ਬਿਓਰੋ। ਆਮ ਆਦਮੀ ਪਾਰਟੀ ਦੇ ਸੀਐੱਮ ਫੇਸ ਦੇ ਐਲਾਨ ਵਿੱਚ ਹੁਣ ਨਵਾਂ ਟਵਿਸਟ ਆ ਗਿਆ ਹੈ। ਅਗਲੇ ਹਫ਼ਤੇ ਸੀਐੱਮ ਫੇਸ ਦਾ ਐਲਾਨ ਕਰਨ ਦੀ ਗੱਲ ਕਹਿਣ ਵਾਲੇ ਕੇਜਰੀਵਾਲ ਨੇ ਹੁਣ ਇੱਕ ਨਵਾ ਦਾਅ ਖੇਡਿਆ ਹੈ। ਕੇਜਰੀਵਾਲ ਨੇ ਮੋਬਾਈਲ ਨੰਬਰ ਜਾਰੀ ਕਰਕੇ ਸੀਐੱਮ ਫੇਸ ਬਾਰੇ ਲੋਕਾਂ ਤੋਂ ਰਾਏ ਮੰਗੀ ਹੈ। ਕੇਜਰੀਵਾਲ ਨੇ ਕਿਹਾ ਕਿ ਉਹਨਾਂ ਦੀ ਪਾਰਟੀ ਚਾਹੁੰਦੀ ਹੈ ਕਿ ਬੰਦ ਕਮਰੇ ਵਿੱਚ ਸੀਐੱਮ ਤੈਅ ਕਰਨ ਦੀ ਬਜਾਏ ਇਹ ਫੈਸਲਾ ਜਨਤਾ ਦੀ ਰਾਏ ਨਾਲ ਕੀਤਾ ਜਾਵੇ।
ਮੁਹਾਲੀ ਵਿੱਚ ਵੀਰਵਾਰ ਨੂੰ ਕੇਜਰੀਵਾਲ ਨੇ 70748-70748 ਨੰਬਰ ਜਾਰੀ ਕੀਤਾ। ਇਸ ਨੰਬਰ ‘ਤੇ ਵਟਸਐਪ, SMS ਜਾਂ ਕਾਲ ਦੇ ਜ਼ਰੀਏ ਰਾਏ ਦਿੱਤੀ ਜਾ ਸਕਦੀ ਹੈ। 17 ਜਨਵਰੀ ਨੂੰ ਸ਼ਾਮ 5 ਵਜੇ ਤੱਕ ਇਹ ਨੰਬਰ ਚਾਲੂ ਰਹੇਗਾ। ਉਸ ਤੋਂ ਬਾਅਦ ਡਾਟਾ ਕਲੈਕਟ ਕੀਤਾ ਜਾਵੇਗਾ ਅਤੇ ਸੀਐੱਮ ਚਿਹਰੇ ਦਾ ਐਲਾਨ ਕਰ ਦਿੱਤਾ ਜਾਵੇਗਾ।
ਕੇਜਰੀਵਾਲ ਨੇ ਭਗਵੰਤ ਨੂੰ ਦੱਸਿਆ ਪਹਿਲੀ ਪਸੰਦ
ਕੇਜਰੀਵਾਲ ਨੇ ਕਿਹਾ ਕਿ ਉਨ੍ਹਾਂ ਦੀ ਸਹਿਮਤੀ ਬਣੀ ਸੀ ਕਿ ਭਗਵੰਤ ਮਾਨ ਨੂੰ CM ਚਿਹਰਾ ਐਲਾਨ ਕਰ ਦਿੱਤਾ ਜਾਵੇ, ਪਰ ਇਸ ਬਾਰੇ ਭਗਵੰਤ ਮਾਨ ਨੇ ਹੀ ਕਿਹਾ ਕਿ ਸਾਨੂੰ ਜਨਤਾ ਤੋਂ ਪੁੱਛਣਾ ਚਾਹੀਦਾ ਹੈ। ਸਾਨੂੰ ਬੰਦ ਕਮਰੇ ਵਿੱਚ ਸੀਐੱਮ ਦਾ ਚਿਹਰਾ ਤੈਅ ਨਹੀਂ ਕਰਨਾ ਚਾਹੀਦਾ ਅਤੇ ਭਗਵੰਤ ਮਾਨ ਦੀ ਇੱਛਾ ਦੇ ਮੁਤਾਬਕ ਹੀ ਲੋਕਾਂ ਦੀ ਰਾਏ ਲਈ ਜਾ ਰਹੀ ਹੈ।
ਮੈਂ CM ਦੀ ਰੇਸ ‘ਚ ਨਹੀਂ- ਕੇਜਰੀਵਾਲ
ਕੇਜਰੀਵਾਲ ਨੇ ਕਿਹਾ ਕਿ ਪੰਜਾਬ ਵਿੱਚ ਸੀਐੱਮ ਚਿਹਰੇ ਦੀ ਰੇਸ ਵਿੱਚ ਉਹ ਸ਼ਾਮਿਲ ਨਹੀਂ ਹਨ। ਉਨ੍ਹਾਂ ਕਿਹਾ, “ਅਸੀਂ ਸਭ ਕੁਝ ਜਨਤਾ ‘ਤੇ ਛੱਡ ਦਿੱਤਾ ਹੈ। ਜਨਤਾ ਜਿਸ ਨੂੰ ਕਹੇਗੀ, ਅਸੀਂ ਉਸ ਨੂੰ ਪੰਜਾਬ ਵਿੱਚ ਪਾਰਟੀ ਦਾ ਸੀਐੱਮ ਚਿਹਰਾ ਬਣਾਵਾਂਗੇ।”
