ਗੁਰਦਾਸਪੁਰ। ਕਾਂਗਰਸ ਦੇ ਤੇਜ਼-ਤਰਾਰ ਵਿਧਾਇਕ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੇ ਮੰਤਰੀ ਬਣਨ ਤੋਂ ਬਾਅਦ ਟਰਾਂਸਪੋਰਟ ਵਿਭਾਗ ਪੂਰੇ ਐਕਸ਼ਨ ਮੋਡ ਵਿੱਚ ਹਨ। ਵਿਭਾਗ ਨੇ ਹੁਣ ਗੁਰਦਾਸਪੁਰ ਵਿੱਚ ਵੱਡੀ ਕਾਰਵਾਈ ਕਰਦੇ ਹੋਏ ਨਿੱਜੀ ਕੰਪਨੀਆਂ ਦੀਆਂ 25 ਬੱਸਾਂ ਨੂੰ ਜ਼ਬਤ ਕਰ ਲਿਆ ਹੈ। ਇਲਜ਼ਾਮ ਹੈ ਕਿ ਇਹ ਸਾਰੀਆਂ ਬੱਸਾਂ ਬਿਨਾਂ ਟੈਕਸ ਚੱਲ ਰਹੀਆਂ ਸਨ। ਨਾਲ ਹੀ ਟਾਈਮਟੇਬਲ ਨੂੰ ਵੀ ਫੋਲੋ ਨਹੀਂ ਕੀਤਾ ਜਾ ਰਿਹਾ ਸੀ।
ਕਿਹਨਾਂ ਬੱਸਾਂ ‘ਤੇ ਹੋਈ ਕਾਰਵਾਈ?
ਗੁਰਦਾਸਪੁਰ ਦੇ ਰੀਜ਼ਨਲ ਟਰਾਂਸਪਰੋਟ ਅਥਾਰਟੀ ਬਲਦੇਵ ਸਿੰਘ ਰੰਧਾਵਾ ਮੁਤਾਬਕ, ਟਰਾਂਸਪੋਰਟ ਮੰਤਰੀ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੇ ਦਿਸ਼ਾ-ਨਿਰਦੇਸ਼ਾਂ ਤਹਿਤ ਨਿੱਜੀ ਕੰਪਨੀਆਂ ਦੀਆਂ ਬੱਸਾਂ ਜੋ ਬਿਨਾਂ ਟੈਕਸ, ਡਿਫਾਲਟਰ ਅਤੇ ਬਿਨਾਂ ਟਾਈਮ ਤੋੋਂ ਚੱਲ ਰਹੀਆਂ ਸਨ, ਸਬੰਧੀ ਕਾਰਵਾਈ ਕੀਤੀ ਗਈ ਹੈ। ਜਿਸ ਵਿਚ ਰਾਜਧਾਨੀ, ਡੱਬਵਾਲੀ ਤੇ ਲਿਬੜਾ ਆਦਿ ਕੰਪਨੀਆਂ ਦੀਆਂ ਬੱਸਾਂ ਸ਼ਾਮਲ ਹਨ
ਹੁਣ ਤੱਕ ਕਰੀਬ 50 ਬੱਸਾਂ ਜ਼ਬਤ
ਪਿਛਲੇ ਇੱਕ ਹਫਤੇ ਵਿੱਚ ਟਰਾਂਸਪੋਰਟ ਵਿਭਾਗ ਹੁਣ ਤੱਕ 50 ਬੱਸਾਂ ਨੂੰ ਨਿਯਮ ਤੋੜਨ ਦੇ ਇਲਜ਼ਾਮ ਹੇਠ ਜ਼ਬਤ ਕਰ ਚੁੱਕਿਆ ਹੈ, ਜਦਕਿ ਕਈਆਂ ਦੇ ਚਲਾਨ ਵੀ ਕੱਟੇ ਗਏ ਹਨ। ਜਿਹਨਾਂ ਬੱਸਾਂ ‘ਤੇ ਹੁਣ ਤੱਕ ਕਾਰਵਾਈ ਹੋਈ ਹੈ, ਉਹਨਾਂ ਵਿੱਚ ਬਾਦਲਾਂ ਦੀ ਕੰਪਨੀ ਓਰਬਿਟ ਵੀ ਸ਼ਾਮਲ ਹੈ।
ਵੜਿੰਗ ਦੇ ਨਿਸ਼ਾਨੇ ‘ਤੇ ਬੱਸ ਮਾਫੀਆ !
ਜ਼ਿਕਰਯੋਗ ਹੈ ਕਿ ਰਾਜਾ ਵੜਿੰਗ ਨੇ ਟਰਾਂਸਪੋਰਟ ਵਿਭਾਗ ਦਾ ਜ਼ਿੰਮਾ ਸੰਭਾਲਦੇ ਹੀ ਸਰਕਾਰੀ ਬੱਸਾਂ ਦੀ ਸੂਰਤ ਬਦਲਣ ਦਾ ਦਾਅਵਾ ਕੀਤਾ ਸੀ। ਨਾਲ ਹੀ ਬੱਸ ਮਾਫੀਆ ‘ਤੇ 15 ਦਿਨ ਦੀ ਕਾਰਵਾਈ ਦੀ ਗੱਲ ਵੀ ਕਹੀ ਸੀ। ਵਿਭਾਗ ਵੱਲੋਂ ਨਿੱਜੀ ਬੱਸਾਂ ‘ਤੇ ਕੀਤੀ ਜਾ ਰਹੀ ਕਾਰਵਾਈ ਇਸੇ ਦਾ ਹਿੱਸਾ ਹੈ।
