January 12, 2023
(New Delhi)
ਬਿਹਾਰ ਦੀ ਸਿਆਸਤ ਵਿੱਚ ਆਪਣੀ ਵੱਖਰੀ ਪਛਾਣ ਰੱਖਣ ਵਾਲੇ JDU ਦੇ ਸਾਬਕਾ ਪ੍ਰਧਾਨ ਸ਼ਰਦ ਯਾਦਵ ਨਹੀਂ ਰਹੇ। ਉਹਨਾਂ ਦੀ ਧੀ ਸੁਭਾਸ਼ਿਨੀ ਯਾਦਵ ਨੇ ਟਵੀਟ ਕਰਕੇ ਇਸ ਬਾਰੇ ਜਾਣਕਾਰੀ ਦਿੱਤੀ। ਸੁਭਾਸ਼ਿਨੀ ਨੇ ਆਪਣੇ ਟਵੀਟ ਵਿੱਚ ਲਿਖਿਆ, “ਪਾਪਾ ਨਹੀਂ ਰਹੇ”..। ਸ਼ਰਦ ਯਾਦਵ ਨੇ ਗੁਰੂਗ੍ਰਾਮ ਦੇ ਫੌਰਟਿਸ ਹਸਪਤਾਲ ਵਿੱਚ ਆਖਰੀ ਸਾਹ ਲਏ। ਉਹਨਾਂ ਦੀ ਉਮਰ 75 ਸਾਲ ਸੀ।
पापा नहीं रहे 😭
— Subhashini Sharad Yadav (@Subhashini_12b) January 12, 2023
ਫੌਰਟਿਸ ਹਸਪਤਾਲ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਕਿ ਸ਼ਰਦ ਯਾਦਵ ਨੂੰ ਬੇਸੁਧ ਹਾਲਤ ਵਿੱਚ ਹਸਪਤਾਲ ਲਿਆਂਦਾ ਗਿਆ ਸੀ। ਚੈਕਅੱਪ ਕਰਨ ‘ਤੇ ਪਾਇਆ ਗਿਆ ਕਿ ਉਹਨਾਂ ਦੇ ਸਾਹ ਨਹੀਂ ਚੱਲ ਰਹੇ ਸਨ। ਪ੍ਰੋਟੋਕਾਲ ਮੁਤਾਬਕ, ਉਹਨਾਂ ਨੂੰ CPR ਦਿੱਤੀ ਗਈ, ਪਰ ਕਾਫੀ ਕੋਸ਼ਿਸ਼ਾਂ ਦੇ ਬਾਵਜੂਦ ਉਹਨਾਂ ਨੂੰ ਬਚਾਇਆ ਨਹੀਂ ਜਾ ਸਕਿਆ। ਆਖਰਕਾਰ, ਰਾਜ 10.19 ਵਜੇ ਉਹਨਾਂ ਨੂੰ ਮ੍ਰਿਤ ਐਲਾਨ ਦਿੱਤਾ ਗਿਆ।
ਵਾਜਪਾਈ ਸਰਕਾਰ ‘ਚ ਮੰਤਰੀ ਰਹੇ
ਸ਼ਰਦ ਯਾਦਵ 1999 ਤੋਂ 2004 ਤੱਕ ਅਟਲ ਬਿਹਾਰੀ ਵਾਜਪਾਈ ਦੀ ਸਰਕਾਰ ਵਿੱਚ ਵੱਖ-ਵੱਖ ਵਿਭਾਗਾਂ ਦੇ ਮੰਤਰੀ ਰਹੇ। 2003 ਵਿੱਚ ਉਹ ਜਨਤਾ ਦਲ ਯੂਨਾਈਟੇਡ(JDU) ਦੇ ਪ੍ਰਧਾਨ ਬਣੇ ਸਨ। ਉਹ NDA ਦੇ ਸੰਯੋਜਕ ਵੀ ਰਹੇ। ਸਾਲ 2018 ਵਿੱਚ ਉਹਨਾਂ ਨੇ JDU ਤੋਂ ਵੱਖ ਹੋ ਕੇ ਲੋਕਤਾਂਤਰਿਕ ਜਨਤਾ ਦਲ(LJD) ਦਾ ਗਠਨ ਕੀਤਾ ਸੀ। ਪਿਛਲੇ ਸਾਲ ਹੀ ਉਹਨਾਂ ਨੇ ਆਪਣੀ ਪਾਰਟੀ ਦਾ RJD ਵਿੱਚ ਰਲੇਵਾਂ ਕਰ ਲਿਆ ਸੀ।
