November 12, 2022
(Chandigarh)
ਕਾਨੂੰਨ-ਵਿਵਸਥਾ ਦੇ ਮੁੱਦੇ ‘ਤੇ ਘਿਰੀ ਮਾਨ ਸਰਕਾਰ ਨੇ ਹੁਣ ਪੁਲਿਸ ਪ੍ਰਸ਼ਾਸਨ ਨੇ ਵੱਡੇ ਬਦਲਾਅ ਕੀਤੇ ਹਨ। ਕਈ ਸੀਨੀਅਰ IPS ਅਫ਼ਸਰਾਂ ਸਮੇਤ ਕੁੱਲ 33 ਅਫ਼ਸਰ ਬਦਲੇ ਗਏ ਹਨ। ਇਸ ਵਿੱਚ ਕਈ ADGP, IG, ਪੁਲਿਸ ਕਮਿਸ਼ਨਰ ਅਤੇ SSP ਪੱਧਰ ਦੇ ਅਧਿਕਾਰੀ ਸ਼ਾਮਲ ਹਨ।
ਅੰਮ੍ਰਿਤਸਰ, ਲੁਧਿਆਣਾ ਤੇ ਜਲੰਧਰ ਦੇ ਕਮਿਸ਼ਨਰ ਬਦਲੇ
ਨਵੇਂ ਆਦੇਸ਼ਾਂ ਵਿੱਚ ਸਭ ਤੋਂ ਅਹਿਮ ਹੈ ਕਿ ਅੰਮ੍ਰਿਤਸਰ ਦੇ ਪੁਲਿਸ ਕਮਿਸ਼ਨਰ ਅਰੁਣ ਪਾਲ ਸਿੰਘ ਦੀ ਛੁੱਟੀ ਹੋ ਗਈ ਹੈ। ਦਰਅਸਲ, ਸ਼ਿਵਸੈਨਾ ਲੀਡਰ ਸੁਧੀਰ ਸੂਰੀ ਦੇ ਕਤਲ ਦੇ ਬਾਅਦ ਤੋਂ ਪੁਲਿਸ ਕਮਿਸ਼ਨਰ ਸਵਾਲਾਂ ਦੇ ਘੇਰੇ ਵਿੱਚ ਸਨ। ਸੂਰੀ ਦਾ ਜਿਸ ਵਕਤ ਕਤਲ ਹੋਇਆ, ਉਸ ਵਕਤ ਉਹ ਪੁਲਿਸ ਸਕਿਓਰਿਟੀ ਵਿੱਚ ਸਨ, ਪਰ ਬਾਵਜੂਦ ਇਸਦੇ ਸ਼ਰੇਆਮ ਸੂਰੀ ਦਾ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ। ਫਿਰੋਜ਼ਪੁਰ ਰੇਂਜ ਦੇ IG ਜਸਕਰਨ ਸਿੰਘ ਹੁਣ ਅੰਮ੍ਰਿਤਸਰ ਦੇ ਨਵੇਂ ਪੁਲਿਸ ਕਮਿਸ਼ਨਰ ਹੋਣਗੇ।
ਲੁਧਿਆਣਾ ਅਤੇ ਜਲੰਧਰ ਦੇ ਪੁਲਿਸ ਕਮਿਸ਼ਨਰ ਵੀ ਬਦਲੇ ਗਏ ਹਨ। ਲੁਧਿਆਣਾ ਦੇ ਕੌਸਤੁਭ ਸ਼ਰਮਾ ਅਤੇ ਜਲੰਧਰ ਤੋਂ ਗੁਰਸ਼ਰਨ ਸਿੰਘ ਸੰਧੂ ਨੂੰ ਹਟਾਇਆ ਗਿਆ ਹੈ। ਸੰਗਰੂਰ ਦੇ SSP ਮਨਦੀਪ ਸਿੰਘ ਨੂੰ ਲੁਧਿਆਣਾ ਦਾ ਨਵਾਂ ਪੁਲਿਸ ਕਮਿਸ਼ਨਰ ਲਾਇਆ ਗਿਆ ਹੈ।
STF ‘ਚ ਵੀ ਬਦਲਾਅ
ਸਪੈਸ਼ਲ DGP ਕੁਲਦੀਪ ਸਿੰਘ ਨੂੰ STF ਦਾ ਸਪੈਸ਼ਲ DGP ਲਾਇਆ ਗਿਆ ਹੈ। IPS ਹਰਪ੍ਰੀਤ ਸਿੱਧੂ ਦੇ ਕੇਂਦਰ ਵਿੱਚ ਜਾਣ ਤੋਂ ਬਾਅਦ ਇਹ ਅਹੁਦਾ ਖਾਲੀ ਪਿਆ ਸੀ। ਆਰ.ਕੇ. ਜੈਸਵਾਲ ਨੂੰ STF ਦਾ IG ਲਗਾਇਆ ਗਿਆ ਹੈ, ਜਦਕਿ STF ਦੇ IG ਗੁਰਿੰਦਰ ਸਿੰਘ ਢਿੱਲੋਂ ਨੂੰ IG ਲਾਅ ਐਂਡ ਆਰਡਰ ਲਗਾਇਆ ਗਿਆ ਹੈ।
ਬੀ. ਚੰਦਰਸ਼ੇਖਰ ਰਾਓ ਨੂੰ ਡਾਇਰੈਕਟਰ ਬਿਓਰੋ ਆਫ ਇਨਵੈਸਟੀਗੇਸ਼ਨ ਦੇ ਅਹੁਦੇ ਤੋਂ ਹਟਾ ਕੇ ਜੇਲ੍ਹ ਵਿਭਾਗ ਦਾ ADGP ਲਗਾਇਆ ਗਿਆ ਹੈ। ਇਹ ਅਹੁਦਾ ਵੀ ਪਹਿਲਾਂ ਹਰਪ੍ਰੀਤ ਸਿੱਧੂ ਦੇ ਕੋਲ ਸੀ। ADGP ਕਰਾਈਮ ਐੱਲ.ਕੇ. ਯਾਦਵ ਨੂੰ ਡਾਇਰੈਕਟਰ ਬਿਓਰੋ ਆਫ ਇਨਵੈਸਟੀਗੇਸ਼ਨ ਲਾਇਆ ਗਿਆ ਹੈ। ਲੁਧਿਆਣਾ ਰੇਂਜ ਦੇ IG ਐੱਸ.ਪੀ.ਐੱਸ. ਪਰਮਾਰ ਨੂੰ ਐੱਮ.ਐੱਮ. ਛੀਨਾ ਦੀ ਥਾਂ ਬਠਿੰਡਾ ਰੇਂਜ ਦਾ ਜ਼ਿੰਮਾ ਦਿੱਤਾ ਗਿਆ ਹੈ।
8 ਜ਼ਿਲ੍ਹਿਆਂ ਦੇ SSP ਵੀ ਬਦਲੇ ਗਏ
ਫੇਰਬਦਲ ਤੋਂ ਬਾਅਦ ਵਿਵੇਕਸ਼ੀਲ ਸੋਨੀ ਰੋਪੜ ਦੇ ਨਵੇਂ SSP ਹੋਣਗੇ। ਉਹ ਫਿਲਹਾਲ ਮੋਹਾਲੀ ਦਾ ਜ਼ਿੰਮਾ ਵੇਖ ਰਹੇ ਸਨ। ਮੋਹਾਲੀ ‘ਚ ਉਹਨਾਂ ਦੀ ਥਾਂ ਸੰਦੀਪ ਗਰਗ ਨੂੰ ਭੇਜਿਆ ਗਿਆ ਹੈ, ਜੋ ਰੋਪੜ ਵਿੱਚ ਤੈਨਾਤ ਸਨ। SSP ਫਿਰੋਜ਼ਪੁਰ ਸੁਰਿੰਦਰ ਲਾਂਬਾ ਨੂੰ ਹੁਣ ਸੰਗਰੂਰ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ, ਜਦਕਿ ਕੰਵਰਦੀਪ ਕੌਰ ਨੂੰ ਫਿਰੋਜ਼ਪੁਰ ਭੇਜ ਗਿਆ ਹੈ। ਉਪਿੰਦਰਜੀਤ ਸਿੰਘ ਘੁੰਮਣ ਨੂੰ SSP ਮੁਕਤਸਰ ਲਾਇਆ ਗਿਆ ਹੈ। ਵਰੁਣ ਸ਼ਰਮਾ ਨੂੰ SSP ਪਟਿਆਲਾ ਲਾਇਆ ਗਿਆ ਹੈ ਅਤੇ ਗੁਰਮੀਤ ਸਿੰਘ ਚੌਹਾਨ ਨੂੰ SSP ਤਰਨਤਾਰਨ ਵਜੋਂ ਤੈਨਾਤ ਕੀਤਾ ਗਿਆ ਹੈ।
ਮਾਨਸਾ ਦੇ SSP ਨੂੰ ਵੀ ਹਟਾਇਆ ਗਿਆ
ਮਾਨਸਾ ਦੇ SSP ਗੌਰਵ ਤੂਰਾ ਵੀ ਤਬਾਦਲਾ ਹੋ ਗਿਆ ਹੈ। ਗੌਰਵ ਤੂਰਾ ਮੂਸੇਵਾਲਾ ਕਤਲ ਕਾਂਡ ਦੇ ਮੁਲਜ਼ਮ ਦੀਪਕ ਟੀਨੂੰ ਦੇ ਫ਼ਰਾਰ ਹੋਣ ਦੇ ਬਾਅਦ ਤੋਂ ਸਵਾਲਾਂ ਵਿੱਚ ਸਨ। ਨਾਨਕ ਸਿੰਘ ਨੂੰ ਗੌਰਵ ਤੂਰਾ ਦੀ ਥਾਂ ਮਾਨਸਾ ਦਾ SSP ਲਾਇਆ ਗਿਆ ਹੈ।
