ਬਿਓਰੋ। ਆਪਣੀ ਨਵੀਂ ਪਾਰਟੀ ਬਣਾ ਕੇ ਚੋਣ ਦੰਗਲ ‘ਚ ਉਤਰੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਚੋਣਾਂ ਤੋਂ ਪਹਿਲਾਂ ਹੀ ਵੱਡਾ ਝਟਕਾ ਲੱਗਿਆ ਹੈ। ਉਨ੍ਹਾਂ ਦੀ ਪਾਰਟੀ ਦੇ ਕਰੀਬ 6 ਉਮੀਦਵਾਰਾਂ ਨੇ ਹਾਕੀ ਸਟਿੱਕ-ਬਾਲ ਦੇ ਨਿਸ਼ਾਨ ‘ਤੇ ਚੋਣ ਲੜਨ ਤੋਂ ਇਨਕਾਰ ਕਰ ਦਿੱਤਾ ਹੈ। ਇਹ ਸਾਰੇ ਬੀਜੇਪੀ ਦੇ ਚੋਣ ਨਿਸ਼ਾਨ ਯਾਨੀ ਕਮਲ ਦੇ ਫੁੱਲ ‘ਤੇ ਚੋਣ ਲੜਨਾ ਚਾਹੁੰਦੇ ਹਨ। ਇਸਦੇ ਪਿੱਛੇ ਦਲੀਲ ਹੈ ਕਿ ਜਿਹਨਾਂ ਸੀਟਾਂ ਤੋਂ ਉਹ ਚੋਣ ਲੜ ਰਹੇ ਹਨ, ਉਹ ਸ਼ਹਿਰੀ ਸੀਟਾਂ ਹਨ ਅਤੇ ਉਥੇ ਬੀਜੇਪੀ ਦਾ ਚੰਗਾ ਅਧਾਰ ਹੈ।
ਇਸਦਾ ਪਤਾ ਲੱਗਦੇ ਹੀ ਕੈਪਟਨ ਅਮਰਿੰਦਰ ਸਿੰਘ ਨੇ ਬੀਜੇਪੀ ਨਾਲ ਗੱਲਬਾਤ ਸ਼ੁਰੂ ਕਰ ਦਿੱਤੀ, ਜਿਸ ਤੋਂ ਬਾਅਦ ਕੈਪਟਨ ਦੀ ਪਾਰਟੀ ਪੰਜਾਬ ਲੋਕ ਕਾਂਗਰਸ ਦੇ 4 ਉਮੀਦਵਾਰਾਂ ਨੂੰ ਬੀਜੇਪੀ ਦੇ ਸਿੰਬਲ ‘ਤੇ ਚੋਣ ਲੜਾਉਣ ਦਾ ਫੈਸਲਾ ਲਿਆ ਗਿਆ ਹੈ। ਜਿਨ੍ਹਾਂ ਸੀਟਾਂ ‘ਤੇ ਕੈਪਟਨ ਦੇ ਉਮੀਦਵਾਰ ਬੀਜੇਪੀ ਦੇ ਸਿੰਬਲ ਨਾਲ ਚੋਣ ਲੜਨਗੇ, ਉਨ੍ਹਾਂ ਵਿੱਚ ਬਠਿੰਡਾ ਸ਼ਹਿਰੀ, ਲੁਧਿਆਣਾ ਈਸਟ, ਖਰੜ ਅਤੇ ਆਤਮ ਨਗਰ ਸੀਟ ਸ਼ਾਮਲ ਹਨ।
ਕੈਪਟਨ ਦੇ ਨਾਲ ਨਹੀਂ ਆਏ ਕਾਂਗਰਸੀ ਵਿਧਾਇਕ
ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਲੀਡਰ ਕੈਪਟਨ ਦੀ ਪਾਰਟੀ ਤੋਂ ਦੂਰੀ ਬਣਾ ਰਹੇ ਹਨ। ਇਸ ਤੋਂ ਪਹਿਲਾਂ ਕਾਂਗਰਸ ਛੱਡਣ ਵਾਲੇ ਵਿਧਾਇਕ ਰਾਣਾ ਗੁਰਮੀਤ ਸੋਢੀ, ਫਤਿਹਜੰਗ ਬਾਜਵਾ ਅਤੇ ਹਰਜੋਤ ਕਮਲ ਨੇ ਵੀ ਕੈਪਟਨ ਦੀ ਪਾਰਟੀ ਦੀ ਥਾਂ ਬੀਜੇਪੀ ਨੂੰ ਚੁਣਿਆ।
37 ਸੀਟਾਂ ‘ਤੇ ਲੜ ਰਹੀ ਕੈਪਟਨ ਦੀ ਪਾਰਟੀ
ਪੰਜਾਬ ਵਿੱਚ ਪਹਿਲੀ ਵਾਰ ਕੈਪਟਨ ਅਮਰਿੰਦਰ ਸਿੰਘ ਦੀ ਚਿੱਠੀ ਦੇ ਨਾਲ ਮਿਲ ਕੇ ਚੋਣ ਲੜ ਰਹੇ ਹਨ ਜਿਸ ਵਿੱਚ ਸੁਖਦੇਵ ਸਿੰਘ ਢੀਂਡਸਾ ਦੀ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ ਵੀ ਗਠਜੋੜ ਵਿੱਚ ਹੈ। ਗਠਜੋੜ ਵਿੱਚ ਬੀਜੇਪੀ 65, ਪੰਜਾਬ ਲੋਕ ਕਾਂਗਰਸ 37 ਅਤੇ ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ 15 ਸੀਟਾਂ ‘ਤੇ ਚੋਣ ਲੜ ਰਹੀ ਹੈ।
