ਚੰਡੀਗੜ੍ਹ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਵੱਡੀ ਕਾਰਵਾਈ ਕੀਤੀ ਹੈ। ਸੂਬੇ ਵਿੱਚ ਗੈਰ-ਕਾਨੂੰਨੀ ਰੇਤ ਮਾਈਨਿੰਗ ਦੇ ਮਾਮਲੇ ਵਿੱਚ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਭਾਣਜੇ ਭੁਪਿੰਦਰ ਸਿੰਘ ਹਨੀ ਨੂੰ ਗ੍ਰਿਫ਼ਤਾਰ ਕੀਤਾ z0.ਹੈ। ED ਨੇ ਵੀਰਵਾਰ02 ਨੂੰ ਹਨੀ ਨੂੰ ਜਲੰਧਰ ਵਿਖੇ ਪੁੱਛਗਿੱਛ ਲਈ ਬੁਲਾਇਆ ਸੀ, ਜਿਥੇ ਕਰੀਬ 8 ਘੰਟਿਆਂ ਦੀ ਪੁੱਛਗਿੱਛ ਤੋਂ ਬਾਅਦ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਵੀਰਵਾਰ ਦੇਰ ਰਾਤ ਭੁਪਿੰਦਰ ਹਨੀ ਦੀ ਗ੍ਰਿਫ਼ਤਾਰੀ ਕੀਤੀ ਗਈ।
CM ਨਾਲ ਕੁਨੈਕਸ਼ਨ ਖੰਗਾਲਣ ਦੀ ਕੋਸ਼ਿਸ਼ !
ਸੂਤਰਾਂ ਦੀ ਮੰਨੀਏ, ਤਾਂ ਭੁਪਿੰਦਰ ਹਨੀ ਤੋਂ ED ਵੱਲੋਂ ਕੀਤੀ ਗਈ ਕਰੀਬ 8 ਘੰਟੇ ਦੀ ਪੁੱਛਗਿੱਛ ਇਸ ਗੱਲ ‘ਤੇ ਅਧਾਰਤ ਰਹੀ ਕਿ ਇਸ ਪੂਰੇ ਮਾਮਲੇ ਵਿੱਚ ਕੀ ਸੀਐੱਮ ਚੰਨੀ ਦਾ ਵੀ ਕੋਈ ਹੱਥ ਹੈ? ਹਨੀ ਤੋਂ ਪੁੱਛਿਆ ਗਿਆ ਕਿ ਜੋ ਰਕਮ ਉਹਨਾਂ ਦੇ ਘਰੋਂ ਬਰਾਮਦ ਹੋਈ, ਕੀ ਉਹਨਾਂ ਦੇ ਮਾਸੜ ਸੀਐੱਮ ਚੰਨੀ ਨੇ ਉਹਨਾਂ ਕੋਲ ਰਖਵਾਈ ਸੀ? ਕੀ ਗੈਰ-ਕਾਨੂੰਨੀ ਮਾਈਨਿੰਗ ਦਾ ਪੂਰਾ ਕਾਰੋਬਾਰ ਸੀਐੱਮ ਦਾ ਹੈ? ਜੇਕਰ ਨਹੀਂ, ਤਾਂ ਇੰਨੀ ਰਕਮ ਉਸ ਕੋਲ ਕਿਥੋਂ ਆਈ? ਇਹਨਾਂ ਸਾਰੇ ਸਵਾਲਾਂ ਦੇ ਸੰਤੋਸ਼ਜਨਕ ਜਵਾਬ ਨਾ ਮਿਲਣ ਦੇ ਚਲਦੇ ਹੀ ED ਨੇ ਭੁਪਿੰਦਰ ਹਨੀ ਨੂੰ ਗ੍ਰਿਫ਼ਤਾਰ ਕੀਤਾ।
8 ਫ਼ਰਵਰੀ ਤੱਕ ਰਿਮਾਂਡ ‘ਤੇ ਹਨੀ
ਗ੍ਰਿਫ਼ਤਾਰੀ ਤੋਂ ਬਾਅਦ ਸ਼ੁੱਕਰਵਾਰ ਦੁਪਹਿਰ ਭੁਪਿੰਦਰ ਹਨੀ ਨੂੰ ਜਲੰਧਰ ਦੀ ਸਪੈਸ਼ਲ ਕੋਰਟ ਵਿੱਚ ਪੇਸ਼ ਕੀਤਾ ਗਿਆ। ਇਸ ਦੌਰਾਨ ED ਨੇ ਹਨੀ ਦਾ ਰਿਮਾਂਡ ਮੰਗਿਆ, ਤਾਂ ਜੋ ਪੁੱਛਗਿੱਛ ਦੌਰਾਨ ਸਾਰੇ ਸਵਾਲਾਂ ਦੇ ਜਵਾਬ ਮਿਲ ਸਕਣ। ਦਲੀਲਾਂ ਸੁਣਨ ਤੋਂ ਬਾਅਦ ਜਲੰਧਰ ਦੀ ਸਪੈਸ਼ਲ ਕੋਰਟ ਨੇ ਭੁਪਿੰਦਰ ਹਨੀ ਨੂੰ 8 ਫ਼ਰਵਰੀ ਤੱਕ ਰਿਮਾਂਡ ‘ਤੇ ਭੇਜ ਦਿੱਤਾ।
ਕੀ ਹੈ ਪੂਰਾ ਮਾਮਲਾ?
ਭੁਪਿੰਦਰ ਹਨੀ ਖਿਲਾਫ਼ ਇਹ ਕਾਰਵਾਈ 2018 ਵਿੱਚ ਦਰਜ ਹੋਏ ਗੈਰ-ਕਾਨੂੰਨੀ ਰੇਤ ਮਾਈਨਿੰਗ ਮਾਮਲੇ ਵਿੱਚ ਕੀਤੀ ਗਈ ਹੈ। ਤਤਕਾਲੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਹਵਾਈ ਦੌਰੇ ਦੌਰਾਨ ਹੋਏ ਗੈਰ-ਕਾਨੂੰਨੀ ਮਾਈਨਿੰਗ ਦੇ ਖੁਲਾਸੇ ਤੋਂ ਬਾਅਦ ਰੋਪੜ ਦੇ ਥਾਣੇ ਵਿੱਚ ਇਹ ਕੇਸ ਦਰਜ ਹੋਇਆ ਸੀ।
ਇਸੇ ਕੇਸ ਦੀ ਜਾਂਚ ਲਈ ED ਨੇ 18 ਜਨਵਰੀ ਨੂੰ ਭੁਪਿੰਦਰ ਹਨੀ ਅਤੇ ਉਸਦੇ ਸਾਥੀਆਂ ਦੇ ਟਿਕਾਣਿਆਂ ‘ਤੇ ਮੋਹਾਲੀ ਅਤੇ ਲੁਧਿਆਣਾ ਵਿੱਚ ਛਾਪੇਮਾਰੀ ਕੀਤੀ ਸੀ। ਇਸ ਦੌਰਾਨ 10 ਕਰੋੜ ਕੈਸ਼, 12 ਲੱਖ ਦੀ ਰੋਲੈਕਸ ਘੜੀ ਅਤੇ 21 ਲੱਖ ਦੇ ਸੋਨੇ ਦੀ ਬਰਾਮਦਗੀ ਹੋਈ ਸੀ। ਬਰਾਮਦ ਕੈਸ਼ ਵਿੱਚੋਂ 8 ਕਰੋੜ ਰੁਪਏ ਹਨੀ ਦੇ ਮੋਹਾਲੀ ਸਥਿਤ ਘਰ ਅਤੇ 2 ਕਰੋੜ ਰੁਪਏ ਉਸਦੇ ਦੋਸਤ ਸੰਦੀਪ ਦੀ ਲੁਧਿਆਣਾ ਰਿਹਾਇਸ਼ ਤੋਂ ਬਰਾਮਦ ਕੀਤੇ ਗਏ ਸਨ।
CM ਚਿਹਰੇ ਦੇ ਐਲਾਨ ਤੋਂ ਪਹਿਲਾਂ ਕਾਰਵਾਈ
ਕਾਂਗਰਸ 6 ਫਰਵਰੀ ਨੂੰ ਸੂਬੇ ਵਿੱਚ ਸੀਐੱਮ ਫੇਸ ਦਾ ਐਲਾਨ ਕਰਨ ਜਾ ਰਹੀ ਹੈ, ਜਿਸਦੇ ਲਈ ਰਾਹੁਲ ਗਾਂਧੀ ਲੁਧਿਆਣਾ ਆ ਰਹੇ ਹਨ। ਲੁਧਿਆਣਾ ਵਿੱਚ ਵਰਚੁਅਲ ਰੈਲੀ ਦੇ ਦੌਰਾਨ ਹੀ ਰਾਹੁਲ ਕਾਂਗਰਸ ਦੇ ਸੀਐੱਮ ਫੇਸ ਦਾ ਐਲਾਨ ਕਰਨਗੇ। ਦਿਲਚਸਪ ਹੈ ਕਿ ਸੀਐੱਮ ਫੇਸ ਲਈ ਨਵਜੋਤ ਸਿੱਧੂ ਅਤੇ ਚਰਨਜੀਤ ਚੰਨੀ ਹੀ ਮੁੱਖ ਦਾਅਵੇਦਾਰ ਹਨ। ਖਾਸ ਤੌਰ ‘ਤੇ ਚੰਨੀ ਦਾ ਨਾਂਅ ਲਗਭਗ ਤੈਅ ਮੰਨਿਆ ਜਾ ਰਿਹਾ ਹੈ। ਅਜਿਹੇ ਵਿੱਚ ਇਸ ਕਾਰਵਾਈ ਦੀ ਟਾਈਮਿੰਗ ਨੂੰ ਲੈ ਕੇ ਸਵਾਲ ਉਠਣੇ ਲਾਜਮੀ ਹਨ।
