ਬਿਓਰੋ। ਕੇਂਦਰ ਸਰਕਾਰ ਦੇ BSF ਨੂੰ ਬਾਰਡਰ ਦੇ 50 ਕਿੱਲੋਮੀਟਰ ਦੇ ਦਾਅਰੇ ਅੰਦਰ ਕਾਰਵਾਈ ਦੇ ਅਧਾਰ ‘ਤੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਅਤੇ ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਬਾਦਲ ਆਹਮੋ-ਸਾਹਮਣੇ ਹਨ। ਸੁਖਬੀਰ ਬਾਦਲ ਵੱਲੋਂ ਇਸ ਮੁੱਦੇ ‘ਤੇ ਸੀਐੱਮ ਉੱਪਰ ਕੀਤੇ ਜਾ ਰਹੇ ਹਮਲਿਆਂ ਦਾ ਖੁਦ ਮੁੱਖ ਮੰਤਰੀ ਨੇ ਪਲਟਵਾਰ ਕੀਤਾ ਹੈ। ਸੀਐੱਮ ਨੇ ਕਿਹਾ ਕਿ ਸੁਖਬੀਰ ਬਾਦਲ ਗਲਤ ਬਿਆਨਬਾਜੀ ਕਰ ਰਹੇ ਹਨ।
ਕੇਂਦਰ ਨੂੰ ਸਹਿਮਤੀ ਦੇਣ ਦੀ ਗੱਲ ਗਲਤ- CM
ਚੰਨੀ ਨੇ ਕਿਹਾ ਕਿ ਕੇਂਦਰ ਦੇ ਇਸ ਫੈਸਲੇ ਦੀ ਉਹਨਾਂ ਨੂੰ ਕੋਈ ਜਾਣਕਾਰੀ ਨਹੀਂ ਸੀ। ਉਹਨਾਂ ਨੂੰ ਤਾਂ ਖੁਦ ਅਖਬਾਰਾਂ ਤੋਂ ਇਸ ਬਾਰੇ ਪਤਾ ਲੱਗਿਆ। ਦਰਅਸਲ, ਸੁਖਬੀਰ ਨੇ ਪਿਛਲੇ ਦਿਨੀਂ ਕਿਹਾ ਸੀ ਕਿ BSF ਨੂੰ ਅਧਿਕਾਰ ਦੇਣ ਲਈ ਮੁੱਖ ਮੰਤਰੀ ਚਰਨਜੀਤ ਚੰਨੀ ਨੇ ਕੇਂਦਰ ਨੂੰ ਸਹਿਮਤੀ ਦਿੱਤੀ।
ਲੋਕਾਂ ਨੂੰ ਨਾ ਭੜਕਾਉਣ ਸੁਖਬੀਰ ਬਾਦਲ- CM
ਸੀਐੱਮ ਚੰਨੀ ਨੇ ਸੁਖਬੀਰ ਬਾਦਲ ਦੇ ਉਸ ਬਿਆਨ ‘ਤੇ ਵੀ ਜਵਾਬ ਦਿੱਤਾ, ਜਿਸ ਵਿੱਚ ਉਹ ਦਾਅਵਾ ਕਰਦੇ ਹਨ ਕਿ ਹੁਣ ਦਰਬਾਰ ਸਾਹਿਬ ਵਿੱਚ BSF ਕਦੇ ਵੀ ਵੜ ਸਕਦੀ ਹੈ। ਚੰਨੀ ਨੇ ਕਿਹਾ ਕਿ ਸੁਖਬੀਰ ਨੂੰ ਇਸ ਗੰਭੀਰ ਮੁੱਦੇ ‘ਤੇ ਬੇਹੱਦ ਸੋਚ-ਸਮਝ ਕੇ ਬਿਆਨ ਦੇਣੇ ਚਾਹੀਦੇ ਹਨ। ਲੋਕਾਂ ਨੂੰ ਭੜਕਾਉਣ ਦਾ ਕੰਮ ਨਾ ਕਰਨ। ਉਹਨਾਂ ਕਿਹਾ, “ਅਸੀਂ ਦਹਿਸ਼ਤਵਾਦ ਦਾ ਬੁਰਾ ਦੌਰ ਵੇਖਿਆ ਹੈ ਅਤੇ ਇਸਦੇ ਲਈ ਵੀ ਅਕਾਲੀ ਦਲ ਜਿੰਮੇਵਾਰ ਰਿਹਾ।”
ਸੁਖਬੀਰ ਬਾਦਲ ਨੇ ਵੀ ਕੀਤਾ ਪਲਟਵਾਰ
ਸੀਐੱਮ ਦੇ ਹਮਲਿਆਂ ‘ਤੇ ਸੁਖਬੀਰ ਬਾਦਲ ਨੇ ਵੀ ਪਲਟਵਾਰ ਕਰਨ ਵਿੱਚ ਦੇਰ ਨਹੀਂ ਲਗਾਈ। ਸੁਖਬੀਰ ਨੇ ਦੁਹਰਾਇਆ ਕਿ ਮੁੱਖ ਮੰਤਰੀ ਨੇ ਕੁਝ ਨਹੀਂ ਕਰਨਾ, ਕਿਉਂਕਿ ਉਹ ਖੁਦ ਲਿਖਤ ਵਿੱਚ ਕੇਂਦਰ ਨੂੰ ਸਹਿਮਤੀ ਦੇ ਕੇ ਆਏ ਹਨ। ਇਸ ਤੋਂ ਬਾਅਦ ਵੀ ਕੇਂਦਰ ਵੱਲੋਂ BSF ਨੂੰ ਇਹ ਵਿਸ਼ੇਸ਼ ਅਧਿਕਾਰ ਦਿੱਤੇ ਗਏ। ਸੁਖਬੀਰ ਨੇ ਮੁੱਖ ਮੰਤਰੀ ਦੇ ਉਸ ਦਾਅਵੇ ਨੂੰ ਵੀ ਝੂਠਾ ਕਰਾਰ ਦਿੱਤਾ, ਜਿਸ ਵਿੱਚ ਉਹ ਕਹਿ ਰਹੇ ਹਨ ਕਿ ਉਹਨਾਂ ਨੂੰ ਕੇਂਦਰ ਦੇ ਫੈਸਲੇ ਦਾ ਅਖਬਾਰਾਂ ਤੋਂ ਪਤਾ ਲੱਗਿਆ।
ਸੁਖਬੀਰ ਬਾਦਲ ਨੇ ਚੰਨੀ ਵੱਲੋਂ ਲਗਾਏ ਗਏ ਲੋਕਾਂ ਨੂੰ ਭੜਕਾਉਣ ਦੇ ਇਲਜਾਮਾਂ ‘ਤੇ ਵੀ ਜਵਾਬ ਦਿੱਤਾ। ਉਹਨਾਂ ਟਵੀਟ ਕੀਤਾ, “ਪਹਿਲਾਂ ਹੀ ਪੰਜਾਬੀ ਇਸ ਚਿੰਤਾ ਵਿੱਚ ਹਨ ਕਿ ਸੀਨੀਅਰ ਪੁਲਿਸ ਅਧਿਕਾਰੀ ਹੁਣ BSF ਨੂੰ ਰਿਪੋਰਟ ਕਿਉਂ ਕਰ ਰਹੇ ਹਨ। ਇਸ ਨੂੰ ਠੀਕ ਕਰਨ ਦੀ ਬਜਾਏ ਸੀਐੱਮ ਸਾਡੇ ਉੱਤੇ ਲੋਕਾਂ ਨੂੰ ਉਕਸਾਉਣ ਦਾ ਇਲਜ਼ਾਮ ਲਗਾ ਰਹੇ ਹਨ। ਅਕਾਲੀ ਦਲ ਨੇ ਹਮੇਸ਼ਾ ਜ਼ਿੰਮੇਵਾਰੀ ਵਾਲਾ ਵਿਹਾਰ ਕੀਤਾ ਹੈ, ਇਸਦੇ ਉਲਟ ਕਾਂਗਰਸ ਨੇ ਹਮੇਸ਼ਾ ਸੂਬੇ ਨੂੰ ਫਿਰਕੂ ਲੀਹਾਂ ‘ਤੇ ਵੰਡਿਆ ਹੈ।”
Already Punjabis are apprehensive as to why senior police officers are now reporting to BSF. Instead of correcting this narrative, CM is accusing us of provoking people. @Akali_Dal_ has always behaved responsibly; in contrast Cong has always divided the State on communal lines.
— Sukhbir Singh Badal (@officeofssbadal) October 18, 2021
ਜਿਕਰਯੋਗ ਹੈ ਕਿ ਪਿਛਲੇ ਦਿਨੀਂ ਕੇਂਦਰ ਨੇ ਪੰਜਾਬ ਸਣੇ 6 ਸੂਬਿਆਂ ਵਿੱਚ BSF ਦਾ ਦਾਇਰਾ ਵਧਾਇਆ ਹੈ। ਪੰਜਾਬ ਵਿੱਚ BSF ਦੇ ਅਧਿਕਾਰ ਖੇਤਰ ਨੂੰ 15 ਕਿੱਲੋਮੀਟਰ ਤੋਂ ਵਧਾ ਕੇ 50 ਕਰ ਦਿੱਤਾ ਗਿਆ। ਯਾਨੀ BSF ਹੁਣ ਸਰਹੱਦ ਤੋਂ 50 ਕਿੱਲੋਮੀਟਰ ਦੇ ਦਾਇਰੇ ਵਿੱਚ ਸਰਚ ਅਪਰੇਸ਼ਨ ਚਲਾਉਣ ਅਤੇ ਕਿਸੇ ਨੂੰ ਵੀ ਗ੍ਰਿਫ਼ਤਾਰ ਕਰਨ ਦੀ ਕਾਰਵਾਈ ਕਰ ਸਕਦੀ ਹੈ। ਪੰਜਾਬ ਵਿੱਚ ਬੀਜੇਪੀ ਅਤੇ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੂੰ ਛੱਡ ਕੇ ਸਾਰੀਆਂ ਪਾਰਟੀਆਂ ਇਸਦਾ ਵਿਰੋਧ ਕਰ ਰਹੀਆਂ ਹਨ।
