ਬਿਓਰੋ। ਅੰਮ੍ਰਿਤਸਰ ਈਸਟ ਸੀਟ ਨੂੰ ਲੈ ਕੇ ਨਵਜੋਤ ਸਿੱਧੂ ਅਤੇ ਬਿਕਰਮ ਮਜੀਠੀਆ ਵਿਚਕਾਰ ਮਹਾਂਮੁਕਾਬਲਾ ਹੋਰ ਦਿਲਚਸਪ ਹੋ ਸਕਦਾ ਹੈ। ਬਿਕਰਮ ਮਜੀਠੀਆ ਸਿਰਫ਼ ਅੰਮ੍ਰਿਤਸਰ ਈਸਟ ਤੋਂ ਹੀ ਚੋਣ ਲੜ ਸਕਦੇ ਹਨ। ਖੁਦ ਮਜੀਠੀਆ ਨੇ ਇਸ ਗੱਲ ਦੇ ਸੰਕੇਤ ਦਿੱਤੇ ਹਨ। ਖ਼ਬਰਾਂ ਹਨ ਕਿ ਮਜੀਠਾ ਹਲਕੇ ਤੋਂ ਉਹ ਆਪਣੀ ਨਾਮਜ਼ਦਗੀ ਵਾਪਸ ਲੈ ਕੇ ਆਪਣੀ ਪਤਨੀ ਨੂੰ ਚੋਣ ਲੜਵਾ ਸਕਦੇ ਹਨ।
ਸਿੱਧੂ ਦਾ ਚੈਲੇਂਜ ਕਬੂਲ ਕਰਨਗੇ ਮਜੀਠੀਆ !
ਦਰਅਸਲ, ਸਿੱਧੂ ਨੇ ਨਾਮਜ਼ਦਗੀ ਤੋਂ ਬਾਅਦ ਮਜੀਠੀਆ ਨੂੰ ਚੁਣੌਤੀ ਦਿੱਤੀ ਸੀ ਕਿ ਜੇਕਰ ਇੰਨਾ ਦਮ ਅਤੇ ਲੋਕਾਂ ‘ਤੇ ਭਰੋਸਾ ਹੈ, ਤਾਂ ਫਿਰ ਇੱਕ ਹੀ ਸੀਟ ਤੋਂ ਚੋਣ ਲੜਨ। ਮਜੀਠਾ ਛੱਡ ਕੇ ਸਿਰਫ਼ ਅੰਮ੍ਰਿਤਸਰ ਈਸਟ ਤੋਂ ਲੜਨ। ਇਸੇ ਬਾਰੇ ਜਦੋਂ ਮਜੀਠੀਆ ਨੂੰ ਸਵਾਲ ਕੀਤਾ ਗਿਆ, ਤਾਂ ਉਹਨਾਂ ਕਿਹਾ ਕਿ ਨਾਮਜ਼ਦਗੀ ਨੂੰ ਹਾਲੇ 2 ਦਿਨ ਬਚੇ ਹਨ। ਸਿਰਫ਼ ਅੰਮ੍ਰਿਤਸਰ ਈਸਟ ਤੋਂ ਚੋਣ ਲੜਨ ਦੀ ਨਵਜੋਤ ਸਿੱਧੂ ਦੀ ਇਹ ਖੁਆਇਸ਼ ਵੀ ਪੂਰੀ ਕਰ ਦਵਾਂਗੇ।
ਬਿਕਰਮ ਮਜੀਠੀਆ ਨੇ ਸਿੱਧੂ ਨੂੰ ਜਵਾਬੀ ਚੁਣੌਤੀ ਵੀ ਦਿੱਤੀ। ਮਜੀਠੀਆ ਨੇ ਕਿਹਾ ਕਿ ਜੇਕਰ ਸਿੱਧੂ ਚਾਹੁੰਦੇ ਹਨ ਤਾਂ ਫਿਰ ਮਜੀਠਾ ਤੋਂ ਵੀ ਚੋਣ ਲੜ ਕੇ ਵੇਖ ਲੈਣ।
ਅੰਮ੍ਰਿਤਸਰ ਈਸਟ ਸਭ ਤੋਂ ਹੌਟ ਸੀਟ
2017 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਲੰਬੀ ਅਤੇ ਜਲਾਲਾਬਾਦ ‘ਚ ਕਈ ਦਿੱਗਜ ਆਹਮੋ-ਸਾਹਮਣੇ ਸਨ। ਲੰਬੀ ਵਿੱਚ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਟੱਕਰ ਦੇਣ ਲਈ ਖੁਦ ਕੈਪਟਨ ਅਮਰਿੰਦਰ ਸਿੰਘ ਮੈਦਾਨ ‘ਚ ਉਤਰੇ ਸਨ, ਤਾਂ ਜਲਾਲਾਬਾਦ ਵਿੱਚ ਸੁਖਬੀਰ ਬਾਦਲ ਖਿਲਾਫ਼ ‘ਆਪ’ ਵੱਲੋਂ ਭਗਵੰਤ ਮਾਨ ਅਤੇ ਕਾਂਗਰਸ ਵੱਲੋਂ ਰਵਨੀਤ ਬਿੱਟੂ ਚੋਣ ਲੜੇ ਸਨ। ਹਾਲਾਂਕਿ ਇਸ ਵਾਰ ਲਗਭਗ ਸਾਰੇ ਦਿੱਗਜ ਸੇਫ ਸੀਟਾਂ ਤੋਂ ਚੋਣ ਲੜ ਰਹੇ ਹਨ। ਸਿਰਫ਼ ਅੰਮ੍ਰਿਤਸਰ ਈਸਟ ‘ਤੇ ਹੀ 2 ਦਿੱਗਜਾਂ ਵਿਚਕਾਰ ਸਿੱਧਾ ਮੁਕਾਬਲਾ ਵੇਖਣ ਨੂੰ ਮਿਲ ਰਿਹਾ ਹੈ।
ਇਹ ਮੁਕਾਬਲਾ ਪਹਿਲਾਂ ਤੈਅ ਨਹੀਂ ਸੀ। ਮਜੀਠੀਆ ਸਿਰਫ਼ ਮਜੀਠਾ ਤੋਂ ਚੋਣ ਲੜ ਰਹੇ ਸਨ। ਹਾਲਾਂਕਿ ਪੰਜਾਬ ਚੋਣਾਂ ਵਿੱਚ ਹਮਲਾਵਰ ਰੁਖ ਵਿਖਾਉਣ ਦੇ ਨਾਲ-ਨਾਲ ਸਿੱਧੂ ਨੂੰ ਅੰਮ੍ਰਿਤਸਰ ਈਸਟ ਵਿੱਚ ਹੀ ਘੇਰਨ ਲਈ ਸੁਖਬੀਰ ਬਾਦਲ ਨੇ ਅਚਾਨਕ ਮਜੀਠੀਆ ਨੂੰ ਅੰਮ੍ਰਿਤਸਰ ਈਸਟ ਤੋਂ ਚੋਣ ਲੜਵਾਉਣ ਦਾ ਐਲਾਨ ਕਰ ਦਿੱਤਾ ਅਤੇ ਹੁਣ ਜੇਕਰ ਮਜੀਠੀਆ ਸਿਰਫ਼ ਅੰਮ੍ਰਿਤਸਰ ਈਸਟ ਤੋਂ ਚੋਣ ਲੜਦੇ ਹਨ, ਤਾਂ ਇਹ ਲੜਾਈ ਹੋਰ ਤਲਖ ਹੋ ਸਕਦੀ ਹੈ।
