ਬਿਓਰੋ। ਪੰਜਾਬ ਦੇ ਮੌਜੂਦਾ ਮੁੱਖ ਮੰਤਰੀ ਅਤੇ ਕਾਂਗਰਸ ਵੱਲੋਂ ਅਗਲੇ ਸੀਐੱਮ ਦੀ ਰੇਸ ਦੇ ਸਭ ਤੋਂ ਵੱਡੇ ਦਾਅਵੇਦਾਰ ਚਰਨਜੀਤ ਸਿੰਘ ਚੰਨੀ ਇਸ ਵਾਰ 2 ਸੀਟਾਂ ਤੋਂ ਚੋਣ ਲੜਨਗੇ। ਚਮਕੌਰ ਸਾਹਿਬ ਦੇ ਨਾਲ-ਨਾਲ ਸੀਐੱਮ ਚੰਨੀ ਭਦੌੜ ਹਲਕੇ ਤੋਂ ਚੋਣ ਮੈਦਾਨ ਵਿੱਚ ਉਤਾਰੇ ਗਏ ਹਨ। ਕਾਂਗਰਸ ਵੱਲੋਂ ਜਾਰੀ 8 ਉਮੀਦਵਾਰਾਂ ਦੀ ਆਖਰੀ ਸੂਚੀ ਵਿੱਚ ਚੰਨੀ ਦਾ ਨਾਂਅ ਵੀ ਸ਼ਾਮਲ ਹੈ।
ਦੂਜੀ ਸੀਟ ਭਦੌੜ ਹੀ ਕਿਉਂ ?
ਭਦੌੜ ਵਿਧਾਨ ਸਭਾ ਸੀਟ ਮਾਲਵਾ ਖੇਤਰ ਵਿੱਚ ਆਉਂਦੀ ਹੈ। ਭਗਵੰਤ ਮਾਨ ਨੂੰ ਆਮ ਆਦਮੀ ਪਾਰਟੀ ਵੱਲੋਂ ਉਮੀਦਵਾਰ ਐਲਾਨੇ ਜਾਣ ਤੋਂ ਬਾਅਦ ਮਾਲਵਾ ਵਿੱਚ ਕਾਂਗਰਸ ਨੂੰ ਵੱਡੇ ਨੁਕਸਾਨ ਦਾ ਡਰ ਹੈ। ਸੰਗਰੂਰ, ਬਰਨਾਲਾ, ਮਾਨਸਾ ਵਿੱਚ ਵੈਸੇ ਵੀ ਆਮ ਆਦਮੀ ਪਾਰਟੀ ਦਾ ਵੱਡਾ ਲੋਕ ਅਧਾਰ ਹੈ। ਮੰਨਿਆ ਜਾ ਰਿਹਾ ਹੈ ਕਿ ‘ਆਪ’ ਦਾ ਮੁਕਾਬਲਾ ਕਰਨ ਲਈ ਹੀ ਸੀਐੱਮ ਨੂੰ ਖਾਸ ਰਣਨੀਤੀ ਦੇ ਤਹਿਤ ਭਦੌੜ ਹਲਕੇ ਤੋਂ ਮੈਦਾਨ ਵਿੱਚ ਉਤਾਰਿਆ ਗਿਆ ਹੈ। ਦੱਸ ਦਈਏ ਕਿ ਭਦੌੜ ਸੀਟ ਰਾਖਵੀਂ ਸੀਟ ਹੈ, ਜਿਥੋਂ ਪਿਛਲੀ ਵਾਰ ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਨਿਰਮਲ ਸਿੰਘ ਖ਼ਾਲਸਾ ਜੇਤੂ ਰਹੇ ਸਨ। ਹਾਲਾਂਕਿ ਖ਼ਾਲਸਾ ਹੁਣ ਕਾਂਗਰਸ ਵਿੱਚ ਹੀ ਹਨ।
ਪਹਿਲਾਂ ਦੋਆਬਾ ਤੋਂ ਚੋਣ ਲੜਨ ਦੀ ਸੀ ਚਰਚਾ
ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੇ 2 ਸੀਟਾਂ ਤੋਂ ਚੋਣ ਲੜਨ ਦੀ ਚਰਚਾ ਲੰਮੇ ਸਮੇਂ ਤੋਂ ਸੀ। ਪਹਿਲਾਂ ਸੀਐੱਮ ਦੇ ਆਦਮਪੁਰ ਜਾਂ ਬੰਗਾ ਤੋਂ ਚੋਣ ਲੜਨ ਦੀਆਂ ਅਟਕਲਾਂ ਸਨ, ਪਰ ਪਹਿਲੀ ਅਤੇ ਦੂਜੀ ਲਿਸਟ ਤੋਂ ਬਾਅਦ ਇਹਨਾਂ ਅਟਕਲਾਂ ‘ਤੇ ਲਗਭਗ ਵਿਰਾਮ ਲੱਗ ਗਿਆ ਸੀ। ਬਹਿਰਹਾਲ, ਹੁਣ ਆਖ਼ਰੀ ਮੌਕੇ ਕਾਂਗਰਸ ਨੇ ਆਪਣੇ ਇਸ ਗੇਮ ਪਲਾਨ ਦਾ ਖੁਲਾਸਾ ਕਰਕੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ।
2 ਸੀਟਾਂ ਤੋਂ ਚੋਣ ਲੜਨ ਦੇ ਮਾਇਨੇ
ਪੰਜਾਬ ਵਿੱਚ ਕਾਂਗਰਸ ਵੱਲੋਂ ਚੰਨੀ ਇਕਲੌਤੇ ਚਿਹਰੇ ਹਨ, ਜੋ 2 ਸੀਟਾਂ ਤੋਂ ਚੋਣ ਲੜ ਰਹੇ ਹਨ। ਪਿਛਲੀ ਵਾਰ ਸੀਐੱਮ ਫੇਸ ਕੈਪਟਨ ਅਮਰਿੰਦਰ ਸਿੰਘ 2 ਸੀਟਾਂ ਤੋਂ ਚੋਣ ਮੈਦਾਨ ਵਿੱਚ ਉਤਰੇ ਸਨ। ਉਸ ਵਕਤ ਕੈਪਟਨ ਨੂੰ ਪਟਿਆਲਾ ਦੇ ਨਾਲ-ਨਾਲ ਪ੍ਰਕਾਸ਼ ਸਿੰਘ ਬਾਦਲ ਦੇ ਖਿਲਾਫ਼ ਲੰਬੀ ਤੋਂ ਵੀ ਚੋਣ ਮੈਦਾਨ ਵਿੱਚ ਉਤਾਰਿਆ ਗਿਆ ਸੀ, ਪਰ ਇਸ ਵਾਰ ਚੰਨੀ ਨੂੰ ਕਿਸੇ ਦੇ ਖਿਲਾਫ਼ ਨਹੀਂ, ਬਲਕਿ ਲੋਅ ਪ੍ਰੋਫਾਈਲ ਸੀਟਾਂ ਤੋਂ ਉਤਾਰਿਆ ਗਿਆ ਹੈ। ਇਸ ਨੂੰ ਸੀਐੱਮ ਉਮੀਦਵਾਰ ਦੀ ਰਣਨੀਤੀ ਦੇ ਤੌਰ ‘ਤੇ ਵੇਖਿਆ ਜਾ ਰਿਹਾ ਹੈ।
ਅਰਵਿੰਦ ਕੇਜਰੀਵਾਲ ਦਾ ਚੰਨੀ ‘ਤੇ ਤੰਜ
ਸੀਐੱਮ ਚੰਨੀ ਦੇ 2 ਸੀਟਾਂ ਤੋਂ ਚੋਣ ਲੜਨ ‘ਤੇ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਤੰਜ ਕਸਿਆ ਹੈ। ਕੇਜਰੀਵਾਲ ਨੇ ਕਾਂਗਰਸ ਦੀ ਇਸ ਰਣਨੀਤੀ ਨੂੰ ਚਮਕੌਰ ਸਾਹਿਬ ਵਿੱਚ ਚੰਨੀ ਦੀ ਹਾਰ ਨਾਲ ਜੋੜ ਦਿੱਤਾ ਹੈ। ਟਵਿਟਰ ‘ਤੇ ਕੇਜਰੀਵਾਲ ਨੇ ਲਿਖਿਆ, “ਮੈਂ ਕਿਹਾ ਸੀ ਕਿ ਸਾਡੇ ਸਰਵੇ ਮੁਤਾਬਕ ਚੰਨੀ ਜੀ ਚਮਕੌਰ ਸਾਹਿਬ ਤੋਂ ਹਾਰ ਰਹੇ ਹਨ। ਅੱਜ ਕਾਂਗਰਸ ਨੇ ਐਲਾਨ ਕੀਤਾ ਹੈ ਕਿ ਉਹ 2 ਸੀਟਾਂ ਤੋਂ ਚੋਣ ਲੜਨਗੇ। ਇਸਦਾ ਮਤਲਬ ਸਰਵੇ ਸੱਚ ਹੈ?”
मैंने कहा था कि हमारे सर्वे के मुताबिक़ चन्नी जी चमकौर साहिब से हार रहे हैं। आज कांग्रेस ने एलान किया है कि वो दो सीटों से चुनाव लड़ेंगे। इसका मतलब सर्वे सच है?
— Arvind Kejriwal (@ArvindKejriwal) January 30, 2022
CM ਫੇਸ ਨਾਲ ਮੈਦਾਨ ‘ਚ ਉਤਰੇਗੀ ਕਾਂਗਰਸ
ਚੰਨੀ ਨੂੰ 2 ਸੀਟਾਂ ਤੋਂ ਮੈਦਾਨ ਵਿੱਚ ਉਤਾਰੇ ਜਾਣਾ ਇਸ ਲਈ ਬੇਹੱਦ ਅਹਿਮ ਹੈ ਕਿ ਹਾਲ ਹੀ ਵਿੱਚ ਪੰਜਾਬ ਦੌਰੇ ‘ਤੇ ਆਏ ਰਾਹੁਲ ਗਾਂਧੀ ਨੇ ਐਲਾਨ ਕੀਤਾ ਸੀ ਕਿ ਕਾਂਗਰਸ ਪਿਛਲੀ ਵਾਰ ਦੀ ਤਰ੍ਹਾਂ ਇਸ ਵਾਰ ਵੀ ਸੀਐੱਮ ਫੇਸ ਦੇ ਨਾਲ ਹੀ ਮੈਦਾਨ ਵਿੱਚ ਉਤਰੇਗੀ। ਰਾਹੁਲ ਨੇ ਕਿਹਾ ਸੀ ਕਿ ਕਾਂਗਰਸੀ ਆਗੂਆਂ ਤੇ ਉਮੀਦਵਾਰਾਂ ਨਾਲ ਰਾਏਸ਼ੁਮਾਰੀ ਕਰਕੇ ਸੀਐੱਮ ਉਮੀਦਵਾਰ ਦਾ ਨਾਂਅ ਤੈਅ ਕੀਤਾ ਜਾਵੇਗਾ। ਹੁਣ ਚੰਨੀ ਨੂੰ 2 ਸੀਟਾਂ ‘ਤੇ ਉਤਾਰੇ ਜਾਣ ਦੇ ਚਲਦੇ ਉਨ੍ਹਾਂ ਨੂੰ ਸੀਐੱਮ ਫੇਸ ਐਲਾਨੇ ਜਾਣ ਦੀਆਂ ਚਰਚਾਵਾਂ ਨੇ ਜ਼ੋਰ ਫੜ ਲਿਆ ਹੈ।
