ਬਿਓਰੋ। ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਵੱਡੇ ਬੇਟੇ ਨਵਜੀਤ ਸਿੰਘ ਐਤਵਾਰ ਨੂੰ ਵਿਆਹ ਬੰਧਨ ਵਿੱਚ ਬੱਝ ਗਏ। ਨਵਜੀਤ ਦਾ ਵਿਆਹ ਸਿਮਰਨ ਕੌਰ ਨਾਲ ਹੋਇਆ ਹੈ।
ਮੋਹਾਲੀ ਦੇ ਗੁਰਦੁਆਰਾ ਸਾਹਿਬ ਵਿੱਚ ਦੋਵਾਂ ਦੇ ਅਨੰਦ ਕਾਰਜ ਹੋਏ। ਇਸ ਦੌਰਾਨ ਕਈ ਖਾਸ ਮਹਿਮਾਨ ਨਵੀਂ ਜੋੜੀ ਨੂੰ ਅਸ਼ੀਰਵਾਦ ਦੇਣ ਲਈ ਪਹੁੰਚੇ।
ਇਸ ਦੌਰਾਨ ਸੀਐੱਮ ਚੰਨੀ ਵੱਖਰੇ ਅੰਦਾਜ਼ ਵਿੱਚ ਨਜ਼ਰ ਆਏ। ਲਾੜੇ ਬਣੇ ਬਟੇ ਦੀ ਕਾਰ ਨੂੰ ਉਹ ਖੁਦ ਡਰਾਈਵ ਕਰਕੇ ਲੈ ਗਏ।
ਇਹੀ ਨਹੀਂ, VIP ਸ਼ਾਨੋ-ਸ਼ੌਕਤ ਤੋਂ ਦੂਰ ਉਹਨਾਂ ਨੇ ਨੂੰਹ ਤੇ ਪੁੱਤਰ ਨਾਲ ਜ਼ਮੀਨ ‘ਤੇ ਪੰਗਤ ਵਿੱਚ ਬਹਿ ਕੇ ਖਾਣਾ ਖਾਇਆ।
ਚਰਨਜੀਤ ਚੰਨੀ ਪੰਜਾਬ ਦੀ ਸਿਆਸੀ ਇਤਿਹਾਸ ਵਿੱਚ ਪਹਿਲੇ ਅਨੁਸੂਚਿਤ ਜਾਤੀ ਦੇ ਸੀਐੱਮ ਹਨ। ਸੀਐੱਮ ਬਣਦੇ ਹੀ ਉਹਨਾਂ ਨੇ ਆਪਣੀ ਸਕਿਓਰਿਟੀ ਘੱਟ ਕਰਵਾ ਦਿੱਤੀ ਸੀ। ਹੁਣ ਵਿਆਹ ਸਮਾਰੋਹ ਨੂੰ ਵੀ ਉਹਨਾਂ ਨੇ ਪੂਰੀ ਸਾਦਗੀ ਨਾਲ ਰੱਖਿਆ।
ਵਿਆਹ ਸਮਾਰੋਹ ਵਿੱਚ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਵੀ ਸ਼ਾਮਲ ਹੋਏ ਅਤੇ ਲਾੜੇ ਤੇ ਲਾੜੀ ਨੂੰ ਅਸ਼ੀਰਵਾਦ ਦਿੱਤਾ। ਜਥੇਦਾਰ ਨੇ ਸਾਦੇ ਸਮਾਰੋਹ ਵਿੱਚ ਪੁੱਤਰ ਦਾ ਵਿਆਹ ਕਰਨ ‘ਤੇ ਸੀਐੱਮ ਦੀ ਤਾਰੀਫ਼ ਕੀਤੀ।
ਵਿਆਹ ਸਮਾਗਮ ਵਿੱਚ ਪੰਜਾਬ ਦੇ ਰਾਜਪਾਲ ਬੀਕੇ ਪੁਰੋਹਿਤ ਵੀ ਸ਼ਾਮਲ ਹੋਏ ਅਤੇ ਨਵ ਵਿਆਹੇ ਜੋੜੇ ਨੂੰ ਅਸ਼ੀਰਵਾਦ ਦਿੱਤਾ।
ਸੀਐੱਮ ਦੇ ਬੇਟੇ ਦੇ ਵਿਆਹ ਵਿੱਚ ਪੰਜਾਬ ਕਾਂਗਰਸ ਦੇ ਇੰਚਾਰਜ ਹਰੀਸ਼ ਰਾਵਤ ਵੀ ਸ਼ਾਮਲ ਹੋਏ। ਰਾਵਤ ਵਿਆਹ ਸਮਾਗਮ ਵਿੱਚ ਸ਼ਾਮਲ ਹੋਣ ਲਈ ਖਾਸ ਤੌਰ ‘ਤੇ ਦੇਹਰਾਦੂਨ ਤੋਂ ਚੰਡੀਗੜ੍ਹ ਪਹੁੰਚੇ।
ਵਿਆਹ ਸਮਾਗਮ ਵਿੱਚ ਕੈਬਨਿਟ ਮੰਤਰੀ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਵੀ ਸ਼ਾਮਲ ਹੋਏ। ਰਾਜਾ ਵੜਿੰਗ ਨੇ ਨਵਜੀਤ ਨਾਲ ਆਪਣੀ ਤਸਵੀਰ ਖੁਦ ਟਵਿਟਰ ‘ਤੇ ਸ਼ੇਅਰ ਕੀਤੀ।
ਨਾ ਸਿਰਫ਼ ਕਾਂਗਰਸੀ, ਬਲਕਿ ਵਿਰੋਧੀ ਧਿਰ ਦੇ ਆਗੂ ਵੀ ਨਵੇਂ ਵਿਆਹੇ ਜੋੜੇ ਨੂੰ ਅਸ਼ੀਰਵਾਦ ਦੇਣ ਲਈ ਵਿਆਹ ਸਮਾਗਮ ਵਿੱਚ ਪਹੁੰਚੇ। ਲੋਕ ਇਨਸਾਫ਼ ਪਾਰਟੀ ਦੇ ਵਿਧਾਇਕ ਸਿਮਰਜੀਤ ਬੈਂਸ ਵੀ ਵਿਆਹ ਸਮਾਗਮ ਵਿੱਚ ਸ਼ਰੀਕ ਹੋਏ।
CM ਚਰਨਜੀਤ ਚੰਨੀ ਦਾ ਪਰਿਵਾਰ ਆਪਣੀ ਨਵੀਂ ਨੂੰਹ ਨੂੰ ਲਕੀ ਮੰਨਦਾ ਹੈ। ਚੰਨੀ ਪੰਜਾਬ ਸਰਕਾਰ ਵਿੱਚ ਮੰਤਰੀ ਸਨ ਅਤੇ ਕਦੇ ਮੁੱਖ ਮੰਤਰੀ ਬਣਨ ਦੇ ਬਾਰੇ ਸੋਚਿਆ ਨਹੀਂ ਸੀ। ਹਾਲਾਂਕਿ ਉਹਨਾਂ ਦੇ ਬੇਟੇ ਦੇ ਰਿਸ਼ਤੇ ਤੋਂ ਬਾਅਦ ਅਚਾਨਕ ਕੈਪਟਨ ਅਮਰਿੰਦਰ ਸਿੰਘ ਦੇ ਹਟਦੇ ਹੀ ਚੰਨੀ ਸੀਐੱਮ ਬਣ ਗਏ। ਇਹ ਇਸ ਲਈ ਹੈਰਾਨ ਕਰ ਦੇਣ ਵਾਲਾ ਸੀ, ਕਿਉਂਕਿ ਅਮਰਿੰਦਰ ਸਿੰਘ ਦੇ ਹਟਣ ਤੋਂ ਬਾਅਦ ਚੰਨੀ ਦਾ ਨਾਂਅ ਸੀਐੱਮ ਲਈ ਚਰਚਾ ਤੱਕ ਵਿੱਚ ਨਹੀਂ ਸੀ। ਪੰਜਾਬ ਵਿੱਚ ਹਰ ਵਾਰ ਜੱਟ ਸਿੱਖ ਹੀ ਸੀਐੱਮ ਬਣਦੇ ਰਹੇ ਹਨ, ਪਰ ਅਚਾਨਕ ਚੰਨੀ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਸੀ।
