ਬਿਓਰੋ। ਪੰਜਾਬ ਦੇ ਮਾਲਵਾ ਖੇਤਰ ਵਿੱਚ ਹੋਈ ਬੰਪਰ ਵੋਟਿੰਗ ‘ਚ ਹੁਣ ਨਵਾਂ ਫੈਕਟਰ ਸਾਹਮਣੇ ਆ ਰਿਹਾ ਹੈ। ਕਿਹਾ ਜਾ ਰਿਹਾ ਹੈ ਕਿ ਮਾਲਵਾ ਵਿੱਚ ਦੀਪ ਸਿੱਧੂ ਫੈਕਟਰ ਨੇ ਵੀ ਖੂਬ ਕੰਮ ਕੀਤਾ। ਦਰਅਸਲ, ਇਸ ਵਾਰ ਦੀਪ ਸਿੱਧੂ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਲਈ ਪ੍ਰਚਾਰ ਕਰ ਰਹੇ ਸਨ। ਵੋਟਿੰਗ ਤੋਂ ਕੁਝ ਦਿਨ ਪਹਿਲਾਂ ਸੜਕ ਹਾਦਸੇ ਵਿੱਚ ਦੀਪ ਦੀ ਮੌਤ ਹੋ ਗਈ, ਜਿਸ ਤੋਂ ਬਾਅਦ ਦੀਪ ਦੇ ਸਮਰਥਨ ਵਿੱਚ ਉਠੀ ਹਮਦਰਦੀ ਦੀ ਲਹਿਰ ਦਾ ਅਕਾਲੀ ਦਲ (ਅੰਮ੍ਰਿਤਸਰ) ਨੂੰ ਫਾਇਦਾ ਹੁੰਦਾ ਨਜ਼ਰ ਆ ਰਿਹਾ ਹੈ।
ਜਾਣਕਾਰਾਂ ਮੁਤਾਬਕ, ਜਿਥੇ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਕੈਂਡੀਡੇਟ ਨਹੀਂ ਸਨ, ਉਥੇ ਸੰਯੁਕਤ ਸਮਾਜ ਮੋਰਚਾ(SSM) ਨੂੰ ਉਸਦਾ ਫਾਇਦਾ ਮਿਲਿਆ।
ਦੀਪ ਸਿੱਧੂ ਦੀ ਅਪੀਲ ਨੇ ਕੀਤਾ ਕੰਮ !
ਦੀਪ ਸਿੱਧੂ ਨੇ ਸਭ ਤੋਂ ਵੱਧ ਪ੍ਰਚਾਰ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਲਈ ਕੀਤਾ। ਮਾਨ ਅਮਰਗੜ੍ਹ ਤੋਂ ਚੋਣ ਲੜ ਰਹੇ ਹਨ। ਅਮਰਗੜ੍ਹ ਵਿੱਚ ਇੱਕ ਚੋਣ ਸਭਾ ‘ਚ ਦੀਪ ਸਿੱਧੂ ਨੇ ਇੱਕ ਹੱਥ ਵਿੱਚ ਤਲਵਾਰ ਅਤੇ ਦੂਜੇ ਵਿੱਚ ਝਾੜੂ ਫੜ ਕੇ ਭਾਵੁਕ ਅਪੀਲ ਕੀਤੀ। ਦੀਪ ਨੇ ਕਿਹਾ ਸੀ ਕਿ ਗੁਰੂਆਂ ਨੇ ਸਾਨੂੰ ਝਾੜੂ ਨਹੀਂ, ਤਲਵਾਰ ਫੜਾਈ ਸੀ। ਦੀਪ ਨੇ ਇਥੋਂ ਤੱਕ ਕਿਹਾ ਸੀ ਕਿ ਝਾੜੂ ਫੜਨ ਦਾ ਮਤਲਬ ਤਾਂ ਸ਼ਰਮ ਨਾਲ ਮਰਨ ਵਾਲੀ ਗੱਲ ਹੈ।
ਆਮ ਆਦਮੀ ਪਾਰਟੀ ਨੂੰ ਨੁਕਸਾਨ ਸੰਭਵ
ਦੀਪ ਦੀ ਮੌਤ ਤੋਂ ਬਾਅਦ ਉਹਨਾਂ ਦੀ ਵੀਡੀਓ ਖੂਬ ਵਾਇਰਲ ਹੋਈ ਅਤੇ ਮੰਨਿਆ ਜਾ ਰਿਹਾ ਹੈ ਕਿ ਇਸ ਵੀਡੀਓ ਨੇ ਆਮ ਆਦਮੀ ਪਾਰਟੀ ਨੂੰ ਮਾਲਵਾ ਦੀਆਂ ਕਈ ਸੀਟਾਂ ‘ਤੇ ਖੂਬ ਨੁਕਸਾਨ ਪਹੁੰਚਾਇਆ ਹੈ। ਸਿਆਸੀ ਮਾਹਰ ਤਾਂ ਇਥੋਂ ਤੱਕ ਕਹਿ ਰਹੇ ਹਨ ਕਿ ਆਮ ਆਦਮੀ ਪਾਰਟੀ ਨੂੰ ਓਨਾ ਨੁਕਸਾਨ ਕੁਮਾਰ ਵਿਸ਼ਵਾਸ ਦੇ ਬਿਆਨ ਨਾਲ ਨਹੀਂ ਹੋਇਆ, ਜਿੰਨਾ ਦੀਪ ਸਿੱਧੂ ਦੀ ਵਜ੍ਹਾ ਨਾਲ ਝੱਲਣਾ ਪੈ ਸਕਦਾ ਹੈ।
ਕਾਂਗਰਸ ਨੂੰ ਮਿਲ ਸਕਦਾ ਹੈ ਫਾਇਦਾ
ਜੇਕਰ ਦੀਪ ਸਿੱਧੂ ਫੈਕਟਰ ਦੀ ਵਜ੍ਹਾ ਨਾਲ ਵੋਟ ਅਕਾਲੀ ਦਲ ਅੰਮ੍ਰਿਤਸਰ ਅਤੇ ਸੰਯੁਕਤ ਸਮਾਜ ਮੋਰਚੇ ਨੂੰ ਪਈ ਹੋਵੇਗੀ, ਤਾਂ ਤੈਅ ਹੈ ਕਿ ਇਸ ਨਾਲ ਆਮ ਆਦਮੀ ਪਾਰਟੀ ਦੀ ਵੋਟ ਕਾਫੀ ਕੱਟੀ ਗਈ ਹੋਵੇਗੀ। ਇਸ ਨਾਲ ਕਾਂਗਰਸ ਨੂੰ ਫਾਇਦਾ ਮਿਲੇਗਾ, ਕਿਉਂਕਿ ਕਾਂਗਰਸ ਆਪਣੇ ਪੱਕੇ ਵੋਟ ਬੈਂਕ ‘ਤੇ ਨਿਰਭਰ ਹੈ। ਜੇਕਰ ਬਦਲਾਅ ਦੀ ਗੱਲ ਵਾਲੀ ਵੋਟ ‘ਆਪ’ ਨੂੰ ਨਹੀਂ ਮਿਲੀ, ਤਾਂ ਫਿਰ ਕਾਂਗਰਸ ਸੱਤਾ ਵਿੱਚ ਰਹਿਣ ਦੇ ਫਾਇਦੇ ਨਾਲ ਸੀਟਾਂ ਜਿੱਤ ਸਕਦੀ ਹੈ।
