ਬਿਓਰੋ। ਪੰਜਾਬ ਵਿੱਚ 2 ਦਿਨਾਂ ਤੋਂ ਲਗਾਤਾਰ ਪ੍ਰਚਾਰ ਕਰ ਰਹੇ ਕਾਂਗਰਸੀ ਲੀਡਰ ਰਾਹੁਲ ਗਾਂਧੀ ਨੇ ਵੱਡਾ ਬਿਆਨ ਦਿੱਤਾ ਹੈ। ਬਰਨਾਲਾ ਵਿੱਚ ਰੈਲੀ ਦੌਰਾਨ ਰਾਹੁਲ ਨੇ ਕਿਹਾ ਕਿ ਪੰਜਾਬ ਵਿੱਚ ਸ਼ਾਂਤੀ ਸਿਰਫ਼ ਕਾਂਗਰਸ ਹੀ ਰਖ ਸਕਦੀ ਹੈ। ਜੇਕਰ ਇਥੇ ਕੋਈ ਐਕਸਪੈਰੀਮੈਂਟ ਕੀਤਾ ਗਿਆ, ਤਾਂ ਪੰਜਾਬ ਵਿੱਚ ਅੱਗ ਲੱਗ ਸਕਦੀ ਹੈ। ਪੰਜਾਬ ਲਈ ਸਭ ਤੋਂ ਜ਼ਰੂਰੀ ਚੀਜ਼ ਸ਼ਾਂਤੀ, ਸੁਰੱਖਿਆ ਅਤੇ ਸਥਿਰਤਾ ਹੈ। ਜਿਸ ਦਿਨ ਪੰਜਾਬ ਤੋਂ ਸ਼ਾਂਤੀ ਗਈ, ਪੂਰੇ ਹਿੰਦੁਸਤਾਨ ਦਾ ਨੁਕਸਾਨ ਹੋਵੇਗਾ।
Live: बरनाला में जन सभा- पंजाब है कांग्रेस के साथ।#JeetegiCongress_JeetugaPunjab https://t.co/4pWvwBKnWs
— Rahul Gandhi (@RahulGandhi) February 15, 2022
ਰਾਹੁਲ ਨੇ ਇਹ ਬਿਆਨ ਅਰਵਿੰਦ ਕੇਜਰੀਵਾਲ ਅਤੇ ਉਹਨਾਂ ਦੀ ਪਾਰਟੀ ‘ਤੇ ਦਹਿਸ਼ਤਗਰਦਾਂ ਨਾਲ ਮਿਲੀਭੁਗਤ ਦਾ ਇਲਜਾਮ ਲਗਾਉਂਦੇ ਹੋਏ ਦਿੱਤਾ। ਰਾਹੁਲ ਨੇ ਕਿਹਾ ਕਿ ਕਾਂਗਰਸ ਦਾ ਵਰਕਰ ਵੀ ਤੁਹਾਨੂੰ ਦਹਿਸ਼ਤਗਰਦ ਦੇ ਘਰ ਨਹੀਂ ਮਿਲੇਗਾ। ਉਹਨਾਂ ਕਿਹਾ ਕਿ ਝਾੜੂ ਦੇ ਸਭ ਤੋਂ ਵੱਡੇ ਲੀਡਰ (ਅਰਵਿੰਦ ਕੇਜਰੀਵਾਲ) ਉਥੇ ਮਿਲਦੇ ਹਨ। ਪੰਜਾਬ ਦੇ ਸਾਹਮਣੇ ਖ਼ਤਰਾ ਹੈ, ਜਿਸਦੇ ਲਈ ਚਰਨਜੀਤ ਚੰਨੀ ਵਰਗੇ ਮਜਬੂਤ ਸੀਐੱਮ ਦੀ ਜ਼ਰੂਰਤ ਹੈ।
ਕੇਜਰੀਵਾਲ ਦੇ ਦਿੱਲੀ ਮਾਡਲ ‘ਤੇ ਵੀ ਹਮਲਾ
ਰਾਹੁਲ ਗਾਂਧੀ ਨੇ ਕਿਹਾ, “ਮੈਂ ਪਹਿਲਾਂ ਕਿਹਾ ਸੀ ਕਿ ਪੰਜਾਬ ਵਿੱਚ ਡਰੱਗਜ਼ ਹਨ। ਕਿਸੇ ਨੇ ਯਕੀਨ ਨਹੀਂ ਕੀਤਾ। ਉਸ ਤੋਂ ਬਾਅਦ ਕੀ ਹੋਇਆ, ਸਭ ਵੇਖ ਰਹੇ ਹਨ। ਮੈਂ ਮਜੀਠੀਆ ਤੋਂ ਮੁਆਫੀ ਨਹੀਂ ਮੰਗੀ ਹੈ। ਅਰਵਿੰਦ ਕੇਜਰੀਵਾਲ ਨੇ ਮੰਗੀ ਹੈ।”
ਰਾਹੁਲ ਨੇ ਅੱਗੇ ਕਿਹਾ, “ਕੇਜਰੀਵਾਲ ਨੇ ਕਿਹਾ ਕਿ ਉਹਨਾਂ ਨੇ ਮੁਹੱਲਾ ਕਲੀਨਿਕ ਖੋਲ੍ਹੇ। ਸਿਹਤ ਸੈਕਟਰ ਨੂੰ ਬਦਲਿਆ। ਕੋਰੋਨਾ ਦੇ ਵਕਤ ਉਹ ਮੁਹੱਲਾ ਕਲੀਨਿਕ ਕਿਥੇ ਗਾਇਬ ਹੋ ਗਏ? ਪੰਜਾਬ ‘ਚ ਅਸੀਂ ਕੋਰੋਨਾ ਦੇ ਖਿਲਾਫ਼ ਲੜੇ। ਪੰਜਾਬ ‘ਚ ਦਿੱਲੀ ਵਰਗੀ ਹਾਲਤ ਨਹੀਂ ਹੋਈ। ਅਸੀਂ ਕੋਰੋਨਾ ਨੂੰ ਕੰਟਰੋਲ ਕੀਤਾ। ਆਮ ਆਦਮੀ ਪਾਰਟੀ ਦੀ ਤਰ੍ਹਾਂ ਅਸੀਂ 1-2 ਹਜਾਰ ਕਰੋੜ ਦੀ ਮਾਰਕਿਟਿੰਗ ਨਹੀਂ ਕੀਤੀ।”
