ਅੰਮ੍ਰਿਤਸਰ। ਪੰਜਾਬ ਵਿੱਚ ਚੋਣਾਂ ਤੋਂ ਪਹਿਲਾਂ ਹੀ ਮੁੱਖ ਮੰਤਰੀ ਅਹੁਦੇ ਦੀ ਦਾਅਵੇਦਾਰੀ ਨੂੰ ਲੈ ਕੇ ਛਿੜਿਆ ਘਮਸਾਣ ਥੰਮਦਾ ਨਜ਼ਰ ਨਹੀਂ ਆ ਰਿਹਾ। ਬੇਸ਼ੱਕ ਕਾਂਗਰਸ ਹਾਈਕਮਾਂਡ ਨੇ ਸੂਬੇ ਦੇ ਮੌਜੂਦਾ ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੇ ਚਿਹਰੇ ‘ਤੇ ਚੋਣ ਲੜਨ ਦਾ ਐਲਾਨ ਕਰ ਦਿੱਤਾ ਹੈ ਅਤੇ ਕਈ ਮਹੀਨਿਆਂ ਤੋਂ ਇਸ ਅਹੁਦੇ ਲਈ ਦਾਅਵਾ ਠੋਕ ਰਹੇ ਸਿੱਧੂ ਦੀ ਵੀ ਹਾਮੀ ਮਿਲ ਚੁੱਕੀ ਹੈ, ਪਰ ਪਰਦੇ ਦੇ ਪਿੱਛੇ ਅਜਿਹਾ ਹੁੰਦਾ ਨਜ਼ਰ ਨਹੀਂ ਆ ਰਿਹਾ। ਸਿੱਧੂ ਬੇਸ਼ੱਕ ਚੁੱਪ ਹਨ, ਪਰ ਉਹਨਾਂ ਦਾ ਪਰਿਵਾਰ ਇਸ ਫੈਸਲੇ ਨੂੰ ਲੈ ਕੇ ਜੰਮ ਕੇ ਭੜਾਸ ਕੱਢ ਰਿਹਾ ਹੈ।
ਨਵਜੋਤ ਸਿੱਧੂ ਦੀ ਧੀ ਰਾਬੀਆ ਸਿੱਧੂ ਵੀਰਵਾਰ ਨੂੰ ਅੰਮ੍ਰਿਤਸਰ ਪੂਰਬੀ ਹਲਕੇ ਵਿੱਚ ਪਿਤਾ ਲਈ ਪ੍ਰਚਾਰ ਕਰਦੀ ਨਜ਼ਰ ਆਈ। ਇਸ ਦੌਰਾਨ ਰਾਬੀਆ ਨੇ ਉਹਨਾਂ ਦੇਪਿਤਾ ਨੂੰ ਸੀਐੱਮ ਕੈਂਡੀਡੇਟ ਨਾ ਬਣਾਏ ਜਾਣ ਨੂੰ ਲੈ ਕੇ ਕਾਂਗਰਸ ਹਾਈਕਮਾਂਡ ‘ਤੇ ਭੜਾਸ ਕੱਢੀ। ਰਾਬੀਆ ਨੇ ਕਿਹਾ, “’ਚੰਨੀ ਮੇਰੇ ਪਿਤਾ ਦੇ ਨੇੜੇ ਖੜ੍ਹਨ ਦੇ ਵੀ ਲਾਇਕ ਨਹੀਂ। ਮੇਰੇ ਪਿਤਾ ਨੂੰ ਪੰਜਾਬ ਮਾਡਲ ਬਣਾਉਣ ਵਿੱਚ 14 ਸਾਲ ਲੱਗੇ ਹਨ। ਉਸਦੀ ਕਦਰ ਅੱਜ ਨਹੀਂ ਹੋਈ, ਪਰ ਜਲਦੀ ਹੋਵੇਗੀ।” ਰਾਬੀਆ ਨੇ ਕਿਹਾ ਕਿ ਸਭ ਨੂੰ ਪਤਾ ਹੈ ਕਿ ਜੇਕਰ ਉਸਦੇ ਪਿਤਾ ਅੱਗੇ ਆ ਗਏ, ਤਾਂ ਮਾਫੀਆ ਰਾਜ ਖਤਮ ਹੋ ਜਾਵੇਗਾ। ਇਸ ਲਈ ਹਰ ਕੋਈ ਉਹਨਾਂ ਨੂੰ ਪਿੱਛੇ ਕਰਨ ਵਿੱਚ ਲੱਗਿਆ ਹੈ।
ਪਿਤਾ ਦੀ ਜਿੱਤ ਤੱਕ ਵਿਆਹ ਨਾ ਕਰਵਾਉਣ ਦਾ ਫੈਸਲਾ
ਇਸ ਦੌਰਾਨ ਜਦੋਂ ਰਾਬੀਆ ਨੂੰ ਨਵਜੋਤ ਸਿੱਧੂ ਦੇ ਉਸ ਬਿਆਨ ਬਾਰੇ ਸਵਾਲ ਕੀਤਾ ਗਿਆ ਕਿ ਉਹਨਾਂ ਕੋਲ ਧੀ ਦੇ ਵਿਆਹ ਲਈ ਪੈਸੇ ਨਹੀਂ ਹਨ, ਤਾਂ ਰਾਬੀਆ ਨੇ ਕਿਹਾ, “ਮੇਰਾ ਪਿਤਾ ਭਾਵੁਕ ਹੋ ਕੇ ਇਹ ਸਭ ਬੋਲ ਗਏ ਸਨ। ਉਹ ਤਾਂ ਮੈਨੂੰ ਅੱਜ ਵੀ ਹੋਰ ਪੜ੍ਹਾਈ ਕਰਨ ਅਤੇ ਹੋਰ ਚੀਜਾਂ ਕਰਨ ਲਈ ਉਤਸ਼ਾਹਿਤ ਕਰਦੇ ਰਹਿੰਦੇ ਹਨ, ਤਾਂ ਇਹ ਕਿਵੇਂ ਹੋ ਸਕਦਾ ਹੈ ਕਿ ਉਹਨਾਂ ਕੋਲ ਮੇਰੇ ਵਿਆਹ ਲਈ ਪੈਸੇ ਨਾ ਹੋਣ।” ਹਾਲਾਂਕਿ ਇਸ ਦੌਰਾਨ ਰਾਬੀਆ ਨੇ ਇਹ ਪ੍ਰਣ ਲੈ ਲਿਆ ਕਿ ਉਹ ਉਦੋਂ ਤੱਕ ਵਿਆਹ ਨਹੀਂ ਕਰਵਾਏਗੀ, ਜਦੋਂ ਤੱਕ ਉਸਦੇ ਪਿਤਾ ਦੀ ਜਿੱਤ ਨਹੀਂ ਹੁੰਦੀ।
‘ਮਜੀਠਾ ‘ਚ ਕਰਿਆਨੇ ਦੀ ਦੁਕਾਨ ‘ਚ ਵੀ ਮਿਲਦਾ ਨਸ਼ਾ’
ਰਾਬੀਆ ਆਪਣੇ ਪਿਤਾ ਦੇ ਹੱਕ ਵਿੱਚ ਪ੍ਰਚਾਰ ਕਰ ਰਹੀ ਸੀ, ਜਾਹਿਰ ਹੈ ਉਸਦੇ ਨਿਸ਼ਾਨੇ ‘ਤੇ ਬਿਕਰਮ ਮਜੀਠੀਆ ਸੀ। ਅਕਾਲੀ ਉਮੀਦਵਾਰ ਮਜੀਠੀਆ ‘ਤੇ ਹਮਲਾ ਬੋਲਦੇ ਹੋਏ ਰਾਬੀਆ ਨੇ ਕਿਹਾ, “ਮਜੀਠਾ ਦਾ ਅੱਜ ਇਹ ਹਾਲ ਹੈ ਕਿ ਉਥੇ ਕਰਿਆਨੇ ਦੀ ਦੁਕਾਨ ‘ਚ ਵੀ ਨਸ਼ਾ ਵਿਕਦਾ ਹੈ। ਉਹ ਵੀ 20 ਰੁਪਏ ਵਿੱਚ। ਹੁਣ ਫੈਸਲਾ ਲੋਕਾਂ ਨੇ ਕਰਨਾ ਹੈ ਕਿ ਉਹਨਾਂ ਨੇ ਆਪਣੇ ਬੱਚਿਆਂ ਨੂੰ ਨਸ਼ੇ ਵੱਲ ਧਕੇਲਣਾ ਹੈ ਜਾਂ ਤਰੱਕੀ ਵੱਲ।”
