ਅੰਮ੍ਰਿਤਸਰ। ਨਾਮੀ ਗੈਂਗਸਟਰ ਪ੍ਰੀਤ ਸੇਖੋਂ ਨੂੰ ਪੰਜਾਬ ਪੁਲਿਸ ਨੇ ਉਸਦੇ 2 ਸਾਥੀਆਂ ਸਣੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਿਸ ਨੇ ਮੁਲਜ਼ਮਾਂ ਦੇ ਕਬਜ਼ੇ ‘ਚੋਂ ਇੱਕ ਕਾਰ, ਇੱਕ ਰਾਈਫਲ, 5 ਪਿਸਤੌਲਾਂ ਅਤੇ ਵੱਡੀ ਗਿਣਤੀ ਕਾਰਤੂਸ ਬਰਾਮਦ ਕੀਤੇ ਹਨ। ਜਾਣਕਾਰੀ ਮੁਤਾਬਕ, ਗੈਂਗਸਟਰ ਪ੍ਰੀਤ ਸੇਖੋਂ ਕਿਸੇ ਵੱਡੀ ਵਾਰਦਾਤ ਨੂੰ ਅੰਜਾਮ ਦੇਣ ਦੀ ਫਿਰਾਕ ‘ਚ ਸੀ।
ਪੁਲਿਸ ਨੇ ਅਜਿਹਾ ਵਿਛਾਇਆ ਜਾਲ
ਅੰਮ੍ਰਿਤਸਰ ਦਿਹਾਤੀ ਪੁਲਿਸ ਦੇ SSP ਗੁਲਨੀਤ ਸਿੰਘ ਖੁਰਾਨਾ ਅਤੇ ਆਰਗੇਨਾਈਜ਼ਡ ਕਰਾਈਮ ਕੰਟਰੋਲ ਯੂਨਿਟ(OCCU) ਦੇ IG ਗੁਰਮੀਤ ਚੌਹਾਨ ਨੂੰ ਸੂਚਨਾ ਮਿਲੀ ਸੀ ਕਿ ਗੈਂਗਸਟਰ ਪ੍ਰੀਤ ਸੇਖੋਂ ਅਜਨਾਲਾ ਦੇ ਚਮਿਆਰੀ ਪਿੰਡ ‘ਚ ਰਹਿਣ ਵਾਲੇ ਆਪਣੇ ਰਿਸ਼ਤੇਦਾਰ ਮਹਿੰਦਰ ਸਿੰਘ ਦੇ ਘਰ ਲੁਕਿਆ ਹੈ। ਸੂਚਨਾ ਦੇ ਅਧਾਰ ‘ਤੇ DSP ਬਲਬੀਰ ਸਿੰਘ, DSP ਗੁਰਿੰਦਰਪਾਲ ਸਿੰਘ ਨਾਗਰਾ, DSP ਵਿਕਰਮ ਬਰਾੜ ਅਤੇ DSP ਅਭਿਮੰਨਿਊ ਰਾਣਾ ਦੀ ਅਗਵਾਈ ‘ਚ 100 ਤੋਂ ਵੱਧ ਪੁਲਿਸ ਕਰਮੀਆਂ ਨੇ ਚਮਿਆਰੀ ਪਿੰਡ ਨੂੰ ਚਾਰੇ ਪਾਸਿਓਂ ਘੇਰ ਲਿਆ।
ਐਨਕਾਊਂਟਰ ਦੇ ਡਰ ਤੋਂ ਕੀਤਾ ਸਰੰਡਰ
ਕਰੀਬ 15 ਮਿੰਟਾਂ ਤੱਕ ਗੈਂਗਸਟਰ ਪ੍ਰੀਤ ਸੇਖੋਂ, ਆਪਣੇ ਸਾਥੀ ਗੁਰਲਾਲ ਸਿੰਘ ਅਤੇ ਨਿੱਕਾ ਖਡੂਰ ਸਾਭੀਆ ਦੇ ਨਾਲ ਘਰ ਦੀ ਛੱਤ ‘ਤੇ ਪੁਲਿਸ ਦੇ ਸਾਹਮਣੇ ਡਟਿਆ ਰਿਹਾ। ਚਾਰੇ ਪਾਸਿਓਂ ਖੁਦ ਨੂੰ ਘਿਰਿਆ ਵੇਖ ਕੇ ਗੈਂਗਸਟਰ ਨੂੰ ਮੌਤ ਦਾ ਖੌਫ ਸਤਾਉਣ ਲੱਗਿਆ। ਉਸ ਨੂੰ ਲੱਗਿਆ ਕਿ ਪੁਲਿਸ ਉਸਦਾ ਐਨਕਾਊਂਟਰ ਨਾ ਕਰ ਦੇਵੇ, ਇਸ ਕਾਰਨ ਉਸਨੇ ਆਪਣੇ ਮੋਬਾਈਲ ਤੇੋਂ ਤੁਰੰਤ ਆਪਣੇ ਸਰੰਡਰ ਕਰਨ ਦੀ ਪੋਸਟ ਪਾ ਦਿੱਤੀ।
ਪਿਛਲੇ 2 ਸਾਲ ਤੋਂ ਕਰ ਰਿਹਾ ਸੀ ਵਾਰਦਾਤਾਂ
ਪ੍ਰੀਤ ਸੇਖੋਂ ਪਿਛਲੇ 2 ਸਾਲਾਂ ਤੋਂ ਲਗਾਤਾਰ ਅੰਮ੍ਰਿਤਸਰ ‘ਚ ਅਪਰਾਧਿਕ ਵਾਰਦਾਤਾਂ ਨੂੰ ਅੰਜਾਮ ਦੇ ਰਿਹਾ ਸੀ। ਪ੍ਰੀਤ ਆਪਣੇ ਨਾੰਅ ਦੇ ਪਿੱਛੇ ਅੰਬਰਸਰੀਆ ਵੀ ਲਿਖਦਾ ਸੀ। ਉਹ ਪੇਸ਼ੇ ਤੋਂ ਬਾਊਂਸਰ ਸੀ। ਉਹ ਰਣਜੀਤ ਐਵਨਿਊ ਦੇ ਹੋਟਲ ‘ਚ ਨੌਕਰੀ ਕਰਦਾ ਸੀ, ਪਰ ਕੁਝ ਹੀ ਮਹੀਨਿਆਂ ‘ਚ ਉਹ ਅਪਰਾਧ ਦੀ ਦੁਨੀਆ ਦਾ ਵੱਡਾ ਨਾੰਅ ਬਣ ਗਿਆ। ਪੁਲਿਸ ਨੂੰ ਕਤਲ, ਕਤਲ ਦੀ ਕੋਸ਼ਿਸ਼ ਅਤੇ ਫਿਰੌਤੀ ਸਣੇ ਕਈ ਸੰਗੀਨ ਮਾਮਲਿਆਂ ‘ਚ ਪ੍ਰੀਤ ਸੇਖੋਂ ਦੀ ਤਲਾਸ਼ ਸੀ।
