ਨਵੀਂ ਦਿੱਲੀ। ਟੋਕਿਓ ਓਲੰਪਿਕਸ ‘ਚ ਸਿਲਵਰ ਮੈਡਲ ਜਿੱਤਣ ਵਾਲੀ ਭਾਰਤ ਦੀ ਸਟਾਰ ਮਹਿਲਾ ਵੇਟ ਲਿਫਟਰ ਮੀਰਾਬਾਈ ਚਾਨੂ ਸੋਮਵਾਰ ਨੂੰ ਵਤਨ ਪਰਤ ਆਏ ਹਨ। ਭਾਰਤ ਪਰਤਣ ‘ਤੇ ਚਾਨੂ ਦਾ ਦਿੱਲੀ ਏਅਰਪੋਰਟ ‘ਤੇ ਸ਼ਾਨਦਾਰ ਸਵਾਗਤ ਕੀਤਾ ਗਿਆ। ਇਸ ਦੌਰਾਨ ਚਾਨੂ ਦੇ ਸਵਾਗਤ ‘ਚ ਏਅਰਪੋਰਟ ਸਟਾਫ ਨੇ ਭਾਰਤ ਮਾਤਾ ਦੀ ਜੈ ਦੇ ਨਾਅਰੇ ਲਗਾਏ।
#WATCH | Olympic silver medallist Mirabai Chanu receives a warm welcome as the staff at the Delhi airport cheered for her upon her arrival from #TokyoOlympics pic.twitter.com/VonxVMHmeo
— ANI (@ANI) July 26, 2021
ਚਾਨੂ ਨੇ ਨਾ ਸਿਰਫ਼ ਵੇਟ ਲਿਫਟਿੰਗ ‘ਚ ਮੈਡਲ ਦੇ ਭਾਰਤ ਦੇ 21 ਸਾਲ ਦੇ ਸੋਕੇ ਨੂੰ ਖਤਮ ਕੀਤਾ ਹੈ, ਬਲਕਿ ਸਿਲਵਰ ਮੈਡਲ ਜਿੱਤ ਕੇ ਟੋਕਿਓ ਓਲੰਪਿਕਸ ‘ਚ ਦੇਸ਼ ਦਾ ਖਾਤਾ ਵੀ ਖੋਲ੍ਹਿਆ ਹੈ। ਉਹਨਾਂ ਨੂੰ ਇਹ ਮੈਡਲ 49 ਕਿੱਲੋਗ੍ਰਾਮ ਕੈਟੇਗਰੀ ‘ਚ ਮਿਲਿਆ।
ਮੀਰਾਬਾਈ ਚਾਨੂ ਦੇ ਸਨਮਾਨ ‘ਚ ਭਾਰਤ ਸਰਕਾਰ ਵੱਲੋਂ ਖਾਸ ਸਮਾਗਮ ਵੀ ਆਯੋਜਿਤ ਕੀਤਾ ਗਿਆ ਸੀ, ਜਿਥੇ ਕੇਂਦਰੀ ਖੇਡ ਮੰਤਰੀ ਅਨੁਰਾਗ ਠਾਕੁਰ ਸਣੇ ਕਈ ਕੇਂਦਰੀ ਮੰਤਰੀਆਂ ਨੇ ਚਾਨੂ ਅਤੇ ਉਹਨਾਂ ਦੇ ਕੋਚ ਨੂੰ ਸਨਮਾਨਿਤ ਕੀਤਾ।
ਇਸ ਦੌਰਾਨ ਮੀਰਾਬਾਈ ਚਾਨੂ ਨੇ ਕਿਹਾ ਕਿ ਉਹਨਾਂ ਦਾ ਇਹ ਮੈਡਲ ਦੇਸ਼ ਦੇ ਲੋਕਾਂ ਨੂੰ ਸਮਰਪਿਤ ਹੈ। ਇਸਦੇ ਨਾਲ ਹੀ ਉਹਨਾਂ ਪ੍ਰਧਾਨ ਮੰਤਰੀ ਅਤੇ ਖੇਡ ਮੰਤਰੀ ਦਾ ਉਹਨਾਂ ਨੂੰ ਪ੍ਰੇਰਣਾ ਦੇਣ ਲਈ ਧੰਨਵਾਦ ਵੀ ਕੀਤਾ।
ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਣਵ ਵੱਲੋਂ ਵੀ ਮੀਰਾਬਾਈ ਚਾਨੂ ਦਾ ਸਨਮਾਨ ਕੀਤਾ ਗਿਆ। ਉਹਨਾਂ ਨੇ ਚਾਨੂ ਨੂੰ 2 ਕਰੋੜ ਦੀ ਰਾਸ਼ੀ ਅਤੇ ਨੌਕਰੀ ‘ਚ ਪ੍ਰਮੋਸ਼ਨ ਦੇਣ ਦਾ ਵੀ ਐਲਾਨ ਕੀਤਾ।
ਗੋਲਡ ‘ਚ ਬਦਲ ਸਕਦਾ ਹੈ ਮੀਰਾਬਾਈ ਦਾ ਮੈਡਲ
ਇਸ ਇਵੈਂਟ ‘ਚ ਚੀਨ ਦੀ ਹਾਊ ਝੀਹੁਈ ਨੇ ਗੋਲਡ ਮੈਡਲ ਹਾਸਲ ਕੀਤਾ ਸੀ, ਪਰ ਹੁਣ ਅਜਿਹੀ ਖ਼ਬਰ ਸਾਹਮਣੇ ਆ ਰਹੀ ਹੈ ਕਿ ਝੀਹੁਈ ਦਾ ਡੋਪਿੰਗ ਟੈਸਟ ਹੋਵੇਗਾ। ਜੇਕਰ ਉਹ ਟੈਸਟ ‘ਚ ਫੇਲ੍ਹ ਹੋ ਜਾਂਦੀ ਹੈ, ਤਾਂ ਗੋਲਡ ਮੈਡਲ ਚਾਨੂ ਦੀ ਝੋਲੀ ‘ਚ ਆ ਜਾਵੇਗਾ।
ਮੀਰਾਬਾਈ ਦਾ ਪੰਜਾਬ ਕੁਨੈਕਸ਼ਨ
ਮੀਰਾਬਾਈ ਚਾਨੂ ਮੂਲ ਰੂਪ ਨਾਲ ਮਣੀਪੁਰ ਦੀ ਰਹਿਣ ਵਾਲੀ ਹੈ, ਪਰ ਪਿਛਲੇ ਕਈ ਸਾਲਾਂ ਤੋਂ ਉਹ ਪਟਿਆਲਾ ‘ਚ ਟ੍ਰੇਨਿੰਗ ਕਰ ਰਹੀ ਸੀ। ਮੀਰਾਬਾਈ ਦੀ ਸਫਲਤਾ ‘ਚ ਉਹਨਾਂ ਦੇ ਅਸਿਸਟੈਂਟ ਕੋਚ ਸੰਜੇ ਕੁਮਾਰ ਦੀ ਵੱਡੀ ਭੂਮਿਕਾ ਰਹੀ। ਸੰਜੇ ਪੰਜਾਬ ਪੁਲਿਸ ‘ਚ ਇੰਸਪੈਕਟਰ ਦੇ ਅਹੁਦੇ ‘ਤੇ ਤੈਨਾਤ ਹਨ।
