ਬਿਓਰੋ। ਪੰਜਾਬ ਵਿੱਚ ਅਗਲੇ ਸਾਲ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਸਿਆਸੀ ਪਾਰਾ ਲਗਾਤਾਰ ਚੜ੍ਹ ਰਿਹਾ ਹੈ। ਚੋਣ ਦੰਗਲ ਵਿੱਚ ਆਗੂਆਂ ਦੇ ਪਾਲਾ ਬਦਲਣ ਤੋਂ ਲੈ ਕੇ ਪਾਰਟੀਆਂ ਲਈ ਸਮੀਕਰਨ ਬਣਨ-ਵਿਗੜਨ ਦਾ ਖੇਡ ਚੱਲ ਰਿਹਾ ਹੈ, ਪਰ ਇਸ ਸਭ ਦੇ ਵਿਚਾਲੇ ਸਿਆਸਤ ‘ਚ ਕੁਝ ਨਵੇਂ ਚਿਹਰਿਆਂ ਦੀ ਐਂਟਰੀ ਦੀ ਚਰਚਾ ਵੀ ਜੋਰਾਂ ‘ਤੇ ਹੈ। ਇਸ ਫੇਹਰਿਸਤ ਵਿੱਚ ਹੁਣ ਕ੍ਰਿਕਟਰ ਹਰਭਜਨ ਸਿੰਘ ਦਾ ਨਾਂਅ ਸ਼ੁਮਾਰ ਹੋਇਆ ਹੈ।
ਸਵਾਲ ਉਠ ਰਹੇ ਹਨ ਕਿ…ਕੀ ਹਰਭਜਨ ਸਿੰਘ ਕਾਂਗਰਸ ‘ਚ ਸ਼ਾਮਲ ਹੋਣਗੇ? ਦਰਅਸਲ, ਬੁੱਧਵਾਰ ਨੂੰ ਹਰਭਜਨ ਸਿੰਘ ਨੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨਾਲ ਮੁਲਾਕਾਤ ਕੀਤੀ। ਸਿੱਧੂ ਨੇ ਆਪਣੇ ਆਫੀਸ਼ੀਅਲ ਟਵਿਟਰ ਹੈਂਡਲ ‘ਤੇ ਹਰਭਜਨ ਦੇ ਨਾਲ ਤਸਵੀਰ ਸ਼ੇਅਰ ਕਰਦੇ ਹੋਏ ਲਿਖਿਆ, “ਸੰਭਾਵਨਾਵਾਂ ਨਾਲ ਭਰੀ ਤਸਵੀਰ…ਚਮਕਦੇ ਸਿਤਾਰੇ ਭੱਜੀ ਦੇ ਨਾਲ।”
Picture loaded with possibilities …. With Bhajji the shining star pic.twitter.com/5TWhPzFpNl
— Navjot Singh Sidhu (@sherryontopp) December 15, 2021
ਹਾਲਾਂਕਿ ਇਸ ‘ਤੇ ਅਜੇ ਤੱਕ ਹਰਭਜਨ ਸਿੰਘ ਵੱਲੋਂ ਕੋਈ ਪ੍ਰਤੀਕਿਰਿਆ ਸਾਹਮਣੇ ਨਹੀਂ ਆਈ ਹੈ।
ਪਹਿਲਾਂ ਬੀਜੇਪੀ ‘ਚ ਸ਼ਾਮਲ ਹੋਣ ਦੀ ਸੀ ਚਰਚਾ
ਦੱਸ ਦਈਏ ਕਿ ਪਿਛਲੇ ਦਿਨੀਂ ਹਰਭਜਨ ਸਿੰਘ ਦੇ ਬੀਜੇਪੀ ਵਿੱਚ ਸ਼ਾਮਲ ਹੋਣ ਦੀਆਂ ਵੀ ਖ਼ਬਰਾਂ ਸਾਹਮਣੇ ਆਈਆਂ ਸਨ, ਜਿਹਨਾਂ ਨੂੰ ਭੱਜੀ ਵੱਲੋਂ ਖਾਰਜ ਕਰ ਦਿੱਤਾ ਗਿਆ ਸੀ। ਟਵਿਟਰ ‘ਤੇ ਉਹਨਾਂ ਨੇ ਇੱਕ ਖ਼ਬਰ ਨੂੰ Quote ਕਰਦੇ ਹੋਏ ਇਸ ਨੂੰ ‘ਫੇਕ ਨਿਊਜ਼’ ਕਰਾਰ ਦਿੱਤਾ ਸੀ। 2017 ਦੀਆਂ ਵਿਧਾਨ ਸਭਾ ਚੋਣਾਂ ‘ਚ ਵੀ ਹਰਭਜਨ ਦੇ ਕਾਂਗਰਸ ‘ਚ ਸ਼ਾਮਲ ਹੋਣ ਦੀ ਚਰਚਾ ਸੀ। ਉਸ ਵਕਤ ਵੀ ਹਰਭਜਨ ਨੇ ਅਟਕਲਾਂ ਨੂੰ ਖਾਰਜ ਕਰ ਦਿੱਤਾ ਸੀ।
ਜਲੰਧਰ ਨਾਲ ਤਾਲੁੱਕ ਰਖਦੇ ਹਨ ਹਰਭਜਨ
ਹਰਭਜਨ ਸਿੰਘ ਦਾ ਜਨਮ ਜਲੰਧਰ ਵਿੱਚ ਹੋਇਆ ਸੀ ਅਤੇ ਉਹਨਾਂ ਦਾ ਲੰਮਾ ਵਕਤ ਇਥੇ ਹੀ ਗੁਜ਼ਰਿਆ, ਪਰ ਕ੍ਰਿਕਟ ਦੀ ਦੁਨੀਆ ਵਿੱਚ ਕਾਮਯਾਬੀ ਦੇ ਨਾਲ ਹੀ ਉਹ ਜਲੰਧਰ ਤੋਂ ਦੂਰ ਹੁੰਦੇ ਚਲੇ ਗਏ। ਹਾਲਾਂਕਿ ਉਹਨਾਂ ਦੇ ਕਈ ਰਿਸ਼ਤੇਦਾਰ ਅਜੇ ਵੀ ਜਲੰਧਰ ਵਿੱਚ ਰਹਿੰਦੇ ਹਨ। ਅਜਿਹੇ ਵਿੱਚ ਜੇਕਰ ਉਹ ਸਿਆਸਤ ‘ਚ ਆਉਂਦੇ ਹਨ ਅਤੇ ਚੋਣ ਲੜਦੇ ਹਨ, ਤਾਂ ਉਹ ਜਲੰਧਰ ਨੂੰ ਆਪਣੀ ਕਰਮਭੂਮੀ ਬਣਾ ਸਕਦੇ ਹਨ।
ਯੁਵਰਾਜ ਸਿੰਘ ਨੂੰ ਲੈ ਕੇ ਵੀ ਚਰਚਾ ਗਰਮ
ਪੰਜਾਬ ਦੀ ਸਿਆਸਤ ਵਿੱਚ ਯੁਵਰਾਜ ਸਿੰਘ ਦੀ ਐਂਟਰੀ ਨੂੰ ਲੈ ਕੇ ਵੀ ਚਰਚਾ ਗਰਮ ਹੈ। ਪਿਛਲੇ ਦਿਨੀਂ ਯੁਵਰਾਜ ਅਤੇ ਹਰਭਜਨ ਦੋਵਾਂ ਦੇ ਬੀਜੇਪੀ ਵਿੱਚ ਸ਼ਾਮਲ ਹੋਣ ਦੀ ਚਰਚਾ ਚੱਲੀ ਸੀ। ਹਾਲਾਂਕਿ ਦੋਵਾਂ ਨੇ ਹੀ ਉਹਨਾਂ ਨੂੰ ਖਾਰਜ ਕਰ ਦਿੱਤਾ। ਦੱਸ ਦਈਏ ਕਿ ਯੁਵਰਾਜ ਸਿੰਘ ਵੀ ਪੰਜਾਬ ਨਾਲ ਤਾਲੁੱਕ ਰਖਦੇ ਹਨ। ਯੁਵਰਾਜ ਸਿੰਘ ਦੇ ਪਿਤਾ ਯੋਗਰਾਜ ਸਿੰਘ ਦੇ ਵੀ ਚੋਣ ਲੜਨ ਦੀ ਚਰਚਾ ਹੈ। ਯੋਗਰਾਜ ਸਿੰਘ ਸਿੱਧੂ ਦੇ ਬੇਹੱਦ ਕਰੀਬੀ ਹਨ। ਯੋਗਰਾਜ ਸਿੰਘ ਇਸ ਤੋਂ ਪਹਲਾਂ ਹਰਿਆਣਾ ਵਿੱਚ ਇਨੈਲੋ ਦੀ ਟਿਕਟ ‘ਤੇ ਚੋਣ ਲੜ ਚੁੱਕੇ ਹਨ।
