ਬਿਓਰੋ। ਪੰਜਾਬ ਕਾਂਗਰਸ ਵਿੱਚ ਛਿੜੇ ਘਮਸਾਣ ਵਿਚਾਲੇ ਕਾਂਗਰਸ ਦੇ ਸੂਬਾ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਇੱਕ ਵਾਰ ਫਿਰ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਹਮਲਾ ਬੋਲਿਆ ਹੈ। ਸਿੱਧੂ ਨੇ ਬਿਜਲੀ ਦੇ ਮੁੱਦੇ ‘ਤੇ ਆਪਣੀ ਹੀ ਸਰਕਾਰ ਨੂੰ ਮੁੜ ਕਟਹਿਰੇ ਵਿੱਚ ਖੜ੍ਹਾ ਕੀਤਾ ਹੈ। ਸਿੱਧੂ ਨੇ ਟਵਿਟਰ ‘ਤੇ ਕੈਪਟਨ ਦੇ 2017 ਤੋਂ ਪਹਿਲਾਂ ਦੇ ਉਹ ਬਿਆਨ ਸ਼ੇਅਰ ਕੀਤੇ ਹਨ, ਜਿਸ ਵਿੱਚ ਕੈਪਟਨ ਪੰਜਾਬ ਨੂੰ ਸਸਤੀ ਬਿਜਲੀ ਦੇਣ ਦੀ ਗੱਲ ਕਹਿ ਰਹੇ ਹਨ।
ਇਸ ਵੀਡੀਓ ਨੂੰ ਸ਼ੇਅਰ ਕਰਦਿਆਂ ਸਿੱਧੂ ਨੇ ਟਵਿਟਰ ‘ਤੇ ਲਿਖਿਆ, “ਕਾਂਗਰਸ ਪਾਰਟੀ ਬਿਜਲੀ ਖਰੀਦ ਸਮਝੌਤੇ ਰੱਦ ਕਰਕੇ ਘਰੇਲੂ ਬਿਜਲੀ 3 ਰੁਪਏ ਪ੍ਰਤੀ ਯੂਨਿਟ ਅਤੇ ਉਦਯੋਗਿਕ ਬਿਜਲੀ 5 ਰੁਪਏ ਪ੍ਰਤੀ ਯੂਨਿਟ ਦੇਣ ਦੇ ਆਪਣੇ ਸੰਕਲਪ ਉੱਪਰ ਖੜ੍ਹੀ ਹੈ, ਨਾਲ ਹੀ ਕਿਸਾਨਾਂ ਅਤੇ ਅਨੁਸੂਚਿਤ ਜਾਤੀ, ਪੱਛੜੀਆਂ ਸ਼੍ਰੇਣਿਆਂ, ਬੀ.ਪੀ.ਐਲ. ਪਰਿਵਾਰਾਂ ਨੂੰ ਪਹਿਲਾਂ ਹੀ 10,000 ਕਰੋੜ ਤੋਂ ਵੱਧ ਦੀ ਬਿਜਲੀ ਸਬਸਿਡੀ ਦੇ ਰਹੀ ਹੈ … ਇਹ ਵਾਅਦਾ ਵੀ ਲਾਜ਼ਮੀ ਪੂਰਾ ਹੋਣਾ ਚਾਹੀਦਾ ਹੈ !!”
Congress Party stands by its resolve to give Domestic Power at 3 Rs per unit and Industrial Power at 5 Rs per unit through annulment of PPAs, along with the already provided Subsidy for over 10,000 Crores to Farmers and SC, BC, BPL families… This promise too must be fulfilled !! pic.twitter.com/kg5c7A0Lcu
— Navjot Singh Sidhu (@sherryontopp) August 26, 2021
ਦਰਅਸਲ, ਸਸਤੀ ਬਿਜਲੀ ਦਾ ਮੁੱਦਾ ਉਨ੍ਹਾਂ 18 ਨੁਕਾਤੀ ਏਜੰਡੇ ਵਿੱਚ ਵੀ ਸ਼ਾਮਿਲ ਹੈ, ਜਿਸ ‘ਤੇ ਕਾਂਗਰਸ ਹਾਈਕਮਾਂਡ ਨੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਪਹਿਲ ਦੇ ਅਧਾਰ ‘ਤੇ ਕੰਮ ਕਰਨ ਨੂੰ ਕਿਹਾ ਸੀ। ਪਰ ਹੁਣ ਸਿੱਧੂ ਦਾ ਟਵੀਟ ਅਜਿਹੇ ਵਕਤ ‘ਤੇ ਆਇਆ ਹੈ, ਜਦੋਂ ਕੈਪਟਨ ਦੇ ਖਿਲਾਫ ਸਿੱਧੂ ਧੜਾ ਖੁੱਲ੍ਹੇ ਤੌਰ ‘ਤੇ ਬਗਾਵਤ ਦਾ ਬਿਗਲ ਫੂਕ ਚੁੱਕਿਆ ਹੈ। ਹਾਲਾਂਕਿ ਬਗਾਵਤ ਦੇ ਇਸ ਖੇਲ ਵਿੱਚ ਸਿੱਧੂ ਧੜੇ ਨੂੰ ਹਾਈਕਮਾਂਡ ਤੋਂ ਨਿਰਾਸ਼ਾ ਹੀ ਮਿਲੀ ਹੈ।
ਹਰੀਸ਼ ਰਾਵਤ ਸਾਫ ਕਹਿ ਚੁੱਕੇ ਹਨ ਕਿ ਸੀਐੱਮ ਬਣਨ ਦਾ ਸਵਾਲ ਹੀ ਨਹੀਂ ਉਠਦਾ ਅਤੇ 2022 ਵਿੱਚ ਕੈਪਟਨ ਦੇ ਚਿਹਰੇ ‘ਤੇ ਹੀ ਕਾਂਗਰਸ ਪਾਰਟੀ ਚੋਣ ਲੜੇਗੀ ਯਾਨੀ ਹਾਈਕਮਾਂਡ ਤੋੋਂ ਮਿਲੇ ਝਟਕੇ ਤੋਂ ਬਾਅਦ ਸ਼ਾਇਦ ਸਿੱਧੂ ਧੜਾ ਹੁਣ ਸੀਐੱਮ ਬਦਲਣ ਦਾ ਏਜੰਡਾ ਛੱਡ ਕੇ ਮੁੜ ਅਧੂਰੇ ਚੋਣ ਵਾਅਦਿਆਂ ‘ਤੇ ਹੀ ਮੁੱਖ ਮੰਤਰੀ ਨੂੰ ਘੇਰਨ ਦੀ ਤਿਆਰੀ ਵਿੱਚ ਹੈ।
