ਚੰਡੀਗੜ੍ਹ। ਬੀਤੇ ਦਿਨੀੰ ਸ਼੍ਰੋਮਣੀ ਅਕਾਲੀ ਦਲ ਦੀ ਕੋਰ ਕਮੇਟੀ ਦੀ ਹੋਈ ਬੈਠਕ ਵਿੱਚੋੰ ਪਾਰਟੀ ਦੇ ਸੀਨੀਅਰ ਆਗੂ ਪ੍ਰੋ. ਪ੍ਰੇਮ ਸਿੰਘ ਚੰਦੂਮਾਜਰਾ ਗੈਰ-ਹਾਜ਼ਰ ਰਹੇ। ਹਰ ਵਕਤ ਪਾਰਟੀ ਦੀਆੰ ਗਤੀਵਿਧੀਆੰ ‘ਚ ਵੱਧ-ਚੜ੍ਹ ਕੇ ਹਿੱਸਾ ਲੈਣ ਵਾਲੇ ਚੰਦੂਮਾਜਰਾ ਦੀ ਕੋਰ ਕਮੇਟੀ ਦੀ ਬੈਠਕ ‘ਚੋੰ ਗੈਰ-ਹਾਜ਼ਰੀ ਕਾਫੀ ਹੈਰਾਨ ਕਰ ਦੇਣ ਵਾਲੀ ਸੀ। ਤੇ ਬਾਅਦ ਵਿੱਚ ਇਸਦੀ ਜੋ ਵਜ੍ਹਾ ਸਾਹਮਣੇ ਆਈ, ਉਹ ਇਹ ਦੱਸਣ ਲਈ ਕਾਫੀ ਹੈ ਕਿ ਚੰਦੂਮਾਜਰਾ ਨੇ ਵੀ ਮਨਪ੍ਰੀਤ ਇਆਲੀ ਵਾੰਗ ਬਾਗੀ ਸੁਰ ਅਖਤਿਆਰ ਕਰ ਲਏ ਹਨ।
ਸਿਸਟਮ ਕਿਉੰ ਤੋੜਿਆ?- ਚੰਦੂਮਾਜਰਾ
ਦਰਅਸਲ, ਚੰਦੂਮਾਜਰਾ ਨੇ ਝੂੰਦਾ ਕਮੇਟੀ ਦੀ ਰਿਪੋਰਟ ਨੂੰ ਸਿੱਧੇ ਕੋਰ ਕਮੇਟੀ ‘ਚ ਰੱਖਣ ‘ਤੇ ਸਵਾਲ ਖੜ੍ਹੇ ਕੀਤੇ ਹਨ। ਉਹਨਾੰ ਨੇ ਕਿਹਾ ਕਿ ਰਿਪੋਰਟ ਨੂੰ ਪਹਿਲਾੰ ਸਮੀਖਿਆ ਕਮੇਟੀ ਕੋਲ ਭੇਜਿਆ ਜਾਣਾ ਚਾਹੀਦਾ ਹੈ। ਚੰਦੂਮਾਜਰਾ ਨੇ ਕਿਹਾ, “ਪਾਰਟੀ ਪ੍ਰਧਾਨ ਸੁਖਬੀਰ ਬਾਦਲ ਨੇ ਖੁਦ ਕਮੇਟੀ ਕਨਵੀਨਰ ਬਲਵਿੰਦਰ ਭੂੰਦੜ ਨੂੰ ਕਿਹਾ ਸੀ ਕਿ ਉਹ ਸਮੀਖਿਆ ਕਮੇਟੀ ਦੀ ਬੈਠਕ ਕਰਨ। ਬੈਠਕ ਵਿੱਚ ਝੂੰਦਾ ਕਮੇਟੀ ਦੀ ਰਿਪੋਰਟ ‘ਤੇ ਵਿਚਾਰ ਕੀਤਾ ਜਾਵੇ ਅਤੇ ਇੱਕ ਸਾੰਝੀ ਰਾਏ ਬਣਾ ਕੇ ਹੀ ਉਸ ਨੂੰ ਕੋਰ ਕਮੇਟੀ ਵਿੱਚ ਲਿਆੰਦਾ ਜਾਵੇ। ਇਸਦੇ ਬਾਵਜੂਦ ਰਿਪੋਰਟ ਸਿੱਧੇ ਕੋਰ ਕਮੇਟੀ ਵਿੱਚ ਰੱਖ ਦਿੱਤੀ ਗਈ। ਕਮੇਟੀ ਮੈੰਬਰ ਹੋਣ ਦੇ ਬਾਵਜੂਦ ਮੈੰ ਰਿਪੋਰਟ ਪੜ੍ਹੀ ਵੀ ਨਹੀੰ ਹੈ। ਮੈਨੂੰ ਨਹੀੰ ਪਤਾ ਕਿ ਸਿੱਧੇ ਰਿਪੋਰਟ ਉਥੇ ਕਿਉੰ ਭੇਜ ਦਿੱਤੀ ਗਈ?”
ਹਾਲਾਂਕਿ ਨਾਲ ਹੀ ਪ੍ਰੋ. ਚੰਦੂਮਾਜਰਾ ਇਹ ਵੀ ਕਹਿੰਦੇ ਹਨ ਕਿ ਉਹ ਕੋਰ ਕਮੇਟੀ ਦੀ ਬੈਠਕ ਵਿੱਚ ਇਸ ਲਈ ਨਹੀੰ ਗਏ, ਕਿਉੰਕਿ ਉਹਨਾੰ ਦੇ ਨਜ਼ਦੀਕੀਆੰ ਦੇ ਪਰਿਵਾਰਕ ਮੈੰਬਰ ਦਾ ਭੋਗ ਸੀ, ਜਿਥੇ ਉਹਨਾੰ ਦਾ ਪਹੁੰਚਣਾ ਜ਼ਰੂਰੀ ਸੀ।
ਵਲਟੋਹਾ ਨੇ ਖਾਰਜ ਕੀਤੇ ਚੰਦੂਮਾਜਰਾ ਦੇ ਇਲਜ਼ਾਮ
ਚੰਦੂਮਾਜਰਾ ਦੇ ਇਲਜ਼ਾਮਾੰ ਨੂੰ ਸੀਨੀਅਰ ਅਕਾਲੀ ਆਗੂ ਵਿਰਸਾ ਸਿੰਘ ਵਲਟੋਹਾ ਨੇ ਖਾਰਜ ਕੀਤਾ ਹੈ। ਉਹਨਾੰ ਕਿਹਾ, “ਰਿਪੋਰਟ ‘ਚ ਹਰ ਸ਼ਬਦ ‘ਤੇ ਪ੍ਰੋ. ਚੰਦੂਮਾਜਰਾ ਦੀ ਸਲਾਹ ਲਈ ਗਈ ਹੈ। ਉਹਨਾੰ ਨੇ ਕੋਰ ਕਮੇਟੀ ਦੀ ਮੀਟਿੰਗ ਤੋੰ ਪਹਿਲਾੰ ਹੀ ਦੱਸ ਦਿੱਤਾ ਸੀ ਕਿ ਉਹ ਅੱਜ ਮੀਟਿੰਗ ‘ਚ ਨਹੀੰ ਆ ਸਕਦੇ।”
ਝੂੰਦਾ ਕਮੇਟੀ ਨੇ ਦਿੱਤੇ 42 ਸੁਝਾਅ (ਅਕਾਲੀ ਦਲ ‘ਚ ਬਰਕਰਾਰ ਰਹੇਗੀ ਸੁਖਬੀਰ ਬਾਦਲ ਦੀ ‘ਸਰਦਾਰੀ’ ! )
ਕਾਬਿਲੇਗੌਰ ਹੈ ਕਿ ਵਿਧਾਨ ਸਭਾ ਚੋਣਾੰ ਵਿੱਚ ਹਾਰ ਦੇ ਮੰਥਨ ਲਈ ਅਕਾਲੀ ਦਲ ਨੇ ਸੀਨੀਅਰ ਆਗੂ ਇਕਬਾਲ ਸਿੰਘ ਝੂੰਦਾ ਦੀ ਅਗਵਾਈ ਵਿੱਚ 13 ਮੈੰਬਰੀ ਕਮੇਟੀ ਦਾ ਗਠਨ ਕੀਤਾ ਸੀ। ਇਸ ਕਮੇਟੀ ਨੇ ਬੀਤੇ ਦਿਨ ਚੰਡੀਗੜ੍ਹ ‘ਚ ਹੋਈ ਕੋਰ ਕਮੇਟੀ ਦੀ ਮੀਟਿੰਗ ‘ਚ ਆਪਣੀ ਰਿਪੋਰਟ ਸੌੰਪੀ ਸੀ, ਜਿਸ ‘ਤੇ ਕਰੀਬ 5 ਘੰਟੇ ਮੰਥਨ ਹੋਇਆ। ਇਸ ਤੋੰ ਬਾਅਦ ਬਲਵਿੰਦਰ ਭੂੰਦੜ ਨੇ ਦੱਸਿਆ ਸੀ ਕਿ ਕਮੇਟੀ ਦੀਆੰ ਸਾਰੀਆੰ 42 ਸਿਫਾਰਿਸ਼ਾੰ ਨੂੰ ਮੰਨ ਲਿਆ ਗਿਆ ਹੈ। ਇਹਨਾੰ ਵਿੱਚ ਪਾਰਟੀ ਪ੍ਰਧਾਨ ਬਦਲੇ ਜਾਣ ਦਾ ਸੁਝਾਅ ਸ਼ਾਮਲ ਨਹੀੰ ਸੀ।
ਰਾਸ਼ਟਰਪਤੀ ਚੋਣਾੰ ‘ਚ ਇਆਲੀ ਨੇ ਕੀਤੀ ਸੀ ਬਗਾਵਤ
ਦੱਸ ਦਈਏ ਕਿ ਹਾਲ ਹੀ ਵਿੱਚ ਹੋਈਆੰ ਰਾਸ਼ਟਰਪਤੀ ਚੋਣਾੰ ਦੌਰਾਨ ਵਿਧਾਇਕ ਮਨਪ੍ਰੀਤ ਇਆਲੀ ਨੇ ਵੀ ਅਕਾਲੀ ਦਲ ਨੂੰ ਬਾਗੀ ਤੇਵਰ ਵਿਖਾਈ ਸਨ। ਪਾਰਟੀ ਦੇ ਸਮਰਥਨ ਦੇ ਬਾਵਜੂਦ ਉਹਨਾੰ ਨੇ ਦ੍ਰੌਪਦੀ ਮੁਰਮੂ ਨੂੰ ਵੋਟ ਨਹੀੰ ਦਿੱਤਾ ਅਤੇ ਚੋਣਾੰ ਦਾ ਵੀ ਬਾਈਕਾਟ ਕਰ ਦਿੱਤਾ। ਉਹਨਾੰ ਨੇ ਸਪੱਸ਼ਟ ਲਹਿਜ਼ੇ ਵਿੱਚ ਕਿਹਾ ਸੀ ਕਿ ਮੁਰਮੂ ਨੂੰ ਸਮਰਥਨ ਦੇਣ ਤੋੰ ਪਹਿਲਾੰ ਉਹਨਾੰ ਦੀ ਰਾਏ ਨਹੀੰ ਲਈ ਗਈ।
