ਬਿਓਰੋ। ਪੰਜਾਬੀ ਵਿੱਚ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦੀ ਸੁਰੱਖਿਆ ‘ਚ ਕੁਤਾਹੀ ਦੇ ਮਾਮਲੇ ਵਿੱਚ ਵੱਡਾ ਖੁਲਾਸਾ ਹੋਇਆ ਹੈ। ਸੁਤਰਾਂ ਮੁਤਾਬਕ, ਪੰਜਾਬ ਦੇ ਕਾਰਜਕਾਰੀ DGP ਸਿਧਾਰਥ ਚਟੋਪਾਧਿਆਏ ਚਾਹੁੰਦੇ ਸਨ ਕਿ ਪ੍ਰਦਰਸ਼ਨਕਾਰੀਆਂ ‘ਤੇ ਬਲ ਦਾ ਇਸਤੇਮਾਲ ਕਰਕੇ ਉਨ੍ਹਾਂ ਨੂੰ ਹਟਾਇਆ ਜਾਵੇ, ਤਾਂ ਜੋ ਪ੍ਰਧਾਨ ਮੰਤਰੀ ਦਾ ਕਾਫ਼ਲਾ ਉਥੋਂ ਲੰਘ ਸਕੇ। ਹਾਲਾਂਕਿ ਪੰਜਾਬ ਸਰਕਾਰ ਇਸਦੇ ਪੱਖ ਵਿੱਚ ਨਹੀਂ ਸੀ। ਉਹਨਾਂ ਨੇ ਪੰਜਾਬ ਪੁਲਿਸ ਨੂੰ ਇਸ ਮਾਮਲੇ ਵਿੱਚ ਸੰਜਮ ਵਰਤਣ ਅਤੇ ਜ਼ਬਰਨ ਕਾਰਵਾਈ ਨਾ ਕਰਨ ਲਈ ਕਿਹਾ। ਇਸੇ ਵਜ੍ਹਾ ਨਾਲ ਪੀਐੱਮ ਮੋਦੀ ਦੇ ਕਾਫ਼ਲੇ ਨੂੰ ਕਰੀਬ 20 ਮਿੰਟ ਤੱਕ ਫਿਰੋਜ਼ਪੁਰ ਨੇੜੇ ਫਲਾਈਓਵਰ ‘ਤੇ ਰੁੱਕਣਾ ਪਿਆ।
ਬਹਿਬਲ ਕਲਾਂ ਵਰਗਾ ਕਾਂਡ ਨਹੀਂ ਚਾਹੁੰਦੀ ਸੀ ਸਰਕਾਰ
ਸੂਤਰਾਂ ਦੀ ਮੰਨੀਏ, ਤਾਂ DGP ਚਟੋਪਾਧਿਆਏ ਨੂੰ ਕਿਹਾ ਗਿਆ ਕਿ ਉਹ ਕੋਈ ਅਜਿਹਾ ਕਦਮ ਨਾ ਚੁੱਕਣ, ਜਿਸ ਨਾਲ ਸੱਤਾ ਧਿਰ ਅਕਾਲੀ ਸਰਕਾਰ ਦੇ ਵਕਤ ਹੋਈ ਬਹਿਬਲ ਕਲਾਂ ਗੋਲੀ ਕਾਂਡ ਵਰਗੇ ਮੁੱਦੇ ‘ਤੇ ਘਿਰ ਜਾਵੇ। 2015 ਵਿੱਚ ਬਰਗਾੜੀ ਵਿੱਚ ਹੋਈ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਦੇ ਚੱਲਦੇ ਬਹਿਬਲ ਕਲਾਂ ਵਿੱਚ ਵਿਰੋਧ-ਪ੍ਰਦਰਸ਼ਨ ਹੋ ਰਿਹਾ ਸੀ, ਜਿਥੇ ਪੁਲਿਸ ਨੇ ਕਾਰਵਾਈ ਕੀਤੀ ਅਤੇ 2 ਲੋਕਾਂ ਦੀ ਪੁਲਿਸ ਫਾਇਰਿੰਗ ਵਿੱਚ ਮੌਤ ਹੋ ਗਈ ਸੀ। ਇਸੇ ਕਾਂਡ ਕਾਰਨ ਪੰਜਾਬ ਵਿੱਚ ਅਕਾਲੀਆਂ ਨੂੰ ਸੱਤਾ ਤੋਂ ਬਾਹਰ ਹੋਣਾ ਪਿਆ।
ਪੁਲਿਸ ਨੇ ਬਲੂ ਬੁੱਕ ਨਿਯਮਾਂ ਦੀ ਪਾਲਣਾ ਨਹੀਂ ਕੀਤੀ
ਇਸ ਮਾਮਲੇ ਵਿੱਚ ਇਕ ਹੋਰ ਅਹਿਮ ਗੱਲ ਸਾਹਮਣੇ ਆਈ ਹੈ ਕਿ ਪੰਜਾਬ ਪੁਲਿਸ ਨੇ ਪੀਐੱਮ ਦੇ ਦੌਰੇ ਦੌਰਾਨ ਬਲੂ ਬੁੱਕ ਦੇ ਨਿਯਮਾਂ ਦੀ ਪਾਲਣਾ ਨਹੀਂ ਕੀਤੀ। ਇਸ ਮੁਤਾਬਕ, ਕਿਸੇ ਵੀ ਤਰ੍ਹਾਂ ਦੇ ਐਮਰਜੈਂਸੀ ਹਾਲਾਤ ਵਿੱਚ ਵੈਕਲਪਿਕ ਮਾਰਗ ਦੀ ਤਿਆਰੀ ਹੋਣੀ ਚਾਹੀਦੀ ਹੈ। ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ SPG ਦਾ ਕੰਮ PM ਨੂੰ ਸੁਰੱਖਿਆ ਘੇਰਾ ਦੇਣਾ ਹੁੰਦਾ ਹੈ। ਬਾਕੀ ਥਾਵਾਂ ‘ਤੇ ਸਥਾਨਕ ਯਾਨੀ ਸੂਬਾ ਪੁਲਿਸ ਦੀ ਜ਼ਿੰਮੇਵਾਰੀ ਹੁੰਦੀ ਹੈ। ਸੂਬਾ ਪੁਲਿਸ ਜਿਸ ਹਿਸਾਬ ਨਾਲ ਇਨਪੁੱਟ ਦਿੰਦੀ ਹੈ, ਉਸ ਹਿਸਾਬ ਨਾਲ SPG ਅੱਗੇ VIP ਦੀ ਗਤੀਵਿਧੀ ਦਾ ਫ਼ੈਸਲਾ ਲੈਂਦੀ ਹੈ। ਇਸ ਕੁਤਾਹੀ ਨੂੰ ਲੈ ਕੇ ਹੁਣ ਖੁਫੀਆ ਏਜੰਸੀਆਂ ਤੋਂ ਵੀ ਰਿਪੋਰਟ ਮੰਗੀ ਗਈ ਹੈ।
ਖਰਾਬ ਮੌਸਮ ਕਾਰਨ ਸੜਕ ਰਾਹੀਂ ਜਾ ਰਹੇ ਸਨ PM
ਪੀਐੱਮ ਨਰੇਂਦਰ ਮੋਦੀ ਬੁੱਧਵਾਰ ਨੂੰ ਪੰਜਾਬ ਦੇ ਫਿਰੋਜ਼ਪੁਰ ਵਿੱਚ ਆ ਰਹੇ ਸਨ। ਜਦੋਂ ਉਹ ਸਵੇਰੇ 10.20 ਵਜੇ ਬਠਿੰਡਾ ਦੇ ਭਿਸੀਆਣਾ ਏਅਰਪੋਰਟ ਉਤਰੇ, ਜਿਥੇ ਕਰੀਬ 30 ਮਿੰਟ ਤੱਕ ਉਹ ਮੌਸਮ ਸਾਫ਼ ਹੋਣ ਦਾ ਇੰਤਜ਼ਾਰ ਕਰਦੇ ਰਹੇ। ਹਾਲਾਂਕਿ ਹੈਲੀਕਾਪਟਰ ਉਡਾਣ ਨਹੀਂ ਭਰ ਸਕਦਾ ਸੀ। ਲਿਹਾਜਾ ਉਹਨਾਂ ਨੇ ਸਵਾ 11 ਵਜੇ ਕਰੀਬ 122 ਕਿੱਲੋਮੀਟਰ ਦੂਰ ਹੁਸੈਨੀਵਾਲਾ ਸਮਾਰਕ ਸੜਕ ਦੇ ਰਸਤੇ ਜਾਣ ਦਾ ਫੈਸਲਾ ਕੀਤਾ। ਇਸ ਬਾਰੇ ਤੁਰੰਤ ਪੁਲਿਸ ਅਤੇ ਪੰਜਾਬ ਸਰਕਾਰ ਨੂੰ ਸੂਚਨਾ ਦਿੱਤੀ ਗਈ। 1.05 ਵਜੇ ਪੀਐੱਮ ਦਾ ਕਾਫਲਾ ਫਲਾਈਓਵਰ ‘ਤੇ ਪਹੁੰਚਿਆ ਅਤੇ ਕਰੀਬ ਅੱਧਾ ਘੰਟਾ ਇੰਤਜਾਰ ਕਰਨ ਤੋਂ ਬਾਅਦ ਪੀਐੱਮ ਦਾ ਕਾਫ਼ਲਾ ਵਾਪਸ ਪਰਤ ਗਿਆ।
