੀ ਨਾਕੇਬੰਦੀ ਵੇਖੀ, ਤਾਂ ਉਹ ਬੈਗ ਸੁੱਟ ਕੇ ਉਥੋਂ ਫਰਾਰ ਹੋ ਗਏ। ਜਦੋਂ ਪੁਲਿਸ ਟੀਮ ਨੇ ਬੈਗ ਨੂੰ ਖੋਲ੍ਹ ਕੇ ਚੈੱਕ ਕੀਤਾ, ਤਾਂ ਉਸ ਵਿੱਚੋਂ 2 ਹੈਂਡ ਗ੍ਰਨੇਡ ਬਰਾਮਦ ਹੋਏ।
ਫਾਜਿਲਕਾ ਦੇ ASI ਨੇ ਦੱਸਿਆ ਕਿ ਉਹ ਆਪਣੀ ਪੁਲਿਸ ਟੀਮ ਦੇ ਨਾਲ ਰਿੰਗ ਰੋਡ ਬਾਈਪਾਸ ਬਠਿੰਡਾ ਦੇ ਨੇੜੇ ਨਹਿਰ ਦੇ ਪੁੱਲ ‘ਤੇ ਨਾਕੇਬੰਦੀ ਕਰਕੇ ਵਾਹਨਾਂ ਦੀ ਚੈਕਿੰਗ ਕਰ ਰਹੇ ਸਨ। ਇਸ ਦੌਰਾਨ ਮਲੋਟ-ਬਠਿੰਡਾ ਰੋਡ ‘ਤੇ ਰਿੰਗ ਰੋਡ ਵੱਲ ਬਿਨ੍ਹਾਂ ਨੰਬਰ ਪਲੇਟ ਦੀ ਕਾਲੇ ਰੰਗ ਦੀ ਪਲਸਰ ਬਾਈਕ ਆ ਰਹੀ ਸੀ। ਬਾਈਕ ‘ਤੇ 2 ਸ਼ਖਸ ਸਵਾਰ ਸਨ। ਦੋਵਾਂ ਨੇ ਆਪਣਾ ਮੂੰਹ ਕੱਪੜੇ ਨਾਲ ਢਕਿਆ ਹੋਇਆ ਸੀ। ਉਹਨਾਂ ਨੇ ਜਿਵੇਂ ਹੀ ਪੁਲਿਸ ਦੀ ਨਾਕੇਬੰਦੀ ਵੇਖੀ, ਤਾਂ ਉਹ ਘਬਰਾ ਗਏ ਅਤੇ ਬਾਈਕ ਨੂੰ ਪਿੱਛੇ ਮੋੜ ਕੇ ਭੱਜਣ ਲੱਗੇ।
ਭੱਜਣ ‘ਚ ਸਫਲ ਰਹੇ ਬਾਈਕ ਸਵਾਰ
ਪੁਲਿਸ ਟੀਮ ਵੀ ਉਹਨਾਂ ਨੂੰ ਫੜਨ ਲਈ ਪਿੱਛੇ ਭੱਜੀ। ਇਸੇ ਵਿਚਾਲੇ ਬਾਈਕ ‘ਤੇ ਸਵਾਲ ਅਣਪਛਾਤੇ ਵਿਅਕਤੀਆਂ ਨੇ ਆਪਣਾ ਬੈਗ ਸੁੱਟ ਦਿੱਤਾ। ਪੁਲਿਸ ਟੀਮ ਨੇ ਉਹਨਾਂ ਦਾ ਪਿੱਛਾ ਵੀ ਕੀਤਾ, ਪਰ ਉਹ ਭੱਜਣ ਵਿੱਚ ਸਫਲ ਰਹੇ। ਪੁਲਿਸ ਟੀਮ ਨੇ ਉਹਨਾਂ ਦੇ ਬੈਗ ਨੂੰ ਕਬਜੇ ਵਿੱਚ ਲੈ ਕੇ ਉਸ ਨੂੰ ਖੋਲ੍ਹ ਕੇ ਵੇਖਿਆ, ਤਾਂ ਕੱਪੜੇ ਵਿੱਚ ਲਪੇਟ ਕੇ ਰੱਖੇ ਹੋਏ 2 ਹੈਂਡ ਗ੍ਰਨੇਡ ਮਿਲੇ।
ਫਰਾਰ ਬਾਈਕ ਸਵਾਰ ਅਣਪਛਾਤੇ ਲੋਕਾਂ ‘ਤੇ ਵਿਸਫੋਟਕ ਪਦਾਰਥ ਐਕਟ 1908 ਦੀ ਧਾਰਾ 3,4 ਅਤੇ 5 ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਦੋਵਾਂ ਨੂੰ ਗ੍ਰਿਫ਼ਤਾਰ ਕਰਨ ਲਈ ਭਾਲ ਵਿੱਚ ਜੁਟ ਗਈ ਹੈ।
