ਚੰਡੀਗੜ੍ਹ। ਪੰਜਾਬ ਕਾਂਗਰਸ ਦੀ ਅੰਦਰੂਨੀ ਖਾਨਾਜੰਗੀ ‘ਚ 2 ਹੋਰ ਲੀਡਰਾਂ ਦਾ ਨਾਂਅ ਸ਼ੁਮਾਰ ਹੋ ਗਿਆ ਹੈ। ਕੈਪਟਨ Vs ਸਿੱਧੂ ਅਤੇ ਸਿੱਧੂ Vs ਚੰਨੀ ਤੋਂ ਬਾਅਦ ਹੁਣ 2 ਅਜਿਹੇ ਲੀਡਰ ਆਹਮੋ-ਸਾਹਮਣੇ ਹਨ, ਜੋ ਰਿਸ਼ਤੇ ਵਿੱਚ ਬੇਸ਼ੱਕ ਭਰਾ ਹਨ, ਪਰ ਸਿਆਸੀ ਪਿਚ ‘ਤੇ ਇੱਕ-ਦੂਜੇ ਦੇ ਸਾਹਮਣੇ ਖੜ੍ਹੇ ਹਨ। ਰਾਜ ਸਭਾ ਸਾਂਸਦ ਪ੍ਰਤਾਪ ਸਿੰਘ ਬਾਜਵਾ ਨੇ ਗੁਰਦਾਸਪੁਰ ਦੀ ਕਾਦੀਆਂ ਸੀਟ ਤੋਂ ਚੋਣ ਲੜਨ ਦਾ ਐਲਾਨ ਕਰ ਦਿੱਤਾ ਹੈ, ਜਦਕਿ ਇਸੇ ਸੀਟ ਤੋਂ ਮੌਜੂਦਾ ਵਿਧਾਇਕ ਫਤਿਹਜੰਗ ਬਾਜਵਾ ਨੂੰ ਨਵਜੋਤ ਸਿੱਧੂ ਅਸਿੱਧੇ ਤੌਰ ‘ਤੇ ਪਾਰਟੀ ਦਾ ਉਮੀਦਵਾਰ ਐਲਾਨ ਚੁੱਕੇ ਹਨ।
ਮੈਨੂੰ ਹਾਈਕਮਾਂਡ ਦਾ ਗ੍ਰੀਨ ਸਿਗਨਲ- ਪ੍ਰਤਾਪ ਬਾਜਵਾ
ਪ੍ਰਤਾਪ ਬਾਜਵਾ ਨੇ ਕਾਦੀਆਂ ਵਿਧਾਨ ਸਭਾ ਸੀਟ ਤੋਂ ਚੋਣ ਲੜਨ ਦਾ ਐਲਾਨ ਕਰਦੇ ਏ ਕਿਹਾ ਕਿ ਉਹਨਾਂ ਨੂੰ ਹਾਈਕਮਾਂਡ ਦਾ ਗ੍ਰੀਨ ਸਿਗਨਲ ਮਿਲ ਚੁੱਕਿਆ ਹੈ। ਉਹਨਾਂ ਕਿਹਾ ਕਿ ਹਾਈਕਮਾਂਡ ਦੀ ਵੀ ਇੱਛਾ ਹੈ ਕਿ ਮੈਂ ਪੰਜਾਬ ਵਿੱਚ ਕੰਮ ਕਰਾਂ। ਹਾਲਾਂਕਿ ਜਦੋਂ ਉਹਨਾਂ ਤੋਂ ਇਹ ਸਵਾਲ ਕੀਤਾ ਗਿਆ ਕਿ ਜੇਕਰ ਉਹ ਕਾਦੀਆਂ ਤੋਂ ਚੋਣ ਲੜਨਗੇ, ਤਾਂ ਫਤਿਹਜੰਗ ਕਿਥੇ ਜਾਣਗੇ, ਤਾਂ ਪ੍ਰਤਾਪ ਬਾਜਵਾ ਨੇ ਕਿਹਾ, “ਇਹ ਪਰਮਾਤਮਾ ਜਾਣੇ।”
ਕਾਬਿਲੇਗੌਰ ਹੈ ਕਿ ਬੀਤੇ ਦਿਨ ਹੀ ਪ੍ਰਤਾਪ ਬਾਜਵਾ ਨੇ ਦਿੱਲੀ ਤੋਂ ਰਵਾਨਾ ਹੋਣ ਵੇਲੇ ਗੱਡੀ ਵਿੱਚ ਬੈਠਿਆਂ ਦੀ ਆਪਣੀ ਤਸਵੀਰ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤੀ ਸੀ ਅਤੇ ਲਿਖਿਆ ਸੀ, “ਆਪਣੀ ਕਰਮਭੂਮੀ ਕਾਦੀਆਂ ਲਈ ਰਵਾਨਾ ਹੋ ਰਿਹਾ ਹਾਂ। ਪੰਜਾਬ ਦੀ ਸਿਆਸਤ ‘ਚ ਵਾਪਸੀ, ਜਿਥੇ ਮੇਰਾ ਦਿਲ ਵੱਸਦਾ ਹੈ।”
Leaving for my Karmabhoomi Qadian. Back to Punjab Politics where my heart belongs. pic.twitter.com/bUTCttRDEx
— Partap Singh Bajwa (@Partap_Sbajwa) December 5, 2021
ਕਾਦੀਆਂ ਪਹੁੰਚਦੇ ਹੀ ਬਾਜਵਾ ਨੇ ਪਾਰਟੀ ਵਰਕਰਾਂ ਅਤੇ ਆਮ ਜਨਤਾ ਨਾਲ ਮੀਟਿੰਗਾਂ ਵੀ ਸ਼ੁਰੂ ਕਰ ਦਿੱਤੀਆਂ ਹਨ।
ਸਿੱਧੂ ਨੇ ਦਿੱਤੇ ਸਨ ਫਤਿਹਜੰਗ ਦੇ ਚੋਣ ਲੜਨ ਦੇ ਸੰਕੇਤ
ਦਿਲਚਸਪ ਹੈ ਕਿ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ 3 ਦਿਨ ਪਹਿਲਾਂ ਹੀ ਕਾਦੀਆਂ ਵਿੱਚ ਰੈਲੀ ਲਈ ਪਹੁੰਚੇ ਸਨ। ਇਥੇ ਸਿੱਧੂ ਨੇ ਫਤਿਹਜੰਗ ਦੀ ਖੂਬ ਤਾਰੀਫ਼ ਕਰਦਿਆਂ ਕਿਹਾ ਸੀ ਕਿ ਫਤਿਹਜੰਗ ਆਪਣੀ ਸੀਟ ਤੋਂ ਵੱਡੇ ਫਰਕ ਨਾਲ ਜਿੱਤ ਹਾਸਲ ਕਰਨਗੇ। ਇਸ ਤੋਂ ਖੁਸ਼ ਫਤਿਹਜੰਗ ਬਾਜਵਾ ਨੇ ਸਿੱਧੂ ਨੂੰ ਅਗਲਾ ਸੀਐੱਮ ਬਣਾਉਣ ਦੀ ਪੈਰਵੀ ਵੀ ਕੀਤੀ ਸੀ।
ਭਰਾਵਾਂ ਵਿਚਕਾਰ ਜੰਗ ਬੇਹੱਦ ਪੁਰਾਣੀ !
ਕਾਦੀਆਂ ਹਲਕੇ ਵਿੱਚ ਦੋਵੇਂ ਭਰਾਵਾਂ ਦੀ ਇਹ ਜੰਗ ਕੋਈ ਨਵੀਂ ਨਹੀਂ ਹੈ। 2012 ਤੱਕ ਪ੍ਰਤਾਪ ਬਾਜਵਾ ਹੀ ਇਥੋਂ ਚੋਣ ਲੜਦੇ ਰਹੇ। 2012 ਵਿੱਚ ਉਹਨਾਂ ਦੀ ਪਤਨੀ ਚਰਨਜੀਤ ਕੌਰ ਬਾਜਵਾ ਨੇ ਇਸ ਸੀਟ ਤੋਂ ਜਿੱਤ ਹਾਸਲ ਕੀਤੀ। ਹਾਲਾਂਕਿ 2017 ਵਿੱਚ ਇਥੋਂ ਫਤਿਹਜੰਗ ਨੂੰ ਉਮੀਦਵਾਰ ਬਣਾ ਦਿੱਤਾ ਗਿਆ ਅਤੇ ਉਹ ਚੋਣ ਜਿੱਤ ਵੀ ਗਏ। ਬਹਿਰਹਾਲ, ਪ੍ਰਤਾਪ ਬਾਜਵਾ ਦੇ ਮੁੜ ਇਥੋਂ ਚੋਣ ਲੜਨ ਦੇ ਐਲਾਨ ਅਤੇ ਹਲਕੇ ਵਿੱਚ ਵਧਾਈ ਸਰਗਰਮੀ ਤੋਂ ਬਾਅਦ ਕਾਂਗਰਸ ਵਿੱਚ ਨਵਾਂ ਕਲੇਸ਼ ਸ਼ੁਰੂ ਹੋਣਾ ਤੈਅ ਹੈ।
