ਖਰੜ: ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ 18 ਨਵੰਬਰ ਨੂੰ ਖਰੜ ਵਿਚ ਵਪਾਰੀਆਂ ਤੇ ਉਦਯੋਗਪਤੀਆਂ ਨਾਲ ਮੀਟਿੰਗ ਦੌਰਾਨ ਐਲਾਨ ਕੀਤਾ ਕਿ ਅਗਲੀ ਅਕਾਲੀ ਸਰਕਾਰ ਸੂਬੇ ਦੀਆਂ ਸਾਰੀਆਂ ਗੈਰ-ਕਾਨੂੰਨੀ ਕਲੌਨੀਆਂ ਨੂੰ ਜਿਥੇ ਹਨ ਜਿਵੇਂ ਹਨ ਦੇ ਆਧਾਰ ’ਤੇ ਰੈਗੂਲਰ ਕਰਨ ਲਈ ਯਕਮੁਸ਼ਤ ਸੈਟਲਮੈਂਟ ਸਕੀਮ ਲਿਆਵੇਗੀ।
ਇਹ ਮੀਟਿੰਗ ਹਲਕਾ ਇੰਚਾਰਜ ਰਵਿੰਦਰ ਸਿੰਘ ਖੈੜਾ ਦੀ ਪਹਿਲਕਦਮੀ ’ਤੇ ਕਰਵਾਈ ਗਈ ਸੀ।
ਕਲੌਨੀਆਂ ਸਬੰਧੀ ਐਲਾਨ
ਬਾਦਲ ਨੇ ਕਿਹਾ ਕਿ ਅਜਿਹੀਆਂ ਕਲੌਨੀਆਂ ਵਿਚ ਜਾਇਦਾਦ ਵੇਚਣ ਲਈ ਇਤਰਾਜ਼ ਰਹਿਤ ਸਰਟੀਫਿਕੇਟ (ਐਨ.ਓ.ਸੀ.) ਦੀ ਸ਼ਰਤ ਖ਼ਤਮ ਕੀਤੀ ਜਾਵੇਗੀ, ਜਿਸ ਨੂੰ ਉਹਨਾਂ ਨੇ ਭ੍ਰਿਸ਼ਟਾਚਾਰ ਦਾ ਅੱਡਾ ਦੱਸਿਆ। ਉਹਨਾਂ ਕਿਹਾ ਕਿ ਨਕਸ਼ਿਆਂ ਸਮੇਤ ਸਾਰੀਆਂ ਪ੍ਰਵਾਨਗੀਆਂ ਨਵੀਂ ਸਰਕਾਰ ਵਿਚ ਬਣਨ ਵਾਲੇ ਬਿਲਡ ਪੰਜਾਬ ਵਿਭਾਗ ਵੱਲੋਂ ਇਕ ਮਹੀਨੇ ਅੰਦਰ ਦਿੱਤੀਆਂ ਜਾਣਗੀਆਂ ਤੇ ਡਵਲੈਪਮੈਂਟ ਚਾਰਜਿਜ਼ ਸਮੇਤ ਟੈਕਸਾਂ ਨੂੰ ਤਰਕਸੰਗਤ ਬਣਾਇਆ ਜਾਵੇਗਾ।
ਉਹਨਾਂ ਨੇ ਦੱਸਿਆ ਕਿ ਜਿਹੜੀਆਂ ਕਲੌਨੀਆਂ ਵਿਚ ਸੀਵਰੇਜ ਤੇ ਸੜਕਾਂ ਵਰਗੀਆਂ ਸਹੂਲਤਾਂ ਨਹੀਂ ਹਨ, ਉਹਨਾਂ ਨੂੰ ਸਰਕਾਰ ਆਪਣੇ ਕੰਟਰੋਲ ਹੇਠ ਲੈ ਕੇ ਸਹੂਲਤਾਂ ਮੁਹੱਈਆ ਕਰਵਾਏਗੀ ਤੇ ਅਜਿਹੇ ਪ੍ਰਾਜੈਕਟਾਂ ਸਬੰਧੀ ਡਵੈਲਪਰਾਂ ਨਾਲ ਸਰਕਾਰ ਖੁਦ ਨਜਿੱਠੇਗੀ।
ਛੋਟੇ ਵਪਾਰੀਆਂ ਲਈ ਰਾਹਤ ਸਕੀਮ
ਬਾਦਲ ਨੇ ਛੋਟੇ ਦੁਕਾਨਦਾਰਾਂ ਨੂੰ ਭਰੋਸਾ ਦਿੱਤਾ ਕਿ ਪਿਛਲੀ ਅਕਾਲੀ ਸਰਕਾਰ ਵੱਲੋਂ ਸ਼ੁਰੂ ਕੀਤੀ ਰਾਹਤ ਸਕੀਮ ਮੁੜ ਲਾਗੂ ਕੀਤੀ ਜਾਵੇਗੀ, ਜਿਸ ਤਹਿਤ ਛੋਟੇ ਦੁਕਾਨਦਾਰਾਂ ਨੂੰ ਸਾਲਾਨਾ 1000 ਰੁਪਏ ਯਕਮੁਸ਼ਤ ਜੀ.ਐਸ.ਟੀ. ਦੇਣਾ ਹੋਵੇਗਾ ਤੇ ਵਹੀ-ਖਾਤੇ ਰੱਖਣ ਦੀ ਲੋੜ ਨਹੀਂ ਰਹੇਗੀ। ਉਹਨਾਂ ਕਿਹਾ ਕਿ ਵੱਡੇ ਵਪਾਰੀਆਂ ਨੂੰ ਸਵੈ-ਘੋਸ਼ਣਾ ਪੱਤਰ ਦੇਣ ਦੀ ਆਗਿਆ ਹੋਵੇਗੀ।
ਪ੍ਰਾਪਰਟੀ ਡੀਲਰਜ਼ ਐਸੋਸੀਏਸ਼ਨ ਦੇ ਜਯੋਤੀ ਲਾਲ ਭਾਰਦਵਾਜ, ਖਰੜ ਆੜ੍ਹਤੀ ਐਸੋਸੀਏਸ਼ਨ ਦੇ ਸੁਨੀਲ ਅਗਰਵਾਲ ਤੇ ਕੁਰਾਲੀ ਮੰਡੀ ਦੇ ਬਿੱਟੂ ਖੁੱਲਰ ਨੇ ਰਜਿਸਟਰੀ ਰੇਟ ਘਟਾਉਣ ਤੇ ਕੁਰਾਲੀ ਮੰਡੀ ਵਿਚ ਵਾਧੂ ਫੜ੍ਹ ਬਣਾਉਣ ਦੀ ਮੰਗ ਰੱਖੀ। ਚਨਾਲੋਂ ਫੋਕਲ ਪੁਆਇੰਟ ਐਸੋਸੀਏਸ਼ਨ ਦੇ ਏ.ਐਲ. ਚੌਧਰੀ ਨੇ ਰੱਦ ਸੂਚੀ ਵਿਚ ਸ਼ਾਮਲ ਫੈਕਟਰੀਆਂ ਨੂੰ ਨਿਯਮਿਤ ਕਰਨ ਤੇ ਸੀਵਰੇਜ-ਸੜਕੀ ਢਾਂਚਾ ਸੁਧਾਰਨ ਦੀ ਮੰਗ ਕੀਤੀ।
ਕੁਰਾਲੀ ਮਾਰਕੀਟ ਐਸੋਸੀਏਸ਼ਨ ਦੇ ਮੈਂਬਰਾਂ ਨੇ ਦੋਸ਼ ਲਾਇਆ ਕਿ ਟੈਕਸ ਅਧਿਕਾਰੀਆਂ ਦੀਆਂ ਮੋਬਾਈਲ ਟੀਮਾਂ ਉਹਨਾਂ ਨੂੰ ਧਮਕਾ ਕੇ ਮੋਟੇ ਜੁਰਮਾਨੇ ਵਸੂਲਣ ਲਈ ਮਜ਼ਬੂਰ ਕਰਦੀਆਂ ਹਨ ਤੇ ਇਹ ਪੈਸਾ ਆਮ ਆਦਮੀ ਪਾਰਟੀ ਸਰਕਾਰ ਦੀ ਔਰਤਾਂ ਨੂੰ 1000 ਰੁਪਏ ਦੇਣ ਵਾਲੀ ਸਕੀਮ ਲਈ ਫੰਡ ਜੁਟਾਉਣ ਵਾਸਤੇ ਵਰਤਿਆ ਜਾ ਰਿਹਾ ਹੈ। ਬਾਦਲ ਨੇ ਇਹ ਮੁਸ਼ਕਿਲ ਮੰਨਦਿਆਂ ਕਿਹਾ ਕਿ ਅਕਾਲੀ ਸਰਕਾਰ ਆਉਣ ’ਤੇ ਇਹ ਰੋਕਿਆ ਜਾਵੇਗਾ ਤੇ ਗੈਂਗਸਟਰਵਾਦ ਵੀ ਖ਼ਤਮ ਕੀਤਾ ਜਾਵੇਗਾ।
ਵਪਾਰੀਆਂ ਨਾਲ ਗੱਲਬਾਤ ਦੌਰਾਨ ਬਾਦਲ ਨੇ ਕਾਂਗਰਸ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਤੇ ਮੌਜੂਦਾ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਕਾਰਗੁਜ਼ਾਰੀ ’ਤੇ ਸਵਾਲ ਚੁੱਕਦਿਆਂ ਦਾਅਵਾ ਕੀਤਾ ਕਿ ਪ੍ਰਭਾਵਸ਼ਾਲੀ ਲੀਡਰਸ਼ਿਪ ਤੋਂ ਬਿਨਾਂ ਵਿਕਾਸ ਸੰਭਵ ਨਹੀਂ।
ਬਾਦਲ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਸ਼੍ਰੋਮਣੀ ਅਕਾਲੀ ਦਲ ’ਤੇ ਭਰੋਸਾ ਕਰਨ ਤੇ ਰਵਿੰਦਰ ਸਿੰਘ ਖੈੜਾ ਨੂੰ ਖਰੜ ਤੋਂ ਐਮ.ਐਲ.ਏ. ਚੁਣਨ। ਇਸ ਮੌਕੇ ਐਨ.ਕੇ. ਸ਼ਰਮਾ, ਰਵਿੰਦਰ ਸਿੰਘ ਖੈੜਾ, ਪਰਮਿੰਦਰ ਸਿੰਘ ਸੋਹਣਾ ਤੇ ਸ਼੍ਰੋਮਣੀ ਕਮੇਟੀ ਮੈਂਬਰ ਅਜਮੇਰ ਸਿੰਘ ਖੇੜਾ ਵੀ ਹਾਜ਼ਰ ਸਨ।