ਬਿਓਰੋ। ਪੰਜਾਬ ਕਾਂਗਰਸ ਵਿੱਚ ਜਾਰੀ ਘਮਸਾਣ ਵਿਚਾਲੇ ਸਰਕਾਰ ਦੇ ਇਸ਼ਤਿਹਾਰਾਂ ਵਿੱਚ ਵੱਡਾ ਬਦਲਾਅ ਕੀਤਾ ਗਿਆ ਹੈ। ਸਰਕਾਰ ਦੇ ਇਸ਼ਤਿਹਾਰਾਂ ਦੇ ਸਲੋਗਨ ਤੋਂ CM ਦਾ ਨਾਂਅ ਹਟਾ ਕੇ ਪੰਜਾਬ ਸਰਕਾਰ ਕਰ ਦਿੱਤਾ ਗਿਆ ਹੈ। ਦਰਅਸਲ, ਮੁੱਖ ਮੰਤਰੀ ਵੱਲੋਂ ਬਿਜਲੀ, ਰੇਤਾ ਅਤੇ ਤੇਲ ਦੀਆਂ ਕੀਮਤਾਂ ਬਾਰੇ ਕੀਤੇ ਵੱਡੇ ਫੈਸਲਿਆਂ ਤੋਂ ਬਾਅਦ ਸਰਕਾਰ ਵੱਲੋਂ ਜਾਰੀ ਇਸ਼ਤਿਹਾਰਾਂ ਵਿੱਚ ‘ਘਰ-ਘਰ ਚੱਲੀ ਗੱਲ, ਚੰਨੀ ਕਰਦਾ ਮਸਲੇ ਹੱਲ’ ਦਾ ਨਾਅਰਾ ਲਿਖਿਆ ਜਾ ਰਿਹਾ ਸੀ, ਪਰ ਹੁਣ ਚੰਨੀ ਦੀ ਥਾਂ ਇਸ ਨੂੰ ‘ਪੰਜਾਬ ਸਰਕਾਰ ਕਰਦੀ ਮਸਲੇ ਹੱਲ’ ਲਿਖ ਦਿੱਤਾ ਗਿਆ ਹੈ।
ਸਿੱਧੂ ਨੇ ਹਟਵਾਇਆ ਸੀਐੱਮ ਦਾ ਨਾਂਅ !
ਮੰਨਿਆ ਜਾ ਰਿਹਾ ਹੈ ਕਿ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੇ ਇਤਰਾਜ਼ ਤੋਂ ਬਾਅਦ ਇਹ ਬਦਲਾਅ ਹੋਇਆ ਹੈ। ਇਸ ਨੂੰ ਚੰਨੀ ਲਈ ਝਟਕੇ ਦੇ ਤੌਰ ‘ਤੇ ਵੀ ਵੇਖਿਆ ਜਾ ਰਿਹਾ ਹੈ। ਦਰਅਸਲ, ਪਿਛਲੇ ਦਿਨੀਂ ਸਿੱਧੂ ਨੇ ਸੀਐੱਮ ਚੰਨੀ ਨੂੰ ਇਸ਼ਾਰਿਆਂ-ਇਸ਼ਾਰਿਆਂ ਵਿੱਚ ਕਮਜੋਰ ਕਿਹਾ ਸੀ। ਉਸ ਵੇਲੇ ਸੀਐੱਮ ਨੇ ਇਸ਼ਾਰਿਆਂ ਵਿੱਚ ਇਹੀ ਸਲੋਗਨ ਸੁਣਾ ਕੇ ਉਹਨਾਂ ਨੂੰ ਜਵਾਬ ਦਿੱਤਾ ਸੀ ਕਿ ਬੇਅਦਬੀ ਅਤੇ ਡਰੱਗਜ਼ ਦੇ ਮਸਲੇ ਇਸ ਤਰ੍ਹਾਂ ਹੱਲ ਕਰਾਂਗਾ ਕਿ ਹਰ ਘਰ ਵਿੱਚ ਸੀਐੱਮ ਚੰਨੀ ਦੇ ਮਸਲੇ ਹੱਲ ਕਰਨ ਦੀ ਗੱਲ ਚੱਲੇਗੀ।
ਕੈਪਟਨ ਪਿੱਛੇ ਲੁਕ ਗਈ ਸੀ ਪਾਰਟੀ
ਮੰਨਿਆ ਜਾ ਰਿਹਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਦੇ ਵਕਤ ਪੰਜਾਬ ਵਿੱਚ ਪਾਰਟੀ ਉਹਨਾਂ ਦੇ ਚਿਹਰੇ ਪਿੱਛੇ ਲੁਕ ਗਈ ਸੀ। ਉਹਨਾਂ ਦੇ ਹੀ ਨਾਂਅ ‘ਤੇ ‘ਕੌਫੀ ਵਿਦ ਕੈਪਟਨ’, ‘ਪੰਜਾਬ ਦਾ ਕੈਪਟਨ’ ਵਰਗੇ ਸਲੋਗਨ ਤਿਆਰ ਕੀਤੇ ਗਏ। ਜਦੋਂ ਕੈਪਟਨ ਖਿਲਾਫ਼ ਬਗਾਵਤ ਹੋਈ, ਤਾਂ ਫਿਰ ‘ਪੰਜਾਬ ਦਾ ਕੈਪਟਨ ਇੱਕ ਹੀ ਹੁੰਦਾ’ ਅਤੇ ‘ਕੈਪਟਨ ਦੋਬਾਰਾ’ ਵਰਗੇ ਸਲੋਗਨ ਬਣ ਗਏ।
ਇਸੇ ਰਾਹ ‘ਤੇ ਤੁਰ ਪਏ ਸੀ ਚੰਨੀ
ਕੈਪਟਨ ਗਏ, ਤਾਂ ਸੀਐੱਮ ਚੰਨੀ ਵੀ ਇਸੇ ਰਾਹ ‘ਤੇ ਤੁਰ ਪਏ। ਉਹਨਾਂ ਦੇ ਨਾਂਅ ਨਾਲ ਹੀ ਸਲੋਗਨ ਬਣਾ ਦਿੱਤੇ ਗਏ, ਪਰ ਇਹ ਗੱਲ ਸਿੱਧੂ ਧੜੇ ਨੂੰ ਰਾਸ ਨਹੀਂ ਆਈ। ਨਤੀਜਾ ਇਹ ਰਿਹਾ ਕਿ ਹੁਣ ਸਰਕਾਰ ਨੂੰ ਸਲੋਗਨ ਬਦਲਣਾ ਪਿਆ।
