ਮੋਹਾਲੀ। ਪੰਜਾਬ ਦੇ 29 ਸਾਲ ਪੁਰਾਣੇ ਗੁਰਬਿੰਦਰ ਸਿੰਘ ਦੇ ਫੇਕ ਐਨਕਾਊਂਟਰ ਕੇਸ ਵਿੱਚ ਵੀਰਵਾਰ ਨੂੰ ਮੋਹਾਲੀ ਦੀ ਸਪੈਸ਼ਲ CBI ਕੋਰਟ ਨੇ ਫੈਸਲਾ ਸੁਣਾਇਆ। ਕੋਰਟ ਨੇ ਇਸ ਮਾਮਲੇ ਵਿੱਚ ਰਿਟਾਇਰਡ ਸਬ-ਇੰਸਪੈਕਟਰ ਅਮਰੀਕ ਸਿੰਘ ਨੂੰ 10 ਸਾਲ ਕੈਦ ਦੀ ਸਜਾ ਸੁਣਾਈ ਹੈ। ਇਸਦੇ ਨਾਲ ਹੀ ਉਸਨੂੰ 20 ਰੁਪਏ ਦਾ ਜੁਰਮਾਨਾ ਵੀ ਠੋਕਿਆ ਗਿਆ ਹੈ। ਘਟਨਾ ਸਮੇਂ ਅਮਰੀਕ ਸਿੰਘ ASI ਵਜੋਂ ਤੈਨਾਤ ਸੀ। ਬੁੱਧਵਾਰ ਨੂੰ ਹੀ ਕੋਰਟ ਨੇ ਉਸ ਨੂੰ ਦੋਸ਼ੀ ਐਲਾਨਿਆ ਸੀ।
ਇਸ ਫੇਕ ਐਨਕਾਊਂਟਰ ਦੇ ਮੁੱਖ ਮੁਲਜ਼ਮ ਰਿਟਾਇਰਡ ਇੰਸਪੈਕਟਰ ਵੱਸਣ ਸਿੰਘ ਦੀ ਮੌਤ ਹੋ ਚੁੱਕੀ ਹੈ। ਘਟਨਾ ਸਮੇਂ ਵੱਸਣ ਸਿੰਘ ਬਿਆਸ ਥਾਣੇ ਦੇ SHO ਵਜੋਂ ਤੈਨਾਤ ਸੀ।
ਕੀ ਹੈ ਪੂਰਾ ਮਾਮਲਾ?
ਇਹ ਪੂਰਾ ਮਾਮਲਾ 1992 ਦਾ ਹੈ, ਜਦੋਂ ਪੁਲਿਸ ਨੇ ਗੁਰਬਿੰਦਰ ਸਿੰਘ ਨਾਮੀ ਸਿੱਖ ਨੌਜਵਾਨ ਨੂੰ ਉਸਦੇ ਘਰੋਂ ਚੁੱਕ ਲਿਆ ਸੀ। ਇਲਜਾਮ ਹੈ ਕਿ ਪਹਿਲਾਂ ਪੁਲਿਸ ਵੱਲੋਂ 21 ਜੁਲਾਈ ਨੂੰ ਬਿਆਸ ਦੇ ਚੰਨਣ ਸਿੰਘ ਨੂੰ ਘਰੋਂ ਚੁੱਕਿਆ ਗਿਆ ਅਤੇ ਫਿਰ ਜਲੰਧਰ ਦੇ ਇੱਕ ਪੁਲਿਸ ਸਟੇਸ਼ਨ ਵਿਖੇ ਹਵਾਲਾਤ ਵਿੱਚ ਉਸਨੂੰ ਕਾਫੀ ਟਾਰਚਰ ਕੀਤਾ ਗਿਆ। ਇਸਦੇ 2 ਦਿਨ ਬਾਅਦ ਪੁਲਿਸ ਨੇ ਚੰਨਣ ਦੇ ਪੁੱਤਰ ਗੁਰਬਿੰਦਰ ਸਿੰਘ ਨੂੰ ਜਲੰਧਰ ਵਿੱਚ ਉਸਦੇ ਭਰਾ ਦੇ ਘਰੋਂ ਚੁੱਕ ਲਿਆ। ਉਸੇ ਦਿਨ ਪਿੰਡ ਵਾਸੀਆਂ ਦੇ ਦਬਾਅ ਦੇ ਚਲਦੇ ਪੁਲਿਸ ਨੇ ਚੰਨਣ ਸਿੰਘ ਨੂੰ ਤਾਂ ਛੱਡ ਦਿੱਤਾ, ਪਰ ਗੁਰਬਿੰਦਰ ਨੂੰ ਪੁਲਿਸ ਐਨਕਾਊਂਟਰ ਵਿੱਚ ਮਾਰਿਆ ਗਿਆ ਦੱਸ ਕੇ ਕੇਸ ਦੀ ਫਾਈਲ ਬੰਦ ਕਰ ਦਿੱਤੀ।
ਫੇਕ ਐਨਕਾਊਂਟਰ ਕੇਸ ਵਿੱਚ ਕਦੋਂ ਕੀ ਹੋਇਆ?
- 23 ਜੁਲਾਈ, 1992 ਨੂੰ ਪੰਜਾਬ ਪੁਲਿਸ ਨੇ ਬਿਆਸ ਦੇ ਗੁਰਬਿੰਦਰ ਸਿੰਘ ਨੂੰ ਘਰੋਂ ਚੁੱਕਿਆ।
- 24 ਜੁਲਾਈ ਨੂੰ ਗੁਰਬਿੰਦਰ ਸਿੰਘ ਨੂੰ ਐਨਕਾਊਂਟਰ ‘ਚ ਮਾਰਿਆ ਦੱਸਿਆ ਗਿਆ।
- 1997 ਵਿੱਚ ਪਰਿਵਾਰ ਦੀ ਅਪੀਲ ‘ਤੇ ਇਸ ਮਾਮਲੇ ਦੀ ਜਾਂਚ CBI ਨੂੰ ਸੌਂਪੀ ਗਈ।
- ਮੁੱਢਲੀ ਜਾਂਚ ਤੋਂ ਬਾਅਦ ਹੀ CBI ਨੇ ਇੰਸਪੈਕਟਰ ਅਮਰੀਕ ਸਿੰਘ ਅਤੇ ਸਬ-ਇੰਸਪੈਕਟਰ ਵੱਸਣ ਸਿੰਘ ਖਿਲਾਫ਼ ਕੇਸ ਦਰਜ ਕਰ ਲਿਆ।
- ਮੋਹਾਲੀ ਵਿੱਚ ਸਪੈਸ਼ਲ CBI ਜੱਜ ਹਰਿੰਦਰ ਕੌਰ ਸਿੱਧੂ ਦੀ ਅਦਾਲਤ ‘ਚ ਕੇਸ ਦੀ ਸੁਣਵਾਈ ਚੱਲੀ।
- ਸਾਲ 2002 ਵਿੱਚ ਦੋਵੇਂ ਮੁਲਜ਼ਮ ਪੁਲਿਸ ਅਫ਼ਸਰਾਂ ਦੇ ਖਿਲਾਫ਼ ਚਾਰਜਸ਼ੀਟ ਦਾਖਲ ਕੀਤੀ ਗਈ।
- ਦੋਵੇਂ ਧਿਰਾਂ ਦੀ ਸੁਣਵਾਈ ਪੂਰੀ ਹੋਣ ਤੋਂ ਬਾਅਦ ਅਦਾਲਤ ਨੇ ਬੁੱਧਵਾਰ ਨੂੰ ਦੋਵਾਂ ਨੂੰ ਦੋਸ਼ੀ ਕਰਾਰ ਦੇ ਦਿੱਤਾ।
- ਵੀਰਵਾਰ ਸਵੇਰੇ ਰਿਟਾਇਰਡ ਸਬ-ਇੰਸਪੈਕਟਰ ਅਮਰੀਕ ਸਿੰਘ ਨੂੰ ਸਜਾ ਸੁਣਾਈ ਗਈ।
