ਬਿਓਰੋ। ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਨੂੰ ਮਹਿਜ਼ 6 ਮਹੀਨਿਆਂ ਦਾ ਸਮਾਂ ਬਾਕੀ ਹੈ। ਲਿਹਾਜਾ ਸਿਆਸਤ ਵਿੱਚ ਉਬਾਲ ਹੈ। ਇਧਰ ਸੱਤਾ ਧਿਰ ਕਾਂਗਰਸ ਆਪਣੇ ਝਗੜੇ ਵਿੱਚ ਉਲਝੀ ਹੈ, ਤਾਂ ਓਧਰ ਵਿਰੋਧੀ ਪਾਰਟੀਆਂ ਸੱਤਾ ਪਰਿਵਰਤਨ ਦੀ ਚਾਹਤ ਵਿੱਚ ਅੱਡੀ-ਚੋਟੀ ਦਾ ਜੋਰ ਲਗਾ ਰਹੀਆਂ ਹਨ। ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਬਾਦਲ 100 ਦਿਨਾਂ ਦੀ ਯਾਤਰਾ ‘ਤੇ ਪੰਜਾਬ ਦੌਰੇ ‘ਤੇ ਹਨ। ਓਧਰ ਆਮ ਆਦਮੀ ਪਾਰਟੀ ਵੀ ਲਗਾਤਾਰ ਵੱਡੇ ਧਮਾਕੇ ਕਰ ਰਹੀ ਹੈ, ਪਰ ਸੀਐੱਮ ਫੇਸ ਨੂੰ ਲੈ ਕੇ ‘ਆਪ’ ‘ਚ ਪੇਚ ਫਸਿਆ ਹੈ।
ਦੁਬਈ ਤੋਂ ਆਵੇਗਾ ‘ਆਪ’ ਦਾ ਸੀਐੱਮ ਉਮੀਦਵਾਰ?
ਆਮ ਆਦਮੀ ਪਾਰਟੀ ਦੇ ਸੀਐੱਮ ਉਮੀਦਵਾਰਾਂ ਦੀ ਰੇਸ ਵਿੱਚ ਹੁਣ ਇੱਕ ਨਵਾਂ ਨਾਂਅ ਜੁੜਿਆ ਹੈ। ਇਸ ਵਾਰ ਦੁਬਈ ਦੇ ਬਿਜ਼ਨਸਮੈਨ ਅਤੇ ਮਸ਼ਹੂਰ ਸਮਾਜਸੇਵੀ ਐੱਸ.ਪੀ.ਐੱਸ. ਓਬਰਾਏ ਦਾ ਨਾਂਅ ਚਰਚਾ ਵਿੱਚ ਹੈ। ਅੰਗ੍ਰੇਜੀ ਅਖਬਾਰ ‘ਦ ਟ੍ਰਿਬਿਊਨ’ ‘ਚ ਛਪੀ ਖ਼ਬਰ ਮੁਤਾਬਕ, ‘ਆਪ’ ਦੇ ਕਈ ਵੱਡੇ ਆਗੂਆਂ ਨੇ ਓਬਰਾਏ ਨਾਲ ਸੰਪਰਕ ਕਰਕੇ ਉਹਨਾਂ ਨੂੰ ‘ਆਪ’ ਦੇ ਨਾਲ ਆਉਣ ਦਾ ਆਫਰ ਦਿੱਤਾ ਹੈ। ਜਾਣਕਾਰੀ ਮੁਤਾਬਕ, ਪਿਛਲੇ ਹਫਤੇ ਪੰਜਾਬ ਦੌਰੇ ‘ਤੇ ਆਏ ਓਬਰਾਏ ਨਾਲ ਕੁਝ ਆਗੂਆਂ ਨੇ ਗੱਲਬਾਤ ਵੀ ਕੀਤੀ ਹੈ।
ਹਾਲਾਂਕਿ ਆਮ ਆਦਮੀ ਪਾਰਟੀ ਨੂੰ ਇਸ ਕੋਸ਼ਿਸ਼ ਵਿੱਚ ਕਾਮਯਾਬੀ ਮਿਲਦੀ ਨਜ਼ਰ ਨਹੀਂ ਆ ਰਹੀ। ਸੂਤਰਾਂ ਮੁਤਾਬਕ, ਓਬਰਾਏ ਨੇ ‘ਆਪ’ ਆਗੂਆਂ ਨੂੰ ਸਾਫ ਕਹਿ ਦਿੱਤਾ ਕਿ ਉਹਨਾਂ ਦਾ ਸਿਆਸਤ ਵਿੱਚ ਆਉਣ ਦਾ ਕੋਈ ਇਰਾਦਾ ਨਹੀਂ ਹੈ। ਓਬਰਾਏ ਨੇ ਕਿਹਾ ਕਿ ਉਹ ਸਮਾਜ ਭਲਾਈ ਦੇ ਕੰਮਾਂ ਜ਼ਰੀਏ ਹੀ ਪੰਜਾਬ ਦੀ ਭਲਾਈ ਕਰਨਾ ਚਾਹੁੰਦੇ ਹਨ। ਦਰਅਸਲ, ਐੱਸ.ਪੀ.ਐੱਸ. ਓਬਰਾਏ ਵਿਦੇਸ਼ਾਂ ਖਾਸਕਰ ਦੁਬਈ ਵਿੱਚ ਰਹਿਣ ਵਾਲੇ ਪੰਜਾਬੀਆਂ ਦੀ ਮਦਦ ਕਰਨ ਲਈ ਜਾਣੇ ਜਾਂਦੇ ਹਨ। ਕੋਰੋਨਾ ਕਾਲ ਵਿੱਚ ਉਹਨਾਂ ਨੇ ਸਿਹਤ ਦੇ ਖੇਤਰ ਵਿੱਚ ਪੰਜਾਬ ਸਰਕਾਰ ਦੀ ਵੀ ਮਦਦ ਕੀਤੀ ਸੀ।
ਪਹਿਲਾਂ ਬਲਬੀਰ ਰਾਜੇਵਾਲ ਦਾ ਨਾਂਅ ਵੀ ਆਇਆ ਸੀ ਸਾਹਮਣੇ
ਆਮ ਆਦਮੀ ਪਾਰਟੀ ਦੇ ਸੀਐੱਮ ਉਮੀਦਵਾਰਾਂ ਦੀ ਫੇਹਰਿਸਤ ‘ਚ ਕਿਸਾਨ ਆਗੂ ਬਲਬੀਰ ਰਾਜੇਵਾਲ ਦਾ ਵੀ ਨਾਂਅ ਸਾਹਮਣੇ ਆ ਚੁੱਕਿਆ ਹੈ। ਦੱਸਿਆ ਜਾਂਦਾ ਹੈ ਕਿ ਖੁਦ ਕੇਜਰੀਵਾਲ ਨੇ ਰਾਜੇਵਾਲ ਨੂੰ ਸੀਐੱਮ ਉਮੀਦਵਾਰ ਬਣਾਉਣ ਦੀ ਪੇਸ਼ਕਸ਼ ਦਿੱਤੀ ਸੀ, ਪਰ ਰਾਜੇਵਾਲ ਨੇ ਇਸ ਤੋਂ ਸਾਫ ਇਨਕਾਰ ਕਰ ਦਿੱਤਾ ਸੀ।
ਭਗਵੰਤ ਮਾਨ ਤੋਂ ਕਿਨਾਰਾ ਕਰ ਰਹੇ ਕੇਜਰੀਵਾਲ?
ਪੰਜਾਬ ਵਿੱਚ ਪਿਛਲੇ ਲੰਮੇ ਸਮੇਂ ਤੋਂ ਭਗਵੰਤ ਮਾਨ ਆਮ ਆਦਮੀ ਪਾਰਟੀ ਦੇ ਸੂਬਾ ਪ੍ਰਧਾਨ ਹਨ। ਹਾਲੇ ਤੱਕ ਚਰਚਾ ਸੀ ਕਿ ‘ਆਪ’ ਇਸ ਵਾਰ ਮਾਨ ‘ਤੇ ਹੀ ਦਾਅ ਖੇਡੇਗੀ। ਪਰ ਸੂਤਰਾਂ ਦੀ ਮੰਨੀਏ, ਤਾਂ ਕੇਜਰੀਵਾਲ ਹੁਣ ਭਗਵੰਤ ਮਾਨ ਨੂੰ ਸੀਐੱਮ ਕੈਂਡੀਡੇਟ ਬਣਾਉਣ ਲਈ ਤਿਆਰ ਨਹੀਂ ਹਨ। ਸ਼ਾਇਦ ਖੁਦ ਮਾਨ ਨੂੰ ਵੀ ਇਹ ਸੰਦੇਸ਼ ਦੇ ਦਿੱਤਾ ਗਿਆ ਹੈ। ਇਹੀ ਕਾਰਨ ਹੈ ਕਿ ਭਗਵੰਤ ਮਾਨ ਇਹਨੀਂ ਦਿਨੀਂ ਪਾਰਟੀ ਤੋਂ ਨਰਾਜ਼ ਦੱਸੇ ਜਾ ਰਹੇ ਹਨ ਅਤੇ ਉਹ ਜਿਆਦਾ ਸਰਗਰਮ ਵੀ ਨਜ਼ਰ ਨਹੀਂ ਆ ਰਹੇ। ਸੋਸ਼ਲ ਮੀਡੀਆ ‘ਤੇ ਮਾਨ ਦੇ ਸਮਰਥਨ ਵਿੱਚ ਉਹਨਾਂ ਦੇ ਸਮਰਥਕ ਕੈਂਪੇਨ ਵੀ ਚਲਾ ਰਹੇ ਹਨ।
...ਤਾਂ ਫਿਰ ਕੌਣ ਹੋਵੇਗਾ ਪੰਜਾਬ ‘ਚ ‘ਆਪ’ ਦਾ ‘ਕੈਪਟਨ’ ?
ਅਰਵਿੰਦ ਕੇਜਰੀਵਾਲ ਨੇ ਕਰੀਬ 2 ਮਹੀਨੇ ਪਹਿਲਾਂ ਅੰਮ੍ਰਿਤਸਰ ਵਿੱਚ ਕਿਹਾ ਸੀ ਕਿ ਇਸ ਵਾਰ ਆਮ ਆਦਮੀ ਪਾਰਟੀ ਸੀਐੱਮ ਫੇਸ ਦੇ ਨਾਲ ਹੀ ਚੋਣ ਮੈਦਾਨ ਵਿਰਚ ਉਤਰੇਗੀ। ਉਹਨਾਂ ਇਹ ਵੀ ਦਾਅਵਾ ਕੀਤਾ ਸੀ ਕਿ ਪਾਰਟੀ ਕਿਸੇ ਸਿੱਖ ਉਮੀਦਵਾਰ ਨੂੰ ਵੀ ਸੀਐੱਮ ਉਮੀਦਵਾਰ ਬਣਾਏਗੀ। ਪਰ ਭਗਵੰਤ ਮਾਨ ਨੂੰ ਛੱਡ ਦਿੱਤਾ ਜਾਵੇ, ਤਾਂ ਫਿਲਹਾਲ ਪਾਰਟੀ ਵਿੱਚ ਕੋਈ ਸਿੱਖ ਚਿਹਰਾ ਨਜ਼ਰ ਨਹੀਂ ਆਉਂਦਾ, ਜੋ 2022 ਵਿੱਚ ‘ਆਪ’ ਦਾ ‘ਝਾੜੂ’ ਚਲਾ ਸਕੇ।
